TALA O LE LALOLAGI

Pago Pago - AMERIKA SAMOA

MAUA TOTOGI TOTINO KOMITI KOVITI-19 MA I LATOU NA LAGOLAGOINA

Mo I se pepa o fa’amatalaga mai le Koviti-19 ua fa’ailoa ai o le a maua totogi mo le tautua a totino o le Komiti ma i latou sa lagolago sua i lenei galuega i le tausaga atoa. 

Fa’ailoa e le sui Kovana Talauega Eleasalo Ale, o ia fo’i o le ta’ita’ifono o le Komiti Fa’afoe o le Covid-19 i le atunuu, ua ia fa’ailoa atu ai se taui fa’aletausaga ua tapena mo i latou uma lava, ua na’o se taui o galuega lelei, e fa’atasi lava fo’i ona maua, mo le tausaga atoa ua tuana’i, o galuega lelei uma sa faia e aunoa ma se taui.

“I tausaga a lua ua tuana’i, o ta’ita’i uma lava o matagaluega ta’itasi ma Ofisa o le Malo ae maise nisi o le aufaigaluega sa toe fa’ae’e atu ia i latou nisi tiute fa’atino ina ia fa’amautu lelei, ua ausia le sini ma le fa’amoemoe, ia le po’ia le atunuu e le Covid-19. O isi o nei tiute fa’aopoopo e ao ina fa’atino i luga o le Uafu, poo le malaeva’alele fo’i i taimi o malaga mai a va’alele ua toe fa’afo’ia mai ai o tatou tagata mai fafo, taimi e fa’amalosia ai ona va’aia toto’a pasese ma auva’a o va’a la’u oloa, taimi o tuiga o tui puipuia o le Covid-19 i soo se nofoaga e faia ai, ma taimi fo’i e mo’omia ai le latou auai i nofoaga o lo’o fa’anofoesea ai le mamalu fa’ato’ai mai i le atunuu o tatou tagata.”

“O le totogi lenei ua na’o sina mea ititi pe afai o le a fua i le taimi ma itula e fa’ataunuu ai o outou na faiva. O se auaunaga sa faia lava e aunoa ma se toe taui atu. O lenei la foa’i mo outou o se toe fa’afetaia lea o la outou tautua sa fa’atino mo le tausaga atoa. Ua fa’aauau pea lava ona mana’omia outou mo nei faiva aua ua lu’ia fo’i i tatou i le tatou gaua’i lea ina ia matua atoatoa ona malu puipuia le atunuu i tui puipuia o le Covid-19 e pei ona fa’atautaia nei lava.”

“O le totogi lenei ua na’o sui totino ma nisi o le aufaigaluega fesoasoani malosi sa iloga ona tula’i mai ma faia latou tiute mo le komiti e oo mai i le fa’aiuga o lenei tausaga,” o  manatu lea o Talauega. 

Ua le na’o Amerika Samoa fo’i ua latou faia lenei ituaiga o taui mo latou komiti fa’afoe o le Covid-19, ua faia uma lava i setete ma teritori.

O le to’atele o e o agava’a e aofia ai lava le aufaigaluega o lo’o ta’imua mai i le fa’atinoga o tuiga, ae maise o e faia tiute e feso’ota’i lelei ma le puipuiga o le saogalemu ma togafitiga o e ua a’afia i le fa’ama’i Covid-19.

Ua iloga le to’agaogao o le aufaigaluega e fa’atinoa le tele o sifi e ao ina faia a’o fa’atino puipuiga ma tuiga o le Covid-19, ua le va’aia fo’i se fa’alogologo tiga i le aufaigaluega, e tusa lava poo le a le tigaina ma u’umi o itula e faigaluega pea lava. O se taui fa’atauva’a lava lenei totogi ua taua’aoina atu mo faiva sa fai mai le tausaga atoa.

E le’i fa’ailoa i pepa o fa’amatalaga le aofai i le totogi. 

Ua i ai se fa’anaunauta’iga, o le tausaga fou a aulia nei o le a taumafai ai ona toe fa’atautaia feoaiga e pei ona masani ai, e fa’aaogaina ai lava le tatou TalofaPass, ma o le a taumafai fo’i e mulimulita’i i le fa’atautaiga o lo’o ua alu ai i tatou ma Samoa Tuto’atasi.

O le taimi nei ua toe fo’i a femalaga’iga i le tulaga masani, ua limiti mai malaga, ae ua le toe motusia, ua mafai ona ulufale mai nisi o lo’o mo’omia le latou tomai fa’apitoa e faigaluega i le tatou atunuu, ina ia mafai ona fa’aauau galuega moomia o tautua lautele ma le fausaga o mea e tele i le tatou malo nei. 

Ua malaga atu fo’i nisi e fia talosagaina o latou visa malaga i le malo tele, i Samoa ma toe taliu manuia mai. I le taimi nei ua mae’a fa’atulaga fo’i nisi o le aufaigaluega a le Star Kist Samoa e fia malaga mai Samoa ina ia mautinoa o lo’o lava tagata faigaluega mo sifi e lua e amata ai le tausaga fou a le Kamupani I’a. 

O le ulua’i malaga mai o nei tagata faigaluega fa’aopoopo a le Star Kist o Tesema 23, ma Tesema 29, 2021.

FA’AMANUIAINA ASPA VAEGA TUPE MO LOLI SALU & MIMITI PEFU I ALATELE

Ua toina nei i le ASPA poo le pulega o le Suavai Taumafa, Suavai Lafoa’i, Eletise ma le Aoina o le Laipisi i le atunuu, i le vaega tupe e $126,000. ina ia mafai ona fa’atauina ai se isi latou Loli tele e salu ma mimitia le pefu mai luga o alatele i le atunuu. O le vaega tupe e fa’auia mai e le ASEPA ae ua toina mai le USEPA mo le fa’amoemoe e fa’atautaia aiga galuega e fa’amama atili ai le atunuu mai so’o se a’afiaga o le Kiso i le atunuu.

Ona o le Kiso e tu’ufa’atasia le suau’u ma le kesi ina ia fa’aaogaina ai e le enesini o ta’avale poo le a lava, e amsani ona va’aia le asu uliuli mai afi tetele e fa’aaogaina ai le Kiso e fa’aolaola ai. O lea Loli o le a mafai ona miti’ia ai nei pefu e le masani ona va’aia e mata, ae ua to’a i le alatele ma le ea fo’i i nisi taimi, e afua mai le tauasuasu uliuli lea.

O le fa’atupega lea mo le tatou teritori ua toina mai le $14miliona o lo ua fa’aagaaga mo le fa’atautaia ai o poloketi laiti nei e aoga tele mo le fa’aititia ma le toe fa’amamaina a’ia’i o tauasuasu oona toe fa’aleagaina ai le si’omaga mama e afua mai afi kiso ua tuai ae o lo’o fa’aaogaina pea lava i ta’avale, afi moli ma isi enesini kiso i le atunuu.

Ua fa’ailoa e le ASPA o le a latou fa’aaogaina tatau lenei vaega tupe e toe fa’atau ai se isi Loli fou o le ituaiga salu ma mimiti pefu, aua o le laotu loli tuai lava o i ai sa faatauina mai muamua o le itulaga na fausia i le tausaga 2002 ae o lenei ua to’ai mai i le 2021.

Ua fa’atulaga la le tinoitupe e fa’aaluina lea mo le Loli lea e $40,731.

O le a maua ai le isi vaega tupe totoe e fa’aleleia ma fa’amae’a ai nisi fo’i o galuega e agaga uma lava i le taumafaiga ia fa’amama atili le teritori mai lapisi o lo ua fa’aleagaina ai le ea mama mai le fa’aaogaina pea o afi kiso i le atunuu.

Ua aofia i ituaiga poloketi e fa’atautaia i lea vaega tupe e tatau ona aofia ai galuega fa’atino e aga atu ina ia faaleleia le a’afiaga o le ea mama mai le fa’aaogaina pea o afi kiso i le atunuu ma fa’aititia ai le toe fa’auia pea o le tauasuasu mai afi kiso i le ea e manavaina e tagata lautele.