TALA O LE LALOLAGI

Pago Pago - AMERIKA SAMOA

AMATALIA GALUEGA PUIPUIMALU A LEOLEO IA TESEMA 16, 2021 - POLOKA I LE PO ATOA

Ua fa’ailoa mai e le Matagaluega o le Puipuiga Lautele o le atunuu, ua amatalia fo’i a latou puipuigamalu o le mamalu lautele fegasoloa’i i alatele uma o le Malo e afua mai ia Tesema 16, 2021. O le a fa’amaumauina fo’i le tele o ni fa’alavelave fa’afuase’i e fa’amauina i lenei tausaga ma e amata poloka a leoleo i le afiafi i le itula e 6:00 ma e fa’ato’a tatala lava nei poloka i le itula e 6:00 i le taeao.

Ua fa’ailoa e le Sui Komesina o Leoleo Foifua Foifua o le a fa’aauau pea lava ona fa’atutuina lea poloka i lumafale o le CBT i Nuuuli, e pei lava ona faia ai i le tele o tausaga ua te’a. O lenei auaunaga a le Matagaluega o le Puipuiga o le Saogalemu Lautele e faia lava se’ia oo ia Ianuari 03, 2022.

I le taimi nei ua le toe fa’atagaina ona livi se tasi o ali’i malu o le Malo i tamaitai uma ma ali’i, ma e lua vaiaso o le a fa’amauina ai lea taofiga, ina ia mautinoa ua fa’aaogaina uma i latou mo le fa’amoemoe ua fa’amalosia nei, ia puipuia a’ia’i le mamalu lautele.

O le a va’aia toto’a le tulaga o ave ta’avale ua fa’afoea ta’avale ma le fa’asua’ava, i latou e ave ta’avale ae leai se laisene e faataga ai ona ia faia lea tiute, laisene o ta’avale ua le toe aoga pe e le’i laiseneina le ta’avale mo feoa’iga i alatele, i latou o feoa’i ae le faia fusipa’u o latou nofoa, le fanau o fe’avea’i e leai ni nofoa e fa’anonofo ai, ma isi lava soligatulafono uma tau feoa’iga tau ta’avale.

TOE FA’AAUAU TUI PUIPUIA KOVITI-19 FANAU LIMA I LE 11 TAUSAGA

Ua fa’amonia mai e le Matagaluega o le Soifua Maloloina e le faia lea o tui puipuia o le Koviti-19 mo fanau mai le lima tausaga i le 11 tausaga ona ua maua sapalai o tui i le fa’aiuga o le vaiaso ua te’a.

Sa taofia lea fa’amoemole i le vaiaso ua te’a ona ua tuai ona taunuu le sapalai ae ua toatele foi fanau sa o’o atu ma matua e faia tui puipuia. 

O lenei vaiaso ua ma’ea fa’atulaga e le Soifua Maloloina nofoaga mo tui puipuia o le Koviti-19 e o’o atu i le aso 23 o Tesema i le aso Tofi, ae tapunia i le aso 24 o Tesema le aso Faraile, ona o le aso malolo o le malo mo le Kerisimasi.