E ono falepuipui Chanel Lafua i le 52 tausaga pe a ta’usala o ia Faamasinoga

PAGO PAGO - AMERIKA SAMOA

Afai ae faamaonia uma e le Fa’amasinoga Maualuga moliga e 15 ua tu’uaia ai e le malo le ave ta’avale o le ta’avale lea na lavea i luma o le StarKist Samoa i le vaveao o le aso Toona’i ma maliliu ai ni alii se to’afa, e ono faasala o ia i le Toese i Tafuna mo le umi e 52 tausaga.

O le aso Gafua o le vaiaso nei na tula’i ai le susuga a Chanel Lafua i luma o le Fa’amasinoga Faaitumalo mo le ulua’i taimi. 

E 15 moliga ua faila e le malo faasaga ia Lafua. O ia moliga e aofia ai moliga mamafa e 4 o le ave ta’avale ua oo ai le maliu i se tagata, atoa ai ma moliga e 4 o le ave ta’avale ‘ona ua oo ai le maliu i se isi tagata, o solitulafono mamafa uma o le vaega D, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e le silia i le $5,000, poo le faasala foi i faasalaga uma ia e 2; atoa ai ma le moliga e tasi o le taofia faamalosi o se tagata, o le vaega C lea o solitulafono mamafa, lea e faasala ai se tasi i le Toese mo le umi e oo atui le 7 tausaga poo le faasala i le salatupe e oo atu i le $5,000, pe faasala foi i faasalaga uma ia e 2; faatasi ai ma moliga mama e 2 o le faaoolima i le tulaga tolu, ma moliga mama e 2 o le ave ta’avale faatautala ua oo ai manu’a i le isi tagata, o le vaega A lea o solitulafono mama, lea e faasala ai se tasi i le Toese mai le umi e oo atu i le tausaga atoa, poo le faasala foi i faasalaga uma ia e 2.

O le taeao ananafi lea na toe tula’i ai Lafua i luma o le afioga i le Tamaitai Faamasino ia Gwen Tauiliili-Langkilde mo le faatulagaina o le aso e faataunuu’u aloaia ai lana ulua’i iloiloga. O le taimi nei, o lo o taofia pea Lafua i le Toese i Tafuna ina ua le mafai ona ia totogi le tupe e $75,000 na faatulaga e tatala ai o ia i tua.

TAGI A LE MALO

E pei ona taua e le malo i le latou tagi e faapea, o le po o le aso Faraile, Tesema 17 ina ua latalata i le itula e 12 i le leva o le po na maua ai e le Ofisa o Leoleo i Fagatogo se telefoni mai se tamaitai i Faganeanea, o lo o ia mana’omia se fesoasoani a Leoleo e tusa ai o se faalavelave na tula’i mai i totonu o se ta’avale na malaga mai ai, lea na i’u ina oso ai loa i fafo ma le ta’avale ona o le tulaga faaletonu o lona saogalemu ina ua faaoolima le ave ta’avale i lana uo tamaitai.

O le ave ta’avale, o le susuga lea a Chanel Lafua, le alii ua molia i lenei mataupu, sa malaga mai i lana uo tamaitai i se ta’avale pa’epa’e na aga’i mai i sisifo ma le faamoemoe e alu aga’i i sasa’e i se saoasaoa e sili atu ma maila faatulaga i luga o le alatele.

Na logo e le Ofisa o Leoleo i Fagatogo vaega taitasi uma a Leoleo o lo o tiute i le itu i sasa’e ina ia mata’ala i le ta’avale lanu pa’epa’e o lo o aga’i atu i sasa’e i se saoasaoa e sili atu. Na maua e Leoleo sa tiute i luma o le Fanua Tanu i Satala le uaealesi ma latou sauni ai loa e taofi le ta’avale pe a oo atu.

E le i leva ona tapena Leoleo i Satala ae latou vaaia loa le aga’i atu o se ta’avale laititi lanu pa’epa’e i se saoasaoa e sili atu nai lo maila faatulagaina i luga o le alatele. Na taofi e Leoleo le ta’avale ma aga’i atu loa e fesiligia le ave ta’avale i le mafua’aga ua taofi ai lana ta’avale. Na vaaia e Leoleo tagata e to’alua i totonu o le ta’avale, o le susuga a Lafua le ave ta’avale ma se tamaitai sa nofo i le nofoa o le pasese, lea na iloa mulimuli ane, o ia lea o le uo tamaitai a le ua molia.

A o talanoa atu Leoleo i le ave ta’avale, na faafuase’i ona vaaia le gaioia o le ta’avale ma agai ese atu loa i se saoasaoa uiga ese. Na tuliloa e le ta’avale a Leoleo le ta’avale ma aga’i atu ai loa i le itu i sasa’e.

Na taua e Leoleo le fiu o le latou ta’avale e tuliloa le ta’avale lea o loo faafoe e le ua molia ae na atili ai ona saoasaoa le ta’avale lea ma alu atu ua taia ai se ta’avale o loo tau solomuli mai i tua i luma tonu o le faitoto’a e ulufale ai i le kamupani ma tula’i mai ai loa le fa’alavelave.

O molimau na vaai tino i le faalavelave na latou i Leoleo e faapea, a o tau solomuli mai le ta’avale lea o loo i ai alii e to’afa mai Masefau, na faafuase’i ona aga’i mai le ta’avale a Lafua o loo tuli mai e Leoleo ma taia ai loa le ta’avale mai Masefau, ma maliliu ai alii se to’alua ae ola le isi to’alua.

O le ta’avale a Lafua na fiti aga’i i le isi tulimanu o le pa ma taia ai le alii Leoleo po sa tu i tua tonu lava o le pa ma maliu ai. Na toe taia ai fo’i isi tagata faigaluega ma manunu’a ai, atoa ai ma le isi alii talavou sa savali mai i fafo o le pa, lea fo’i na taia o ia i le fiti atu o le ta’avale ma maliu ai fo’i. 

Na taua e le malo i le latou tagi, e ui i le alu saoasaoa ole ta’avale a Lafua i le taimi na sola ese ai mai Leoleo, e lei soona alu saoasaoa le ta’avale a Leoleo i le taimi na tuli ai, ae na alu lava i le saoasaoa masani.

Na taunu’u le ta’avale Leoleo i luma o le kamupani a le StarKist ma latou molimauina ai se tulaga faaletonu i ta’avale e 2 o loo lavevea atu ai, atoa ai ma tagata faigaluega o lo o manunu’a, ma latou talosagaina ai loa le Ofisa o Leoleo i Fagatogo mo se fesoasoani i ni Leoleo faaopoopo atoa ai ma le fesoasoani a le vaega o le EMS.

Na auina atu tino o i latou e to’afa na matua manunu’a tigaina i lenei faalavelave, faamaonia mai ai i le Falema’i o le LBJ le maliliu o i latou nei. O i latou ua maliliu e aofia ai le susuga a Ierome Vili, Alatina Faleasi, Taumaoe Olive ma Faasalala Ahoni.

Na faamaonia atili mai e Foma’i na faia suesuega faapitoa le matuia o manu’a i tino o i latou nei, lea na mafua ai ona maliliu.

O le tamaitai lea na oso i fafo ma le ta’avale i Faganeanea, o ia lea na fesiligia e Leoleo Suesue e faatatau i le mafua’aga tonu na ala ai ona tula’i mai le vevesi i le va o Lafua na lana uo tamaitai, lea na malaga atu na o i latou i le ta’avale.

Na taua e le tamaitai lea i Leoleo Suesue e faapea, na o atu lona aunty ma Lafua piki mai o ia mai lona fale faigaluega i Tafuna ma le faamoemoe e momoli o ia i le fale. Ao aga’i mai le latou ta’avale, sa ia maitauina le matua  ona lava o Lafua. Sa ia maitauina le mata’utia o le saoasaoa o le ta’avale, e ui na la fautuaina ma lona aunty ia Lafua e faalemu le alu o le ta’avale.

A o aga’i mai pea le ta’avale, sa taua’i misa Lafua ma lona aunty, ma atili ai le soona alu faatautala le ta’avale a Lafua. Na talosaga le molimau ia Lafua e faa alu lemu le ta’avale, peita’i na ita Lafua ma faa alu saoasaoa le ta’avale.

Ina ua oo mai le ta’avale i Faganeanea, o iina na oso ai loa i fafo le tamaitai ma vili le Ofisa o Leoleo e logo i ai le faafitauli, ma amata mai loa iina ona tau saili e Leoleo le itu lagi o lo o aga’i i ai le taavale.

Na fesiligia e Leoleo se tasi o molimau faatuatuaina sa i ai i luma o le StarKist i le taimi na tula’i mai ai le fa’alavelave. Na taua e le tamaitai lea, o ia o se tagata faigaluega a le StarKist, sa latou nofonofo ma nisi o tagata faigaluega i luga o le poloka sima oloo malolo mai galuega, ae faafuase’i loa ona ia vaaia se ta’avale lanu pa’epa’e o lo o aga’i atu i sisifo mo sasa’e i se saoasaoa uiga ese.

Na alu atu le ta’avale pa’epa’e ma so’a se ta’avale o loo tau solomuli i luma tonu o le faitoto’a tele ma tula’i mai ai loa le fa’alavelave. Na taua e le molimau e faapea, na fiti le ta’avale pa’epa’e agai i le faitoto’a ma toso uma atu ai se vaega e to’ateleo tagata faigaluega sa i ai i luma o le pa e aofia ai alii e to’alua na maliliu.

O isi alii e to’alua na maliliu sa i totonu o le ta’avale lea na tau solomuli mai.