TALA O LE LALOLAGI

Pago Pago - AMERIKA SAMOA

$1.2 MILIONA FA’ALELEIA MALAEVA’ALELE AMERIKA SAMOA

Ua fa’afetaia lava e le tatou Faipule i le Konekeresi, Uifa’atali Aumua Amata le tinoitupe e $1.293+ ua fa’amatu’u at mai le FAA ina ia toe fa’aleleia ai le fausaga o tatou Malaevaalele uma i le teritori.

O le vaega tupe lea ua toina mai mo Amerika Samoa o se vaega tupe na fa’alauiloa mai i le aso Tofi talu ai e le FAA, o se vega o le Matagaluega o Feoaiga a le Malo Tele.

O le vaega tupe fou lenei e aofia ai le $1,073,165 e fa’aaogaina lea i le Pago Pago International Airport, $110,000 mo le malaeva’alele o Fitiuta ma le $110,000 mo le malaeva’alele o Ofu.

“E tatau lava ona lelei malaeva’alele i Amerika Samoa, e le gata i lona malaeva’alele tele fa’avaomalo, ae o isi malaeva’alele i Manu’atele ina ia mautinoa o lo’o feoai saogalemu ma tulaueleele ma le saogalemu vaalele ma pasese i so’o se taimi o le malaga,” o se saunoaga lea a Uifa’atali Amata.

“Fa’amalo atu fo’i i le susuga le Kovana Sili Lemanu Peleti S Mauga ma le fa’atonu o le Uafu ma Malaeva’alele, Christopher King, aua o loo latou galulue malosi ina ia fa’atalosagaina nei vaega tupe ina ia fa’aleleia atili pe fa’atumauina foi le lelei o tatou malae sese’e ai va’alele ma isi tautua uma e feso’ota’i ma le tautuaina o tagata fegasoloa’i o le atunuu ma e fia asiasi fo’i ia Amerika Samoa.”

Ua fa’apea fo’i ona fa’ao’o le fa’afetai a le tatou Faipule i le Konekeresi i le Pule o le FAA Steve Dickson ma le failautusi fo’i o Feoaiga a le Malo tele Pete Buttigieg ona o lo latou amana’iaina o Amerika Samoa i lenei fa’asoa, aua o lo’o tele lava se mana’omia o lo’o i ai pea i le galueaina o le malaeva’alele fa’avaomalo o Amerika Samoa ina ia atoatoa ona lelei malae sese’e mo le tulaueleele saogalemu o va’alele uma.

O le vaega tupe lenei ua lisia i tupe fa’asoa mo le tausaga 2022 mo galuega mo malaeva’alele uma i le terirori o Amerika Samoa.

O lo ua atagia mai o lo’o i ai nisi vaega tupe fa’aopoopo mai fo’i e oo lava i le tausaga e 2026 e fa’aauau ai ona fa’aleleia atili malaeva’alele uma o i le tatou atunuu. O lo ua mae’a fa’atulafonoina nei fesoasoani ina ia fa’auia mai ona o se pili malilie fa’atasi i ai le Senate ma le Maota o Sui a le Konekeresi.

O le vaega tupe fo’i lea o se vaega lea o le $2.9piliona mo setete ma teritori uma lava o le Malo tele na toina i le FAA e fa’aleleia ai talafatai o malaeva’alele uma i le Iunaite Setete ma Teritori o Amerika.

FOAI BLUESKY COMMUNICATIONS MEATA’ALO FANAUITI - ROTARACT CLUB

Ona o lenei vaitau o le vaitaimi fiafia o le lalolagi atoa, ma ua avea fo’i lea vaitaimi ma taimi e sailia ai e le Rotaract Club a le Rotary CLub a latou meaalofa e mafai ona tauaaoina mo fanau uma lava o lo’o fa’anofoia falema’i ona o gasegase o le tino ma togafitiga. O nisi o fanau o lo’o nofoia nofoaga e tausia fa’apitoa ai i latou ma o latou tina ona o sauaga i mafutaga i o latou aiga, pe o nisi foi mafuaga ua fa’anofo esea ai i latou.

O le taumafaiga lenei e faia lava i tausaga taitasi ma ua lafo atu i le vasega talavou o sui totino uma o le Rotary lea ua fa’aigoaina o le Rotaract Club latou te feoa’i malolosi e fa’atino lea faiva ia taunuu i se taunu’uga lelei le latou foa’i mo fanau. O le tausaga fo’i lenei ua faliu ai le pulega ma le aufaigaluega a le BlueSky Communications ina ia latou taua’aoina aloaia le $1,000. e fa’atauina ai ni meaalofa matagofie mo nei fanau uma.

“Ona ua mautinoa e le Pulega ma le Aufaigaluega a le Bluesky Communication, ole a fa’aaogaina tatau lenei foa’i mo le fa’amoemoe mo fanau nei ia maua se latou Kerisimasi fiafia, ma o le a fa’atautaia ma le tonu lea fa’amoemoe e le Kalapu a le Rotaract i lenei tausaga, o lea ua alagatatau ai ona faia le foa’i ma le agaga fa’afetai tele, o le a manatua nei fanau i le tufatufaga e fa’afiafiaina atili ai i latou.” O se tala lea mai le susuga Tuiasosopo.

O le Kalapu lenei a le Rotaract o le vasega lea o sui totino o le Rotary e talavou ma o lo’o lava ma totoe le malosi e fa’atino ai le tele o galuega o agaga i ai le Rotary ae mana’omia vae ma lima se tele toe malolosi e fa’atinoa. O lea la ua tuufa’atasia i latou uma nei e talavou ma latou fa’atuina ai le Rotaract i le latou peresetene o lo’o tula’i mai i lenei tausaga Tiare Drabble. 

O tausaga o nei sui totino o le Rotaract e amata mai le 21 tausaga se’ia oo i le 40 tausaga le matutua. O le latou polokalama lona lua lenei mo le sailiga o meata’alo mo fanau e le o mafuta fa’atasi ma o latou aiga i lenei Kerisimasi ma le tausaga fou. Ua talosagaina lava e i latou le fesoasoani mai le lautele o le atunuu, i so’o se ala, poo ni meata’alo fo’i o le a tuai fo’i o lo’o tausia lelei pea, e mafai ona e fa’apasia mai na meata’alo aoga tele. O isi meaalofa taua mo i latou ua fa’ailoa mai o Tusi Faitau.

O le tausaga lenei ua fa’agasolo, ua manatu i latou ina ia latou foa’ia fa’atasi tusi faitau i le gagana Peretania poo le gagana Samoa fo’i, ma e tufatufaina atu fa’atasi lava ma meataalo nei i le fanau i Amerika Samoa.

“O lenei galuega ua faataunuuina ma le agaga fiafia ona o le a fesoasoani se foa’i itiiti ae o le agaga ia matua mautinoa o fa’afiafiaina le fanau o lo’o fa’agasegasea ma fa’anofoesea mai latou aiga, ma nisi fo’i ua matauina o lo’o nofo fa’anoanoa ona o ni a’afiaga eseese lava i le atunuu. O se ala ua toe fa’afo’i atu ai  se auaunaga i le atunuu ae maise ia i latou o lo’o i ai le mana’omia i o latou soifuaga i lenei vaitau fiafia o le tausaga.”

“Ona o mea ta’alo o le a taua’aoina e na’o na fa’afiafia ai i latou, ae o tusi faitau o le a avatua ai ma se fe’au taua e a’oa’oina ai le fanau ia silafia ona faitau ma le malamalama, siitia ai fo’i lo latou iloa ma fa’aleleia ai lo latou olaga a’oa’oina lelei. O se mea lea e agaga i ai lenei fo’i Kamupani mai lava i le amataga, ia aoaoina lelei le fanau talavou a Amerika Samoa,” o se fa’amatalaga lea a le alii pule sili o le Bluesky Communications Justin Tuiasosopo.