Molia se alii na fasi e le ‘uncle’ o lona to’alua, I le faia o uiga mataga I se tamaitai 15 tausaga:

Pago Pago - AMERIKA SAMOA

E to’alua ni ali’i ua molia e le malo i moliaga mamafa, ina ua taofia e Leoleo i le faaoolima ae maua ai ma fualaau faasaina i le isi, ae molia le isi i lona faia o uiga mataga i se tamaitai e 15 tausaga le matua.

O ali’i e to’alua e aofia ai Sepu Mata ma Filipo Tava’e.

Ua molia nei e le malo o Amerika Samoa ia Mata i le moliaga e 2 o le tagofia o itutinosa o se tamaitai talavou i le tulaga lua, faapea ai ma moliaga e 2 o le faia o amioga faasotoma, o le vaega  lea o solitulafono mamafa e mafai ona fa’asala ai se tasi i le Toese mai le 5 e oo atu i le 15 tausaga.

E $15,000 le vaega tupe lea ua fa’atulaga e tatala ai i tua Mata.

O le susuga a Tava’e, ua molia nei o ia e le malo i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o ni solitulafono mamafa e mafai ona fa’asala ai se tasi i le Toese mo le umi e mafai ona oo atu i le 10 tausaga, pe faasala foi i le salatupe e mafai ona oo atu i le $20,000; atoa ai ma moliaga mama e 2 o le faaoolima i le tulaga tolu faapea ai ma le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le Toese mo le umi e oo atu i le 1 le tausaga, pe faasala foi i le salatupe e mafai ona oo atu i le $1,000, poo le faasala fo’i i faasalaga uma ia e 2.

E $5,000 le vaega tupe lea ua fa’atulaga e tatala ai i tua ia Tava’e.

Afai ae mafai ona tatala Mata ma Tava’e i tua mai le Toese i Tafuna, ua fautuaina i laua ina ia tausi le filemu i totonu o le la aiga, aua ne’i o la toe solia se tulafono a le malo, a ia avea i laua ma tagatanu’u lelei e tausisi i tulafono uma a le malo. 

TAGI A LE MALO

E pei ona taua e le malo i le latou tagi e fa’apea, o le po o le aso 25 o Novema na faafesootai ai e se ali’i le Ofisa o Leoleo i Tafuna mo se fesoasoani, e mafua mai i le faalavelave lea na faaoolima ai le uncle a lona to’alua ia te ia i totonu o lona fale ao si’i lona atali’i e 2 tausaga le matua.

Na taua e le ali’i lea i Leoleo le tu’i e le uncle a lona to’alua o lona gutu ma pau ai i lalo ao sii lona atali’i. O le laki na le oo ai ni manu’a i lona atali’i i le taimi na la pauu faatasi ai i lalo.

Ina ua o’o atu leoleo I Leone, sa o latou molimauina se alii o nofonofo I luma o le fale sa alu atu ai le valaau, lea na manino mulimuli ifo o le ali’I lea o Sepu Mata, o ia sa valaauina leoleo, ae mulimuli ane, molia ai ma ia I lenei faalavelave.

Na talosagaina e Leoleo le fesoasoani a le EMS ina ua latou molimauina ni manu’a i foliga ma le ulu o Mata.

Na faamatala e Mata i Leoleo le mafua’aga na faaoolima ai le uncle a lona to’alua ia te ia. E ui e nonofo faatasi le latou aiga i le fanua e tasi ae eseese fale latou te nonofo ai. Pe tusa o le itula e 5:30 i le afiafi ae taunuu loa Mata i le fale faatoa manava mai i galuega o le aso, ma nofonofo ai loa i tua o le umukuka ma inu ana fagu pia Vailima.

Pe tusa o le itula e 7:00 i le afiafi, na aga’i atu ai loa Mata i totonu o le fale mo le taumafataga o le afiafi. A o faia le taligasua o le afiafi, na taua e Mata i Leoleo le i ai o isi taimi na tu ai i luga ma siva ao ola lana musika. Sa i ai faatasi i luga o le laulau  i lea afiafi ia Mata, o lona faletua ma ona alo e to’afa, e aofia ai lona atali’i laitiiti e 2 tausaga lea na ia siia i le taimi na tula’i mai ai le faalavelave.

Ao siva Mata, na faateia o ia ina ua savali mai le uncle a lona to’alua ma tu mai i fafo o le fale, ma valaau mai ia te ia e tape lana musika ma nofo lelei i lalo e ‘ai ae aua ne’i toe vaai mai o tu i luga e siva. E le’i amanaia e Mata le tala a le uncle a lona to’alua, ona sa ia iloa o loo ‘ona lona uncle, o loo ‘ona fo’i o ia.

O le uncle o le to’alua a Mata, o le susuga lea a Filipo Tava’e, le o lo o molia faatasi ma Mata i lenei mataupu. 

E faalua ona valaau mai Tava’e ia Mata e tape lana musika peita’i sa tali i ai Mata, e leai sana feau e pisa atu ai fua i ana mea o loo fai. A o si’i e Mata lona atali’i ma la sisiva faatasi i autafa o le laulau ‘ai, na faateia o ia ina ua ulufale atu Tava’e i totonu o le latou fale ma tu’i lona auvae ma palasi ai i lalo ao ia si’i pea lona atali’i. 

O le taimi na pau ai i lalo ia Mata ao sii mau pea i ona lima lona atali’i, na tamo’e atu ai lona faletua ma si’i ese mai lona atali’i. Na taua atili e Mata i Leoleo e faapea, a o taatia i lalo, na savali atu Tava’e ma kiki lona papatua ma toe faaauau le ta tu’iiina o ona foliga ma manu’a tigaina ai ona foliga.

Na taua atili e Mata i Leoleo, le o se taimi muamua lenei ua faaoolima ai Tava’e ia te ia. 

Ina ua mae’a ona fesiligia e Leoleo ia Mata e tusa ai o lenei mataupu, na aga’i atu ai loa i le fale o Tava’e mo le faatalatalanoaina o ia.

Na musu Tava’e e o ma Leoleo ona i lona talitonuga, e sa’o le mafua’aga na ia faaoolima ai ia Mata. Sa ia taua i Leoleo, e le o se taimi muamua lenei ua ‘ona ai Mata ma soona ki leotele lana musika i luga i taimi o faiga lotu.

Na fiu Leoleo e talosaga ia Tava’e latou te o i le Ofisa peita’i sa faaaua pea ona tete’e Tava’e, na oo lava fo’i i le taimi na taumafai ai Leoleo e uu mai le lima o Tava’e ae na faaauau pea ona tete’e Tava’e. O le taimi lea na taumafai ai loa Leoleo e pu’e faamalosi Tava’e ae auina atu i le Ofisa mo suesuega.

A o tauivi Leoleo ma Tava’e, na tau le lima o le isi Leoleo i se mea malo i le taga o le ofu a Tava’e sa fai, ma mafua ai loa ona saili e Leoleo le tino o Tava’e mo ni aupega.  Na latou maua ai se paipa tioata o lo o i ai vaega o se pauta pa’epa’e, ae o le isi taga o lona ofu sa laei na maua i ai se pepa iila o loo i ai lau mamago o le laau fa’asaina o le mariuana.

Ina ua fesiligia e Leoleo ia Tava’e e tusa ai o le faalavelave na ia faaoolima ai ia Mata, na ia taua ai e faapea, na mafua ona ia faaoolima ia Mata, o le tiga o lona loto i le mea leaga na faia e Mata i lona afafine e 15 tausaga le matua i le 5 masina talu ai, lea na faalua ai ona ia ulufale faamalosi i le latou fale i le leva o le po ma tagofia itutinosa o lona afafine ao moe i luma o le potu malolo.

Na ioe Tava’e i tuuaiga na ia faaoolima ia Mata atoa ai ma fualaau faasaina na maua ia te ia, peita’i, e le i mana’o o ia e faailoa le tagata na faatau mai ai fualaau fa’asaina. O le mae’a ai ona fesiligia o Tava’e e uiga i lenei mataupu, na ia talosaga ai loa i Leoleo e fia faila sana tagi faasaga ia Mata ona o gaioiga mataga sa ia faia i lona afafine.

TU’UAIGA FAASAGA IA MATA.

A o le i fesiligia e Leoleo ia Mata e uiga i lenei mataupu, na muamua latou fesiligia le tamaitai na aafia mo sana faamatalaga. Na taua e le tamaitai na aafia i Leoleo, e faalua ona alu atu Mata ma tagofia ona itutinosa ao moe i luga o le nofoa i totonu o le potu malolo. 

O ia gaioiga uma na tutupu i le masina o Iulai o le tausaga nei, pe tusa o le itula e 11:00 i le po ao momoe ma nai ona tei laiti i luma o le potu malolo. 

Ina ua fesiligia e Leoleo ia Mata, na ia ioeina ai lona faia o uiga mataga i le tamaitai na aafia. Na taua e Mata i Leoleo, o le tamaitai na aafia le mafua’aga na ulufale ai i totonu o le fale i le leva o le po, sa malie ai fo’i o ia i gaioiga uma na tutupu. Na taua atili e Mata i Leoleo, ua mae’a ona toe teuteu le mataupu na tula’i mai i le lotoifale o le latou aiga, ma ua talia fo’i e le uncle a lona to’alua lana faatoesega.