TALA O LE LALOLAGI

Pago Pago - AMERIKA SAMOA

MAEA POLOKALAMA ARTS COUNCIL - PESEPESEGA MO LE KERISIMASI

O le afiafi o le aso Lulu na te’a nei ua mae’a lelei ai le polokalama na fa’atulaga ma fa’atautaia e le American Samoa Arts Council & Humanities lona 44, o Pesepesega matagofie mo le Kerisimasi ma le Tausaga Fou.

O lea fa’amoemoe sa amatalia mai le afiafi o le aso Sa i le Pavillion i le Malaeoletalu i Fagatogo.

I le saunoaga a le afioga le Kovana Sili, Lemanu PS Mauga, e pei ona fa’ailoa i pepa o fa’amatalaga mai le Ofisa o le Kovana, sa ia toe fa’amanatu aso a’o laiti mai, e saunia lava meata’alo mo lenei aso fa’apitoa i mea ua maua i le Si’omaga. E le lau maua le fiafia fa’atasi ma uso ma tuafafine, o uo mamae fo’i mai aiga ma nu’u ta’itasi, lea ua fa’afetai lenei vaitau ma le anoanoa’i o so’o se ituaiga o meata’alo ua mafai ona fa’atauina mo le fanauiti se’ia oo i tupulaga talavou.

Sa ia faalauiloa ituaiga o va’a e fai i lapalapa ae faia tu’uga poo ai e mua lana va’a, e fa’ase’e nisi va’a i tafega o vai ona o le tetele o timuga, ae sa maua ai lava le fiafia ma le fealofani i taimi uma. 

“O le vaitau o le agaga alofa foa’i atu. O le autu sili lea e ao ina tatou manatua mai lenei vaitau o le tausaga. Ia tatou mafai ona fiafia fa’atasi ma e pele ia i tatou ma tatou fa’auoga eseese. Ia ulu i o tatou mafaufau le agaga o le fealofani ma fiafia fa’atasi, ae le o le avea ma se vaitau e tele ai ni a’afiaga fa’asoligatulafono e fa’atino ai, ona ua i’u puta a tatou mafutaga fiafia.”

“Fa’asolo ina matutua ane ua iloa fa’aaoga apa tuai o fale e fausia ai se va’a paopao ma fa’aaoga tagaalaisa e sui ai la o va’a, o mea na sa mafai ona fausia ai meataalo mo i matou le tupulaga feololo le matutua. Kama o le va’a apa ma va’a atigiapa inu.”

“O le vaitau lenei ua tele na’ua meata’alo fa’aeletoronisi ua va’aia ua matua fiafia i ai le fanau. Ua ave telefoni taugata ma mea e fa’ana ai fanau ona o lo’o ua mafai ona feso’ota’i ai i latou ma ta’aloga ma ata fa’asolo e fiafia ma fa’anofo filemu ai. Ae o se fa’ailo sili lea ua fa’ailoa ai, ua mafai ona feso’ota’i a tatou fanau ma talutalu o le latou vaitau o soifua ai, ae le mafai ona feso’ota’i i latou ma nei mea uma, pe afai o le a leiloa muamua faitau le Pi Tautau a le fanau, ma le ABC fa’aperetania. Ia nofouta i tatou matua i lena tulaga.”

“Matua ia tautuana a tatou fanau, o lo tatou tofi lava lea. Ia sa’o ona fa’atonutonu ma a’oa’o mai fanau i le taimi a’o iti, e oo atu lava ina matua, ua mautu lona a’oa’iga, ia le feseta’i i latou mai le ta’iala e talafeagai ma lo latou vaitau, ae le galo fo’i ia te ia le amataga mai o lana savaliga ina ia a’oa’oina lelei. Aua ne’i motusia le ola feso’ota’i ma fanau, ia lava le tatou mafutaga ma i latou i taimi uma.”

E to’a 42 aufaipese ma nisi o ausiva sa filifilia a’ia’i e le Arts Council mo le lenei tausaga. 

SIITIA TAU O MEA’AI MA ISI OLOA UMA I LE 3.4% IA NOVEMA, 2021

Ua leai se isi ua le lagona le si’itia o le tau o mea’ai ma isi oloa e masani ona fa’atauina mo le tausiga o le aiga i le masina ua te’a. O le to’atele ua fa’aaogaina le Pepa Talafua Mea’ai a le Food Stamp e mama ia i latou fa’atauga uma ia, peita’i ia i latou o fa’asoa le tupe ina ia lava pili totogi, ua fa’afaigata atili ona so’o le fa’asoa i le totogi ua maua.

Ua fa’ailoa mai i le lipoti o fa’amaumauga o fuainumera o le masina o Novema, ua faamauina ai le siitaga e 3.4% mo oloa tau mea’ai ma mea e gaosia ai mea’ai i le atunuu.

O le tau o oloa e 20 na suesuea, e 14 ia oloa na iloga ona siitia latou tau o fa’atau atu ai i le mamalu lautele mai faleoloa.

Pusa Moa ua siitia i le 4.2%, saimin ua si’itia i le 9.5%, pusa vai ua siitia 8.7%, pata ua siitia 2.9%, spare ribs ua siitia i le 1.6%, soda ua siitia i le 0.8%, taga araisa ua siitia i le 0.8%.

O nisi o mea ua le si’itia le tau i le masina o Novema ua tumau pea le tau o le i’a, talo, sosisi, fa’i, apa tuna ma le falaoa.

TULA’I SOSAIETE NGO TAGATA SAMOA I ALASKA

I se pepa o fa’amatalaga ua fa’ailoa ai le Sosaiete a Tagata Samoa i le setete o Alaska, ua latou fa’atuina se sini ina ia latou taumafai a’ia’i e fa’aolaola ma fa’amalosia le Aganuu ma Agaifanua a Samoa ma le Gagana Samoa i lea fo’i setete.

Ua sapaia fo’i e le Sosaiete a Tagata Polenisia i Alaska lea fo’i Sosaiete, e avea ma latou pa’aga aua o tagata Polenisia fo’i Samoa. Ua fa’apena fo’i ona auaufa’atasi atu i ai ma le Kava’s Restaurant.

Ua le gata la i le auuso Polenisia ua latou sapaia lenei fa’amoemoe, ae ua va’ava’alua ane fo’i ma le Asosi a Tagata Alaska, lea e ta’ita’ia e Tafilisaunoa Toeafoa, fa’atasi ai ma le Asosi a le Sons & Daughters of Seaula lea e ta’ita’ia e le susuga Sitafune Talosaga ma Lokeni Lokeni Ula Jr.

O Tesema 11, 2021 na amata ai ona fa’atulaia lenei Sosaiete a Samoa i Alasaka ma e to’a 30 sui patino sa latou fa’atula’ia lea asosi i lea aso i Anchorage Alaska.

O le a’ai o Anchorage ua iloga ona fa’atumulia i le to’atele o tagata o atumotu ua fa’amautu i ai, ma e to’atele ai lava tagata Samoa nai lo nisi atumotu o le pasefika. Ua fa’ailoa mai e le faitauga o lea setete e 2% o le faitauga o Alaska o tagata na o atumotu ua fa’amautu atu i le latou Setete.

E tusa ma le 12,000 o tagatanuu o Alaska e vagaia le tagata pasefika e tasi, ae latalata i le to’a 10,000 o tagata mai atumotu o tagata Hawaii, Samoa, Tonga ma isi atumotu.

Ua si’isi’i pea i luga le faitauga o tagata Samoa ua fa’amautu atu i Alaska i tausaga ta’itasi ma ua manatu i latou ua tatau ai ona fa’amautu loa le a’otauina o le Aganuu ma ana Agaifanua fa’apea ma le Gagana Samoa i le setete. O galuega alofilima lava le isi vaega o le aganuu e tatau ona fa’ailoa ma fa’amanatu i nisi o fanau a le atunuu ua fa’amautu nei i le setete.

“Ua matou loto tetele ina ia fa’ataunuu le matou fa’amoemoe, ua mausali fo’i o matou agaga aua o ai ea ua le pele ia te ia, la’u Samoa? O le mea sili lava o le mafai e le fanau ua tupuga mai Samoa ona soo le fau ma le fau i le gagana, tu ma agaifanua e iloga ai i latou o alo mai Samoa,” o se tala lea a le sui na ia fa’ailoa maia lea faamoemoe maualuga ua amatalia nei.

Na usuina le pese e iloga ai le pele o Samoa i agaga o e uma ua tau toto i Samoa, “Lota Nuu na Ou Fanau Ai,” ma ua avea foi ma manulauti e fafagu ai pea le agaga o tagata Samoa e toe susue le fa’amalama ma toe tepa atu i Samoa. O le Asosi lea a Samoa ua fa’atuina i Anchorage Alaska, o le a tautuaina fa’atasi Samoa na lua, Amerika Samoa ma Samoa Tuto’atasi. O se vaega tele o lea fa’amoemoe ua fa’atuina nei, o le tulaga o le soifua fa’atasi ma tautua i Ekalesia e pei ona avea le tagata ma lona totino.

E se tasi o tama matua o lo’o ua avea ma sui sa auai e fa’atuina lenei fa’amoemoe aoga tele, “O le popolega sa i ai, i le tu’ua ai e fanau o le aiga ma gasolo atu i fafo, o le lusi atoa lea o le latou fa’asamoa, le aganuu ma uiga poo tu ma aga e tatau ona soifua ai. O le fa’amoemoe autu lava lea, o le a nafa ma lenei Asosi a Samoa, ia fa’atumau le agaga moni o le Samoa moni i lana gagana ma lana tu ma aga ia le mou atu mai le soifua i aso fai so’o o le fanau.” O se tala lea a le Peresetene ma le CEO o le Asosi a Samoa i Alaska Vaiomatalematu Maddy Unutoa.

O sui totino na tutu fa’atasi ma tau amata le fa’amoemoe lenei, sa latou fono i le aso 8 Tesema 2021, ma tusia a latou tusi vala’aulia ma toe tufatufaina atu i tama ma tina matutua fa’apea aiga Samoa uma lava i le a’ai ua latou silafia. Ua fa’apea foi ona fa’aoo atu i Ekalesia uma ua aga’i i ai le atunuu i lea a’ai ina ia o mai e sapaia lea fa’amoemoe lelei.

Ua i ai le latou fa’asalalauga, “Mo Tama Fanau uma a Samoa Tuto’atasi ma Amerika Samoa, afai ua e lagona lou agaga o oe o le Samoa, susu mai tatou mafuta, aua o le agaga moni lava lea o le aganuu a Samoa, ia tatou fa’atasi ma fealofani i nuu ese ua tatou alaala ai nei.”