TALA O LE LALOLAGI

Pago Pago - AMERIKA SAMOA

$30.8MILIONA MAI LE USEPA FA’ATUPEGA MO AMERIKA SAMOA

Ua fa’ailoa i se pepa o fa’amatalaga e fa’apea e $30.8 milion ua fa’atulaga mo Amerika Samoa mai le USEPA, o se vaega tupe na fa’atulaga mai e le tulafono o le Talafatai o Setete ma Teritori o Amerika na pasia ma ua sainia fa’aletulafono e le Peresetene ia Novema 15, 2021.

O le fa’aaogaina o lenei seleni o lo ua fa’atulaga e fa’ataunuuina lea i le tausaga 2022, ma o se vaega lea ua fa’amatu’u mai le aotelega e $110miliona mo teritori mai le $7.4piliona mo setete uma ma teritori.

O le vaega tupe lea e fa’atutu aga’i i le fa’aleleiga atili o laina o le Suavai Taumafa Mama ma le Suavai Lafoa’i poo le Sua i totonu o le atunuu.

O lo ua fa’ailoa e le Pule Sili o le USEPA, Michael S. Regan, “O lea vaega tupe i lona fa’aaogaina e mafai ona fa’aopoopo ai nisi o le aufaigaluega agavaa mo tiute uma o le fa’aleleia o laina o le Suavai Lafoa’i ma le Suavai Taumafa Mama, o le galueaina o laina ma le fausia o alavai ia mautinoa o sologa lelei lea tautua, ma ua tatau ai ona fa’aaogaina ia tautuaina fo’i afio’aga maotua o le atunuu.”

Ua sili ona va’ai toto’a le USEPA i afio’aga e le o tautuaina lelei i le suavai taumafa mama ma le tautua o le Suavai Lafoa’i, ia mautinoa ua oo i ai le tautua lenei, ma ia fa’aleleia atili nai lo le tulaga o i ai i lenei vaitaimi.

“O tinoitupe nei e fa’aleleia atili ai le talafatai o le atunuu ma fa’atupe ai galuega fa’aleleia o le suavai lafoa’i ma le suavai taumafa mama, o le a mafai ona fa’atino ai nisi o galuega ua loa ona fa’atalitalia se fesoasoani tau tupe e fa’aleleia atili ai mo le atunuu atoa. Ua tele tausaga o momo’o ina ia mafai ona fa’amae’a le galuea’ina o laina o le suavai lafoa’i, ae silisili le fa’amae’aina o nisi o galuega tatau ona fa’aleleia atili mo laina o le suavai taumafa mama i totonu o nofoaga ua tumutumu i ai le atunuu, ma afio’aga maotua fo’i o le atunuu e le o lelei a’ia’i i ai tautua nei,” o se tala lea a le tamaitai Faipule o Amerika Samoa i le Konekeresi, Uifa’atali Amata.

Fa’amalo ia Kovana Lemanu Mauga ma le tofa le Lutena Kovana Talauega Ale, le matagaluega o le ASEPA ona o le mataala ma le sogasoga e una’ia mai nei poloketi aoga i le lautele o le atunuu, ina ia fa’ailoa ma tima’i mai i galuega e ao ina fa’aleleia atili ai le tautua lautele o le atunuu e ala i le suavai taumafa mama ma le suavai lafoa’i.

Fa’afetai fo’i ia Michael Regan ma le latou vaega i le tufatufaga ua to’ia ai Amerika Samoa. 

FA’ATULAGA AUFAIGALUEGA A LE PULE’AGA SAMOA PAGO PAGO

Ua fa’ailoa mai suiga o matagaluega eseese o le Pule’aga Samoa Pago Pago o le a galulue ai le Aufaigaluega tofia i lenei tausaga, ma o le a fa’aauau atu i le tausaga fou se’ia mae’a fo’i le tausaga ona toe faia lea o se isi fo’i suiga.

O Patele Kolio Etuale o le a avea ma Taitai o le Pule’aga lea o le a suitulaga ia Patele Sefo Tupuola, lea ua i malaga i fafo mo ana talavai fa’aauau. O Patele Kolio o le a galu i le Pulega a le Aiga Pa’ia i Fatuoaiga. O Patele Pio Afu o le a galue nei e va’aia le Pulega a Sagato Iosefo i Futiga.

O Patele Salesi Moimoi ua tofia e galue i le Pulega a Iesu le Tupu i Nuuuli, ma ua siitia ese mai ai le Pulega a Lepua e pei ona sa ia galue ai. O Patele Andrew Wilson  lea e avea nei ma fesoasoani i le Pulega i Leone ua filifilia nei e avea ma Patele i le Pulega i Alao. O Patele Sagato Tavete o le a galue i le Pulega a Iesu le Tupu i Malaeloa.

O Patele Ralph Solomona mai le Puleaga Samoa -Apia o le a fesoasoani le ia Patele Kelemete Pua’auli i le Pulega a le Koluse Pa’ia i Leone. O ia lea e va’aia atoa ma le Pulega i Asili, Afao ma Amanave, a’o malaga atu i fafo Patele Sefo mo ana talavai.

Fa’atulaga nei Patele Sefo e na te va’aia le Pulega a Afao ma Amanave. O suiga tofi nei e ao ina fa’atautaia uma tiute o nei sui i nofoaga ua fa’ailoa mai i luga ia Ianuari 16, 2022.

FA’ATALANOAGA VAEGA TUPE O LE ARPA - FA’AAOGA MO GALUEGA A LE FALEMA’I

Ua fa’ailoa fa’alaua’itele mai nei e le Pulega a le Falema’i tele i Faga’alu, o le aso Gafua a sau nei, Tesema 13, 2021, o le a fa’atautaia ai se fonotaga fa’alaua’itele i le Gov. Rex Lee Auditorium i Utulei ina ia sailia ai taofi o le atunuu mamalu, e tusa o le fa’aaogaina o alagatupe a le ARPA mo galuega toe fa’aleleia atili o tautua a le falema’i tele i Faga’alu.

O nei galuega uma, o le taumafai lea ia mautu a’ia’i le falema’i ina ia mafai ona fa’ataotolia ai gasegase o le covid-19 pe a oo ina a’afia nisi i lea fa’ama’i, pe a lutia fo’i i tatou i lea lava fa’ama’i.

O itula o le a faia ai lea fonotaga sailia taofi i Utulei e amata mai le 9:00 i le taeao se’ia oo i le 11:00 i le taeao lava.

O le fa’asalalauga lenei ua fa’ailoa mai ai lenei fonotaga taua, ua tuuina mai ai se avanoa lelei i le mamalu lautele o le atunuu e fa’aalia ai latou taofi e tusa o le fuafuaga o lo’o ua fa’ataoto mo le fa’aaogaina tatau o lea vaega tupe mai le ARPA, ma ua fautuaina fo’i le atunuu ina ia fa’aalia lou taofi ma le fa’aaloalo, ina ia mafai ona fa’autagia e lau faigamalo sou taofi ua e fia fa’ailoa mai.

O galuega o le a fa’aaogaina ai lenei seleni, ua mautinoa lava o le fa’aleleia atili o le tautuaina o le mamalu lautele pe a lutia le atunuu i le Covid-19. Ua toina mai e le American Rescue Plan Act le $300miliona i le Malo o Amerika Samoa ina ia latou toe fa’atulaia ai se falema’i i Tafuna ma ia fa’atulaga ai le ituaiga fausaga fou ma fa’aleleia atili tautua o lo’o ua mae’a fa’atautaia i le falema’i tuai o i ai nei. 

O le fa’aaogaina o nei vaega tupe mai le ARPA ua fa’atulaga mai ina ia fa’aaogaina  tatau e fa’aleleia ai le tautuaina o le lautele o le atunuu e ala i taimi o e aafia ai i le Covid-19 ma ua fa’atulaga ai le vaevaega o lea alagatupe mo lona fa’aaogaina tatau: Ata mo le Fausaga o le Falema’i Fou -$200 milion; Fa’alautele le ICU i Faga’alu LBJ Medical Center -$27.65 milion; Fa’aleleia atili le Falema’i i Faga’alu -$12.5 miliona; Fa’alautele atili le ER i Faga’alu-$4,84 miliona; fa’afaigaluega mai nisi Foma’i, tausima’i & Technicians mo le Falema’i - $50 milioina. 

O le a taliaina uma lava manatu fa’aalia, ma ni fautuaga foi ina ia mautu mai se aotelega o taofi e mafai ona fai fuafua i ai le fa’aiuga a lau faigamalo mo le fa’aaogaina tatau o lenei alagatupe taua. O le a tatala lava le avanoa e fa’auia mai ai lou taofi se’ia mae’a Tesema 30, 2021 i le itula e 4:00 i le afiafi.

Fa’atuatusi mai lou taofi i le afioga le Pule Sili o le Falema’i tele i Faga’alu - Faumuina John Faumuina, CEO LBJ Tropical Medical Center, Amerika Samoa 96799. Mo nisi o le a fa’aaogaina mai e le Emeli: [email protected]

Telefoni o le Numera : (684) 633-1222 ext. 449.