TALA O LE LALOLAGI

Pago Pago - AMERIKA SAMOA

FESOASOANI FA’ALAPOTOPOTOGA TUMAOTI - SUI UA A’AFIA I FUALA’AU FA’ASAINA

O i latou uma ua a’afia i a’afiaga fita ona sa tagofia e i latou fuala’au fa’asaina ma vaila’au o’ona, ua a’apa mai fo’i se tasi o Fa’alapotopotoga Tumaoti fou i le atunuu ma fesoasoani mai e ala i se foa’i taua e taumafai ai ona fa’aleleia togafitiga ma le tausiga faapitoa o i latou ua a’afia.

O le ala o lenei foa’i, ona o se atali’i pele o lea aiga, ua i’u lava ina maumau ai lona soifua, a’o talavou lava, ona o a’afiaga o le tagofia o vaila’au o’ona ma fuala’au fa’asaina.

O le igoa o lea fa’alapotopotoga Tumaoti o le ‘Christopher James Foeoletii Ledoux Foundation’ aua na maliu lava lea alo talavou i le 32 o tausaga o lona soifua.

Ina ua mae’a ona lagomau lenei atili i le tausaga ua te’a, ona amata tuufa’atasia loa lea e lona Aiga lenei fa’alapotopotoga ina ia manatua ai pea le atali’i sa matua iloga ona tigaina i lana taumafaiga e toe alu ese mai i le tagofia o Fuala’au Fa’asaina ma Vaila’au O’ona.

“O le taumafaiga lenei, ina ia tima’ia nisi o lo’o manatu ina ia latou tagofia pea vaila’au o’ona o le “Aisa” ia faliu ese manu o mafai ona fa’afaigofie lou toe fo’i ese mai lena taua e te le malo ai, ae mautinoa e maumau ai lou tagata atoa, ma avea ai oe o se avega mamafa i lou aiga.” O se tima’i mai lea a se tasi o sui iloga o lea aiga, o se tasi o ona tuafafine o lo’o lagolagosua malosi mo le fa’amoemoe ia aoga le latou taumafaiga i se isi o lo’o feagai ma nei fa’afitauli, sa latou va’aia ma molimauina a’o taumafai si o latou tuagane pele e manumalo mai ai.

O le tamaitai o Trude Ledoux-Sunia, o le tuafafine o Christopher James, ua ia fa’ailoa fo’i, “Sa faia le matou sailiga ma le suesuega pe i ai se so’otaga o le tagofia o fuala’au fa’asaina ma vaila’au o’ona ma le to’atele o fanau o lo ua le maumau le soifua a’o talavou i le pule i le soifua, a’afia i fa’alavelave le ma’alofia  ona ua fa’afoea taavale ma le fa’asua’ava, auai i le tele o fa’atupu fa’alavelave i totonu o aiga, sauaina o tina ma fanau i totonu o aiga, le fia auai i fa’alapotopotoga ma auai i sauniga fai i le Atua. Ua iloga mai fa’amaonia, ioe e tele le so’otaga o le tagofia o vaiala’au o’ona ma fuala’au fa’asaina ma nei a’afiaga uma lava.”

O le ala lea ua u’unaia malosia ai lenei fa’amoemoe, ia aoga i nisi o sui ua toe taumafai e toe fuata’ina le soifua, toe fo’i i le mea sa i ai, ae maise o nai o latou aiga, ia gafatia ona tausia le fanau i ala sa masani ai, a’o le’i lutia le mafutaga fa’aleaiga ina ua tagofia vaila’au o’ona ma fuala’au fa’asaina e nisi o matua.

Ua fa’ailoa mai e lea sui o le fa’alapotopotoga lea, “Ua amata atu le matou fesoasoani i nai aiga o lo ua matauina o i ai fa’afitauli i le matou nuu o Pago Pago. Peita’i afai ua mo’omia tele lava le fesoasoani e nisi o aiga, e mafai ona fa’aaoga mai le so’otaga ua mae’a tapena i le Facebook e tatou te talanoa ai ma fa’asoa’i i ala e mafai ona oo atu ai se fesoasoani.”

O le itulau lea ua mae’a tapena o le Christopher James Foeoletini Ledoux.

5 MEA TAUA MANATUA AI DANNY SHELTON - ALO SAMOA O TA’ALO I LE GIANTS:

Ua fa’aauau nei le soifua ta’alo fa’atauva o Danny Shelton i le NFL ma o le fitu ai lenei o ta’amilosaga a le Football fa’apolofesa o ta’alo lava o ia o se Defensive Tackle poo le Pu’e Mata’utia, i le taimi nei mo le ‘au a le Giants mai Los Angeles, Kalefonia.

Na fa’aulu mai i le numera 12 o e na piki fa’apitoa e le Cleveland Browns, lea sa mua’i ta’alo ai mo le tolu ta’amilosaga muamua o lona soifua ta’alo fa’atauva i le NFL, soso’o lea ma le se’i atu e le New England Patriots a’o le’i toe ave e le Detroit Lions i le ta’amilosaga Football o le 2020.

Mea lona lua e ao ina manatua, e 87 ta’aloga faitaulia ua mae’a ta’alo ai lea alo e tupuga mai Samoa, ae na fanau ane i Washington State. O le 72 o ana ta’aloga faitaulia nei sa amata ta’alo ai o ia i le amataga o ta’aloga e tatala malae i lona tulaga DT.

I lona soifua ta’alo i le taimi nei e 247 ana pu’e e 126 pu’e to’atasi, 5.5 sacks, 16 pu’e na lusi, fa’a 18 na taia e ia le quarterback a le isi ‘au, tasi lava le pa’u o le polo, 2 taimi ua ia taofia ai le pasiga.

O le mea lona tolu, ua maka ai lana ta’aloga sili ona mata’ina a’o ta’alo o ia o le DT mo le Patriots mo New England i le 2019. O le ta’amilosaga lea sa ia tatala malae ai i le 14 o ana ta’aloga e 16 mo lea ‘au malosi.

Na fa’amauina ai lana 3.0sacks, tasi le polo pa’u, ma le 61 o ana pu’e lelei, lua pu’e na misi ma le 6 taimi na ia taiaina ai le Quarterback a le isi ‘au., sa matauina fo’i o ia na faia atoa le 49% o le puipuigamalu o le latou ‘au ta’alo.

O le mea lona fa e ai ina silafia, sa ta’alo le atali’i lea e tupuga mai i Samoa, mo lona soifua ta’alo fa’atauva i Kolisi i le Iunivesite o Washington, ma e fa lelei ta’amilosaga o ta’alo ai mo le Huskies. I lona tausaga lona fa o ta’alo pea mo le Huskies sa fa’ato’a ausia ai e Shelton ana pu’e e 94, e 53 lelei o ana pu’e ia e faito’atasi lava, 9 sacks, 17 pu’e maumau, 3 pa’u a le polo, ma le tasi le sao fa’asalavei. O iina sa ia mauaina ai le avanoa e ta’alo ai i le Au fili ALL-Pac-12 ma ausia ai foi e ia le avea ai ma totino o le First Team All American.

E ese mai lona avea ai ma tama ta’alo Football a le Huskies, sa avea fo’i o ia ma tama ta’alo i ta’aloga fa’aafeleti, lea sa ia ta’alo fa’atauva ai mo lana Iunivesite i le togiina o le pulu mamafa i ta’aloga a le Pac -12 i le tele o taimi na sailia ai siamupini mo le WSU.

I le taimi nei ua ta’alo fa’atasi nei Shelton ma le sui fa’ato’a sainia atu e avea ma wide Receiver a le Giants, le ali’i o John Ross mai le Iunivesite o Washington foi. O i la’ua fo’i sa potu fa’atasi fo’i i le nofotunau i le Iunivesite ae o lea ua ta’alo fa’atasi nei foi mo le Giants.

O le mea lona lima, ia silafia, o lenei ali’i o Danny Shelton o se alo e tupuga mai Samoa. O lona suafa atoa o Danny Sailileupumoni Shelton. O lona igoa Samoa e mimita ai le ali’i taalo, Saili le Upumoni, e tatau ona ia ausia lea tulaga i mea uma, ma amata a’oa’oga ae fa’aiu ane i le aoga maualuga a Auburn High School, lea sa ia maua ai le fa’ailoga mo le Offensive Lineman o le tausaga ma le Defensive Lineman o le tausaga, ma e fa’alua ona ia mauaina nei fa’ailoga a’o a’oga i le a’oga maualuga lea.