Tete’e nisi aiga Mageo fuafuaga e fausia le Falepuipui fou i ona laueleele

Pago Pago - AMERIKA SAMOA

Ua fa’aalia e nisi o le aiga o Mageo i le afioaga o Pago Pago lo latou teena o le fuafuaga a le malo e fausia ai le Falepuipui fou i luga o eleele o le aiga i le nofoaga ua taua o Autapini/Happy Valley.

O le alia’e mai ai o lenei mataupu i le 3 vaiaso talu ai, na fesoota’i mai ai nisi o le aiga o Mageo i le Samoa News e faaleo o latou lagona tete’e faasaga i lenei fuafuaga, ona o mafua’aga e tele latou te talitonu e le tatau ai ona fausia lenei galuega i fanua o le aiga.

Na taua e se tasi o sui o le aiga i le Samoa News le faateia o ia ma isi suli o le aiga o Mageo ina ua latou maua le tala ua amata ona faagasolo galuega mo le fausiaina o le Falepuipui fou i eleele l le aiga, e sui tulaga mai ai i le nofoaga o loo i ai le Toese i Tafuna i le taimi nei.

Na taua e le sui o le aiga e faapea, e le i talanoaina e le aiga potopoto lenei mataupu, e leai fo’i se maliliega autasi o le aiga e lisi atu fanua ma eleele o le aiga e fausia ai se Falepuipui mo le malo.

“O Pago Pago o le taulaga o Amerika Samoa, e faapefea la ona aumai le Falepuipui o loo taofia ai tagata solitulafono ma amio leaga e faatu i le Laumua o le atunu’u,” o le fesili lea a se tasi o sui o le aiga.

“O le nofoaga lea ua maua tala o le a fausia ai le Falepuipui fou, ua matua tumu i aiga o loo nonofo ai, e le talafeagai ona fausia ai se Falepuipui i nofoaga e to’atele tagata aemaise aiga ma fanau o lo o nonofo ai. O lo o i ai isi eleele o isi aiga o le atunu’u e mafai ona lisi e le malo mo lea fuafuaga, ae le taliaina e le to’atele o le aiga”.

O lagona lava fo’i ia e tasi na faasoa mai e isi sui o le aiga i le Samoa News e faatatau i lenei mataupu.

Na taua e se tasi o Tina o le aiga e faapea, o ituaiga mataupu faapenei, e i ai le aia tatau o tagata uma lava o loo nonofo latalata i le nofoaga lenei e faaleo ai o latou lagona. I lona talitonuga, e le talafeagai ona fausia se Falepuipui i Pago Pago.

“E tusa lava poo eleele e patino i lo matou aiga, ae tatau fo’i ona i ai se finagalo o le afioaga aemaise ai le atunu’u atoa, ae patino lava mo i latou e nonofo latalata i le nofoaga lea, ina ne’i tula’i mai ni faafitauli i se taimi mulimuli ane, ona aafia ai loa lea o le soifua maloloina o tagata,” o le saunoaga lea a le Tina.

Na toe faatepa e le Tina lea i le Samoa News le tele o faafitauli na tula’i mai i i tausaga ua te’a, i pagota e sosola ese mai le Toese ma latou faatino solitulafono e aafia ai le saogalemu o aiga. 

“O lea lava ou te manatuaina le isi pagota na sola i tua i se tausaga ua mavae ma ia faaoolima i se alii ave taxi ao fealua’i lea alii i le po e tau saili se tupe e tausi ai lana fanau. E oo mai i le taimi nei ua le toe aoga lea alii ave taxi i se galuega, ona o manu’a tuga na mafua mai i le taimi na faaoolima ai le alii pagota ia te ia i se agaese”.

“O ituaiga faafitauli la faapea lea e mafua ai ona ou tete’e i le fausia o se Falepuipui i Pago Pago i le nofoaga o loo tumutumu ai aiga, ae lelei le saili o se isi nofoaga e mamao ese mai i le vaega e nonofo ai aiga ma tagata, atonu e talafeagai lelei ai mo lenei atina’e”.

Na taua e nisi e alala i le nofoaga lea ua fuafua e fausia ai lenei galuega lo latou molimauina o loli ma masini o lo o aga’i atu i ai, e foliga mai o ni tagata faigaluega o loo taumafai e faatulaga se nofoaga e fausia ai se galuega tele.

O le tete’e ai o nisi o suli o le aiga o Mageo i lenei tulaga, ua latou tapenaina ai loa se pepa mo se sainigalima e saini uma ai suafa o suli o le aiga faapea ai aiga ma tagata o le afioaga ma le atunuu e tete’e i lenei galuega, ma le faamoemoe a mae’a ona faatino, ona tuuina atu loa lea i luga o le Ofisa o le ali’i Kovana mo sona finagalo.

E talitonu le Samoa News, o se tasi o fuafuaga vaai mamao a le faigamalo a Lemanu ma Talauega, o le saili lea o se isi nofoaga e fausia ai le Falepuipui o loo i Tafuna, ae fa’aaoga le nofoaga lea e fausia ai le Falema’i.

Na maua le avanoa e feiloa’i ai le Samoa News ma le Sa’o o le aiga o Mageo, le susuga i le Feagaiga ia Rev. Mageo Patolo Mageo e faatatau i lenei mataupu.

A o le i tuuina mai le finagalo o le Fetalaiga i le Launiu Saelua e tusa ai o lenei mataupu, na fa’aalia e Mageo lona faanoanoa i le gaioiga ua faia e nisi o lona aiga, e momoli tu ai le mataupu i le nusipepa e aunoa ma le fesiligia o ia i le mafua’aga ma le moni o lenei mataupu.

Saunoa Mageo e faapea, afai e fia malamalama lona aiga i lenei mataupu, e na o ia lava o le Sa’o o le aiga e manino ma malamalama ai le mataupu.

“E le maua i le Samoa News se tali o fesili o loo outou fia malamalama ai, e maua atu ia te a’u o loo tausia lo tatou aiga. O lenei lava ou te avanoa i taimi uma mo ni fesili ae leai ma se isi na susu mai e fesili mai,” o le saunoaga lea a Mageo.

I le mataupu e faatatau i le fausiaina o le Falepuipui fou, na faamanino e Mageo e faapea, e le i mautu pe ua pasia aloaia fuafuaga e tusa ai o lenei mataupu. O lo o faagasolo pea talanoaga ma feutanaiga malo ina ia taoto le mataupu i sona taotoga lelei.

Na faamaonia fo’i e Mageo, e le i talanoa lona aiga e faatatau i lenei ona o lea lava e faagasolo talanoaga ma le malo e le i mautu. Afai loa e mautu fuafuaga ma le malo ma ua finagalo le malo e lisi le fanua, ona momoli loa lea o le mataupu i le aiga ma talo se fonotaga e soalaupule ai le mataupu.

Na fa’aalia fo’i e le tofa a Mageo lona faanoanoa tele i nisi o le atunu’u e aofia ai ma nisi o Matai o le afioaga o Pago Pago, i lo latou aia lea i mataupu ma eleele e patino lava i le aiga o Mageo. I lona talitonuga, soo se mataupu lava e fitoitonu i le aiga o Mageo e aofia ai ma ona eleele, taatia pea mataupu ia e talanoa ma soalaupule ai le aiga, e leai se aia a se tasi poo le afioaga e tagofia ai fua mataupu ma eleele o le aiga.

“E tofu lava le aiga o le afioaga ma eleele, o meatotino na e pule ai lava le aiga ma le matai latou ia, e faapena fo’i i meatotino ma eleele o le aiga Sa Mageo i Pago Pago, e pule ai lava nao le aiga o Mageo,” o le saunoaga lea a le Sa’o o le aiga.

Saunoa Mageo e faamanino le tulaga o le eleele o lo o fuafua e fausia ai lenei galuega tele ma ia taua ai e faapea, o le nofoaga lea ua fuafua e lisi atu mo le malo mo le Falepuipui fou, e le o nofoia e ni tagata e leai fo’i nisi o le aiga o galulue ai.

O le fanua e taoto i le va o mauga i tua atu o le mauga o Autapini/Happy Valley, o iina o loo taoto ai le vanu pe tusa ma le 800futu lona maualalo, o se nofoaga e leai se isi o nofo ai i le taimi nei, e faigata fo’i ona oo i ai se tagata, o le fanua lena ua faamoemoe e lisi atu mo le malo mo le Falepuipui.

Saunoa atili Mageo e faapea, ua tele tausaga o taatia fanua o le aiga e le faato’aina, ae leai lava se isi sa mafaufau i ai, a’o lea ua taumafai e saili ni atina’e e manuia ai le aiga e ala i le lisi atu o ona eleele i le malo, a o lea foi ua tulioso mai lona aiga e tete’e ma taumafai e taofi galuega lelei mo le manuia o le aiga atoa.

Saunoa Mageo e faapea, o lona tiute o ia o le Sa’o o le aiga, na te saili auala e manuia ai lona aiga, e le gata mo le taimi nei ae faapena fo’i tupulaga mo le lumana’i. Sa ia faaalia manino lona faanaunautaiga o loo i ai, e le o se taumafaiga e manuia ai se toatasi poo ia foi o le Sa’o o le aiga, ae o taumafaiga e manuia ai le aiga atoa.

Sa ia faatepa lona aiga i le tele fo’i o isi aiga o le atunu’u i Tutuila nei ma Manu’a, o loo lisi atu a latou fanua e faatino ai galuega a le malo, ae totogi i ai e le malo tupe mo aiga.

“O se lagona faapena fo’i lea e taumafai atu i ai, ia manuia le aiga ma manuia fo’i tupulaga mo le lumana’i,’ o le saunoaga lea a Sa’o.

I le mataupu e faatatua i le pepa o le sainigalima lea o loo faagasolo i le taimi nei, na taua e Mageo e faapea, ua uma ona ia iloa taumafaiga a nisi o lona aiga  e ala i le sainigalima e tete’e ai i le faamoemoe, ma ia ia manatu fo’i e fa’agaioi pea aia tatau o tagata taitoatasi.

Ae i lona taofi, ua mae’a ona ia talanoa i nisi o le au matutua o le aiga e faatatau i lenei mataupu, ma ua fa’aalia fo’i e le to’atele o le au matutua lo latou lagolagoina o le faamoemoe.

O tagata o le aiga o lo o tete’e i lenei faamoemoe e pei ona saunoa Mageo, ua na o se vaega to’aitiiti lava e le manana’o e atia’e le aiga pe manuia fo’i ona tagata mo le lumana’i.