TALA O LE LALOLAGI

Pago Pago - AMERIKA SAMOA

FILIFILIA TAUSALA LALELEI SAMOA HAWAII 2021-22 - MS PENICIA JADE HUNKIN PENE

O le tauvaga tausala lalelei mo le Miss Samoa Hawaii sa faia ia Novema 05, 2021 i Honolulu Hawaii ua manumalo ai le tamaitai ia Penicia Jade Hunkin Pene. 

Mai le lua vaiaso na muamua na amata ai ona faia palotaga i luga o laina tafa’ilagi mo se tausala filifilia mo Samoa Hawaii, ma amata ai lea fa’amoemoe ia Oketopa 26, 2021.

O nisi tamaitai na tauva i lea fa’amoemoe e aofia ai Divine Mercy Sua Afia, Zoe Vaimanino Pomele, Seraiah Kealoha ma Asofaafetai November Timoteo.

Mo lea lava vaega o le tauvaga sa sailia ai e tausala ta’itasi le fa’ailoga fa’apitoa na fa’atauva i ai, poo ai e sili ana palota.

O le fa’asologa o e na fa’amau fa’ailogaina a latou taumafaiga i le tauvaga tausala lalelei Samoa Hawaii ua mautu mai ai fa’aiuga a fa’amasino filifilia ua manumalo ai Ms Penicia Jade Hunkin Pene i le tofi Tausala Lalelei Samoa Hawaii, ae tulaga lua ai Asofaafetai November Timoteo, tulaga tolu ai  Zoe Vaimanino Pomele, tulaga fa ai Divine Mercy Sua Afi’a ma le tulaga lima o le taumafaiga a Seraiah Kealoha.

ASIA E LE TA’ITA’I EKALESIA LDS LE MOTU SA MUA’I TULAUELEELE AI MISIONARE

O se vaega o le asiasiga a le ta’ita’i o le Ekalesia a Iesu o le Au Pa’ia o Aso e Gata Ai na malaga mai mo le suaina o le eleele e fa’atuina ai le Malumalu Sa i Amerika Samoa, ia asia fo’i e ia le ulua’i eleele o Amerika Samoa na afea ma papatisoina ai nisi o le atunuu e latou misionare i le tausaga e 1866.

O le sui mamalu sa malaga ma o Elder K. Brett Nattress mai le Pacific Area Presidency, ma na malaga fa’atasi ma Elder Fa’apito Auapa’au, le sui mamalu o le To’a 70 mo Amerika Samoa ma Peresetene Sonny Aiono o Ottoville.

“O le fa’afetai tele i le Atua ona o le soifua fa’atuatua o le Au Pa’ia ma latou faia le galuega tala’i atu.” O se tala lea a Nattress i lana lea malaga mai.

O le susuga le Epikopo o Aunuu Lotoa Lotoa JR. lea sa ia fa’ailoa mai ai, “Ua ese le fa’afiafiaina o matou loto ina ua asia i matou i lenei motu e ta’ita’i iloga o le Ekalesia, au aoga fo’i ia i matou uma lea asiasiga e fa’amalosi’au mai ai i le galuega.”

“Ona o le fa’amoemoe maualuga lava o le ta’ita’i e fia va’aia e ia atoa le eleele o lo’o fa’atautaia ai le ekalesia i Aunuu, o lea sa ia asia ai lava le motu ma savalia atoa le eleele o lo’o ua fa’amautu ai le lotu.”

“Sa faia le tali a le Ekalesia ma ua fa’aaogaina fo’i le talo ma le i’a, ua lauiloa ai Aunuu i le tatou malo.” O se tala ata lea a le aumalaga.

O lo ua fa’amauina fo’i le tele o fa’amatalaga a le mamalu o le Ekalesia sa latou asaina le gasu i lea taumafaiga mai le amataga se’ia oo fo’i ina toe fa’amautuina nei. Ua i ai ni tala ua amata fa’amautu mai, ona ua manatu le Ekalesia e toe fausia le malumalu fou.

O le susuga Lotoa Lotoa Jr, ua ia fa’ailoa atu ia Elder Nattress, “O a’u ua na’o se tausaga e tasi lau tautua ai i le Ekalesia ae o le taimi ua maua savavali fa’ata’amilo ai i le laufanua o le ekalesia, ua tele se mea ua ou iloa ai i le ekalesia ma ona fuafuaga o lo ua loma nei.”

“O le taimi la nei, o lo ua mae’a ou talanoa i la’u Uarota ina ia matou nofo sauni mo ni suiga tetele o le a matou feagai ai ma ia sauni o le a i ai le latou Malumalu Sa ma toe va’aia i nisi suiga i le ekalesia i Aunuu. E i ai o matou sao e fai i lea fa’atofala’iga tele.” O se tala mulimuli lea a Lotoa Lotoa Jr.

TAOFIA MATAUPU TAU LAFOGA TOTOGI A FAIFE’AU I SAMOA

Ua fa’ailoa i se lipoti i Samoa ua toe fa’amanatu atu e le vasega o Faife’au uma a le EFKS i le FAST le latou polomisi ina ia latou soloia le tulafono ua mae’a pasia e le Palemene i le nofoaiga ua te’a, lea e totogia ai lafoga a i latou, mai o latou alofa foa’ia e latou Ekalesia mo le tausiga o latou aiga.

Ua fa’ailoa mai e Palemia Fiame Naomi Mataafa, ua ia fa’atonuina le Matagaluega o Lafoga a le Malo ina ia toe iloilo toto’a i le tulafono ua pasia ma fa’amamaluina, ae maise lava i le aiaiga e tamau ai le totogia o lafoga a Faife’au uma i le atunuu.

O le susuga le Failautusi o le EFKS  Rev. Vavatau Taufao lea sa ia fa’ailoa maia, “O le polomisi e toe iloiloina le fa’ai’uga e totogia matou lafoga, ae le o le toe iloilo o le tulafono tau lafoga totogi pe fa’aleaoga le tulafono ua mae’a pasia.”

Ua fa’ailoa fo’i e Rev. Taufao, “Masalo o le mataupu autu lava lea na mafua ai ona malo le FAST i le palotaga o le tausaga lenei, o le latou fa’amoemoe e tula’i loa e fa’atautaia le Palemene, o le a latou latou fa’aleaogaina atoa lava le tulafono lea.”

I le vaiaso ua te’a sa mua’i fa’ailoa atu e La’auli Leuatea Schmidt, e tatau ona fesoasoani tagata uma i palotaga laiti o lo’o fa’atautaia nei, ina ia ausia e i latou le lua o vaetolu o le Palemene, e mautinoa ai ua mafai e i latou ona soloia le tulafono o lafoga totogi a Faife’au o loo ua mae’a pasia ma fa’amamaluina nei.

Ua fa’ailoa se taofi o Tuilaepa i le fonotaga, afai e fia manatu le FAST latou te soloia pe fa’aulu se suiga i le tulafono e mafai lava ona latou toe fa’atu mai se taofi e toe iloilo ai lea tulafono ma toe palotaina.

Ua fa’ailoa le manatu o le Failautusi a le EFKS, “Ua iloga mai ua tuumuli le FAST i le latou polomisi. Na fai mai lava e tula’i loa latou soloia lea vaega o le tulafono, ae o lea ua latou toe fa’atulagaina le iloiloga o le tulafono tau lafoga atoa.”

Peita’i ua fa’ailoa le taofi o Tuilaepa, “Pe afai e manatu le FAST e taofia le totogia e faife’au o latou lafoga, e sili ai la ona taofia atoa lava le toe totogia o lafoga mai tagata faigaluega uma  ma faipisinisi, ona o loa lea o le FAST e su’e mai se isi alagatupe e totogia ai pili a le Malo ma isi uma mea e fa’atupe i le atunuu.”

Peita’i na vave lava ona fa’alauiloa se fa’asalalauga fa’alaua’itele a le Customs & Revenue, lea ua fa’ailoa mai ai, o le fa’amamaluina o le tulafono tau Lafoga Totogi Tax Amendment Act 2017, ua taofia mo sina taimi lona fa’amamaluina  seia toe fa’alauiloa mai le fa’aiuga sa’o o lea vala o le tulafono tau Lafoga.