Taofi e Leoleo se alii i le faaoolima ae maua ai fualaau faasaina

Pago Pago - AMERIKA SAMOA

O le alii lea na pu’e faapagota e Leoleo i le masina na te’a nei ona o tu’uaiga i lona faaoolima i ni tagata se to’alua, ua molia nei o ia i lona le usitaia o tulafono tau fualaau faasaina, ina ua maua e Leoleo i totonu o lana ato tupe se pepa iila o lo o i ai vaega o la pauta faasaina o le aisa faapea ai ma se sikaleti mariuana se tasi ua uma ona taai.

Ina ua fesiligia e Leoleo le ua molia e faatatau i fualaau faasaina na maua ia te ia, na tali le ua molia, o fualaau faasaina na faatau mai i se alii ave taxi e masani ona la fetaui i le Fale Piliaki i Tafuna lea e masani ona latou tafafao ai i faaiuga o vaiaso.

Na taua e le malo i le latou tagi e fa’apea, o le taeao o le aso 19 o Oketopa, 2021 pe tusa o le itula e 4:47, na faafesootai ai e se ulugalii le Ofisa o Leoleo i Tafuna mo se fesoasoani, ona o se alii na la maua o loo tau togafiti le manu’a o lona ulu ma ona foliga i luma o le Ofisa autu o le Pulega o le Eletise ma le Suavai (ASPA) i Tafuna.

Na taua e le ulugalii i Leoleo, o laua na tamomo’e i le taeao lea ae la maua mai ai le tagata na manu’a o loo saofa’i i autafa o le alatele o loo mana’omia se fesoasoani. E to’atele Leoleo na tali atu i le valaau ma latou feiloa’i ai ma le ulugalii faapea ai ma le alii na manu’a e uiga i lenei mataupu. 

Na taua e Leoleo e le ulugalii i Leoleo e fa’apea, pe tusa o le te’a laititi o le itula e 4:40 i le vaveao o le aso e pei ona taua, na la vaaia ai se ali’i talavou ae tino maualuga o lo o aga’i mai i luga o le alatele ma laulau vavale solo. Na faaauau le la savaliga i le isi itu o le auala e aunoa ma se la manatu o se mea e ono tula’i mai.

Ae ina ua la toe fo’i mai i le isi itu o le auala, na la tau mai ai loa i le alii o loo manu’a lona ulu ma ona foliga o loo saofa’i i autafa o le alatele o loo tau togafiti ona manu’a.

Na fa’ataalise atu Leoleo e saili le itu atoa i Petesa pe latou te maua ai se ali’i talavou tino maualuga o lo o savali i luga o le alatele. Na fiu Leoleo e ta’amilo latou te le i maua se isi, ona toe taamilo atu loa lea i luma o le vaega o loo tu’uaia na tula’i mai ai le fa’alavelave, ma latou vaaia ai se tagata faigaluega a le kamuipani i’a o lo o nofonofo i se Fale Fa’atali pasi e fa’atali lana pasi e alu ai e faigaluega.

Na fesiligia e Leoleo la tagata faigaluega lea ma ia faamatala ai fo’i mea uma na ia vaaia e uiga i lenei fa’alavelave. Na faamaonia e le tagata faigaluega i lea i Leoleo vaaiga uma na molimauina e le ulugalii, e le gata o le laulauvavale o le alii talavou na ‘ona ae na ia lu’i fo’i ali’i Leoleo, kiki le faitoto’a o le pa toe taumafai e fa’aleaga se faailoilo o le alatele (road sign).

Ina ua siliga le sailiga a Leoleo, na latou toe fo’i ai loa e fa’atino a latou galuega masani, peita’i, ina ua latou aga’i atu i luma o se tasi o Faleoloa i le nofoaga lava lea i Tafuna lava, lea e sosoo ma le isi ofisa o le malo, ma vaaia ai se alii talavou pe tusa ma le 24 tausaga o loo manu’a lona ulu.

Na faailoa ane e le alii lea i Leoleo se faalavelave na tula’i mai i ni nai minute e le i mamao atu, ina ua faaoolima se ali’i tino masoa ia te ia e ala i lona tu’i o lona ulu i se mea malo o loo uu i lona lima ma faaauau lava ona tamo’e aga’i atu i le itu i sisifo.

Na faamatala e le alii lea i Leoleo e faapea, o ia na fa’atino lana galuega masani i taeao uma lava, o le faamama lea o le otaota i luma o le Faleoloa ma la savavali e fai sina faamalositino o le taeao.

A o pisi e faamama le otaota i luma o le faleoloa, na faafuase’i ona ia vaaia se ali’i tino maualuga ua aga’i atu i le vaega o loo tu ai, o lo o ee i luga ma leotele. Na faateia o ia ina ua tu’i e le ali’i lona ulu ma pau ai i lalo. A o ta’atia i lalo, na savali mai le ali’i talavou tino maualuga lenei ma kiki lona tua.

O gaioiga uma sa faia e le ua molia na mafai ona pueina i masini pu’eata a le Faleoloa, lea na mafai ona maimoa i ai Leoleo ma maitau uma gaioiga a lenei ali’i. O le ali’i sa i luga lona ata o masini pu’eata a le Faleoloa, o ia lea o Mark Taufiti, le ali’i o lo o molia i lenei mataupu.

Na faailoa e le alii talavou na manu’a i Leoleo vaega o lona tino na manu’a ina ua faaoolima le uam olia ia te ia. O ia vaega e aofia ai ona foliga, o lona lima ma lona papatua. Na talosagaina e Leoleo le fesoasoani a le EMS ma faia ai loa togafitiga faanatinati mo le Tama Asia na aafia i lenei fa’alavelave.

E to’alua fo’i i isi tagata na savavali i luga o le alatele i le taimi lea o le vaveao na fesiligia e Leoleo e uiga i lenei mataupu, ma la faailoa ai le vaaiga sa la molimauina i le taimi na la savalia ai le alatele. 

Na taua e le moilmau muamua e fa’apea, ao savali mai mo lana faamalositino i le taeao e pei ona fesiligia, sa ia molimauina ai se alii talavou ae tino maualuga o lo o ee ma laulau vavale solo i luga o le alatele, i luma tonu lava o le Faleoloa na tula’i mai ai le faalavelave E le i umi ae ona vaaia ua savali atu le tagata lea ma faaoolima i se alii talavou sa tu i luma o le faleoloa ma faamama le otaota.

O lona popole tele i lona saogalemu na mafua ai ona vave lana savali ese mai le nofoaga na tula’i mai ai le fa’alavelave. 

Na faamaonia e le molimau lona lua le faamatalaga a le molimau muamua. Na taua e le ali’i lea e fa’apea, sa ia vaaia se ali’i talavou sa ia ofuina se mitiafu mumu (o le ofu lea o Taufiti na ofu i le taeao lea), o ia ta tu’i faailoilo o le alatele ma palauvale solo i tagata.

Na faigata ona iloa e Leoleo poo ai le igoa o le alii o loo i ai lona ata i luga o le pu’eata a le Faleoloa, ae o le ta’avale lea na afe i luma o le Faleoloa i le taimi lava lea o le vave ma momoli atu ai le susuga a Lefiti, na faigofie ai loa ona iloa e Leoleo le tagata e ana le ta’avale. 

Na aga’i Leoleo i le fale o le tagata e ana le ta’avale ma fesiligia o ia i le mafua’aga na afe ai lana ta’avale i luma o le Faleoloa i le taimi lea o le vaveao, ae faailoa ane e le Tina e ana le ta’avale, o lana tama Taufiti, o lo o moe fo’i o ia i totonu o le fale.

Na piki e Leoleo le susuga a Lefiti mai lona fale i le taeao lea ma auina atu loa i le Ofisa o Leoleo i Tafuna mo isi suesuega atili e uiga i lenei mataupu.

Ina ua fesiligia e Leoleo ia Lefiti e uiga i lenei mataupu, sa ia taua ai e fa’apea, o lona ita i lona to’alua na mafua ai ona savali mai i luga o le alatele ma laulau vavale solo i tagata feoa’i i lea vaveao, sosoo ai ma lona faaoolima i se alii sa nofonofo i luma o le Fale Faatali pasi o loo faafesaga’i ma le Ofisa autu o le ASPA i Tafuna, atoa ai ma lona faaoolima i se isi alii talavou na tu tu i luma o se Faleoloa i le nofoaga lava i Tafuna.

A o le i auina atu Taufiti i le Ofisa o Leoleo, na saili e Leoleo lona tino poo i ai ni aupega mata’utia. I totonu o lana ato tupe sa i totonu o le taga o lona ofu sa fai, na maua ai e Leoleo se pepa iila o loo i ai vaega o le pauta faasaina o le aisa, ma se sikaleti mariuana e tasi ua uma ona taai.

Ina ua fesiligia e Leoleo le ua molia e faatatau i fualaau faasaina na maua ia te ia, na ia ioeina ai, o fualaau faasaina na faatau mai i se tasi o ana uo ave taxi. Sa ia taua atili fo’i i Leoleo, o le mafua’aga lea o le la vevesi ma lona to’alua, e le fiafia lona to’alua i lona tagofia o fualaau faasaina.

O le masina na te’a nei na tula’i ai le susuga a Taufiti i luma o le Faamasinoga Faaitumalo.

Ua molia nei o ia i le moliga o le umia faasolitulafono o vaega o le pauta faasaina o le aisa, faapea ai ma le moliga e tasi o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000; faapea ai ma le moliga mamafa o le faaoolima i le tulaga lua, o se solitulafono D i le faatulagaina o solitulafono mamafa, lea e mafai ona faasala ai se tasi i le Toese mo le umi e mafai ona oo atu i le 5 tausaga i le Toese, pe faasala fo’i i le salatupe e mafai ona oo atu i le $5,000, pe faasala fo’i i faasalaga uma ia e lua. 

O lo o molia fo’i Taufiti i le moliaga o le faatupu vevesi i nofoaga faitele, o le vaega B lea o solitulafono mama.

E $10,000 le vaega tupe lea ua fa’atulaga e tatala ai i tua le ua molia, a o faagasolo ai taualumaga o lana mataupu i luma o le Fa’amasinoga. O le vaiaso fou lea ua fa’atulaga e faia ai le ulua’i iloiloga o le mataupu a Taufiti i luma o le Fa’amasinoga Faaitumalo.