Lipoti mai le Komiti Galulue Koviti-19 a le malo o Amerika Samoa

PAGO PAGO--I se pepa o fa’amatalaga i le aso Lulu o le vaiaso lenei, sa fa’alauiloa ai e le Komtiti Galulue o le Koviti-19 nisi o mataupu sa talanoaina i le fonotaga a le komiti sa faia i le aso Gafua. 

Tatala le fonotaga i le saunoaga faafeiloa’i a le Sui Aloaia o le Kovana (GAR) a’o le Taitaifono o le Faatino Galuega KOVITI-19, Afioga i le Sui Kovana Talauega Ale i le upegatafailagi a’o kuarenitini.  

Sa ia saunoa e faatalofa i sui mamalu o le Fono Faitulafono, Ofisa o le Faipule i Uosigitone, ma sui uma o le fono a le Komiti Galulue.  Faaalia lona agaga faafetai i totino o le komiti i le auai ma le sapasapaia pea o le faamoemoe autū ia malu puipuia le atunuu mai le faama’i oti.  

O nisi mataupu na ia saunoaina e aofia ai le fuafuaga tele o le 3-aso mo le una’iga o tuipuipui i le vaiaso muamua o Tesema, sauniuniga mo le malaga mai Hawaii ia Novema 18, ma se teuteuga o le poloa’iga tulaga faafuase’i e lagolagoina ai pisinisi faalotoifale. 

Talosaga ia Talauega i le Komiti Galulue e silasila ma tapena aga’i i se isi laasaga o malaga i le va o Amerika Samoa ma le Iunaite Setete, aemaise le lē gafatia ona faatupeina pea kuarenitini mo pasese i le taunuu mai.  I ripoti lata mai na ta’ua ai ua silia le $18 miliona le tau o malaga togipau o le toe taliu mai, nofoaga kuarenitini, ma taumafataga. 

Saunoa le Susuga i le Loia Sili Fainuulelei e faailoa taumafaiga a le malo e lagolago i le finagalo o le Kovana ia ausia le 90% o le mamalu o le atunuu e tuipuipuia.  O le mafuaga lea o le faatulafonoina o le atoatoa o tuiga o tagata faigaluega o le malo ia Tesema 15.  O i latou e le usitaia lenei poloaiga o le a iai se taofiga lē tumau mai a latou galuega.    

I le tulaga o tuipuipuia, na folasia e Dr. Aifili Tufa, Foma’i Faapitoa o Faama’i Pepesi, i fuainumera faamauina o  tuipuipui i lo tatou teritori.  O loo augani mai pea i le tāua o le tuipuipuia ma se silasila i motu o Palau i le Pasefika ma le tulaga sa’oloto o ona tagata ma nisi e asiasi atu e aunoa ma se faanofoesea pe iai se tasi ua pesia i le lautele.  Ua mafua lea sa’olotoga ona o le maualuga o le numera o e ua tuipuipuia i Palau.  Faaopoopo Dr. Aifili i le toe faatepa i le pepesi o le misela i Amerika Samoa i le faai’uga o le 2019, ma lo tatou ausia o sini o le tuipuipuia. “Afai na tatou mafaia le 90% i ni nai masina a’o osofia tatou i le misela, tatou te mafaia fo’i i le tauiviga ma le KOVITI-19,” o le saunoaga faamalosi lea a Dr. Tufa.

Tala Lata Mai o le Kuarenitini 

E le eseese ma isi malaga mai Hawaii, e 1 le pasese na faamaonia ua maua i le KOVITI-19 i le SUEGA #1 o le malaga ia Novema 1.  E toatolu (3) pasese o tagata na maua muamua i le KOVITI.  O le toatasi lea na faamaonia ua atoatoa ona tuipuipuia ma ua faanofoesea nei i le maota e patino mo ia tulaga.  

O i’uga o le SU’EGA #2 ia Novema 8, ua faamaonia ai e mamā uma i latou sa su’eina i le KOVITI.  Na faasoa fo’i Dr Tufa e amata atu i le malaga lenei, o le a lē faamalosia le aiaiga e faaauau mai le 10 i le 14 aso taofia o i latou sa maua i su’ega. 

Sa faailoa e le Pule o le Hawaiian Airlines i Amerika Samoa o Tuli Fruean le faafitauli i le umi na’ua ona faatali alii pailate i malaga talu ai nei ona o le to’atele o pasese e faaaogaina nofoa tulei.  Talosaga mai Fruean i le Komiti Galulue ma aiga e taoto mai i le aufaigaluega a le vaalele ua masani i pasese o nofoa tulei.  E vave ai foi ona tuuvaa le malaga.