Molia se alii i lona faia o uiga mataga i se tamaitai talavou

Pago Pago - AMERIKA SAMOA

Ua taofia nei i le Toese i Tafuna se alii mai Petesa ona o tu’uaiga i lona faia lea o uiga mataga i se tamaitai e talavou i lalo o le tulafono. 

O lea tamaitai e pei ona taua e le malo i le latou tagi, na sola ese mai o ia i lona aiga, ae fetaui ai ma le alii ua molia i se vaega o le taulaga i Fagatogo, ma alia’e mai ai loa le solitulafono e pei ona tu’uaia ai lenei ali’i.

Ina ua pu’e faapagota e Leoleo le alii ua molia, na maua i ai i le taga o lona ofu sa faia se pepa iila o lo o i ai vaega o le pauta faasaina o le aisa.

O le masina na te’a nei na tula’i ai le susuga a Melvin Talosaga i luma o le Fa’amasinoga Faaitumalo mo lana ulua’i iloiloga.

E 2 tagi ua faila e le malo faasaga ia Tausaga.

I le tagi muamua, ua molia ai o ia i moliga e 3 o le feusua’i ma se tamaitai e talavou i lalo o le tulafono; faapea ai ma moliga e 3 o le faia o amioga faasotoma, o le vaega B lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga.

I le tagi lona lua faasaga ia Tausaga, ua molia ai o ia i le moliga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le umi e le itiiiti ifo i le 5 tausaga ae le sili atu i le 10 tausaga, pe faasala fo’i i le salatupe e le silia i le $20,000, poo le faasala foi i faasalaga uma ia e 2.

E $30,000 le vaega tupe lea ua faatulaga e le Fa’amasinoga e tatala ai i tua le ua molia. 

Afai ae tatala o ia i tua, e le mafai ona ia toe taumafai e faafesootai le tamaitai na aafia i soo se auala, poo lona taumafai foi e faafesootai nisi o lona aiga, a ia avea o ia ma tagatanu’u e tausi i tulafono a le malo i taimi uma, ma aua nei taumafai e tuua le atunuu e aunoa ma se faatanaga a le Fa’amasinoga.

O le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

O le aso 28 o Setema 2021 e pei ona taua e le malo i le latou tagi, na aga’i atu ai se ulugalii i le Ofisa o Leoleo i Tafuna e faila le la talosaga i le Ofisa o Leoleo mo se fesoasoani e tau sailia ai le la tama teine e 16 tausaga le matua ua faatele ona sola ese mai i lo latou aiga. 

Ae le gata i lea, na taua ai fo’i e le ulugali’i i Leoleo i le taimi lea, popolega o loo ia tei laua, ona o masalosaloga i le mafuta lea o le la tama teine na sola ese mai le aiga ma se alii e suafa o Melvin Talosaga.

Na taua e le ulugali’i i Leoleo e faapea, e le o se taimi muamua lenei ua sola ese ai le la tama teine mai lo latou aiga. Na amata mai lava lenei mea ina ua faatoa 13 tausaga o le tamaitai lenei, lea lava ua atoa lona 16 tausaga ae o lo o fai pea lava lana masani e sola ese mai i lo latou aiga pe ta’i 3 i le ta’i 4 aso e alu ese ai ma nofo solo i fale o ana uo, ona faatoa toe fo’i atu lea i lo latou aiga. 

Na taua atili e le ulugalii i Leoleo e faapea, e i ai se Tina mai Petesa sa telefoni atu ia te i laua ma faailoa atu le fale o le aiga o loo nofo ai le la tama teine, o le fale lea o le susuga a Talosaga.

O le aso na sosoo ai, na aga’i atu ai loa Leoleo Suesuse i Petesa i le fale o le Tina lea na ia logoina le ulugalii e faatatau i le fale o loo i ai le tamaitai o loo tau sailia e ona matua. Na maua le Tina lea ma ia faailoa loa i Leoleo Suesue le fale o Talosaga, o iina lea o loo nofo ai le tamaitai o loo tau sailia, poo le tamaitai na aafia i lenei mataupu.

Na taunuu Leoleo Suesue i le fale o Talosaga ma latou maua atu i ai le tamaitai na aafia. Na faailoa e Leoleo Suesue ia Talosaga le mafua’aga o le latou oo atu i lona fale, o le tau sailia lea o se tamaitai e 16 tausaga le matua na sola ese mai i lona aiga i Tafuna, ma o loo maua ripoti o loo nofo i lona fale.

Na ta’utino Talosaga i Leoleo Suesue, o loo i ai i totonu o lona potu le tamaitai o loo tau sailia. 

Na sau i fafo le tamaitai ma tuu atu loa e Leoleo Suesue i aao o ona matua, ma faia ai loa le faaiuga o le a latou toe aga’i atu i le Ofisa o Leoleo i Tafuna mo le faatalatalanoaina o lenei mataupu. 

Na faailoa e Leoleo Suesue ia Talosaga, e mana’omia lo latou talanoa e faatatau i lenei mataupu, ma e tatau ona latou aga’i atu i le Ofisa i Tafuna mo le faatalatalanoaina atili o lenei mataupu. 

Ina ua fesiligia e Leoleo Suesue le tamaitai na aafia e tusa ai o le mafua’aga o lona sola ese mai lona aiga, na ia taua ai lona le fiafia i ona matua i le otegia soo o ia e faatatau i lana uo o Talosaga.

Na taua e le tamaitai na aafia i Leoleo Suesue e faapea, ua silia i le 10 masina talu ona la masani ma Talosaga. O le ulua’i taimi na la masani ai o luga lea o le pasi, sosoo ai loa ma le la faamasani i luga o le Facebook ma le telefoni, seia oo lava i le tauanau o ia e Talosaga e alu atu i lona fale i Petesa la te eva ai.

O le masina o Aokuso o le tausaga nei e pei ona taua e le tamaitai na aafia i Leoleo, na amata ai loa ona valaau atu lana uo ia te ia e alu atu i lona fale i Petesa la te eva ai. 

O nisi aso, e vave alu ese ai mai le aoga ae aga’i atu i le fale o lana uo i Petesa ma la tafafao ai, afai e umi se la tafaoga ua tuai ona alu i le fale, ona moe ai lava lea i le fale o lana uo, pe nofo ai fo’i mo aso e 3 pe 4 ona faatoa toe fo’i lea i lo latou aiga.

Na taua atili e le tamaitai na aafia, o taimi uma e moe ai i le fale o lana uo, na te le faailoaina ai i ona matua poo fea o loo i ai, e le mana’o fo’i e ta’u i ona matua le nofoaga o loo i ai, ina ne’i o atu ona matua e saili mai o ia.

O le masina o Aokuso e pei ona taua e le tamaitai na aafia i Leoleo Suesue, na amata ai ona la feusua’i ma Talosaga i lona lata loto malie. Sa ia faailoa ia Talosaga, o ia e 16 ona tausaga, ae o Talosaga e 28 ona tausaga.

Ao lei auina atu e Leoleo le ua molia i le Ofisa i Tafuna mo le faatalatalanoaina o lenei mataupu, na saili e Leoleo lona tino na maua ai se pepa iila o lo o i ai vaega o le pauta faasaina o le aisa. Ina ua fesiligia o ia e Leoleo Suesue le ua molia e tusa ai o fualaau faasaina sa maua ia te ia, na tali le ua molia, o fualaau faasaina na aumai i lana uo e fa’aaoga mo ia lava.

Ina ua fesiligia Talosaga e faatatau i le mataupu o lo o aafia ai le tamaitai na sola ese mai i lona aiga, na ta’utino le ua molia, sa alu atu le tamaitai na aafia ma moe i lona fale mo po e 3, peita’i, e le o ia le mafua’aga, o le loto faitalia lava o le tamaitai na mafua ai ona moe i lona fale.

Na taua e le ua molia e faapea, na te’i i le aso 19 o Setema ina ua telefoni atu le tamaitai na aafia ma fai atu ia te ia, pe mafai ona alu atu la te momoe i lona fale i le aso e sosoo ai, ae na ia tali i ai, e mafai ona alu atu la te tafafao ae le mafai ona moe i lona fale, ina ne’i su’e o ia e ona matua.

Na ioe le ua molia e tusa ai o tu’uaiga faasaga ia te ia, e pei o le faiaiga ma le tamaitai na aafia ao la momoe ai i lona fale i po e 3 i le masina o Aokuso faapea ai ma le masina o Setema. 

Sa ia taua atili i Leoleo, na malie atoatoa le tamaitai na aafia i taimi uma la te fai’aiga ai, na te lei faamalosia fo’i o ia i soo se mea.

O le tausaga e 2014 na ta’usala ai e le Faamasinoga Maualuga le susuga a Talosaga i le moliaga o le faaoolima i le tulaga lua, faapea ai ma le umia faasolitulafono o fualaau faasaina o le aisa, ma poloaina ai o ia na te tulia masina e 20 i le Toese i Tafuna, o se tasi lea o tuutuuga o lana nofovaavaaia e 5 tausaga.

O le moliaga e pei ona ta’usala ai le ua molia, na afua mai ina ua taofi e Leoleo se ta’avale sa ia faafoeina ae maua ai fualaau faasaina i totonu.