Saunia Kovana pili a le Fono sii ai totogi kovana ma le lutena kovana, ma alauni a le Fono

Pago Pago - AMERIKA SAMOA

O le aso 14 o Oketopa na sainia ma fa’amonia ai e le afioga i le Kovana Sili, Lemanu Peleti Palepoi Sialega Mauga, le pili a le Senate ua ma’ea pasia e le Fono Faitulafono e si’i ai totogi fa’aletausaga o le kovana ma le lutena kovana, fa’atasi ai ma le si’itaga o alauni (office expense allowance) mo sui o le Fono Faitulafono.  O le alauni a senatoa ma faipule o le tupe lea e faaoga mo a latou galuega fa’a Fono Faitulafono.

TOTOGI KOVANA & LUTENA KOVANA

O le tulafono fou, e pei ona saunia e Lemanu, ua sii ai le totogi o le kovana sili mai le $85,000 i le tausaga i le $120,000, ae o le lutena kovana si’i mai i le $75,000 i le $100,000. 

O lo’o fa’ailoa i fa’atomuaga o le tulafono le tele o galuega a le kovana ma le lutena kovana ua fa’aopoopo i o la tiute ona o le Koviti-19. 

ALUNI MO SENETOA MA FAIPULE

O le tulafono fou, e pei ona sainia e le kovana, e si’i ai alauni a senetoa ma faipule mai le $30,000 i le tausaga i le $45,000 i le tausaga. O alauni a le Peresitene o le Maota Maualuga ma le Fofoga Fetalai o le Maota o Sui ua si’i mai i le $40,000 i le $60,000 i le tausaga. 

O le fa’atomuaga o le pili, o lo’o faailoa ai e faapea, o senetoa ma faipule o le Fono Faitulafono, e i ai ma isi lu’itau o loo feagai ma latou, ona o lo’o fau pea le maota Fono fou, e leai ni o latou ofisa e faia ai a latou fonotaga. 

Me e tatau lava ona fa’aavanoa se mea o latou maota ma laoa poo saili foi o ni fale’aiga e faataunuu ai a latou pisinisi. “O lea la faiga, e alagatatau ai ona fa’aopoopo o latou alauni e fai ai ia mea,” o se vaega lea o le pili. 

O lo’o taua foi i le fa’atomuaga e fa’apea, o le a faaopoopo pea tiute ma galuega a o tatou ta’ita’i i le vaega Fa’amalosi Tulafono ma le Fono Faitulafono a o agai atu pea le lalolagi i luma i taumafaiga uma e fofo ai ma tauivi mo le Koviti 19. 

Ona o mafuaaga ua ta’ua, ua alagatatau ai ona si’i o totogi o le Kovana ma le Lutena Kovana, fa’apea ai ma tupe fa’aaoga mo Senetoa ma Faipule ina ia o gatasi ma a latou fatuaiga tausi.

O le fa’atupeina o nei si’itaga mo le tausaga tupe lenei 2022, e sau mai le $1 miliona tala fa’atulagaina mo le Fono Faitulafono i le tupe fa’aopoopo a le malo mo le tausaga tupe 2022. 

Ae mo tausaga i le lumana’i, e fa’atupe i alagatupe paketi masani a le Fono Faitulafono ma le Vaega Fa’amalosi Tulafono i tausaga ta’itasi.