Tete’e le tamaitai i tu’uaiga o le faia o amioga tau faavalea

Pago Pago - AMERIKA SAMOA

Ua teena e le tamaitai o Mulioaiga “INA” Tupulua moliaga faasaga ia te ia e aofia ai le gaoi ma le tau faavalea, ina ua tula’i i luma o le Fa’amasinoga Maualuga i le taeao ananafi. O le masina o Tesema lea ua faatulaga ai le ulua’i iloiloga o le mataupu a Tupulua, ae o le tausaga e 2026 lea ua faatulaga e faia ai le faaamasinoga autu o lenei mataupu.

Ua molia e le malo Tupulua i moliaga mamafa e 2 e aofia ai le moliaga e tasi o le gaoi faapea ai ma le moliaga e tasi o le faia o gaioiga tau faasese ma le tau faavalea, o le vaega C lea o solitulafono mamafa, lea e mafai ona faasala ai se tasi i le Toese mai le umi e oo atu i le 7 tausaga, pe faasala foi i le salatupe e mafai ona oo atu i le $5,000, pe faasala foi i faasalaga uma ia e lua.

O le aso Lua o le vaiaso nei na faatulaga e faia ai le iloiloga faapitoa o le mataupu a Tupulua i luma o le Fa’amasinoga Faaitumalo, ma maua ai le avanoa o le malo e folasia ai a latou mau e lagolago ai tu’uaiga ua soli le tulafono, ma mau e lagolago ai o Tupulua o loo tu’uaia i le soliga o le tulafono.

Ae ina ua valaau le mataupu, na faailoa e le Loia Fautua a Tupulua i Michael White le malie o le ua molia e taofi le faataunuuina o lea iloiloga, ae tuu sa’o atu loa lana mataupu i luma o le Fa’amasinoga Maualuga e faatulaga ai sona faamasinoga autu/

O le aso Lulu na te’a nei na tula’i ai Tupulua i luma o le afioga i le ali’i Fa’amasino Sili lagolago ia Fiti Sunia, ma ia teena ai le tagi a le malo faasaga ia te ia. 

TAGI A LE MALO

E pei ona taua e le malo i le latou tagi e faapea, o le aso 25 o Iuni o le tausaga nei na talosagaina ai e se tagata faigaluega a le Fa’amasinoga se fesoasoani a le Vaega e gafa ma suesuega o mataupu tau Lotoifale a le Ofisa o Leoleok, mo le suesueina o le mataupu o loo aafia ai se tina mai Leone, lea ua tele sana vaega tupe ua ma’imau i amioga tau faavalea a nisi o tagata o lo o faaaogaina fesootaiga i luga o initaneti ma latou faaaoga ai igoa o isi tagata e aofia ai ma le suafa o “Elvis Patea”.

Na manino i suesuega a Leoleo, o le masina o Me o le tausaga e 2020 seia oo mai i le masina o Aperila o le tausaga lenei 2021 na faatinoina ai lenei solitulafono. Ae i le faaiuga o suesuega na manino ai, o le tamaitai ua molia ia Mulioaiga “INA” Tupulua, o ia lea o loo faia lenei galuega o le faaaoga o igoa o tagata eseese e tau faavalea ai le Tina na aafia i tupe, ma leiloa ai le silia i le $19,000 le tupe a le Tina na aafia.

O lenei gaioiga tau faavalea na amata ina ua imeli tagata i le Tina na aafia ma faailoa i ai, o lona igoa o “Jason Laumoli” (J.L), o ia o se Loia o loo galue i Samoa, ma o lo o ia tauaveina lana mataupu e tusa ai o sana solitulafono na aafia ai i se taimi na malaga atu ai i Samoa.

Na tali le Tina na aafia i le imeli e faapea, e leai se taimi na ia aafia ai i se solitulafono ao i ai i Samoa i lana malaga lata mai nei, ae talu ai lona le mana’o e saisaitia o ia i le tulafono pe a toe malaga atu i Samoa, na ia talitonuina ai le imeli a J.L ma ia malie ai loa i tuutuuga uma lava e pei ona faatonu atu e J.L ia te ia e fai, e aofia ai le totogi atu o tupe e totogi ai pili a le Loia i taimi uma e tula’i ai i le Faamasinoga i Samoa mo lana mataupu.

E 6 masina o faia le masaniga a J.L ma le Tina na aafia i luga o le imeli, ma ua oo lava i le ituaiga mafutaga o le ave e le Tina na aafia o ma ona ata telenoa i luga o le imeli aga’i ia J.L. O taimi uma e mana’o mai ai J.L i le Tina na aafia i se tupe, e alu ai le Tina lea ma momoli le teutusi o loo i ai le tino i tupe e $300 pe sili atu foi i le Faleoloa Asia i Futiga.

O isi taimi, e talosaga ai le Tina na aafia i lona tausoga o Tupulua (le ua molia), pe mafai ona alu e momoli le teutupe i le Faleoloa, e lelei Tupulua e fai lana ta’avale. Sa malie i ai Tupulua ma alu loa momoli le teutusi.

Ua mae’a le suamalie o upu ma pepelo i le va o J.L ma le Tina na aafia, ma ua amata fo’i ona tau masalosalo le Tina. O le mafua’aga lea na ia imeli ai loa ia J.L i le isi aso ma fai i ai, o le a faamuta aloaia le la mafutaga.

O le aso lava fo’i lea na maua ai e le Tina na aafia se imeli mai ia J.L, o lo o faailoa atu ai le suia o le igoa o lana Loia o loo tula’i mo ia i Apia, mai ia J.L ia “Elvis Patea” (E.P). E lei umi se mafutaga ma E.P ae toe maua e le Tina na aafia le isi imeli mai ia J.L, e faailoa atu ai le suia o lana Loia mai ia E.P aga’i ia “Cristine Garvey” (C.G). E tusa ma le 4 masina le umi o le mafutaga ma le masaniga a le Tina na aafia ma C.G, ma alu atu ai fo’i se vaega tele o lona tamaoaiga.

Na taua e le Tina na aafia i Leoleo se taimi o le tausaga lenei na ia maua ai se imeli mai ia C.G, ma ia faailoa atu ai, o ia o le to’alua muamua a J.L, ma ua ia maua uma fo’i ona ata telenoa na lafo atu ia J.L.

Na fai C.G i le Tina na aafia, afai na te le totogiina atu se tupe ia te ia, o le a ia faasalalauina ona ata telenoa na lafo atu i le telefoni a J.L. E leai se tupe na lafo e le Tina na aafia e tusa ai o le faatonuga a C.G.

I le masina lava o Aperila o le tausaga nei, na maua ai e le Tina na aafia se imeli mai ia Tupulua, lea na fesili atu ai Tupulua ia te ia pe moni na alu i le Ofisa o Leoleo e faatalanoa lana mataupu e faatatau ia J.L, E.P ma C.G. Na tali le Tina na aafia i le imeli a Tupulua, e leai se taimi na alu ai i se Ofisa o Leoleo e faatalanoa ai lenei mataupu.

Na toe imeli Tupulua i le Tina na aafia ma fai i ai, e mafua ona ia fesili, ona o C.G ma E.P ua malaga i laua i fafo, ae o J.L o loo loka i le Falepuipui.

Na oso masalosaloga a le Tina na aafia i le imeli a Tupulua na avatu ia te ia, atoa ai ma le tele o lana vaega tupe ua ma’imau. Na maua le avanoa e fesiligia ai e Leoleo ia Tupulua e uiga i lenei mataupu, lea na ia malie ai loa e tuuina atu sama faamatalaga tusitusia i Leoleo.

Na taua e Tupulua i Leoleo e faapea, na ia iloa lelei vaivaiga o le Tina na aafia, e faigofie ona gau lona loto i lona fia mafuta atu i alii e feiloa’i ma talanoa i ai, ona ia manatu ai loa lea, na faia le auala lea e maunu mai ai ni tupe e fesoasoani ai i lona aiga, talu ai, e na o lona to’alua e faigaluega, e le lava fo’i lana siaki e tausi ai le la aiga.

Na maua e Leoleo faamaumauga o imeli uma lava ma fetusiaiga i le va o Tupulua ma le Tina na aafia, lea e tusa ma le 300 itulau le tele, ma le ova i le 150 itulau o tusi i luga o le messenger. Na mafai foi e Leoleo ona maua mai faamaumauga mai le teugatupe a le Tina na aafia, o loo taua ai tupe uma sa tala talu mai le masina o Me o le tausaga na te’a nei seia oo mai ia Aperila o le tausaga nei, i le aofai e $19,270, o le tupe ma lea na goto i le taga a Tupulua i lana gaioiga tau faavalea sa faia ia te ia.

Na ta’utino Tupulua i Leoleo, o ia lava e toatasi na faia imeli e ta’u ai le igoa o J.L, E.P ma C.G. 

I le faaaogaina o le igoa o J.L i lenei faiga tau faavalea, e $6,900 le tupe a le Tina na aafia na gau ai. O le faaaogaina o le igoa E.P, e $8,860 le tupe a le Tina na aafia na ma’imau ai. O le faaaogaina o le igoa o C.G, e $3,450 le tupe a le Tina na aafia na gau ai. O isi tupe na fa’aaoga  e le Tina na aafia e fesoasoani ai ia i latou uma nei, aemaise lava ia J.L, e aofia ai ma le faatauina o se Telefoni taugata mo ia.

Na faatoese Tupulua i le Tina na aafia i luma o Leoleo Suesue ma ona loimata, ma ia talosaga i ai e faamagalo o ia mai le mea sese sa ia faia. Na ta’utino Tupulua e faapea, ua ia iloaina lona sese ma le le sa’o o le mea sa ia faia, ma ua ia sauni fo’i e toe totogi le tupe. 

Na taua e le Tina na aafia i Leoleo lona mana’o e toe totogi atu lana tupe.