Molia se Tamaitai i lona fa’aaoga o siaki e leai ni tupe o i ai totonu

Pago Pago - AMERIKA SAMOA

Ua taofia nei i le Toese i Tafuna se tamaitai i lona fa’aaoga o ni siaki e leai ni tupe i totonu e fai ai ana faatau i Faleoloa ma Fale’aiga i vaega eseese o le atunu’u. E pei ona taua e le malo, e tutusa lava taimi na tau fai mapuna a’e ai gaioiga tau faavalea a lenei tamaitai i Faleoloa ma Fale’aiga, ma mafua ai loa ona faila tagi a i latou e pulea nei Pisinisi i le Ofisa o Leoleo mo se fesoasoani.

O le vaiaso na te’a nei na tula’i ai i luma o le Fa’amasinoga Faaitumalo le tamaitai o Leataata Poufa mo lana ulua’i iloiloga. O le ali’i Loia Fautua ia Michael White na tula’i mo le ua molia.

E 6 moliaga mamafa ua faila e le malo faasaga ia Poufa. O ia moliaga e aofia ai le moliaga e tasi o lona tuuina atu o se siaki e leai se tupe o i ai; tasi le moliaga o lona taumafai e tala se siaki e le o i ai se tupe o i ai; faapea ai ma moliaga e 4 o le gaoi, o solitulafono C uma ia o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, pe faasala foi i faasalaga uma ia e lua.

E $15,000 le vaega tupe lea ua faatulaga e le afioga i le Tamaitai Faamasino ia Gwen Tauiliili-Langkilde e totogi ona faatoa mafai lea ona tatala Poufa i tua mai le Toese i Tafuna.

Afai ae tatala o ia i tua, ua poloaina o ia e aua nei toe taumafai e tu vae i faleoloa ma fale’aiga na aafia i lana gaioiga, pe taumafai fo’i e faafesoota’i molimau a le malo e uiga i lenei mataupu.

O le vaiaso fou lea ua faatulaga e faia ai le ulua’i iloiloga autu o lenei mataupu i luma o le Fa’amasinoga Faaitumalo, ma valaau ai loa e le malo le latou molimau na te folasia mau e lagolago ai le latou tagi faasaga ia Poufa.

TAGI A LE MALO

E pei ona taua e le malo i le latou tagi e faapea, o le taeao o le aso 24 o Aokuso o le tausaga nei 2021 na aga’i atu ai ni sui se to’alua mai le Faleaiga o le Tropical Pizza i le Ofisa o Leoleo i Tafuna ma faila se tagi faasaga i le tamaitai o Leataata Poufa, i lona fa’aaoga lea o ses siaki e le o i ai se tupe i totonu e faatau mai ai mea’ai mai le latou Fale’aiga. E le gata i lea, e pei ona taua e le kamupani i le latou tagi, sa alu fo’i ma ave sui na tuuina atu ia te ia.

Na amata suesuega a Leoleo Suesue e ala i le fesiligia o nisi o tagata faigaluega a le Tropical Pizza e aofia ai Ta’ita’i, o le Pule atoa ai ma tagata faigaluega. 

Na taua e se tasi o Ta’ita’i a le Fale’aiga a le Tropical Pizza i Leoleo Suesue e faapea, na faateia le aufaigaluega ina ua ulufale atu Poufa ma oka lana mea’ai i le Fale’aiga. Ina ua tapa e le aufaigaluega le tupe e totogi ai le oka a Poufa, na tu’u atu e Poufa i le tagata faigaluega se siaki e $125 ma lana fesili, pe talia e le Fale’aiga siaki a tagata taitoatasi (personal check). 

Na iloilo e le Taitai o le Sifi le siaki ma vaaia ai ni tusitusiga i le tino o le siaki, e foliga mai o se siaki ua uma ona fa’aaoga. O loo atagia mai ai foi i le tino o le siaki nisi o vaega ua pisia i se vali e foliga mai o ni faamaumauga na taumafai e aveese mai luga o le siaki. 

Na fesili le Taitai o le Sifi ia Poufa i le mafua’aga ua tusi tusi solo ai le tino o le siaki, ae na tali Poufa, o le siaki na avatu e lona aunt ia te ia e fai ai le fa’atau, na te le iloaina fo’i le mafua’aga ua ala ai ona tusi tusi solo le tino o le siaki.

Na mae’a fesili ma tali i le va o le Taitai o le Sifi ma Poufa ma i’u ina talia ai le tala o le siaki e totogi ai le fa’atau ua uma ona fai.

Na fesiligia e Leoleo Suesue le Pule o le Fale’aiga a leTropical Pizza e uiga i lenei mataupu, ma ia faamaonia ai faamatalaga a lana aufaigaluega. Na taua e le Tamaitai Pule e faapea, na alu atu Poufa i le isi aso ma se siaki e $87.95 ona talia lea e le Taitai o le Sifi sa tiute. E le gata na totogi le oka mea’ai a Poufa ae na alu fo’i ma le sui e $40.

Na fesiligia e Leoleo Suesue le tamaitai sa gafa ma le taliina o tupe a le Fale’aiga i le aso na tula’i mai ai lenei faalavelave, ma ia faamaonia ai i Leoleo Suesue faamatalaga a isi o le aufaigaluega. 

Na taua e le tamaitai tali tupe e faapea, ina ua alu atu Poufa ma le siaki ia te ia, sa ia fai i ai e faatali atu i luma ae se’i alu e talanoa i le Taitai Sifi e faatatau i lana siaki.  E lei umi ona alu i tua ae toe fo’i mai i luma ma ia faailoa ia Poufa ua talia e le Taitai Sifi lana siaki.

Pe tusa o le itula e 11:38 i le taeao lava lea, na toe aga’i atu ai fo’i Poufa i le Fale’aiga ma le isi fo’i siaki e $100.54 lona aofa’i, ma mana’o e oka meaa’i i le tau e $35. Na alu le tagata faigaluega i tua i le Taitai ma faailoa i ai le isi fo’i siaki lea ua toe sau ma Poufa ma vaaia ai e le Taitai le tusi tusi solo i le tino o le siaki.

Na fesili le Taitai ia Poufa i le mafua’aga e tusi tusi solo ai le tino o le siaki, peita’i na vaaia le tau le tali o Poufa, Mulimuli ane talosaga Poufa i le Taitai mo se avanoa e tamo’e ai i lana ta’avale e aumai le tupe o lo o i ai e totogi ai lana oka mea’ai e $35.

Fai mai molimau a le aufaigaluega, e le i toe fo’i atu i totonu Poufa e totogi lana oka, ae na alu atu lava i le ta’avale e piki le tupe ma alu atu ai lava.

A o galulue Leoleo Suesue e tau tuu faatasi le paso e  pei ona tula’i mai i le Fale’aiga o le Tropical Pizza, na faafuase’i ona ulufale atu ni tagata faipisinisi se to’alua ma faila a laua tagi faasaga i se tamaitai na alu atu ma se siaki e leai se tupe o i ai ma fai ai lana faatau i a laua faleoloa. 

O le aso 25 o Aokuso na alu ai se Fafine Faipisinisi ma faila sana tagi i le Ofisa o Leoleo i Tafuna faasaga ia Poufa, i lona tala o se siaki e leai se tupe o i totonu e fa’atau ai mea’ai mai lona faleoloa. 

Na taua e le Tamaitai Faipisinisi lea i Leoleo Suesue e faapea, o ia e pulea le Fale’aiga a le Jade Restaurant i Nuuuli. I le afiafi o le aso e pei ona taua, na ulufale atu ai Poufa i le faleoloa ma avatu ia te ia le siaki e $108.51 e totogi ai lana oka e $20.

Na taua e le tamaitai faipisinisi lona le fesiligia o Poufa, talu ai, sa ia vaaia i ona foliga, o ia o se tamaitai lalelei ma e leai ni masalosaloga na te faia ni uiga faapea. Sa talia e le tamaitai faipisinisi le siaki a Poufa e aunoa ma sona fesiligia, ma fa’aaoga ai loa e totogi ai lana oka ma toe ave i ai ma lana sui e $70.

I le aso na soso’o ai ina ua alu le tamaitai faipisinisi i le Faletupe e teu lana tupe, na toe fiki mai i tua le siaki a Poufa. Na taua foi e le tamaitai faigaluega a le Faletupe, e leai se tupe o i totonu o le siaki lea na fa’aaoga e Poufa e totogi ai lana oka.

E 2 aso e va ai, ae ulufale foi le isi tamaitai faipisinisi i le Ofisa o Leoleo i Tafuna ma faila lana tagi faasaga ia Poufa i lona fa’aaoga o se siaki leaga e totogi ai lana oka i lona faleoloa. O le tamaitai lea, o le pule o le Nina’s Restaurant i Nu’uuli.

Na taua e le tamaitai faipisinisi i Leoleo Suesue e faapea, i se taimi o le aso ao i ai i totonu o le faleoloa, na ulufale atu ai Poufa ma le siaki e $121.62 ma talosaga atu ia te ia pe mafai ona totogi ai lana oka o loo fia fai. Na talia e le pule o le faleoloa le siaki ma totogi ai loa le faatau a Poufa e lata i le $50, ma toe ave i ai ma lana sui e lata i le $70.

E lei leva ona alu ese atu Poufa ae toe fo’i ane i le faleoloa lava lea ma le isi siaki e $200, ae mana’o e totogi ai lana oka e $50. E lei talia e le pule o le faleoloa le siaki na alu atu ma Poufa ae na ia fesiligia Poufa poo fea e sau ai ma nei siaki. E lei tali Poufa ae na faliu ma alu ese loa.

Na taua e le isi faipisinisi i Leoleo Suesue, o le pule lea o le Samoa Lelelei Mart le alu atu o Poufa ma le siaki e $50 e totogi ai lana pepa sikaleti, ma ia tuu i ai le sui e $39.

Na logo e Leoleo Suesue le Tina o Poufa ma faamatala i ai tu’uaiga faasaga i lana tama mai le tele o faleoloa ma fale’aiga, ma talosagaina ai loa se avanoa latou te feiloa’i ai i le Ofisa o Leoleo i Tafuna. Ina ua taunuu Poufa ma lona Tina i le Ofisa o Leoleo, sa ia fa’aalia ai loa i Leoleo Suesue lona le mana’o e faia sana faatamalaga e tusa ai o tu’uaiga faasaga ia te ia.