Molia ni alii se toalua i le umi o fualaau faasaina

Pago Pago, AMERIKA SAMOA

E to’alua ni ali’i na pu’e faapagota e Leoleo i le masina na te’a nei e ala i se poloaiga mai le Fa’amasinoga e saili ai a laua meatotino, ona o tu’uaiga o loo aafia i laua i le umia atoa ai ma le faatauina atu o fualaau faasaina.

O i laua e to’alua e aofia ai Tagi Falaniko o Fagatogo ma Felise Laulu o Puapua. O Falaniko na pu’e faapagota e Leoleo i le Malae o le Talu i Fagatogo ae o Laulu na pu’e faapagota i Puapua ina ua taofi e Leoleo lana ta’avale i luga o le alatele. 

TAGI FAASAGA IA FALANIKO

O le taeao po lava o le aso 22 o Iulai o le tausaga nei na pu’e faapagota ai e Leoleo ia Faleniko i luma o le Malae o le Talu i Fagatogo, i lalo o se poloaiga mai le Fa’amasinoga e sailia ai lona tagata ma lona fale poo ia umia faasolitulafono fualaau faasaina.

Ao taumafai se ali’i Leoleo Kapeteni e loka lima a le ua molia, na tete’e o ia e ala i lona savali ese. E le i umi ae taunu’u mai isi Leoleo mai le Ofisa autu o Leoleo i Fagatogo ma fesoasoani loa i le tuuina atu o loka i luma o Falaniko.

Na saili e Leoleo taga o le ofu o Falaniko ma latou maua ai fualaau fa’asaina. E tasi le pepa iila feololo o lo o tumu i vaega o le pauta paepae na maua i le isi taga, ae o le isi taga na maua i ai se pepa iila feololo o lo o tumu i lau mamago lanu meamata.

Na faia se suega faapitoa i pauta papae ma lau mamago lanu meamata sa maua ia Falaniko ma faamaonia ai, o vaega ia o le pauta faasaina o le aisa faapea ai ma le laau faasaina o le mariuana.

Na aga’i atu Leoleo ma su’e le fale o Falaniko i Fagatogo peita’i e le i maua ai ni fualaau fa’asaina, se’i vagana ai mea e fa’aaoga e i latou e umia fualaau faasaina ma le faamoemoe e tulei ma faatau atu i isi tagata e pei o pepa iila laiti, o straws ua uma ona ta tipi tulimanu, o se fua, faapea ai ma ni paipa tioata e fa’aaoga e ula ai le aisa.

Na malie Falaniko e talanoa i Leoleo e tusa ai o fualaau faasaina na maua ia te ia. Sa ia taua e faapea, faatoa sau i lalo mai le pasi na alu i Iliili e faatau mai ai ana fualaau faasaina. E $300 na ia faatau mai ai vaega o le pauta o le aisa ae $100 na ia faatau mai ai le taga mariuana, o mea sa ia faamoemoe e tulei ma faatau atu mo le faamanatuina o le aso fanau a si ona atali’i.

O le masina na te’a nei na tula’i ai Falaniko i luma o le Fa’amasinoga Faaitumalo. 

O lo o tuuaia o ia i le moliaga e tasi o le umia faasolitulafono o le pauta faasaina o le aisa; tasi le moliaga o le umia o le aisa ma le faamoemoe e tulei ma faatau atu i isi tagata; tasi le moliaga o le umia faasolitulafono o mariuana; ma le moliaga e tasi o le umia faasolitulafono o mariuana ma le faamoemoe e tulei ma faatau atu i isi tagata.

E $30,000 le tupe lea ua faatulaga e tatala ai i tua Falaniko.

I le aso na tulai ai Falaniko i luma o le Faamasinoga Faaitumalo, na ia manatu ai e tuu sa’o atu loa lana mataupu i luma o le Fa’amasinoga Maualuga e faataunuu ai sona faamasinoga autu.

O le vaiaso fou lea ua faatulaga e toe valaau ai le mataupu a Falaniko ina ua ia teena tuuaiga faasaga ia te ia i luma o le Fa’amasinoga Maualuga.

O le tausaga e 2014 na tausala ai e le Faamasinoga ia Falaniko i le talepe fale ma le talia o oloa na gaoi, ma nofovaavaaia ai o ia mo le 5 tausaga. O le tausaga e 2019 na maea ai le nofovaavaaia a Falaniko.

O nisi o tuutuuga o le nofovaavaaia a Falaniko e aofia ai lona tuliina o masina e 20 i le Toese i Tafuna.

O Falaniko, faatasi ai ma isi alii talavou e to’atolu, na galulue faatasi e talepe ma gaoi se faleoloa i Tafuna. Fai mai le malo, o le ta’avale pikiapu a Falanino na la’u ai oloa na gaoia ma momoli i lona fale.

TAGI FAASAGA IA LAULU

O le afiafi o le aso 24 o Iulai pe tusa o le 6:04 i le afiafi, na maitauina ai Leoleo sa tiute i luga o le alatele i Puapua se taavale pikiapu lanu mumu o aga’i atu i luga o le alatele i Puapua i se saoasaoa e le tusa ma le tulafono. Na mulimuli Leoleo i tua o le pikiapu mumu lenei ma faatonuina ai le ave ta’avale e afe i tua lana ta’avale.

E to’atasi le ali’i sa i totonu o le ta’avale, o ia fo’i lea o le ave ta’avale, o le susuga lea ia Faletolu Laulu, le ua molia i lenei mataupu. Na faailoa e Leoleo ia Laulu, e le gata ua ia soli tulafono tau i le alatele, ae o lo o i ai foi se poloaiga mai le Fa’amasinoga e saili ai lona tagata ma ana meatotino poo ia umia ni fualaau faasaina poo ni a’upega mata’utia fo’i.

O le faateia o Laulu i le gaioiga a Leoleo na mafua ai ona ia fesiligia Leoleo i le mafua’aga o le latou taofi o lana ta’avale, peita’i sa faailoa i ai e Leoleo le alu saoasaoa o lana ta’avale i luga o le auala mai maila faaletulafono.

Na tete’e Laulu e le i saoasaoa lana ta’avale, ae ina ua faaali i ai e Leoleo faamaonia o le alu saoasaoa o lana ta’avale, na amata ai loa ona usita’i Laulu i faatonuga a Leoleo. Ina ua fesiligia lana laisene, na tali ai le ua molia, o lo o galo i le fale lona laisene ave ta’avale. Na saili e Leoleo faamaumauga a le Ofisa o Ta’avale Afi a le latou Ofisa ma faamaonia ai, o le tausaga na te’a nei na mae’a ai le aoga o le laisene ave ta’avale a Laulu, lona uiga, e le talafeagai ona ia toe faafoeina se ta’avale i luga o le alatele.

Na malie Laulu i le faatonuga a Leoleo, o lana ta’avale faatasi ai ma ia, o le a aga’i atu i le Ofisa o Leoleo i Tafuna mo isi suesuega. A o le i auina atu Laulu mo suesuega faaopoopo, na muamua saili e Leoleo lona tino mo ni fualaau faasaina poo ni aupega.

I le taga taumatau o le ofu vae a Laulu sa faia, na maua ai e Leoleo se paipa tioata o lo o i ai vaega o le pauta paepae, ae o le isi taga o lona ofuvae sa faia na maua i ai e Leoleo sikaleti ua uma ona taai. 

Na faia se suega i le pauta paepae ma faamaonia ai, o vaega ia o le pauta faasaina o le aisa. Na faia fo’i se suega faapitoa i sikaleti e 2 na maua ia Laulu ma faamaonia ai, o vaega ia o le laau faasaina o le mariuana.

Na saili e Leoleo totonu o le ta’avale ma maua ai i lalo o le nofoa o le pasese ni tama’i pepa iila se 2 o lo o i ai vaega o le pauta faasaina o le aisa.

Ina ua fesiligia e Leoleo le ua molia e tusa ai o fualaau faasaina na maua ia te ia, sa ia ta’utino ai e fa’apea, o fualaau faasaina sa maua ia te ia faapea ai ma totonu o le ta’avale, o mea lava sa i ai i totonu o le ta’avale i le taimi na avatu ai le ta’avale a lona uncle na te fa’aaogaina. 

Ina ua ia maua fualaau faasaina i totonu o le ta’avale, sa ia tago ma tuu i totonu o le taga o lona ofu sa faia. Na taua e le ua molia, ua sese o ia i lona tago fua i fualaau faasaina sa i totonu o le ta’avale. 

O le masina lava fo’i na te’a nei na tula’i ai Laulu i luma o le Fa’amasinoga Faaitumalo. Ua molia o ia i le moliaga e tasi o le umia faasolitulafono o vaega o le pauta faasaina o le aisa, faapea ai ma le moliaga e tasi o lona umia faasolitulafono o vaega o le laau faasaina o le mariuana.

E $5,000 le vaega tupe lea ua fa’atulaga e tatala ai i tua Laulu.

O le vaiaso fou lea ua fa’atulaga e toe tulai ai Laulu i luma o le Fa’amasinoga Maualuga, ina ua ia tula’i ai i le vaiaso na te’a nei ma ia tuuina atu ai lana tali tete’e i moliaga faasaga ia te ia.