Le faamaonia moliaga faasaga ia Tumuatasi Lefatia

Pago Pago, AMERIKA SAMOA

O le faaiuga lea na tuuina mai e le Vaega Iloilo Iuga i le aoauli o le aso Tofi na te’a nei i le faamasinoga autu faasaga i le Pule o Le Aute Sports & Bar, ua atagia mai ai le le faamaonia o le tagi a le malo faasaga ia Tumuatasi Lefatia, poo MAMA fo’i e pei ona iloa ai o ia e le to’atele, i lona umia faasolitulafono lea o fualaau faasaina o le aisa ma le marijuana, faapea ai ma moliaga o le umia faasolitulafono o nei fualaau faasaina ma le faamoemoe e tulei ma faatau atu i isi tagata.

E silia laititi lava i le tasi le itula le umi o le taimi na iloilo ai e ali’i ma tamaitai iloilo iuga mau faamaonia o lenei mataupu, ae tu’u ina mai loa le faaiuga e le nofosala Lefatia i moliaga mamafa uma e 4 na tu’uaia ai o ia e le malo.

O ia moliaga mamafa e aofia ai le umia faasolitulafono o le laau faasaina o le mariuana; umia faasolitulafono mariuana ma le faamoemoe e tulei ma faatau atu i isi tagata; umia faasolitulafono o le pauta o le aisa, faapea ai ma le umia faasolitulafono o le aisa ma le faamoemoe e tulei ma faatau atu i isi tagata, o ni solitulafono mamafa, o solitulafono mamafa e mafai ona faasala ai se tasi i le Toese mai le 5 e oo atu i le 20 tausaga, pe faasala foi i le salatupe e oo atu i le $20,000, poo le faasala fo’i i faasalaga uma ia e 2. 

Na maligi loimata o Lefatia ina ua mae’a ona lau e le Failautusi o le Fa’amasinoga le faaiuga a le Vaega Iloilo Iuga, e le nofosala o ia i se solitulafono e tasi. Na aapa atu le aao o le isi ana Loia Fautua ia David Vargas ma popo lona taua’u ma faalototele ia te ia.

E le i finagalo le Loia a le malo ia Kristine Soule’ e faailoa sona finagalo e tusa ai o le faaiuga a le Vaega Iloilo Iuga.

Ae ina ua fesiligia le Loia a Lefatia, na taua ai e le susuga a Vargas, lea na to’alua ma le ali’i Loia ia Marcellus Talaimalo Uiagalelei lona faafetaia o le faaiuga a le Vaega Iloilo Iuga, ua mafai ai ona maua se faaiuga fiafia mo le latou itu.

O le itu sa faafetaia e Vargas, o le auala na iloilo toto’a ai e le Vaega Iloilo Iuga mau faamaonia o lenei mataupu, atoa ai ma le latou mulimulita’i i faatonuga ma ta’iala uma na faataoto e le Fa’amasinoga e faavae ai la latou galuega Faa Faamasino Iloilo Iuga.

Na faailoa e se sui o le Vaega Iloilo Iuga i le Samoa News le faatamala o le malo e folasia mau faamaonia e lagolago ai le latou tagi faasaga ia Lefatia.

Sa ia taua e faapea, “E le lava mau a le malo na folasia e faamaonia ai le latou tagi faasaga ia Lefatia. O fualaau faasaina na maua i le potu lea na momoe ai Lefatia ma lana fanau, e le o manino lelei poo ai e ana, ona e le na o Lefatia e masani ona alu i totonu o le potu lea, e to’atele fo’i isi tagata e aofia ai lona to’alua, o lana fanau, o tama o loo faia le taaloga Pikiaki, faapea ai ma fafine o le nu’u e o atu e faatau, e masani ona o i totonu o le potu lea ma eva ai ma Lefatia.”

MOLIMAU A LE ITU TETE’EE

E to’alua molimau na valaau e le itu tete’e ina ua mae’a ona valaau molimau e to’atele a le malo. 

O ia molimau e aofia ai le Tina ia Lefatia, faapea ai ma lona to’alua, le susuga a Faafetai Lefatia.

Na muamua molimau le susuga a Faafetai ae faai’u ai loa i le molimau a Tumuatasi.

Na tusi e Faafetai le ata o le nofoaga autu o Le Aute Sports & Bar i Malaeloa ina ia faa faigofie ai i le Vaega Iloilo Iuga ona malamalama ma mulimulita’i i lana molimau.

E tusa ai o le ata na tusia e Faafetai, e 3 fale eseese o loo i totonu o le Fale atoa lea e taua o le nofoaga autu a Le Aute. O ia fale eseese e 3 e aofia ai le Fale Piliati, o le Potu moe lea na maua ai i totonu Tumuatasi ma lana fanau o loo momoe i le taeao o le osofaiga, ma le isi fale o loo i ai potu e 3 ma le umukuka.

Ae mo le potu lea e aga’i i ai molimau a le malo e faapea o le potu lea na maua ai Tumuatasi ma lana fanau, toe maua ai fo’i ma fualaau faasaina i le taeao o le osofaiga, 

Na taua e Faafetai i lana molimau e faapea, o le potu moe lea na maua ai lona to’alua o loo momoe ai ma lana fanau i le taeao o le osofaiga a Leoleo, o le potu e patino ia te i laua ma lona to’alua, faapea ai fo’i ma le la fanau.

O le faafitauli o loo tula’i mai, e i ai fo’i isi tagata o loo ulufale i totonu o le potu, o tagata ia e faataga atu i totonu e lona to’alua. O lea tulaga e mafua ai ona tula’i mai vevesi i lo la va ma lona to’alua, i le tele o taimi, ona e le mana’o e soona soli atu e nisi le la potu.

Na taua atili e Faafetai i lana molimau e faapea, e lei i ai i le fale i le taimi na alu atu ai le osofaiga a Leoleo. Na alu e faatau ai le latou Ti o le taeao, ae na faateia o ia ina ua fo’i mai ua tumu atu Leoleo i le fale.

Ina tula’i Tumuatasi mo lana molimau, sa faailoa e lana loia fautua ia Marcellus Talaimalo Uiagalelei le mae’a lea ona ia fautuaina o Tumuatasi i ona aia tatau i lalo o le tulafono e le tau faia ai fua sana faamatalaga, peita’i ua manatu o ia e molimau mo le faailoaina o le mea moni i lana itu.

Na taua e Tumuatasi i lana molimau e faapea, o le poloaiga mai le Faamasinoga lea na o atu ma Leoleo e su’a ai lona fale, o loo alu atu i luga o le igoa o lana tama o Manu Lefatia, ae le o lona igoa.

O le poloaiga na avatu e le Fa’amasinoga, o le avanoa e su’e ai fana ma pulufana. E le o i ai se vaega o le poloaiga e su’e ai ni fualaau faasaina.

Na maligi loimata o Tumuatasi ao ia molimau e faailoa i le Vaega Iloilo Iuga mea na tutupu i le taeao o le aso 12 o Setema 2018 ina ua osofa’i e Leoleo ma a latou a’upega lona fale i Malaeloa.

O le pao leotele o se leo na mafua ai ona ala i luga ae ona vaaia loa Leoleo ua ulufale i totonu o lona potu ma latou a’upega na ta’i atu ia te ia ma lana fanau. O le taimi lea ua na o le fetagisi o lana fanau laiti e to’a 5 ua fefefe, o lana tama teine e 12 tausaga sa moe i ona tafatafa ua na o le faamimigi i lona le mautonu, ae o ia i le taimi lea, sa to’a lava lona mafaufau ina ua ia iloa e leai se isi o lana fanau o manu’a.

Na ta’i atu fana a Leoleo ma faatonu latou e punonou i lalo. Na sosoo ai loa ma le ta’ita’i o latou i fafo o le potu ma auina atu i le vaega o loo i ai Laulau Piliaki. 

Na faatoa faailoa atu e Leoleo ia te ia i fafo i le nofoaga o loo i ai Laulau Piliaki le mafua’aga o le osofaiga, ma tuu atu loa ia te ia le kopi o le poloaiga a le fa’amasinoga e su’e ai lona fale. Sa ia faamaonia, o le poloaiga e su’e ai lona fale o loo alu atu i le igoa o lana tama o Manu Lefatia.

Ina ua mae’a ona faailoa ia te ia le kopi o le poloaiga e su’e ai lona fale, na faatonu ai loa o ia e Leoleo latou te toe fo’i atu i totonu o le potu se’i saili le potu. Na faateia o ia ina ua taunuu atu i totonu o le potu ae faaali atu e le ali’i Leoleo ia Justin Thompson ia te ia le tama’i ato lanu uliuli ma fesili atu poo ia e ana le ato lea. 

Sa ia toe fesili i le ali’i Leoleo, poo i ai sona igoa i le ato.

Na taua atili e Tumuatasi e faapea, na saili lona tino e Leoleo, e leai ni fualaau faasaina na maua ai. Na su’e uma fo’i totonu o lona Fale peita’i e leai ma se mea na maua ai. E leai ni fualaau faasaina na maua, e oo i a’upega ma pulufana, e leai ma se mea na maua i le fale.

Ina ua fesili Uiagalelei i le molimau e faamatala poo ai e masani ona ulufale i totonu o le potu, na tali le molimau, e le gata o laua ma lona to’alua ma le la fanau, ae masani fo’i ona ulufale atu ai tama o loo faatautaia le taaloga Piliaki, atoa ai ma isi fo’i Fafine o le nu’u e o atu e tapua’i i ta’aloga Piliaki a latou ta’ito’alua, e masani ona ia avatua i totonu o le potu latou te eva ai ma matamata le TV  e faatali ai le taimi e uma ai ta’aloga a latou ta’ito’alua.

Na ioe Tumuatasi, e i ai lana tama’i pisinisi o loo faatautaia i le nofoaga o loo i ai lona fale i Malaeloa. O lea tama’i pisinisi ua tusa ma le 10 tausaga talu ona faagasolo mai. O lana tama’i faleoloa e faatau ai nai mea suamalie, faapea ai ma ana Laulau Piliaki mo soo se tasi e fia taalo ae totogi le tupe.

E leai se ‘ava malosi e faatau i lana pisinisi, se’i vagana ai lava taumafa suamalie.

O le nofoaga fo’i e aga’i atu i lona fale, e leai se pa e siosio, ae mafai lava e soo se tagata ona ulufale atu ai.

Na faai’u le molimau a Tumuatasi i lona ta’utino i le Vaega Iloilo Iuga, e le o ia e ana le tama’i ato lanu uliuli lea na maua i totonu o le potu o loo i ai aisa ma mariuana.

Ina ua toe fesili atu i ai Uiagalelei i le taimi o lana molimau, poo ia e ana le ato lea na maua e Leoleo i totonu o le potu, na tali Tumuatasi, “E leai”.