Faafofoga Vaega Iloilo Iuga i molimau a tamaitai su’esu’e faapitoa fualaau faasaina

Pago Pago, AMERIKA SAMOA

A o faagasolo ai taualumaga o le faamasinoga autu o le Pule o le Pisinisi o LE AUTE Sports & Bar ia Tumuatasi Lefatia, poo MAMA fo’i e pei ona iloa ai e le to’atele i lenei vaiaso, na maua ai le avanoa e faafofoga ai ali’i ma tamaitai iloilo iuga i molimau faapitoa ma ni tamaitai e i ai lo la agavaa ma le tomai faapitoa i le suesueina o fualaau faasaina. 

O i laua ia o Alecia Martin ma Rochelle Hranac, o ni tamaitai e gafa ma le suesueina o fualaau faasaina i le Vaega a le DEA (Drug Enforcement Agency) a le malo tele o Amerika.

Talu ai tulaga o le poloka ai o vaalele ma puipuiga o le faama’i oti o le KOVITI-19, ua le mafai ai ona malaga mai tamaitai nei e to’alua e faaleo le la molimau i luma o le Fa’amasinoga Maualuga a Amerika Samoa o loo faagasolo ai taualumaga o lenei mataupu, ae na fa’aaoga auala o fesootaiga faaonapo nei e faaleo mai ai le la molimau.

I tulaga masani o molimau faapitoa faapenei, e tatau i le itu a le malo ona faamaonia i le Faamasinoga faapea le Vaega Iloilio Iuga, o le tagata lea ua sauni e molimau i tulaga o fualaau faasaina, e i ai lona agavaa e mafai ai ona ia faailoa mai tulaga o le i ai lea o fualaau faasaina i totonu o ni mau faamaonia, poo le leai fo’i.

O le tamaitai Suesue faapitoa o Martin, ua silia ma le 10 tausaga talu ona galue mo le DEA, o lana galuega o le suesueina lea o vailaau oona i totonu o mau faamaonia e tuuina atu, e aofia ai aisa ma mariuana. Sa ia faailoa i le Fa’amasinoga le tele o taimi e auai atu ai o ia i aoaoga e fesoasoani ai i le faalauteleina o lona tomai i lana galuega.

O ia aoaoga e aofia ai lona iloa faavasega le eseesega o ituaiga vailaau oona e maua i totonu o ni mau faamaonia. Na te umia fo’i le faailoga o le BA i mataupu tau Saienisi ma vailaau.

O le mae’a ai ona faafofoga o le Fa’amasinoga atoa ai ma le Vaega Iloilo Iuga i le folasaga a le malo e faatatau i agava’a o Martin, na tuuina mai ai loa le faaiuga a le Fa’amasinoga e talia ai ma aloaia Martin e molimau e faatatau i fualaau faasaina, ina ua faamalieina le Fa’amasinoga i le tele o ona agava’a le tomai i le suesueina o fualaau faasaina.

O le aso 27 o Oketopa, 2020 na maua ai e Martin se teutusi o loo i ai ni mau faamaonia, ua tuuina atu na te suesueina poo i ai i totonu o ia mau faamaonia ni vailaau oona. 

Ina ua fesiligia e le Loia a le malo ia Kristine Soule ia Martin pe na faapefea ona ia maua le teutusi o loo i ai mau faamaonia, na tali le molimau, o se tasi o alii Suesue faapitoa mai le DEA na tuuina atu le teutusi ia te ia na te suesueina. 

I totonu o le teutusi, sa i ai sikaleti e 26 ua uma ona taai. O totonu sikaleti o loo i ai lau meamata.

Na fesili le Loia a le malo ia Martin poo fea e avatu ai le teutusi lea sa i ai sikaleti ua uma na taai e 26, na tali le molimau, “Na aumai i le Ofisa o Leoleo a Amerika Samoa”.

O faiga masani o lana galuega, na te aveese mai lau meamata ona faatino ai loa lea o suega eseese e 3 ina ia mafai ai ona faamaonia ituaiga vailaau oona o loo tau sailia pe maua ai. O le iuga o le suega, na faamaonia ai, o lau meamata sa i totonu o sikaleti e 26, o vaega ia o le laau faasaina o le mariuana. 

Na fua fo’i e le molimau le mamafa o lau mariuana na maua ai, e 6.6kalama le mamafa.

O le mae’a ai ona faia o lana suega, na tusia ai loa lana ripoti e tusa ai o le faaiuga o lana suega sa faia, ma toe tuu mau faamaonia i totonu o le teutusi ma toe faafo’i mai loa i le Ofisa o Leoleo a Amerika Samoa.

Na faaali e le Loia a le malo ia Martin se teutusi o loo i ai si sikaleti ua uma ona taai e 26, ma fesili i ai pe na te manatua le teutusi lea. Na tali le molimau, na te manatua, o le teutusi tonu lava lea na avatu ai sikaleti e 26 lea sa ia suesueina ma faamaonia ai, o sikaleti mariuana.

Sa ia faamaonia fo’i i luma o le Vaega Iloilo Iuga, o lana saini atoa ai ma lona igoa o loo tusia i tua o le teutusi, e faamaonia ai, o ia sa faatinoina le suesueina o mau faamaonia sa tuuina atu mo suesuega. O loo aofia ai fo’i i le teutusi lana ripoti e tusa ai o le faaiuga o le suega sa ia faia.

Ina ua maua le avanoa e fesiligia ai e le Loia a Lefatia, susuga Marcellus Talaimalo Uiagalelei le molimau, sa fia iloa ai e le ali’i Loia le auala e faatino ai le suesueina o mau faamaonia pe a auina atu i le Ofisa o le DEA i Kalefonia.

Na faamatala a Martin e faapea, o le taimi e taunuu atu ai i mau faamaonia i le Fale Suesue a le DEA, e i ai lava le tagata faapitoa na te vaaia ma tausia lelei mau faamaonia. E oo lava fo’i ia te ia e le mafai ona alu i totonu o le potu lea e teu faapitoa ai mau faamaonia.

Ae o le taimi lava e tofia ai o ia na te suesueina ni mau faamaonia, o le taimi lena e aveese mai ai le mau faamaonia mai le potu faapitoa sa teu ai, ae tuu atu loa i lalo o lana vaavaaiga.

E i ai lava le vaega o le Fale Suesue ua faapitoa mo ia e faatino ai ana suesuega. Afai e mae’a le aso ae lei mae’a ona faatino ana suesuega i se mau faamaonia, ona teu lea o lea mau faamaonia i totonu o se potu faapitoa, e nao ia lava fo’i e faataga ona alu ai i totonu. 

E mae’a loa ona faatino ana suesueg i se mau faamaonia, ona toe tuu loa lea o le mau faamaonia i totonu o le teutusi, tuu i ai ma lana ripoti e tusa ai o le faaiuga o lana suesuega, saini ai ma lona igoa ma le aso na faatino ai le suesueg, ona tapuni loa lea o le teutusi ae toe faafo’i atu i le potu faapitoa lea e teu ai mau faamaonia, e sauni ai mo le toe faafo’i atu i le nofoaga ma auina atu ai.

O le molimau lona lua na fesiligia, o le tamaitai Suesue ia Hranac. Ua silia i le 4 ma le afa tausaga talu ona galue o ia i le DEA o se tamaitai Suesue Faapitoa i vailaau oona, ma ua i ai fo’i lona poto masani i le suesueina o soo se mau faamaonia. 

Na te umia faailoga o le BA ma le MA i tulaga Tau Saienisi ma Vailaau, ua silia fo’i i le 2 tausaga o au ai i aoaoga e faalautele ai lona silafia i vailaau oona ma tulaga tau Saienisi, e 10 tausaga na galue ai o ia o se tamaitai Suesue mo le Ofisa o Leoleo i le aai o Arizona.

Na faamalieina le Faamasinoga i le tulaga maoa’e o agavaa o Hranac e mafai ai ona ia molimau i tulaga o fualaau faasaina.

O le masina o Oketopa 2020 na tuu atu ai ia te ia se teutupe na avatu i le Ofisa o Leoleo a Amerika Samoa mo le faia i ai o ana suesuega. I totonu o le teutusi o loo i ai ni pepa iila feololo se 3 o loo i ai vaega o le pauta paepae, lea lea e 80kalama lona mamafa. 

E 3 ituaiga suega na faatino e Hranac i vaega o le pauta paepae. I le faaiuga o ia suega e 3, na faamaonia ai, o le pauta paepae na avatu i Amerika Samoa, o vaega ia o le fualaau faasaina o le “methamphetamine” poo le pauta o le ‘aisa’ e pei ona lauiloa ai e le to’atele.

Ina ua mae’a ona faatino lana suesuega, na taua e Hranac le sainia o lona igoa i le tino o le teutusi, tu’u i ai ma lana ripoti atoa ai ma le aso na faia ai le suega, ona tapuni loa lea o le teutusi ae toe faafo’i mai i Amerika Samoa.

Ina ua faailoa e le Loia a le malo ia Hranac le tuetusi o loo i ai pepa iila e 3 ma fesili i ai pe na te manatua le teutusi lea, na tali le molimau, o le teutusi lea sa ia faia i ai le suesuega i vailaau oona, o loo i ai lana saini ma lona igoa, atoa ai ma le ripoti i le faaiuga o lana suesuega sa faia. 

O le isi molimau na fesiligia e le malo e aofia ai Leoleo Suesuega ia Jimmy Tagata lea ua galue nei o se Masela o le Fa’amasinoga, o le susuga a Major Lima Togia, faapea ai le susuga a Justin Thompson.

O le afioga i le alii Faamasino Sili lagolago ia Elvis P. Patea o loo faatautaia taualumaga o lenei mataupu, ae lagolagosua i ai afioga i ali’i Faamasino ia  Suapaia J. Pereira ma Paepae I. Faiai.