Tala o le Lalolagi

Pago Pago, AMERIKA SAMOA

TAUNUU ULUAI AUMALAGA - TAYLOR FARMS TAGATA FAIGALEUGA MAI AMERIKA SAMOA:

O lo ua maea ona to’ai tanuu mai i Kent Washington le ulua’i aumalaga o tagata faialuega sa manatu le Pulega a le Taylor Farms Northwest Inc. e aumaia mai Amerika Samoa.

O i latou nei e to’a 31 ua mae’a talosaga ma ua taliaina e faigaluega amata i lenei vaiaso i le Taylor Farms i le latou fale gaosi oloa tau taumafa paleni poo Deli Products, e afua mai saunisi, seia oo i fuala’au aina ua faotagapepa ma fa’atau atu e fa’aaoga i le saunia o mea taumafa eseese i setete uma o le Iunaite Setete ma ona teritori.

O le ulua’i vaega na to’ai mai i Uosigotone e toafitu i le malaga a le va’alele a le Alaskan Airways ona soso’o ai lea ma le to’afa o i latou, o nisi ua malaga mai i le isi va’alele ma fa’ato’a soso’o loa lea ma le vasega e to’atele na atoa ai le 31 o i latou i le taeaona sosoo ai.

“O le fa’aletonu ua le malaga fa’atasi mai ai uma alo nei o Amerika Samoa, ona ua tuai ona toa’i taunuu ma ua fa’apea fo’i ona eseese ai va’alele ua maua ai latou avanoa e fa’aauau ai le faigamalaga mai Honolulu i SeaTac. Ua le maua uma ni nofoaga i le va’alele a le Hawaiian Air mai lea vaega o le malaga, ae o le mea sili e tele lava va’alele e mafai ona fa’aauau mai ai le latou malaga, ae ua o eseese mai.” O se tala lea a le susuga McFarland o le Taylor Farms.

Na fa’atalia le aumalaga lenei e le vasega o tama fanau a Samoa o lo’o auai i le Dynasty Car Club ma le Muamua Le Atua Car Club, faapea ma le Fa’alapotopotoga a le “Lend A Hand”. 

“O le agaga lava o fanau a le atunuu, e fia fa’atalofa ma fa’amanuia atu fo’i i le aumalaga ina ia fa’ailoa atu ia i latou lo latou loto faiuso, ae o se fa’amalosi fo’i ia i latou ia taumafai ia a’e malo faiva ua loto ina ia fai i lenei fo’i vaega o le malo tele o Amerika.” O se tala lea a le susuga Charlie Jr o le Peresetene o le Dynasty Car Club.

Na muamua potopoto i latou i le pakaga ta’avale a le faleoloa tele o lo’o fesaga’i ma le pakaga a le Malae Va’alele ma latou tatalia ai le to’ai taunuu mai o va’alele e lua i le afiafi o le aso Lua, lea sa o mai ai le vaega muamua o le aumalaga.

O sui mamalu foi nei o nei Kalapu Ta’avale na la’uina mai le au pasese mai le Malae Va’alele i le Falefaigaluega. Ua fa’ailoa mai, ina ua to’ai taunuu uma sui na fa’atalia i le afiafi o le aso Lua ona faatoa faao’o ai lea o i latou i le nofoaga e fa’amautu i ai ma faigaluega. O loo alaala i latou uma i le Comfort Inn mo le taimi nei.

SIITIA LE FOOD STAMP MASINA O SETEMA I AMERIKA SAMOA

Ua fa’ailoa se siitaga foi o le a maua e i latou ua agava’a i le Covid-19 ASNAP, fa’apea fo’i ma le Food Stamp masani sa maua e tagata ua agava’a ai.

I se pepa o fa’amatalaga ua fa’alauiloa ai e DHSS ua fa’atagaina fo’i e le USDA -FNS le latou talosaga na fa’aulu ina ia taua’aoina atu i sui uma ua agava’a i nei alagamanuia le maua lea o le latou $245 i le masina o Setema, 2021. 

O lea siitaga ua fa’amae’a ai fo’i le tupe na atofa mo le polokalama i lenei tausaga fa’aletupe o le a mae’a ia Setema 30, 2021.

E le gata i lea, ae ua mae’a pasia mai fo’i e le USDA - FNS le talosaga lona lua a le DHSS na auina atu ina ia maua ai le $158. mo isi uma sui o loo agava’a i le Covid -19 Nutrition Assistance Program [COVID-NAP]. Ua talosagaina ai ma le aofia ai ma nisi sui o le ASNAP i lea alamanuia ona e fa’aaoga ai tupe ua le fa’aaogaina mo le tausaga fa’aletupe lea o le a mae’a.

O le food stamp mo le Covid-19 e fa’amuta ia Setema 30, 2021.

O lona uiga, o le vasega uma lava o tagata sa masani ona agava’a mo le ASNAP masani a le tatou Malo, o le a taua’aoina ia i latou i le masina o Setema le $590 a le sui e to’atasi, o le aotelega lea o le $245. lea ua fa’aluaina ai latou penefiti ma le $158 mai le Covid-19 NAP.

O lo ua fa’apena fo’i le sui ua agava’a mo le Covid-19 NAP lea e maua ai lana $345. mo lenei masina ma le $158 mai le ASNAP e fa’aiu ai lenei tausaga o alamanuia mai le Food Stamp.

O nei pepa mea’ai uma lava e ao ina talafua ai mea’ai a’o le’i mae’a le masina o Setema 30, 2021 ma o le a tufatufaina mai lava i le fa’asologa ua oo i ai le masina lenei o Setema, i lona ulua’i vaiaso, lea e fa’asolo ai i le mataitusi ua fa’atulaga mo le aso muamua seia oo i lona aso 5.

Ua faafetaia fo’i e le susuga le Fa’atonu o lea Matagaluega o Alagamanuia mo Tagata Lautele, Muavaefa’atasi John Suisala le galulue fesoasoani mai a le susuga le Fa’atonu o le FNS Western Region Administrator Jesus Mendoza, le Fa’atonu o le SNAP Charles Tobin ma GMNAS Rebecca Hobbs mo le latou puipuigamalu o le polokalama mo Amerika Samoa, atoa ai ma le latou agaga mai i le polokalama ina ia aoga lelei i le atunuu, ae silisili ia mulimulita’ia aiaiga ua fa’atulaga ia le motusia lea fo’i alamanuia.