Molia se tama matua e 70 tausaga i le faia o uiga mataga i lona ‘grandaughter’

Pago Pago, AMERIKA SAMOA

O le lua vaiaso talu ai, na tula’i ai se Tama matua e 70 tausaga, i luma o le Fa’amasinoga, ma ia faaagafua ai ona aia tatau faaletulafono e faatatau i lana ulua’i iloiloga, ae na manatu o ia e tu’u sa’o atu loa lana mataupu i luma o le Fa’amasinoga Maualuga e faagasolo ai sona faamasinoga autu.

O lo’o taofia nei i le Toese i Tafuna, lenei tama matua, ina ua pu’e faapagota o ia e leoleo I le tolu vaiaso talu ia, ona o tu’uaiga I lona faia o ni uiga mataga I sona lava afafine laititi (granddaughter), e 15 tausaga.

(O le a le mafai e le Samoa News ona faailoa suafa o i latou o loo aafia i lenei mataupu, talu ai lava le manatu e puipui le tamaitai talavou o loo aafia).

Na teena e le ua molia tuuaiga faasaga ia te ia ina ua tula’i i luma o le afioga i le ali’i Fa’amasino Sili lagolago ia Elvis P. Patea. O le masina o Oketopa lea ua fa’atulaga e toe valaau ai lenei mataupu i luma o le afioga i le ali’i Fa’amasino ia Fiti A. Sunia.

E lima (5) moliaga mamafa ua faila e le malo faasaga i lenei Tama matua, e aofia ai le moliaga o le faiaiga faamalosi faapea ai ma le faia o amioga faasotoma, o ni solitulafoo mamafa, e mafai ona faasala ai se tasi i le Toese e amata mai i le 5 e oo atu i le 15 tausaga le umi; 2 moliaga o le tagofia o itutinosa o se tamaitai faapea ai ma le moliaga e tasi o le faiaiga ma se tagata e aiga i ai, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e mafai ona oo atu i le $5,000, poo le faasala foi i faasalaga uma e lua.

E $50,000 le vaega tupe lea ua faatulaga e le Fa’amasinoga e tatala ai i tua le ua molia.  Ma afai e tatalaina o ia I tua, ua faatonuina lenei tama matua e le Faamasinoga, ina ia saili se isi nofoaga e faamautu ai a’o faagasolo taualumaga o lana mataupu, e le mafai ona ia toe faafesootai le tamaitai o lo o aafia i lenei mataupu, poo se tasi fo’i o lona aiga, a ia avea o ia ma tagatanu’u e tausisi i tulafono i taimi uma lava

TAGI A LE MALO

O le afiafi o le aso 17 o Aokuso, 2021 na logo ai e Leoleo mai le Ofisa o Leoleo i Tafuna le Vaega o Leoleo Suesue, e faatatau i se mataupu o loo aafia ai se tamaitai e 15 tausaga le matua ma se Tama matua. 

E to’alua Leoleo Suesue na aga’i atu mo le suesueina o lenei mataupu.

Na maua le avanoa e fesiligia ai loa e Leoleo Suesue le tamaitai na aafia e tusa ai o le faalavelave na tula’i mai ia te ia.

I suesuega a Leoleo na manino ai le mamafa o se avega o lo’o tauave e lenei tamaitai 15 tausaga ona o uiga e fa’aali atu e lona tama matua ia te ia, e aofia ai lona tagofia o ona itutino sa, ma lona faamalosia o ia la te faiaiga.

Sa faamatala e lenei tamaitai, na amata ona fa’aalia atu e lona tama matua nei uiga ia te ia, ina ua ia talosagaina se fesoasoani ona o se mageso sa I lona ogavae.  Sa faatonuina ai o ia e aumai ni lau laau e fofoina ai lona vae, ae peitai, na avea lea ma auala na amata ai ona tagofia e lenei tama matua ona itutino sa ma I’u ina tauanau ai o ia e la te faia ni uiga feusuaiga.

Na ta’ua e lenei tamaitai lona taumafai malosi e tete’e atu taumafaiga a lona tama matua, ae peitai ua malosi tele le ua molia.

Na manatua foi e le tamaitai na aafia nisi o faalavelave na tutupu i le va o ia ma lona tama matua, i le tausaga ua mavae, lea fo’i na faamalosi ai e le ua molia.

Na taua foi e le tamaitai i Leoleo Suesue le i ai o nisi o taimi e faafefe ai e lona tama matua o ia e fasi faamo’amo’a, pe afai na te ta’uina i se tasi le mea o loo tupu i lo la va.

O lenei tamaitai, sa galue I se tasi o Matagaluega a le malo, I galuega faapitoa a Fanau Aoga, I tuuaga o aoga, e pei ona fa’ato’a mae’a atu nei.

I le aso 17 lava lea na logoina ai le Ofisa o Leoleo, sa aga’i atu ai lenei tamaitai I le ofisa na galue ai, ma le faamoemoe e piki lana siaki.  O iina na maitauina ai e se tasi o tagata matua e galue I lea Ofisa a le Malo, foliga faanoanoa ma le mafatia o le tamaitai.

Ina ua fesiligia o ia e le tagata matua I le mafuaaga o lona tagi ma lona mafatia, sa faapea loa ona tatala iai e lenei tamaitai talavou le avega mamafa o lo’o ia tauaveina, e tusa ai ma uiga mataga a lona tama matua, lea na amata mai I le tausaga ua te’a, seia o’o mai lava I lea aso.

Ina ua mauaina e Leoleo le tama matua ma fa’ailoa iai ona aia tatau, sa o latou auina atu loa o ia I le Ofisa o Leoleo I Tafuna mo suesuega.

Ina ua mae’a ona faailoa i ai ona aia tatau i lalo o le tulafono, na taua e le ua molia lona malamalama i ona aia tatau, ma ua ia sauni fo’i e faailoa i sana faamatalaga mea uma na tutupu i le va o ia ma lona granddaughter.

Na taua e le ua molia e faapea, sa ia maitauina le suiga ua i ai uiga faaalia o lona granddaughter i totonu o le aiga, o le mafua’aga lea na ia tago ai loa ma siaki lona afafine, ma ia iloa ai, ua leva ona aafia lona afafine i tulaga tau feusuaiga.

Na ta’utino le ua molia i Leoleo Suesue, o ia ua sese i lana gaioiga sa faia, peita’i ua le mafai ona taofi lagona faaosooso. Sa ia ioeina uma fo’i faamatalaga a le tamaitai na aafia e faatatau i mea na tupu.