TALA I VAIFANUA

Pago Pago, AMERIKA SAMOA

FA’AEAINA SSG. TINOISAMOA, LOGANSCOTT T. - ARMY COMMENDATION MEDAL

O se tasi o Toa Samoa, le alo e fa’asino ia Lemoelefili Tulafono & Tino Tinoisamoa o lo ua fa’aeaina fo’i ina ua ta’auina se tasi o fa’aeaga i lana tautua ma ua fa’ai’u ai ina tuuina atu ma le fa’asinomaga o le nofoaga fou a le Vaega Au o le a tautua mai ai.

O lea alo o le atunuu o SSG Tinoisamoa, Loganscott T. ua fa’aeaina i le fa’ailoga o le tautua US Army Commendation Medal, ma o loo ua mae’a umia e ia le SSG poo le E6 e tautua ai. O lo’o tautua o ia e taitai 25U/C Small Group Leader ma ua siitia nei i lona nofoaga fou e tautua mai ai ma lona faletua o Emma Hanipale Tinoisamoa ma le fanau e to’alua o Tayler ma Shaun. 

O le taimi na faatautaia ai le ‘aiga e fa’amavae mai ai mai le nofoaga sa i ai, ua fa’apea fo’i taua’ao aloa’ia ai nei fa’aeaga, ma ua fa’ailoa atu ai fo’i le nofoaga fou e tautua mai ai i Alaska. 

O le tina o Loganscott, o Lemoe Tulafono Tinoisamoa, sa avea ma pule a’oga i Manulele Tausala Junior High, soso’o ai ma le avea ma Pule A’oga i le Tafuna High ae o le faia’oga mai tausaga e tele, i Fagaitua High se’ia oo mai ai ina avea ma Pule A’oga. 

Ua fa’aalia e Loganscott Tinoisamoa, “Ina ua lutia le tina i gasegase o le tino, sa ia tuua ai le galuega e pele ia te ia, o le Faia’oga, ae malaga mai. O se mea fiafia ia i matou le fanau, ona e le’i toe agaga lava o ia e toe foi atu, ae mafuta pea ma i matou i taimi uma o ona togafitiga i tausaga e tele, se’ia oo ina malolo ai fa’atasi ma i matou. O le a se sao e ta’ua ai i matou le fanau i galuega ma faiva ua galulue ai, tau ina ia silafia e Amerika Samoa, o le agaga ia fa’aauau ona aoga si o matou Tina i le atunuu e pele ia te ia, faapea fo’i ma i matou uma ma si o matou tama, lea lava ua fa’aauau ona matou nonofo pea iinei.”

UPUMONI PUA’AULI TUPUTALA - TUSITALA O LE “ITULA LEAGA FAIA O LE FA’AIPOIPOGA”

Ua maoa’e le taumafaiga a le tamaitai Tusitala Amerika Samoa ia, Upumoni Pua’auli Tuputala, ona o lea ua mae’a lana tusi muamua “Itula Leaga Faia o le Fa’aipoipoga” ae ua toeitiiti fo’i mae’a ona tusia lana tusi lona lua, “Lo’u Afafine Peleina.”

O nei fo’i tusi, ua mae’a fa’alaiseneina mo fefa’ataua’iga i le setee o Uosigitone, lea ua fa’amautu ai le tamaitai Tusitala si ona to’alua pele ma le fanau e to’afa, 2 tama 2 teine.

O le a se fe’au taua mai lea ulua’i tusi a le tusitala, ua ia fa’ailoa mai, “E ese lava le lautele o le atunuu lea e fa’atutu aga’i i ai lau tusi lenei ina ia fautuaina, ma tima’ia i ni misitelio o lo’o i tua atu o le olaga tuufa’atasia i se fa’aipoipoga e aga atu ina ia amatalia ai se aiga mautu e tausia lelei ai fanau ma feso’ota’i lelei ai aiga na lua,” o se tala lea a Upumoni. 

“O le tusi lenei, o le tusi e fesoasoani ai i nisi o tupulaga talavou, o lo’o ua mafana le faigauo ma ua aga atu e tuufa’atasia i le fa’aipoipoga mamalu, ae o tua atu o lena fa’aipoipoga fiafia, o le olaga tuutoina i le tautoga ia tasi lava lau va’ai, ia muta ai fo’i ou mana’o, ma ia fa’amautu le mafutaga i le alofa ma fa’amaoni i mea uma ma taimi uma.”

“Taimi faigata o le lutaluta ma sousou le mafutaga ona o fa’ai’uga faia, ae ua le autasi ai le loto o pa’aga e lua, ua foliga mai ua solituina ai aiaiga o le fa’aipoipoga na osia i agaga e lua ina ia tuufaatasia ma aufa’atasi. Le fe’eseeseaiga ua i’u ina faifai tetele ma fa’atupu leaga i le mafutaga. O le to’atele o tina, e manatu fa’apito ai loa ma fa’amatuu atu le tama o le aiga e alu ese mai le li’o o lona aiga sa mafuta lelei ai, ma tuuina i ai le saolotoga e toe filifili fa’alua ai.”

“O le tusi la lea, e leai, e le faigofie fa’apena ona fa’amatu’u esea atu le tautoga, o el tuuoti lava le mea na tauto ai, e le suia gofie fo’i lea tulaga i ni fe’ese’esega ona o fa’aiuga faia to’atasi, ae le’i mua’i feutaga’i.” 

“O le ala lea o le tusi, ina ia fesoasoani atu lava i nisi, ua faigofie ona fa’amatuu ese atu le tautoga, ma nisi o aoaoga lelei e maua mai e nisi, ona o sasi ma lape o le mafutaga sa soifua ai le ua autu i ai lenei tala tusia. O mea moni na tutupu ma mea moni fo’i ua mae’a ona toe fonofono ma toe fatufatu fa’aleleia ona e le uma lava le alofa.” 

O sina fa’aata lea ua fa’ailoa mai e Upumoni, lea fo’i ua fa’aea i ai aiga o lona tina mai Gagaifo Lefaga, ua fa’asuafaina ia “Faumuina,” o le suafa mo lona tina, ae ua fa’auia ia te ia lea ula, mo le pa’ia o Aiga.

O le tupuaga o lenei tusitala mai Alao, Amerika Samoa, ua ia fa’ailoa mai ai lona tama o Taufao Pua’auli mai Alao. Peita’i o lona tina o Lemalu Seina Afuie mai Gagaifo, Lefaga, Samoa Tuto’atasi.

E matua taua ia Tusitala le fa’asamoa ma le agaifanua o le soifua fa’aaloalo o tupulaga Samoa i o latou matua ma tagata tino matutua uma o le Aiga lautele. Ua atili ai ona fa’afiafiaina o ia e fa’alauiloa o ia o le Samoa i nei setete sa ulua’i fa’amautu atu i ai i latou i Sacramento, Kalefonia, a’o le’i masi’i mai ma lona aiga i Washington State.

“Ou te mitamita i le fa’avae o malo o Samoa ma Amerika Samoa, e atagia ai Faigamalo e fa’amautu i le Upu a le Atua, ma e taua fo’i le Upumoni a le Atua i o latou olaga. O le auga lava lea e tasi e taumafai i ai lo’u olaga tautua ma taumafai i faiva ua mafai ona tautua ai. Ua le fefe fo’i e faia suiga e tatau ai, pe afai e va’aia ua tauau ina faaletonu mai le ola a’e a le fanau, ua va’ai i suiga e tele o le soifuaga, ae galo ai ona toe tepa lava i le amataga maulalo sa tau atina’e mai ai e matua ua matutua, ma mana’omia le tausiga a le fanau ia i latou i nei atunuu,” o sana tala lea.

“O Amerika ua avea ma se atunuu ua aumaia i lo’u sui, ma tagata uma ua gasolo mai i ai e soifua a’e ai ma taumafai e fa’aleleia atili la’asaga o le soifuaga e ola mautu ai. Peita’i e le o mea uma e iila i nei fo’i atunuu, e tele suiga, tele fo’i mea e lu’ia ai lou tumau i le a’oaiga sa e soifua a’e ai.”

O lo ua ou va’aia ma faitau fo’i i galuega ua mae’a a nisi o tamaitai Samoa e aofia ai Sia Fgel ma Lani Wendt Young ma isi, ae o a’u ua na’o se tusitala fa’ato’a fofoa mai se fua, o le tusi lea “The Savage Hour of Marriage” poo le “Itula Leaga Faia o le Fa’aipoipoga!” i le tatou gagana.

Ina ua fesiligia se tasi sa sili ona latalata ia te ia mo se fesoasoani e fa’amalosia ai ona fa’amae’a lana ulua’i tusi, ae fa’ailoa mai ai le tamaitai VA, o le Samoa  ma o se Kerisiano e to’aga e tatalo malosi mo le leleiga o se isi uso o i ai le mana’omia. Sa ia tatalo i le Atua, ae maua mai ai i ana feso’ota’iga lea sui. E le’i la’ua fetaui lava, ae o le fa’amalosiau sa matua mana’omia e ia, i taimi faigata o lona olaga na semanu a le au ai le fa’amoemoe i se taunuuga lelei e pei ona i ai nei, sa ia maua mai lea ia Angel Fa’asua.

“O Angel Fa’asua, sa avea ma taula o le agaga e fa’amae’a ai lenei fa’amoemoe, le ulua’i tusi. O ia e vala’au mai i taimi tonu lava ua le manatu ai e toe fa’ai’u le taumafaiga, pe toe tago lava i ai. Lea ua mae’a, e tatau ona fa’afo’i le fa’afetai i le ua tatau ai, aua o le fa’afetai sili ona tele ma lalamua i mea uma, o le fa’afetai lea i le Atua o le malosi, ola ma le atamai uma lava,” o se toe tepa lea a Upumoni.

E valu masina atoatoa na tusia ai lenei tusi, ma ua fa’afetaia sa talia mo ona fa’atauga i Uosigitone ia Me 2021 ma ua i ai nei lea galuega i fefaatauaiga i luga o le Amazon. O le igoa o le tusi “The Savage Hour of Marriage”. le taimi nei o lo’o ua toetoe mae’a le tusi lona lua “My Dear Daughter”.