TALA I VAIFANUA

PASIA ABFAN LEMAFA - BISHOP DREWAN ULUA’I LA’ASAGA AVEA MA SEILA U.S NAVY

O le tamaitai talavou, o se Toa manumanu o le Vasa, sa aotauina o ia ina ia mafai ona ausia lona agava’a e ulufale ma tautua ai i le USNavy a le Malo tele. Ua fa’amanuiaina lana taumafaiga ma ua fa’au’u mai i le vasego le Boot Camp ia Aperila 12, 2021 lea ua fa’au’u mai le latou vasega lea ia Aukuso 06, 2021.

Ua avea nei o ia ma ABFAN Lemafa Bishop, Drewan ua agavaa e galue ai mo el USNavy. O le tamaitai Seila na fa’au’u mai le Aoga Maualuga a Fagaitua High i le vasega fa’aiuaso o le tausaga o le 2013, ulufale ai lea i le Kolisi Tuufa’atasi ma fa’au’u mai i le tausaga 2016 ma lona fa’ailoga o le Tausitusi ma le Suetusi.

Ina ua mae’a ona ulufale lea o ia i le Ashford University ma faauu mai ai ma lona fa’ailoga o le Bachelor of Science Accounting poo le Suetusi ma le Tausitusi.

O le aso ua fa’amauina sa ulufale ai i le USNavy, Aperila 12, 2021 ma ua fa’amauina nei fo’i sa mae’a lana ulua’i aoaoga fa’apitoa i le USNavy, na amata lava o latou nofova’ava’aia muamua i latou i nofoaga fa’apitoa e siakia ai poo maua se isi i le Covid-19 mo le lua vaiaso fa’ato’a amatalia ai le latou aoaoga fa’amilitery a le Navy o le Boot Camp.

O le isi aoaoga na faatautaia e soso’o atu i le Boot Camp ina ia a’otau tomai e mo’omia mo faiva ua fa’atulaga e tautua ai, sa amatalia lea ia Iuni 27, 2021 ma fa’ato’a mae’a ia Aukuso 06, 2021 ma ua maua ai loa ana toniga ma le tofi ua fa’atulaga e tautua ai, ABFAN Lemafa-Bishop.

O le avea ai ma Aviation Boatswain’s Mates e tatau ona va’aia lelei i latou le utuina o va’alele a le US Navy. 

E afua mai le latou va’ava’aiga i le tulaueleele o va’alele i luga o va’a tetele o lo’o fa’atulaga e tulaueleele ai va’alele i luga o le sami, fa’apea fo’i ma nofoaga fa’apitoa o Uafu ua tofia e galulue ai. O latou e taga’i toto’a i kesi eseese e fa’aaogaina mo va’a o le fuavaa ma va’alele o le fuava’alele i luga o le Uafu ma e taua tele fo’i lea faiva, ina ia sa’o lelei le ituaiga kesi mo va’alele ma va’a e fa’aaoga. O isi va’alele e ave’esea mai le kesi ae suia ma ua fa’apea fo’i i va’a tau a le Fuava’a.

Ua fa’atulaga lenei alo o le atunuu e amata lana tautua ia Aukuso 12, 2021 i le lotoa a le Fuava’a poo le US Navy ua i ai i Bremerton, Washongton State. O le aso ananafi ua to’ai taunuu ane ai AFBAN Lemafa - Bishop, Drewan i lea nofoaga.

Tau ina ia fa’amanuia le Atua i le soifua tautua o lea fo’i alo o Amerika Samoa, o le Teine o le Asaga, le Au Kirikiti ta’uta’ua mai le motu o Aunuu.

PAULINE GEBAUER WHITE - PISINISI GAOSIA TUIGA MA OFU SIVA SAMOA

O se tasi o alo o Amerika Samoa, le tamaitai o Pauline Gebauer - White, o se tasi sa mua’i avea ma Fitafita Samoa i le US Army, ua suia nei lona soifua auauna mo tagata Samoa uma e mo’omia ona i ai sona Tuiga Samoa, fa’apea ma la’ei e sausaunoa ai fa’a-Tausala ma Manaia i faafiafiaga fa’aleaganuu, ua masani ai i tatou uma.

Ole igoa o lana pisinisi tumaoti ua fa’atautaia nei mai le a’ai o Las Vegas, Nevada o le Urban Islander Designs. Ua i ai fo’i se tala sa tusia e fa’atatau i lea lava auaunaga i le nusipepa o faipisinisi i le Iunaite Setete, “Forbes”.

E oo mai lava i le aso Lulu na te’a nei, sa faia ai se fa’afiafiaga i Las Vegas ae sa teuina le tausala lalelei i teuga sa tapena mai e le tamaitai o Pauline Gebauer White mai lona faleoloa. Ua le gata i le tuiga ua tapena, ae ua fa’asolo ane i lona la’ei atoa ma ana teuga ua maua ane ai le tauaofai o nei mea uma i le $1,100. ma o se tala mai a Pauline, “O au galuega nei e tapena ai la’u taulaga ma sefulua’i e molitai i lau Ekalesia o sou sao mo le galuega a le Atua.”

O Pauline o se tasi o alo o le atunuu ua mae’a le tautua i le USArmy ma ua agava’a i ana penefiti uma lava ona ua fa’agasegasea. O lea la e oo lava i lona fale ma ana mea uma ua maua fua mai i ana alamanuia nei mai le auaunaga i le vaega au.

Ua ia fa’ailoa, “O la’u taleni lenei ua ou fiafia e faatino, ina ia fa’aaoga ai so’u iloa ma o se fa’amanuiaga mai lou avea ai o se talavou mai Samoa, o le Samoa moni lava.”

Ua le gata la i penefiti a le tamaitai Fitafita Tuai ua maua, ae ua faapea fo’i ona maua e lona aiga le  alamanuia mo le sui e tausia leleia o ia i ona a’afiaga talu ai lana auaunaga i le vaega au. O lona to’alua Shaun White, o se tasi fo’i o Fitafita Tuai, o lo ua mauaina le alamanuia e avea ai ma sui e tausia lelei o ia, ma sa mauaina e i la’ua na manuia ina ua tu’ua le vaega au i le tausaga e 2006.

O lana tiute mulimuli lava sa tautua ai i le a’ai o New York i Fort Totten. O iina sa tiute fa’atasi ai i latou ma Manu ma Tumua Viena, o nisi o fitafita Samoa.

O le tausaga lava na mae’a ai lana tautua i le USArmy 2006 na toe fa’amautu mai ai loa i la’ua i Las Vegas Nevada ina ua talia mai le la’ua litaea ona ua tumau ni fa’aletonu o le soifua maloloina ona o a’afiaga mai le tautua i le vaega au.

Na soloa’i mai ma maua se avanoa e galue ai mai le fale ma ua faamasani ai loa e sailia nisi tomai e mafai ona faatautaia ai tautua mai le fale ae fa’afesootai i ala o upega tafailagi mo fefa’ataua’iga.

“O le mafuaga lea ua mafai ai ona manatu e fa’atautaia le auaunaga lea e ala i teuga mo fa’afiafiaga a Tausala ma Manaia Samoa. Ua matauina le moomia ma le aoga o lenei auaunaga, aua e le o tu’ua e Samoa le tatou lea agaifanua ao alaala ma nonofo ai i atunuu tetele e pei o Amerika, Niu Sila, Ausetalia ma isi malo o le atu Europa,” o sana tala lea a’o ia fa’ailoa le mamao ua o’o i ai fefa’ataua’iga o ana oloa gaosi.

“Ona o feso’ota’iga tau Upega Tafailagi ua faasalalauina ai lenei auaunaga e soo se atunuu lava e mafai ona oka mai ai e le tagata nei oloa, o le faigofie fo’i lea ona maua maketi lelei mo lenei auaunaga, ae ua iloga ai fo’i, le malosi o le loto o le tagata Samoa i ana tu ma agaifanua, ae maise i ala o fa’afiafiaga.” 

Ua fa’alautele e Pauline Gebauer lana maketi ma ua faasolo ina i ai sui ua faigaluega tumau i le gaosiga o ana oloa e pei o Pale Fuiono, titi fulumoa, sei fulumoa, o la’ei e siva e gaosia i le siapo ao isi e gaosia lelei i le ietoga, poo fala’ie mamae. O nisi ua fa’aaogaina lava ie mamafa ma e anagata e le vave masae ae lelei ona mamanu ia fa’afetauia ma teuga a le tausala poo le manaia ua filifilia.

O le tamaitai o Pauline Gebauer White o se alo e fa’asino ia Iliganoa Sooalo Jamias ma Peter Gebauer o Nuuuli ma Malaeimi.