TALA I VAIFANUA

Pago Pago, AMERIKA SAMOA

FAAFIAFIAINA TO’ATELE MATUA MATUTUA I AMERIKA - MOLIMAU A TROY POLAMALU

Mai le tautalaga a le alii tautaua i le Football i lona tulaga o le Wide Receiver, Troy Polamalu, sa matua fa’ailoa ai le agaga me’eme’e ma le fiafia o matua matutua ona ua ta’ua le igoa pele o Amerika Samoa, o le atunuu na soifua mai ai. Ua le gata i lea, ae ua ia fa’ailoa i lana aganuu o le a’oa’oina lelei o fanau ina ia fa’aaloalo ma usiusita’i i matua ma e matutua o le aiga atoa.

“O le ituaiga fa’amaumauga lenei ma tautalaga e fa’aosofia ai le lagona fiafia ma le mitamita ona o se fa’aeaga o le fanau ua tupuga mai le atunuu, e iloa atu ai Samoa i lana aganuu ma agaifanua e tausia ma faatonu ai fanau. o le to’atele o fanau ua maua manuia tau le tamaoaiga, ua latou fa’agalo le aoaiga a matua ma le agaga moni o le ola fa’aaloalo i e matutua. Fa’afetai mo le ta’utinoga a lea alo o Amerika Samoa, ua ia ta’utino lona tupuga mai i le tatou atunuu ma aoaiga lelei e ola ai. Leitioa fo’i a fa’amanuia le Atua i lana taumafaiga ona o lo’o ia tumau i le aoaiga lelei,” o se tala lea a le tama matua o Matagi mai Fagatogo ma Faleasao, o le tama fo’i mai le Manu’atele.

O le avea ai ma tama Samoa ua iloga i le toe foi mai o Polamalu ma le Fa’asamoa Initiative i le tausaga e 2015, lea sa ia fa’aoo atu ai le to’atele o isi alo uma o Samoa o lo’o ta’utaua i fa’agatama eseese ina ia latou toe fa’asoa se iloa i nei fa’agatama eseese i fanau talavou i Amerika Samoa.

Mai ia Iulai o lea lava tausaga, 2015 na toe fa’aoo atu isi ana fesoasoani i le tausaga 2017 ma le 2019, ae o lea ua filifilia nei o ia e le Pittsburg Steelers e ulufale atu i le “Hall of Fame” i le fa’atasiga tele sa faia i Pittsburg.

E lua superbowl ua umia ai nei e lana ‘au lenei le Siamupini i le Football a le NFL, ae tasi le taimi na oo ai i latou i le sailiga o le siamupini ae sa faiaina ai. 

MAEA FA’AFOTUTUPU AFIOGA LE SA’O - TUANAITAU POUTUTASIOLEITUMALO:

Ia Me 27 & 28, 2021 na fa’afotutupu ai le afioga le Sa’o, Tuana’itau Vaesa’u Malaki Poututasioleitumalomalotumaumafatulegaee i le fale o Latia i Pavaiai lava. O le maota e fa’asino i le Sa’o ma Tei, susu ai le na Muaimalae, susu le Taumafalofi, le fetalaiga ia i latou Matua, Salemeana’i ma Lufilufi ma le nofo a Tualauta. 

O le Malae lava i le Fale o Latia na fa’atautaia ai mea uma mo le fa’amoemoe i ona aso e lua. Le aso 27 Me, 2021 o le fa’amoemoe lea o le fa’anofonofo ma le faletua ina ia fa’apa’iaina i le la’ua Ekalesia, le Katoliko Roma i Pavaiai lava. Lea sa fa’ataunuu lea fa’amoemoe maualuga i lea aso i le itula e 5:00 i le afiafi ma sa ta’ita’ia lava le sauniga mamalu e Moseniolo Viane Etuale ma le aufaigaluega Katoliko Roma, ma sa fa’amanuiaina ai le afioga le Fa’anofonofo ma le Faletua e a’ao uma lava o ta’ita’i Ekalesia ua aofia i totonu o Pavaiai.

O le toe tula’i mai o lana afioga le Sa’o e ta’ita’ia le faiganuu a lona afio’aga i Pavaiai, ua fa’ato’a toe nofoia lea o le poutu i lona tala talu mai le 10 tausaga o avanoa.

O le afioga le Sa’o sa mua’i tautua i lona aiga, i le suafa Vaesa’u mo le aiga o lona Tama mai Sa’ilele, Amerika Samoa. Peita’i ua toe tusilima i ai le pa’ia o aiga na te tauavea le suafa Tuana’itau mo lona aiga i Pavaiai.  ia o se tasi o alo e soloa’i mai lona tupuaga mai ia Tuanaitau Numera, o se tasi sa auai i le Maota o Ali’i sa latou sainia le feagaiga ma le Malo Tele e fa’atula’ia ai le Malo Fa’ateritori o Amerika Samoa.

O lona faletua, Tiana Toleafoa Togiola sa masii mai uma ona aiga mai Leauva’a ma Vailele i Samoa, fa’apea fo’i Vaiusu ma Savaii ina ia fa’ailo le fa’aeaga ua oo i le soifua tautua o le latou alo na sausausema mo le pa’ia o aiga.

O i latou na sa molita’ia maia le fa’anofonofo ma le faletua i le ta’alolo tele i le toe aso o le fa’amoemoe i le Fale o Latia, Pavaiai.

“E ui ina e le’i faigofie le ala i malo, ae sa tulitulimatagau lava se finagalo o le Atua i le tofiga a aiga, lea ua sologa lelei mea uma, ua mae’a fa’ailo fo’i le autasia o aiga uma ona fuaiala e valu, ua latou filifili e avea ai ma suli e tausia aiga i lenei vaitau. O se fa’asinomaga ua maoa’e ma e le fa’atauagavale fo’i i ai lo’u nei tagata, pau o le mea o le fai le mea sili, ma tausia aiga, ta’ita’i atu i matou uma i manuia o le Atua, ma ia taumafai lava i le nonofo filemu ma le loto aiga ia fusia ai i matou uma i le alofa o le tasi i le tasi.” O se saunoaga lea a Tuina’itau Vaesa’u Malaki e tusa o lona filifilia ai e lona aiga e tauavea le suafa.

E tula’i mai lana afioga le Sa’o i le suafa a aiga ua atoa lona 57 tausaga o le soifua. O ona matua fo’i o le afioga Vaesa’u Togiola PoututasioleitumaloMalotumaumaFatulegae’e ma si ona tina o Vaalele Togiola, o le tamaitai na soifua a’e i Olohenga Mamao. Ua mautu atu i la’ua uma i ti’asa, ae le mafai ona fa’agaloina le a’oa’iga, ia nonofo fealofani ma aiga uma, ma ia tautua aiga, afio’aga ma le itumalo i mea e mafai ona fa’atino i le atamai ma le malosi ua foa’ia mai e le Atua. O le latou aiga fo’i ma matua ua malolo mai i ti’asa, o se tasi lea o matafale na auai i le taumafaiga fa’atasi ma isi e fa’atulaia le Ekalesia Katoliko Roma i Pavaiai.

O lo ua avea Tuana’itau Vaela’a Malaki ma Taitaifono o le Ekalesia i Pavaiai mo le 23 ai lenei o tausaga. O lo ua tautua fo’i le afioga le Sa’o i le Atunuu e ala i le Sosaiete a le Aufai Fa’ato’aga i lona tofiga Peresetene o tula’i mai i lenei vaitau. Talu ona malolo mai tautua i le Malo, o lo ua matua mafuli i la’ua e toe fa’aa’e mai le faiganuu i Pavaiai, ua fa’atasitasi le afioga le Sa’o ma le vasega o Alii ma Tulafale fa’apea ma le fa’amalosia o le Malosi o le afio’aga i lana aumaga. Ua faia latou fonotaga i vaiaso ta’itasi ae o latou leoleoga ma fonotaga e faia i po ta’itasi ma le afiafi o Aso Sa ta’itasi e fa’atasia ai mo fonotaga i mataupu e fia talanoaina i le Saofaiga o le pulega a le afio’aga o Pavaiai.

Mai le itu o le saofaiga a Faletua ma Tausi ma le tinifu, ua tula’i mai ai fo’i le faletua o Tiana Toleafoa Togiola ma ua amatalia fo’i le latou galuega fautua ma le fesoasoani atu i tiute fai e agava’a mo le tausiga lelei o fanau i totonu o aiga, ia va’ai toto’a fo’i tina i a latou matafaioi fa’atino i le fatuaiga tausi mo fanau ma le tausialii.

O le Fale o Latia, le fale sa sili ona tuai i le afio’aga, sa mua’i galueaina ma toe umusaina a’o le’i fotutupu le afioga le Sa’o i lona itumalo, afio’aga ma aiga ia Me 28, 2021.