TALA I VAIFANUA

PGO PAGO, AMERIKA SAMOA

FAATASI TAGATA PASEFIKA POLOKALAMA A LE FALELALAGA - TALIMALO SAMOA:

I le fa’atasiga a le Falelalaga o le Pasefika “Pacific Weavers Program” mo tagata matutua uma lava i le setete o Uasigitone, sa latou fetufai ma fa’amasani, fa’afiafiaina o latou sui i a latou polokalama e masani ona mafuta ai, sa auai uma ai isi fo’i sui mai isi malo uma o le pasefika, ae talimalo ai Samoa.

Na fa’ataunuu lea fiafia i le Federal Way i le nofoaga masani a le Pacific Weavers, lea fo’i ua va’aia ua fa’atautaia ma le latou polokalama mo le fanau talavou, ina ia fa’aauau pea ona fa’afiafiaina i latou e feso’ota’i, o nisi sa soifua a’e i malo faa-atumotu o le Pasefika. 

“E taumafai lava e fa’amanatu pea tu ma aga fa’a-atumotu i lagona ma agaga o le fanau talavou, ia le motusia le latou soifua feso’ota’i ma o latou aiga ma pelega e masani ai le soifuaga fa’aatumotu, e to’atele totino i totonu o aiga, ma e tatau ona soifua ola fa’aaloalo i e matutua ma tausia lelei i latou pe a vaivai ma ua mana’omia ona latou tausia lelei i latou.” O se talatala mai lea a le ali’i o Iosefa Se’ia, o le alo o Amerika Samoa mai Tafuna, ma ua avea ma CEO o le Pacific Weavers, poo le Falelalaga o le Pasefika.

Ua faailoa mai o le fa’atasiga lenei, e masani ai lava ona faia ina ia feso’ota’i sui matutua o le atumotu ma fa’atasitasi e talitali manuia o lo’o ua fa’atulaga e setete o le Malo tele, e tausia lelei ai i latou a’o alaala tumau i Amerika. O nisi aoga o le latou polokalama, ua fa’aaogaina e mafai ai ona maua mai ai le to’atele o i latou e fesoasoani atu i isi polokalama mo le fa’asoa atu o alamanuia mo sui uma o alaala i le setete o Washington.

Mo lea lava fa’amoemoe sa auai mai ai nisi o sui mai le Malo o Tonga, malo o Fiti ma le Malo o Palau. O le susuga Waisale Serevi sa auai mai mo le fa’amoemoe e fesoasoani foi i ona tagata nuu o lo’o alaala uma lava i lea vaega o le setete o Washington. O lo’o auai fo’i o ia o se tasi o lona malo e aofia i le pulega ma fa’atautaiga o le Pacific Weavers. O nisi sa auai mai i le vasega o Samoa na talimalo sa aofia ai le susuga Matagi mai Fagatogo, Bernard ma Maasoama mai Petesa Tafuna, Pua ma La’auli mai Malie Samoa, Villa Eneliko Tofilau mai Leone, faapea ma isi sui uma mai Manu’atele ma Tutuila Amerika Samoa.

Ua i ai nisi sa faigaluega i nisi o lala o le tatou Malo ua va’aia le nonofo mau ai iinei e aofia ai le tama’ta’i o Rona Muliagatele sa tautua i le DHSS i lona tatala ai, Fa’auila Vaimauga ma nisi o tamaitai o Lahaina Muluea Tusi ma Faleupolu Fuatagavi Masaniai. O i la’ua ia ua fa’aautu i ai le auaunaga mo tatou tagata matutua ua fa’aigoaina o le Asian Counseling Referral Services King County Behavioral Health Managers in Samoan Community.

Ua galulue feso’ota’i i latou ma le susuga Joseph Se’ia mo lea fa’amoemoe na fa’atasia i le aso Faraile ua te’a, ma sa fa’apea lava ona mautu ma ausia le fa’amoemoe o lea fo’i aso.

O tapenaga sa faia, sa mua’i faia le fa’alauiloaga o lou sui ma le nuu, atunuu ma lou aiga e te sau ai, ma le malo o le Pasefika e fia ulufale atu i ai mo sau tafaoga pe ete nofo mau ai. Ina ua me’a sa fa’atulaga le taimi e fefa’amasani ai ai, ona alo ai loa lea i le latou ‘aiga fiafia na tapena e le vaega o uso mai Samoa uma sa aofia i lea aso. O le latou ta’aloga Bingo na fa’aiu ai ma ta’ape le fuamanusina i le itula e 2:00 i le aoauli.

TOE FA’ATETELE LE COVID-19 I HAWAII - AVEA MA FA’AUILAVEA O LE TATALA O TATOU FEMALAGA’IGA:

Ua fa’atulaga taimi e fa’atautaia ai fa’atasiga, ua le fa’asaina fo’i le femalaga’i mai o nisi mai atumotu e uia ai Hawaii ae le’i faia tui puipuia fa’atasi ai ma le toe fa’amalosia o le faia o a’oa’oga e fa’aaoga ai feso’ota’iga o tau Initeneti i aoga a le setete, o nisi nei o mea ua toe fa’amalosia ina ua toe pepesi fa’alauaitele mai o le Covid-19 Delta.

O mea sli ia ona taua i le toe va’ai toto’a o le vasega o ta’ita’i o lea malo, ona ua toe maualuga le oso o le faitauga o sui ua a’afia nei i le Covid-19 Delta.

“Ua matou taumafai e fa’amautu mea uma nei ua lisia i luga a’o tapena atu mo le toe a’e o a’oga a le fanau, ma e le o toe faigofie aua ua matele ina muamua tatala le tele o vaega o le fa’asa sa fa’amalosia muamua, ae ua avea ma ala e toe fa’atetele atili ai le a’afia o tagata i le Covid-19 fou lea.”

Na mua’i fa’ailoa e Kovana Ige e na te le sapaia le toe taofia o aoga a le fanau, peita’i ua ia silafia lelei lava, e i ai vaega o le faasa o le a fa’amalosia nei e toe aiaia ai aoga a le fanau, ina ia saogalemu le fanau talavou.

Ua fa’ailoa mai e le sui kovana a Hawaii Josh Green, ua toe fa’amauina le to’a 628 tagata ua fa’amaonia le maua i le Covid-19 ae 424 lava ia sui mai Oahu lea e i ai le laumua o le setete, Honolulu.

O le lona lua ai lea o aso talu ona silia ma le 600 i latou ua fa’amauina ua maua i le Covid -19 mai falema’i ua taumafai ona togafitia ai.

O le aso Tofi e 655 i latou ua fa’amauina ua maua i lea asoma sa agai atu i falema’i e fia maua se togafitiga, E 628 na fa’amauina mai falema’i i Hawaii ae o isi sui ua faamauina mai isi malo tulata sa malaga atu i ai nisi ae ua maua i le fa’ama’i. O le faitauga lea e 21 i latou.

SIAMUPINI LE RED ANGELS - LIKI A LE SUMMER 2021 FANAU 8-10 TAUSAGA LE MATUTUA:

I le malae o Tony Solaita i Tafuna na fetaui ai le Red Angels ma le Rebels i le po o le aso Tofi ina ia sailia fo’i poo ai le ‘au e avea le Siamupini 2020. Fa’ai’u le taumafaiga na matua saili i ai nei ‘au malolosi, ma ua sola le Red Angels ma le siamupini o lenei tausaga.

Ua fa’ailoa mai e le tamaitai o lo’o tu malosi e sapaia le Red Angels, “O le tauiviga lenei e le’i faigofie ona matauina po’o ai le ‘au a sola ma le siamupini. Tau fai lelei uma lava le ta’a’alo malolosi o le fanau sa fili fa’apitoa mo le Rebels fa’apea fo’i le Red Angels. O le iuga o lenei ta’aloga faitaulia, ua fa’amaonia ai e sili teisi lava le malolosi o le ‘au a le Red Angels i le Rebels, ae fa’afetaia le iuga matagofie o lenei filigamaea. Malo le ta’a’alo fa’atausala i le fanau.”

O le fa’afetai sili na fofogaina sa fa’amalo mai ai le vasega o matua i le tamaitai o Nelle Monroe, Ashley Felise ma Hendrix Scanlan mo le aoaoina fa’apitoa o le latou ‘au. Silisili le fa’amalo i le vasega o matua ma aiga o e pele ia i latou le fanau, aua o i latou sa faia le faiva o le tapua’i ma le naunauta’i ia manuia le ta’aloga a le fanau.