TALA I VAIFANUA

Pago Pago, AMERIKA SAMOA

FAIA’OGA TUMATI’E TAUMAFAIGA I AOAOGA O LE NUMERA I LE 2019 & 2020 

O le taua’aoina o fa’ailoga tumati’e o galuega fa’atino i le Numera, o se mea e faatautaia pea e le vasega a le OCI Math & Science a le Matagaluega o a’oga i tausaga ta’itasi, lea e latou te sailia ma vailiilia ai aoaoga ma galuega fa’atino a faia’oga uma o le Numera ma le Fa’asaeanisi, ia maua se tasi ua tumati’a lana taumafaiga i le Numera i tausaga ta’itasi.

Lipotia mai e le tamatai o Magdalene Augafa Leauanae, o se totino e galue mai lea vaega o le Matagaluega o A’oga ae o se tasi fo’i sa pale i lea faailoga i le tausaga e 2001.

O i la’ua ua lautogia mo nei fa’ailoga mai le tausaga 2019 ua tula’i mai ai le tamaitai o Loretta Mapu Atonio ma le sui ua filifilia mo le tausaga 2020 ua tula’i mai ai le tmaaitai o Fa’asalaga Ikenasio.

Na fa’atautaia lava le sauniga mamalu e le vaega o le OCI o le Matagaluega o Aoga a le malo ina ia fa’amau fa’ailogaina nei sui ma le la’ua taumafaiga mata’ina i nei tausaga e lua. Sa le fa’ataunuuina i le vaitau masani le taua’aoina o le fa’ailoga i le tamaitai na malo i le tausaga 2019, peita’i ona o le a’afiaga o le fa’ama’i lea ua filifili ai le matagaluega o le a tu’ua se’ia oo ma i lenei vaitau o le olaga ua saogalemu fo’i mai nei a’afiaga, ona faatautaia f’atasi ai lea ma le sui agava’a o lenei tausaga.

Fa’ailoa e Atonio, “E leai se faigofie o le taumafaiga poo le ala o le umia o lenei tusi pasi ma le fa’ailoga, ae o le tuu lava i ai o le mea ua mafai, o se mea sili ua oo i ai le soifua galue, fa’afetai ua fa’ate’ia lava lou tagata ina ua maua le vala’au, ma iloa ai ua lautogia. O le fa’afetai e ave i le Atua o le atamai ma le ola”.

O le taumafaiga sa fuafua ma fa’atulaga mo faia’oga e mafai ona maoa’e le latou aoaoina o le Numera ma le Fa’asaeanisi i potu a’oga. O lo ua matauina e faia faiva fa’apitoa o pule a’oga ma sui Pule i lea mataituina fo’i o faiva o faiaoga uma, ia mautu a latou fa’amaumauga o galuega i potu a’oga, ma o se tasi lea o vala o le fa’afetai. O le galuega mae’ae’a o faia mai ina ia tuufa’atasia ma sailia ai le sui ua sili ona agava’a mai faia’oga uma lava o le Numera ma Saeanisi.

Ua fa’ailoa le agaga fa’afetai o nei sui ua taua’aoina i ai fa’ailoga nei mo tausaga a’oga ua mae’a nei e lua. O fua nei o galuega ua amata seleseleina, ae o le fa’anaunauga, ia atamamai alo o Amerika Samoa ona sa fa’atino tiute o faia’oga ma le mata’u tele ma le fa’amaoni lava.

Na i ai saunoaga fa’apitoa o le aso iloga, ma sa tula’i muamua ai le tamaitai Magdalene Augafa Leauanae mai le OCI ma ia fa’afetaia le galuega ua mae’a faia e nei faia’oga, sa la’ua faia le mea sili ma aoao le fanau ia atamamai.

“E tele ala a le Atua e toe fa’afo’i atu ai lau galuega na faia ma le fa’amaoni, fa’afetai o se tasi lea o na ala, sa matua le mailoa lava e i oulua o le a avea oulua ma nisi e fa’aea i lenei aso. Fa’amalo lava le galulue, o le fua o le tatou galuega faitele, ia atamamai uma fanau a le atunuu, e fa’auia mai i o tatou potu a’oga.”

Na oo ai lea i le avanoa o le Sui Fa’atonu o A’oga Netini Sene. O ia lea e matua una’ia malosi lea itu o aoaoga a le fanau, le Numera ma le Saeanisi.”O galuega lava ua fua, o la oulua faiva sa faia ma le punoua’i, ua lua tali i ai i lenei aso. Fa’amalo le fai o le faiva, fa’malo le tauata’i, fa’amalo le onosai e aoao le fanau.”

Mai sui na lautogia mo nei fa’ailoga, sa la’ua fa’ailoa mai ai e tusa o ala o feso’ota’iga tau Upega Tafailagi, “O le fa’afetai e fo’i i le Atua e ona le ola ma le malosi uma lava. O ia fo’i e ona le mafaufau tonu ma le poto o lo’o sailia, fa’afetai i le vasega o pule a’oga ma sui pule fa’apea le vasega o uso a faia’oga ae maise lava le vasega o fanau a’oga. O outou la matou fu’a e ao ina agiagia, e tatau ona matou galulue ina ia fatufatu mea lelei ma a’oa’oga tatau i o outou mafaufau, ina ia atagia matou galuega aoao ia te outou. Fa’afetai i lo outou naunau ma le olaga fia iloa ma saili le atamai. Ia outou tutupu ma ia outou iloa so outou vala’auina mai le Atua soifua. Fa’afetai fo’i i o matou aiga i ma’ua pa’aga ma fanau, o outou lava e mapu atu i ai le aupeau. O a lava tiga ma ni leleiga o galuega, tou te fa’apalepale mai lava ma onosa’i ao tausaili i so’o se faiva. O la ma’ua taumafaiga, o le tatou taumafaiga ma se fa’aea fa’atasi lava lea ma outou.”

Peita’i o le la’ua mau na fa’aea i lea aso, sa saunoa i ai le tamaitai o Fa’asalaga Ikenasio, “O le tatou manulauti, E tatau ona ave le fa’amuamua i fanau, ia aoaoina lelei.”

SUIA MALAGA VA’ALELE IA AUKUSO 26 IA SETEMA 13, 2021

Ua mae’a fa’amaonia mai e le Fa’atonu o le Medicaid Office le taofiga o le malaga a le Hawaiian Airlines sa tatau ona toe amataina ia Aukuso 26 i le va o Honolulu ma Amerika Samoa, ae ua tolopoina i le aso 13 Setema, 2021.

O le mafuaga ua fa’ailoa mai, “Ua manatu le faigamalo ina ia tauofo fa’atopetope le konekarate mo le fa’atula’ia o le Talofa Pass, le ala o le a fa’aaogaina e ulufale mai ai tagata uma i totonu o Amerika Samoa pe a oo ina tatala le fa’asa o femalaga’iga i totonu ma o ese mai le tatou teritori.

I se pepa o fa’amatalaga mai le Komiti Fa’afoe o le COVID-19 Task Force sa fa’ailoa ai e le taitaifono Lutena Kovana Talauega Eleasalo Ale, “O le fa’amautinoa a’ia’i lava o mea uma tau sootaga ma le tatou malo ina ia le atili ona faigata ona ulufale mai lava se tasi ma le fa’ama’i. O lo ua taumafai lava ina ia mautu mea uma ae maise  o se fesoasoani mo i latou ua maea fa’amauina nofoa i femalaga’iga a va’alele e o atu mai Amerika Samoa ma malaga i fafo atu o Hawaii aga’i i isi setete uma.”