TALA I VAIFANUA

Pago Pago, AMERIKA SAMOA

26 AUKUSO  LE ULUA’I MALAGA E LE NOFOVA’AVAAIA -  HAWAIIAN AIR 

Ua amata foi le nofo va’ava’aia a le to’a 242 sui o e ua maea filifili e fia malaga mai i le malaga lona valu ma o le toe malaga lenei a le malo o Amerika Samoa ua fa’atulaga e toe fa’afo’ia mai ai o latou tagata o lo’o aumau i fafo atu o latou laueleele ma aiga. O lo ua nofoia e i latou le faletalimalo o le Ohana Waikiki East Hotel i Honolulu.

Mai le lisi o i latou uma sa nofo talosaga mo le fia malaga mai ma sa fa’amauina o latou suafa i le lisi i Upega Tafailagi a le DOH ma le Madecaid, o loo totoe mai ai le 400 o i latou nei, peita’I e to’a 200+ ua toe ave’esea o latou igoa, ina ua manatu i latou e sili ai le toe fo’i sa’o mai lava i le taimi ua le toe faia ai se nofova’ava’aia.

Pe afai o le a mae’a nei malaga o lo’o fa’atautaia mai a le tatou malo o le a toe fo’i lava le fa’avasegaina o latou pasese e malaga mai i le atunuu i le Hawaiian Air. O le aofai o malaga o lo ua fa’atagaina e le malo, o malaga na o le a fa’atautaia e le va’alele a le Hawaiian Air i lo tatou va ma le Iunaite setete.

O le malaga muamua o le a faia fa’apea,o Aokuso 26, 2021.

E ui la ina le faia se nofova’ava’aia mo malaga uma a le Hawaiian Air, ae o lo ua maea tapenaina se sootaga e fa’ailoa atu ai i pasese uma ituaiga suega e ao ina faia e pasese e mafai ai ona fa’ataga i latou e malaga mai i Amerika Samoa.

O le sootaga lea o lo’o tapena mai e le tatou Komiti Fa’afoe o le Covid-19 a le tatou Malo, ma o le a mae’a tapena lelei lea sootaga e mafai ona fa’auia i lau telefoni, ipad poo se Komipiuta ina ia mafai ona fealua’i le tagata ma taga’i toto’a i aiaiga e mafai ai ona malaga mai i Amerika Samoa.

O le aumalaga lea e fa’amoemoe e malaga i le malaga a le va’alele lona 8 o le a amatalia ona fai latou suega o le Covid-19 ia Iulai 21, 2021, ae malaga ese atu i latou i le aso 29 o Aukuso.

Peita’i, o nisi o malaga o lo’o ua fa’atautaia pea nisi malaga e totogia na’o le ta’itasi pasese e malaga ai i Hawaii lea e amata i le aso, 22 Iulai, 2021, Aukuso 05 ma Aukuso 12, 2021. O malaga uma nei ua faatautaia pea e le Medicaid Office

FA’ATULAGA LE VAITA’ELE O LE PALA LAGOON E TATALA I LE VAIASO NEI

Ona o le tele o aiaiga o le fa’asa ina ne’i a’afia nisi i le Covid-19 sa tapunia ai le tatou Vaita’ele o le Pala Lagoon, lea sa fausia o se poloketi tele a le Rotary a Amerika Samoa. O le taimi nei ua toe asiasia lava e le Rotary le tatou Vaita’ele ma ua tapena lelei, ina ia mafai ona toe fa’aaogaina aua o lea ua matele ina soloia nisi o fa’asa o le tatou Covid-19 i lo tatou malo nei.

O le masina o Mati 2020 na tapunia aloa’ia ai le tatou Vaita’ele, lea ua fa’ailoa mai  e le susuga Taulapapa Willie Sword, “O lo ua gasolo mai lava totino o le Rotary e toe fa’aleleia ma fa’amama le tatou Vaita’ele. O le vaitau lenei o le taumafanafana e tatau ai ona fa’afiafia le fanau a le atunuu e fa’aaoga le tatou Vaitaele ma a’oa’o ai latou ‘a’au.”

O se tala fiafia la lea mo le vasega o le fanauiti, o lo ua fuafua e toe tatala le Pala Lagoon Swimming Pool i le vaiaso nei. Ua i ai le fuafuaga e fa’atuina ai ma se tama’i faleoloa e fa’atau atu ai nai mea’ai mama, apainu ma faguvai mo le lautele e fa’aaogaina le tatou Vaita’ele. E ese mai lea o le a i ai nisi suiga fa’aopoopo I le tatou nofoaga atoa, ae le’i mautinoa a’ia’i ina ia mafai ona fa’alauiloa mai.

“O lo ua umi o faia lava le matou galuega ia mautinoa ua toe tula’i mai le Vaita’ele i le tulaga mama aua le soifua maloloina o le fanau, ua mae’a sasa le vao, fufulu uma le vaitaele atoa ma taga’i toto’a fo’i i le sapalai o le suavai e faaaogaina ina ia lelei mo le fanau,” o se tala lea a Sword.

Ua mae’a tofia se tasi e faigaluega tumau i lea nofoaga taua, o le tamaitai lea o Vaega’au Sagaga Fe’a lea e iloa i lona suafa o “Sisi”. Ua fou lea tofiga mo le Fe’a ma ua fa’ailoa mai ua fa’amalosia lava le lisi o Tulafono ua mae’a fa’amauina ma fa’ailoa atu i totonu lava o le fale e te ulufale atu ai i le tatou Vaita’ele, ina ia lau silafia uma e i latou e gasolo atu e fa’aaoga le Pala Lagoon Swimming Pool.

O lo ua fa’atulaga nei se aoga a’au mo le fanauiti a le atunuu, e fa’atautaia ma fa’aaoga i ai le tatou Vaita’ele i lona toe tatalaina lenei mo le fa’aaogaina e le lautele.

TATALA ITULA E TATALA AI PISINISI MA ISI TULAGA

O le fa’atulagaga lanu moana o le fa’asa o le Covid-19 a le tatou Malo, ua fa’ailoa ua tatala ai nei itula sa fa’amuta ai feoa’iga, mafutaga faitele a ekalesia ma aiga ma isi uma, ae maise o itula e tatala ai Faleoloa ma isi pisinisi uma, e afua mai le aso Faraile ua te’a.

O lona uiga, ua le toe i ai ni fa’asa lea sa fa’amalosia mo taimi e tatala ma tapunia ai pisinisi o so’o se ituaiga, ma itula e tamau ai feoa’iga a ta’avale la’u pasese, ua fa’ataga mea uma.

Ua fa’aauau pea lava ona faia mai lapata’iga fa’alaua’itele ina ia naunau le mamalu lautele e faia o latou tui puipuia o le Covid-19. Ua i’u ina faia ai ma nai fa’atosina ina ia naunau le to’atele e gasolo atu e faia tuiga. O fa’atosina nei e aofia ai ma le totogia o pasi e la’u fua mai ai tagata e faia tui puipuia, lona luau a fai ma le se’i mo i latou uma lava ua faia lou tui, e maua lau numera o lea se’I, ma e fai ta’i vaiaso lea se’i. O le fe’au taua o lo’o natia mai ai, ia fai lou tui puipuia.

I le taimi nei, ua le mafai lava ona tatala mai ni avanoa e  talosaga se pemita o nisi e malaga mai ai i Samoa, ae ua fa’ataga lava na’o tagata o lo’o talosaga e fia o mai e fai latou fa’atalanoaga o avanoa faigaluega iinei e ala i le polokalama fa’apitoa o le “Guest Worker Program.”

O le mamalu e fia talosaga e ulufale mai i’inei ,alaga ua tatau ona mua’I faattumu lana talosaga i le Kamupani I’a, poo le  Call Center.O le talosaga e ulufale mai ai, ua tutusa lelei lava ma le faiga o lo’o alu a’i i lenei vaitai, talsoaga ma fa’aulu pepa fa’amaumau i le Uepesite a le DOH /Attorney General ma e vala’au mai i latou pe a latalata ina fa’amanuiaina lou sui e te malaga loa.

Ua faatulaga mai le uepesite www.americansamoapublichealth.com ma e tatau ona e tuuina le 10 ao loma lau malaga e fa’atautaia mai ai le pasia o lou tu’uvaa ese atu.

O le lisi o mea e ao ina e tapena i ai e fa’auia atu i lea Uepesite mo lou avanoa e te malaga ai: Pepa fa’amaumau o lau suega e te le o maua i le Covid-19, 3 aso a’o loma ona e malaga ese; Pepa Tui ua fa’amaonia ai ua mae’a puipuia oe mai le Covid-19; Ia mae’a I ai lou pepa kilia mai se foma’i; Fa’amaoniga o au feoa’iga mai le 30 aso ua te’a; E tatau foi i le tagata malaga ona fa’ailoa patino atu pe na mua’I maua I le covid -19 ma ua mae’a toe manuia mai ai, e tatau ina e fa’ailoa maia poo ai nisi sa outou feso’ota’i i luga o le malaga mai ma le tusa ma le fa vaiaso talu ai.

Ua tatau foi ona talia e lenei sui ona nofo va’ava’aia mo le 15 aso pe ulufale mai, peita’i ua i ai nisi ua mafai ona fa’apuupuuina lea nofova’ava’a pe a pasia mai lava e foma’I e te tu’ua le nofo va’ava’aia.

O le aiaiga lenei o sui e malaga mai i le Guest Worker Program, e tauau e I ai le isi pepa fa’atumu e taua’aoina mai e le Matagaluega o le Soifua maloloina mo I latou uma. O le aiaiga lenei o le fa’asa o le a fa’aleaogaina lea ia Aukuso 13, 2021.