TALA I VAIFANUA

Pago Pago, AMERIKA SAMOA

LEAGA LE MEA TOSO VA’A - AE SAUNI FA’AE’E ATU LE MV LADY NAOMI E FA’ALELEIA

O le vaiaso na te’a nei sa fa’ato’a tuu ai i lalo le va’a o le “Sa’ilele” a le tatou Matagaluega o Uafu ma Malaeva’alele ae ua sauni le MV Lady Naomi e fa’ae’e atu mo ona galuega lipea ma siakiga o lona tino atoa.

Peita’i, ua fa’ailoa mai, ina ia mae’a tuuina i lalo le Sa’ilele, ae fa’aleagaina loa le isi totoga o le mea toso va’a, ma ua faigata nei ona mautinoa pe mafai ona faia lipea mo le MV Lady Naomi pe leai.

Ua fa’ailoa mai o lea fa’aletonu na tupu e tusa o le 6:00 i le taeao o le aso Lulu, ma na amata mai ai lava i lea taimi ona taumafai  le aufaigaluega e toe fa’aleleia mai le mea toso va’a ae se’i faia galuega mo le MV Lady Naomi.

Ua le mautinoa fo’i pe o mana’omia ona toe fo’i le MV Lady Naomi i Apia e fa’atali ai se taimi e fa’ato’a amata ai ona faia ona galuega lipea, pe fa’atali ai pea iinei.

O le galuega lenei mo le MV Lady Naomi, sa fa’atulaga e lua vaaso e faia ai, ona toe fealua’i lea mo ana malaga masani peita’i, ua le mautinoa nei pe tatalia le taimi e mae’a ai ona fa’aleleia le mea toso va’a pe o le a se’e e fa’atali mai i Apia seia toe lelei le mea toso va’a ona fa’ato’a toe sau lea e faia ona galuega lipea.

MAE’A AIAIA LE FEAGAIGA MALILIE FA’ATASI - FA’ATUPEGA MEDICAID MO LE 8 TAUSAGA

Ua mae’a ona faia le maliliega i le Konekeresi ina ia fa’aulu loa le pili e aiaia ai le fa’atupega a le Medicaid mo Teritori o le Iunaite Setete e aofia ai Amerika Samoa, Guam, CNMI  ma le US Virgin Islands, ae o Puerto Rico lea ua fa’amauina lana fa’atupega mo le lima.

Ua fa’ailoa mai e le tatou Faipule i le Konekeresi, Uifa’atali Aumua Amata Radewagen, o le a fa’auluina lenei pili mo iloiloga a le Konekeresi i le vaiaso nei, ae afai ae maea pasia lelei, e mafai lava ona fa’amauina ao le’i mae’a le tausaga faaletupe ia Setema 30, 2021.

O lo ua mauitnoa e sapaia lenei pili tau fa’aulu mo Medicaid a teritori e sui Faipule mai atunuu uma uma o lo’o i le va’ava’aiga a le Insular Areas fa’atasi ai ma le ta’ita’ifono ma isi sui lautonoga o le Komiti a le Maota mo le Enetia & Komiti o Fefa’ataua’iga ma isi Komiti o le Soifua Maloloina.

“O le fa’amautinoaina o le valu tausaga mo le fa’atupega a le Medicaid e aoga tele lea mo le tatou atunuu ma isi teritori uma, aua e fa’amoemoe tele i ai o tatou tagata mo togafitiga o tatou gasegase, fa’atasi ai ma pasese totogi mo malaga i fafo e faia talavai. O le mautinoa o lo’o maua mai lea fa’atupega, o se mea fiafia lea mo i tatou uma,” s se saunoaga lea a Uifa’atali.

AOFIA FALEOLOA SIIATOA ASIASIGA MATAGALUEGA O LE SOIFUA MALOLOINA

O le taimi nei, ua le nao pisinisi e fa’atau mai ai mea’ai ma gaosia mea’ai ua aofia i le asiasiga ma le suesuega vailiili a le matagaluega o le Soifua Maloloina. Ua faasolo atoa ai ma le vasega o Faleoloa Siiatoa i totonu o le atunuu.

Ua fa’ailoa mai e le tamaitai o Eileen Solaita, o lo’o aofia i lea fo’i aufaigaluega mamalu, “O le tele o fa’afitauli lea ua matauina le fa’ateleina, o meainu suamalie, apainu, ma pusa vai ua fa’aputu uma lava i nofoaga e vevela pe o lo’o teuina lava i pusaoloa tetele lae e fa’atutu i le la. O mea na e vave tele ona fa’aleagaina ai nei ituaiga o oloa, ma afai e inu atu e tagata ua fa’aleagaina ma e fa’atupula’ia ai gasegase i le mamalu lautele.”

O le isi lea vaega o le suesuega o lo’o matele ina lei utagiaina e le au fai oloa ile atunuu.  O mea’ai ua fa’aputu i luga o fata e soso’o ai ma fasimoli ta’ele ma mea tau vailaau e fa’aaogaina mo le fa’amamaina o le fale ma fufuluga o ipu, ma isi mea uma fa’apena.

O fata o lo’o teu ai mea’ai ua matele ina gigi fa’atasi ma isi oloa uma, ma e ono lavea atu fa’atau oloa i mea’ai a’o fela’uai isi oloa na e le tatau ona tuu fa’atasi ma mea’ai. E tatau ona i ai ala savali e le fa’alavelavea ai taga alaisa ma isi oloa tau mea’a fa’apena.

Ua matele ina i ai pusi e momoe solo i fata o faleoloa, ona o le taumafai lea e maua isumu ma manu fa’alafua e ono o atu e ati  maea’ai o i luga o fata o faleoloa.Ua matauina e i ai mogamoga ma isi iniseti e ono mama’i ai tagata lautele ona e le o sefe ma saogalemu le teuina o mea’ai mai manu fa’alafua.

I le taimi o suesuega ma sailiga a le matagaluega o le Soifua Maloloina, ua matauina ai, ua toe tuufa’atasia e tagata faigaluega a’ano o moa ma mulipipi, ae maise ua fa’aaogaina luga o fata poo laulau, o nofoaga ta’alaolao, ae leai ni sinc e fa’aalu ese lelei ai le suavai o lo’o fufulua ai le a’ano o manufasi.

O nofoaga ta’alaolao nei e fa’aaoga e fa’apepa ai mulipipi ma pepa moa ma e so’o se pefu lava poo le a ituaiga kasa eseese e ono lamatia ai a’o tau fao taga na mea’ai. O le fa’amalosiga lenei e ao ai i le aufaipisinisi ona taga’i toto’a i le soifua male tulaga mama o mea uma tuupepa ai mea’ai taumafa mo le atunuu.

TOALUA FANAU BASEBALL UA AUSIA TOGI & AGAVAA - AOOGA AI I KOLISI I FAFO                                                                                   

Ua fiafia lava le tamaitai peresetene o le Little Leagus & Community Empowerment Organization  i Amerika Samoa, Saipai Cassens ina ua mafai ona faamautu mai avanoa e lua mo sui e to’alua o le latou au ta’a’alo ina ia a’o’oga ma ta’a’alo fa’atauva ai i le Baseball i Kolisi i fafo.

O sui nei e to’alua ua aofia ai le ali’i talavou o Paul Cassens-Hunkin ma Isley Tautolo-Samuelu. Ua fa’atulaga lenei vaega e to’alua ina ia tu’ua le teritori ia Aokuso ae malaga atu i Kalefonia e a’o’oga i West Los Angeles College, ma o le latou ‘au ta’a’alo e amata le ta’aloga muamua ia Setema 2021.

O le mafuaga lea o le pisi na’ua o le tamaitai peresetene ina ia mafai ona fa’amautu mai nei avanoa mo talavou nei e to’alua, ina ia amata ane le ta’aloga ae ua mae’a tulaueleele i Los Angeles ma sauni lelei mo la’ua ulua’i ta’aloga.

Ua fa’ailoa mai fo’i e le na’o le to’alua lea, o lo’o fa’asolo atu ma le isi to’atolu o tamaitai ma le isi to’alua o talavou tama e mulimuli atu.

I le taimi nei o lo’o fa’aauau lava ona faia o koleniga ma ta’aloga e fa’aleleia atili ai le ta’a’alo a le fanau ma o lo’o avea le susuga Coach Vaimalu Aetonu, o se Vetereni a le USArmy e kolenia fa’apitoa i latou uma e aofia i le Community Empowerment Organization, a’o le sui Peresitene lea o le CEO-AS.

Fa’ailoa mai e Cassens, “E to’atele lava nai tatou fanau o lo’o ua matua iloga le lelei o le ta’a’alo i le Baseball ma o lo’o fa’atalitalia ni avanoa lelei e mafai ai ona o atu i fafo e fa’alautele tomai ma siitia ala e ta’a’alo fa’atauva ai. O tatou fanau e tino malolosi ma e pau lava le mea e fai ole a’oa’o o metotia e fa’aleleia atili ai latou taleni ta’alo, e vave lava ona latou fiafia ma tumau i ai, aua latou lumana’i manuia.”

“O se isi lava mea e sili ona moomia mo fanau uma a Amerika Samoa, o le lelei ona koleni fa’apitoa i tulafono ma ala o le ta’aloga,” o toe tala lea a le tamaitai peresetene Saipai Cassens.