Molia Solomona Gauta i le gaoi ma le umia o fualaau faasaina

Pago Pago, AMERIKA SAMOA

O le alii lea o loo tatala i tua e faatali ai taualumaga o lana mataupu i luma o le Fa’aamsinoga Maualuga, ua toe molia nei o ia e le malo i isi moliaga mamafa e aofia ai le gaoi ma le umia faasolitulafono o fualaau faasaina o le aisa ma le faamoemoe e tulei ma faatau atu i isi tagata. 

O le vaiaso na te’a nei na taofia faapagota ai e Leoleo le alii o Solomona Gauta ona o tu’uaiga i lona faia o ni gaioiga e save’u ai le nonofo filemu o lona aiga i Vaitogi. Ae ina ua tula’i o ia i luma o le Fa’amasinoga, na tauaao atu ai loa e le malo ia te ia kopi o tagi e 2 faasaga ia te ia, i ni mataupu na tula’i mai i le faaiuga o le tausaga na te’a nei.

O le vaiaso na te’a nei na tula’i ai le susuga a Gauta i luma o le afioga i le Tamaitai Faamasino ia Gwen Tauiliili_Langkilde mo lana ulua’i iloiloga.

E 3 tagi ua faila e le malo faasaga ia te ia. I le tagi muamua, o loo tu’uaia ai o ia moliaga mama e 3 e aofia ai le faatupu vevesi i totonu o lona aiga, faaoolima i le tulaga tolu, faapea ai ma le faaleaga meatotino i le tulaga tolu. E $1,000 le vaega tupe lea ua fa’atulaga e le Fa’amasinoga e tatala ai Gauta i tua mai le mataupu lea.

I le tagi lona lua, ua tu’uaia ai o ia e le malo i le moliaga mamafa o le gaoi, faapea ai ma le moliaga mama o le faatoolima i le tulaga tolu. E $10,000 lea ua faatulaga e tatala ai i tua Gauta i le tagi lea.

Ae i le tagi lona tolu, ua tu’uaia ai o ia e le malo i le umia faasolitulafono o vaega o le pauta faasaina o le aiga ma le faamoemoe e tulei ma faatau atu i isi tagata, faapea ai ma le moliaga o lona umia faasolitulafono o vaega o le pauta faasaina o le aisa, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e silia i le $20,000, poo le faasala foi i faasalaga uma ia e lua. 

E $25,000 lea ua faatulaga e tatala ai i tua Gauta i le mataupu lea.

TAGI O LE FAATUPU VEVESI

O le aso 24 o Iuni na faafesootai ai e se tamaitai o le aiga o Gauta le Ofisa o Leoleo i Tafuna mo se fesoasoani, ina ua faaleaga e Gauta le faamalama o le ta’avale a lana uo. E to’atele Leoleo na tali atu i le valaau ma latou fesiligia le tamaitai na ia talosagaina se fesoasoani a Leoleo i le mafua’aga o le fa’alavelave. 

O le mae’a ai ona fesiligia e Leoleo o le tamaitai na aafia ma lana uo, na aga’i atu ai loa Leoleo ma pu’e faapagota Gauta ma auina atu loa i le Ofisa o Leoleo i Tafuna mo isi suesuega. 

O le taeao na sosoo ai ma tula’i ai loa Gauta i luma o le Fa’amasinoga Faaitumalo mo lana ulua’i iloiloga i le mataupu e pei ona tu’uaia ai o ia. 

A o le i valaau le mataupu a Gauta, na tauaao e le malo ia Gauta kopi o tagi e lua faasaga ia te ia, e mafua mai i ni faalavelave se lua na tula’i mai i le tausaga na te’a ei, lea o loo tu’uaia ai fo’i o ia. O ia mataupu e 2 e aofia ai le tagi faasaga i le umia faasolitulafono o fualaau faasaina o le aisa, faapea ai ma le mataupu o loo aafia ai o ia ma ona tausoga e to’alua, i lo latou ave faagaoi lea o se ta’avale ina ua mae’a ona latou faaoolima i le ave ta’avale.

UMIA O FUALAAU FAASAINA

O le aso 9 o Setema 2020 na logo ai e Leoleo sa tiute i luga o le alatele Leoleo Suesue o le Vaega e Suesueina Fualaau Faasaina mo se fesoasoani, ona o fualaau faasaina na maua i se ta’avale na latou taofia i le solitulafono i luga o le alatele. 

E to’afa ali’i sa malaga i lea ta’avale, o se tasi o i latou nei o le susuga a Solomona Gauta, le ali’i ua molia i lenei mataupu. E to’a 3 ali’i sa nonofo i totonu o le ta’avale e aofia ai ma le ave ta’avale, ae o Gauta na tietie i tua o le pusa o le ta’avale. Na taofia e Leoleo le ta’avale ma auina atu uma ali’i e to’a 4 sa malaga i le ta’avale, e mafua mai i le leai o se laisene a le ali’i na ia faafoeina le ta’avale. 

Ina ua taunu’u i le Ofisa o Leoleo i Tafuna, na faatonu e Leoleo le pasese e to’atolu e faatali mai i le isi potu ae se’i faatalanoa le ave ta’avale i le mafua’aga ua leai ai sona laisene. O le taimi lea na talosaga ai loa Gauta i se tasi o Leoleo, pe mafai ona alu e fa’aaoga le paipa e fufulu ai ona mata. Na talia e le Leoleo ma faasino ai loa e le Leoleo ia Gauta le vaega o loo i ai le paipa.

A o fufulu mata o Gauta, o le taimi lea na aga’i atu ai se tasi o Leoleo i tua o le pusa o le pikiapu na tietie ai Gauta, ma maua ai se pepa iila e fa’aaoga e utu ai le pauta o le aisa o loo taa tiatia ai. Na logo e le Leoleo lea isi Leoleo e faatatau i le tulaga e pei ona maitauina, ma faanatinati atu ai loa Leoleo i le vaega tonu o loo fufulu ai mata o Gauta ma latou maua ai se pepa iila o loo taatia i le vaega tonu o loo tu ai Gauta. O le taimi lea na taofia ai loa Gauta i lalo o le vaavaaiga a Leoleo ae sei faagasolo suesuega. 

O le pepa iila na maua i le vaega na tu ai Gauta, sa i ai tamai pepa iila laiti i totonu faapea ai ma straws ua mae’a ona ta tipi tulimanu, o loo tutumu i vaega o le pauta o le aisa.

Na vaaia e Leoleo foliga popole ma le le mautonu o Gauta i le taimi lea ao saili e Leoleo lona tino faapea ai ma le tamaitai o loo asoa i lona sulugatiti.

Na fesiligia e Leoleo le ave ta’avale poo fea na latou aga’i i ai. Na taua e le ave ta’avale e faapea, na aga’i atu i Vaitogi i le fale o lana uo ae oso mai ai Gauta e fia maua sana lifi mo Puapua. Na toe fo’i le ta’avale e momoli Gauta i Puapua peita’i ina ua oo atu i Puapua, e lei fia nofo Gauta ae na mana’o e toe fo’i mai i le ta’avale i Vaitogi. 

Na fesiligia e Leoleo le ua molia e tusa ai o fualaau faasaina sa maua ia te ia. Na taua e Gauta e faapea, o le ato sa sulu i lona sulugatiti, o le ato a le alii e igoa ia Chino na alu ae galo i le fale faatali pasi. Na tago piki i luga le ato ma taamilo loa e saili poo fea e maua ai Chico. Ua fiu e saili Chico e le maua, ae fetaui loa ma le taofia e Leoleo o le latou ta’avale. 

Na taua atili e Gauta e faapea, o le alii o Chico e sau mai Iliili i le nofoaga e taua o le “Le filifili”.

O mea na maua ia Gauta e aofia ai tamai pepa iila e 24 o loo i ai vaega o le pauta o le aisa; 5 straws ua uma ona ta tipi tulimanu o loo i ai vaega o le pauta o le aisa. Sa maua ai fo’i ma isi pepa iila feololo e 4 o loo to’a ai vaega papa’e o le pauta o le aisa. 

Na faia se suega i pauta papa’e na maua ia Gauta ma faamaonia ai, o vaega uma ia o le pauta faasaina o le aiga.

GAOI TA’AVALE

O le po o le aso 14 o Oketopa, 2020 na talosagaina ai e se ali’i ave taxi se fesoasoani a Leoleo ina ua osofa’i o ia e ni ali’i se to’atolu i Vaitogi ao alu atu e piki mai lana pasese. Na taunuu Leoleo ma latou suesueina loa le mataupu. 

Na taua e le alii na aafia e faapea, na alu atu e piki mai lana pasese i Vaitogi, peita’i e taunu’u atu ua alu lana pasese i le isi ta’avale. Ao paka le taxi a le alii na aafia i luma o se fale, na faafuase’i ona tuli oso faamalosi atu i totonu o lana ta’avale ni alii se to’atolu ma talosaga atu ia te ia, pe mafai ona momoli latou i le nofoaga e taua o le “Laumei” i le isi pito nu’u o Vaitogi. Na malie le ave taxi ma alu loa lana taavale e momoli alii nei e to’atolu.

O i latou nei aofia ai Solomona Gauta, o lona tausoga o Solomona Samatua, lea ua molia uma i laua i lenei mataupu, ma le isi o la tausoga o loo tau sailia pea e Leoleo i le taimi nei.

A o aga’i atu le ta’avale i le nofoaga o le Laumei, na faafuasei ona tu’i e Gauta o loo nofo i le nofoa o le pasese le ave taxi ma tifa ai i tua le taxi ma le auala. O le taimi foi lea na tau fai ta tu’i ai e isi ali’i e to’alua o loo nonofo i le pito i tua le ave taxi.

Na tulei i fafo e Gauta le ave taxi ina ua manu’a o ia ae latou sosola i le ta’avale. Na maua le avanoa o le alii ave taxi e faafesootai ai Leoleo mo se fesoasoani ma amata ai loa ona tau saili mai e Leoleo le ua molia.