TALA I VAIFANUA

Pago Pago, AMERIKA SAMOA

SGM NUUVALI, SUZIE – 20 TAUSAGA I LE USARMY, FA’AU’U TIKERI & SIITIA TOFIGA SGT MAJOR:

O le tamaitai na togisilia i lona fa’au’uga mai Fagaitua, Suzie Nuuvali ua ia fa’aeaina lona aiga ma le Malo o Amerika Samoa i ana taumafaiga e tolu ua fa’aeaina ai nei i le vaega au USArmy, i lona fa’au’uga i le aso Lulu o le vaisao nei.

Mai le a’oga Excelsior College ua ia mauaina ai ona fa’ailoga e lua Bachelors in Business ma le Bachelors in Leadership & Workforce Management, ma ua aga atu nei o ia e sailia lona fa’ailoga o le Masters in Busness Management.

Lona lua o mea ua ia ausia, o le atoaga lea o le 20 tausaga o lana tautua ma o lona fa’ailoga ua ia ausia nei o le SGM. Sargeant Major ma o se fa’ailoga sili ona maualuga mo I latou uma e tautua I lea vaega o le Vaega Au atoa a le Malo Tele.

O nei mea uma ua fa’apinea ai le tamaitai mai Aua, o se alo e fa’asino ia Auimatagi Salamasina Dorothy Apineru Morris o Aua. O ia o se tamaitai sa umi se taimi o tausia mai e nai ona matua matutua o Susie ma Oloatua Apineru o Aua. I ona fa’aeaga uma nei sa ia maua a’o alaala i la’ua ma si ana tama e to’atasi ua 14 tausaga o Tauloa, i Fort Bliss Texas. O lo ua fa’atulagale soifua galue o SGM Nuuvali, Susie e faaauau o le Operations Sergeant Major mo le Training Battalion i Fort Campbell, Kentucky.

Na soifua ae Susie Nuuvali i Calfornia, peita’i na tu’ua e ia lea setete ae malaga ma lona tina ma fa’aauau lona olaga a’oga atoa i Amerika Samoa mai le lima o ona tausaga se’ia oo ina fa’au’u mai Fagaitua i le tausaga e 2000 o se tasi o togisilia o lona tausaga fa’au’u. O ana taumafaiga uma ua fa’amanuiaina ai o ia, ua ia fa’ailoa mai, “Ou te ofoina lea ma le alofa tele I si o’u tina ma nai o’u matua matutua ua mapu mai i ti’asa.”

O nisi o mea ua iloga ai le tautua a SGM Nuuvali, Susie i le vaega au ua aofia ai ona tofiga sa galue ai: O ia o le totino o leAir Crew, Section Sergeant, Drill Sgt, Instructor, Senior Group Leader i le NCO Academy. First Sgt, Camp Commandant, Special Mission Wing ma le Afghanistan Force Protection Advisor. Sa mafai fo’I ona tofia o ia e avea ma ta’ita’i o le Equal Opps Leader, Field Sanitation NCO, Unit Prevention Leader ma le SHARP Victim Advocate ma le Color Guard NCOIC.

E i ai taimi sa tofia fa’apitoa ai e galue mai misiona fa’apitoa a le USArmy lea sa aofia ai nei galuega fa’apitoa i le Joint Base Lewis McChord i Washington State, Fort Jackson South Carolina, Joint Base Langley-Eustis i Virginia ma Fort Bliss Texas. Peita’i o ana misiona mo le USArmy mai nofoaga i fafo atu o Amerika a le Militeri e aofia ai lona galue mai Korea ma Siamani. E i ai lona sao i le mission Operation Atlantic Resolve i Siamani, Romania ma Estonia. Sa tele taimi na aofia ai SGM Nuuvali i malaga a ta’ita’i mo le vevesi i Iraq, Afghanistan ma Kuwait ina ia soalaupule fa’aleleiga ma ta’ita’i o na atunuu ma le nofo lelei ma le soaglaemu o le vaega o fitafita uma i le nofoaga o vevesi.

Mai le tautua e 20 tausaga ua ausia nei e SGM Nuuvali ua fa’amau fa’ailogaina ai o ia e le USArmy i nisi o nei fa’ailoga e aofia ai le Bronze Star Medal, Meritorious Service Medal (4th award), Army Commendation Medal (7th award), Army Achievement Medal (15th award), Meritorious Unit Citation (2nd award), Master Aviation Badge, Senior Aviation Badge, Basic Aviation Badge, Basic Army Instructor Badge, Drill Sergeant Badge, Driver's Badge ma le Nijmegen Cross mo le Four Day Marches Foreign Award. O le tamaitai Samoa fo’I mai Aua, Susie Nuuvali Apineru sa ia mauaina le fa’ailoga o le Army Aviation Order a le St Michael Award.

Ina ua tu’ua Nuuvali le tatou atunuu i le 2000, sa ia va’ai i le US Army e mafai ai ona ia ausia ana moemitiga i lona olaga tautua mo lona aiga ma lona malo, ua tula’i mai nei, o lo’o ua fa’aeaina e ia le tatou atunuu na ulufale atu ai i le vaega au, faatasi ai ma nai ona matua ma le paia lasi o ona aiga. 

Malo le fa’aeaea, e le mafai ona tuuina i lalo le lamepa, ae ia tuuina i luga i le tu’ugalamepa ma susulu atu ai i le lalolagi uma, fa’amalo le tauata’i fa’amalo le fa’aea aiga ma le atunuu.

FA’ATULAGA MAI SE FAUFAUTUA FA’APITOA MO VETERENI MAI LE OFISA AUTU I HAWAII

Ua fa’ailoa mai le agaga fiafia tele o le afioga le tatou Faipule I le Konekeresi, Uifa’atali Aumua Amata ina ua ia mataituina se tusi mai le Ofisa Autu o Tautua mo Fitafita Tuai i Hawaii, Sergio S. Chao, o le a latou fa’amatuu maia se tasi o le latou aufaigaluega faufautua fa’apitoa mo fitafita tuai e faigaluega atu i le tatou Ofisa Autu mo Tautua i Fitafita tuai i Amerika Samoa nei.

Ua lipotia mai e Uifa’atali Amata, “O le matou fonotaga mulimuli sa faia I le falema’i o le Malo Tripler i Honolulu, na ou mauaina ai le avanoa lelei e fa’ailoa atu ai ia Chao ma le foma’i o VA i Honolulu Dr. Adam Robinson, le mana’omia tele ona i ai o se faufautua fa’apenei mo tatou fitafita tuai i le Ofisa o le VA i Amerika Samoa. E mautinoa ua mafai ona fa’amaonia mai e Chao lea mana’omia i le taimi nei, ma ua fa’amalosia ai lona fa’ataunuuina o lea mana’oga.”

“O se tala sili lea ona fa’afiafia loto, fa’afetai i le vave feso’ota’i ma le lelei fo’i ona faamautu mai o mana’oga fa’apitoa o fitafita tuai e le tatou Ofisa Autu o le VA i le teritori, o lea ua pasia vave lea mana’oga aoga tele mo tatou Vetereni.”

“Fa’amalo le galulue malosi a ali’i foma’i ma le pulega i le tatou falema’i o VA, le Faleomavaega Eni Hunkin VA Clinic, ona o le latou fo’i talosaga mai i mea o mo’omia tele ma togafitiga mo fitafita tuai o alaala tumau i Amerika Samoa. Malo le galulue ma tima’I mo le fa’aleleia atili o le tautua mo fitafita tuai a le atunuu.”

O lo ua mautinoa nei pe na’o ni nai masina e tatalia ai e Vetereni i le tatou atunuu lea tautua ae fa’aa’e loa ona e tatau ona fa’asalalauina le avanoa lea, ma faia loa le filifiliga o se sui agava’a ma fa’ato’a malaga atu loa lea e amata lana tautua i le tatou atunuu mo vetereni uma.

O le fa’aiuga o le masina o Me 2021 lea sa fono ai le afioga le sui i le Konekeresi Uifa’atali Aumua Amata ma le pulega o le VA i le Paseika i Honolulu, i le potu fono o le falema’i tele o le Tripler lea e matele ina fa’aaogaina mo talavai a tatou fitafita tuai. O iina tonu lea sa fa’aailoa atu ai lea mana’oga tupito mo Amerika Samoa i a latou  sui Vetereni uma o alaala tumau ai.

Ao le’I faia lea fonotaga aloa’ia sa ia fa’ailoa atu i nisi o sui Vetereni e to’a 12, sa o atu mai Amerika Samoa e fia faia talavai i gasegase lava ia e mana’omia ai se sui faufauatua faapitoa mo le falemai VA iinei.

Ina ua mae’a ona talanoaina e Uifa’atali Aumua Amata fa’afitauli o sui vetereni nei o le tatou malo, ona ia fa’ailoa atoatoa loa la o nei mea uma ua fa’ailoa mai ia te ia, i le vasega o foma’i ma ta’ita’I o le Ofisa VA i Honolulu.