TALA I VAIFANUA

Pago Pago, AMERIKA SAMOA

AMATA TUUFA’ATASI FUAVA’A TUTOTONU I LE PASEFIKA MATAITUINA SAINA

O lo ua amata ona fa’atulaga mai le Ofisa tutotonu o le Vaega Au ma le Matagaluega o le Puipuiga o le Saogalemu o le Iunaite Setete i le Pentagon se latou tuufaatasiga o fuava’a i se nofoaga i totonu o le Pasefika, ina ia fa’afaigofie ona mataituina gaoioiga uma ua fa’atino e le Malo o Saina i le vasa Pasefika ma ona malo fa’aatumotu.

Ua amata lea fuafuaga fa’ataoto i le latou mua’i fa’atulaga lea o le igoa e fa’aauga uma i ai galuega patino mo lea fa’amoemoe aua ua matauina le fa’ateleina ona tapena e le malo Saina o latou vaega au.

Ona e le o manatu ina ia fa’avave fa’alaua’itele mai lea fuafuaga, ae ua fa’ailoa mai e sui iloga nei sa auai i le fonotaga fa’apitoa mo lea fuafuaga fa’ataoto, “Ua matauina o lo’o ua matua faamaonia le mana’o o le faigamalo fou a le Malo tele, ina ia malu puipuia mai le Iunaite setete ma ona teritori mai le tau fa’amata’u lea e alia’I mai o foufou mai e Saina. O le ala lea o le vave ona talanoaina ma fa’atino loa le fuafuaga ua talanoaina.”

O le tala mai ua le o fa’avaivai fo’i le NATO latou i le tu’ufa’atasia o latou vaega au ma ua fa’afeso’ota’i mai ma Uosigitone i ala o feso’ota’iga ma aiaiga o maliliega fa’atasi ai ma se fa’aiuga mai le Laumua e tusa o le va ma le faigamalo a Saina. O lona uiga ua fia mautinoa lelei, poo fea o i ai se finagalo ma se fa’aiuga a le Malo o Amerika e tusa ai o tau fa’amata’u ma le fa’ateleina pea o tapenaga o le vaega au a Saina ua iloga o fa’aauau pea i le taimi nei.

I le taimi nei ua fa’ailoa mai e le NATO, o Saina ua avea nei ma se lu’iga i le puipuiga malu o le saogalemu o atunuu uma, ma ua le toe fa’atamala fo’i la le va’ai toto’a a le NATO i gaoioiga uma o lo’o fa’atino mai e Saina i le taimi nei.

O talanoaga ma fonotaga taua o lo’o ua fa’atino i le taimi nei, o lo’o una’ia ma tu’ufa’atasia mai e le China Task Force sa tofia ma tuufa’atasia e Peresetene Biden ia Mati 2021, ina ia latou va’ai toto’a lava i maliliega ma aiaiga uma o lo’o ua mae’a sainia ma pasia I le va o Amerika ma Saina fa’apea fo’i ma Saina ma le NATO ina ia le fesasiaiI lava ni gaoioiga faia mai e Saina i so’o se vaipanoa o le lalolagi. O ala fo’i e fa’ataunuuina ai maliliega ma aiaiga nei, ua aofia i le va’aiga toto’a a le Komiti Fa’afoe tofia lea a le Peresetene, le China Task Force.

O le vaega lea sa ta’itaia mai e Ely Ratner, ua fa’ailoa mai ua mae’a lelei le latou lipoti ma ua fa’ao’o atu lea i le Failautusi o le Defense Lloyd Austin, ina ia fa’ailoa i a latou fonotaga ma Peresetene Biden i a latou fonotaga taua, lea e talanoaina ai le fa’atula’ia o lea nofoaga autu mo gaoioiga e tete’e atu ia Saina ma latou tau fa’amata’u mai, lea ua iloga mai, ua foufou mai e le o toe mamao.

“I le taimi nei, o lo ua na’o se fuafuaga lava, ae le fa’apea ua mautinoa le fuafuaga lea. Ua na’o se fuafuaga ua tuuina atu mo le fonotaga lea, e mautinoa ai le pasia e amata tapena loa, pe fa’atalitalia fo’i mo sina taimi fa’ato’a fa’ataunuu, pe suia fo’i.” O se tala lea a lea sui na oo mai mo latou asiasiga e fa’amautu ai le latou fuafuaga fa’ataoto ua taua’aoina mo le fonotaga taua a le vaega au ma le peresetene ma ona laulauatofi.

Faailoa e le Failautusi a le Defense, “E tele lava fuafuaga ua fa’ataoto mai, ae o le fonotaga lenei e pasia ai le fuafuaga e fa’ataunuu ma le taimi e tatau ona tapena ai, ma o le taimi lava e pasia ai le fuafuaga fa’ataoto e tatau ma agavaa mo le tapenaga, o le taimi lava lea e gaoioi ai loa.”

“O le agaga fa’afetai, ona ua gaua’I mai le Pentagon ina ia amata tapena ma mataituina le tele o gaoioiga ua faia e Saina i malo eseese o le Pasefika. O lea la ua pasia nei e ave’esea uma mai le tele o mea uma a le vaega au o i ai nei i Sasa’e Tutotonu, ae amata loa ona fa’amautu se nofoaga autu i le vasa pasefika.” O se tala lea a Elbridge Colby, o le sui lea ua tofia mai el Pentagon o le ta’ita’i o lea galuega fa’avave mo le pasefika mo le Marathon Initiative.

“O le Komiti Fa’afoe tofia ma le igoa o le a fa’aigoaina ai le fa’agaoioiga o vaega au a le Malo tele mo le Pasefika, o i latou nei e toe fa’afo’ia mai le malosi’aga o le itu i sisifo o le Pasefika. I le taimi nei e le’i mae’a fa’ailoa atu e le Pentagon lea fuafuaga i le Laumua.” O se tala lea a Colby.

FA’AMASINOGA FA’ATA’ITA’I A’OGA FAGAITUA HIGH – FA’AMASINOGA MAUALUGA

O le taeao o le Aso Lulu na te’a nei, na mafai ai ona faia le fa’amasinoga fa’ata’ita’i, e fa’afoliga o se fa’amasinoga moni, ae fa’ata’ita’ia lea e le fanau a’oga i Fagaitua, ona ua pau lea o se avanoa ua maua mai le Fa’amasinoga maualuga ina ia fa’atautaia ai lea mataupu fa’ale-aoaoga a le Laumua.

O le faamasinoga fa’ata’ita’i lea sa feso’ota’i ai faia’oga o le mataupu Igilisi 128 American Literature ma le History o le Vasega 11 i Fagaitua ma ali’i ma tamaitai Faiaoga o le Furman University. O nei sui e aofia ai Mr. Glen Halva-Neubaur, ma ua fesoota’i ai ma Ms Allyson Stevens ma Ms Grace Cheney.

O le vasga 11 lea o le a soso’o nei ma lo latou tausaga fa’aiuaso i Fagaitua, peita’I o le fa’atinoga ua mataituina, e matua sili atu nisi matati’a o le a latou fa’atutu i le Laumua o le Toa o le Vasa i lo latou tausaga faai’uaso, i aoaoga i potu a’oga.

Na fia iloa mai fo’i e nei ta’ia’i pe a mai se fa’atinoga o le fa’amasinoga fa’ata’ita’i lenei e le fanau a’oga a Fagaitua, o lea sa fa’atagaina ai le pu’eina atoa o le fa’atautaiga o lea fa’amasinoga, e ui ona o se mea e sili ona fa’asaina lea i fa’atautaiga o fa’amasinoga masani.

I le fa’amasinoga lea, sa na’o le tamaitai Loia lava o Mitsie Jessop Ta’ase sa avea ma Fa’amasino e fa’atautaia le fa’amasinoga ae o le Tiuri, poo le vasega o e iloiloina se fa’aiuga o le fa’asminoga, fa’apea ma le vasega o loia e toaono mo le itu a le malo ma le itutete’e e tula’i mo le sui ua molia, sa tutula’i ai le fanau a’oga. Ua oo lava i moliau e toatolu na fa’aaogaina e itu na lua e fefinaua’i ai lea fa’amasinoga sa iloga ona mautu a latou fa’amaumauga ma tuufesili fo’i a le fanau loia, ua mata’ina le taumafaiga a i latou.

“O le fa’amasinoga o le tama na tu’ua’ia ma molia e le Malo, ua masalomia o ia na fasiotia lona afafine na pa’u mai i luga o le tofe ma maliu ai. O le fa’amasinoga o John Snyder na molia e Midland State, i ona moliga o le fasioti tagata. O John Snyder na muamua molia i le tagofia o fuala’au fa’asaina ma vailaau oona ma fa’afalepuipuia ai. Ona ave lea o lona afafine lea ua maliu, tausia ma va’ava’aia fa’apitoa e lona uso.”

“O lona uso lea sa ia vala’auina leoleo, ua leiloa pe ua avea fa’amalosia ese mai le teine mai lona fale ma lana va’ava’aiga. O moliga muamua na sa fa’asaga ia John Snyder a’o le’i toe molia o ia i le fasioti tagata ina ua maua ane lona afafine ua maliu ma o lona tino ua pa’u mai i luga o le tofe.”

O sina fa’amatalaga lea o le fa’amasinoga na fa’ata’ita’ia ai le tomai saili ma le taumafai a le fanau e fa’atino se fa’amasinoga tonu mo le tama o John Snyder, e ui ina vaiti se ala e mafai ai ona fa’afinaua lona moliga, ae o le iuga, sa le atoatoa molimau e mafai ai ona fa’amautinoa, o John Snyder le na ia unaia lona afafine ma pa’u mai ai i luga o le tofe, ma maliu ai.

A’o fa’agasolo le faamasinoga, sa iloga o le popolega muamua lava sa oo i le tama o Snyder, o le a toe pa lana palola. E toe loka nei o ia ona o le a masalomia o ia sa ia fa’ao’o le oti i lona afafine. O le isi lea popolega tele sa ia te ia, ma va’aia lona tulaga le mautonu e nisi o molimau sa talanoa ia te ia ina ua mae’a le mea na tupu ma maliu ai lona afafine. I le va’aiga i le fa’atinoga a loia, ua iloga ai le agava’a o le fanau e fa’afinaua’ia fa’aloia itu tagi ma le itu a le malo.

O le itu a le Malo sa tula’i mai ai loia fa’ata’ita’i Tootooali’i Anoa’i, Telesia Sila ma Apotala Su’a, Loia na tula’i mo le sui Molia e agaia le fa’amasinoga o Ruth Satele, Lorietta Uiagaleei ma Starlight Lotulelei.

Ina ua mae’a fa’afofogaina nisi o molimau autu a le malo sa tuuina atu mo fa’afesili a Loia, sa iloga ai le tulitulimata’ia lelei, o le tulaga o fa’amaumauga pe leai se mea o suia mai le nofoaga sa maua atu ai le tino o le afafine. O ia mea uma, ina ia mafai ona fa’amaonia, e sili atu nai mo molimau maumaututu ma tu’ua’iga, e le o tonu moliga o le tama o John Snyder.

E tusa ai ma se faamatalaga a le tamaitai faiaoga o le Fa’aperetania i Fagaitua o Britany Hisatake-Talo. Ua ia fa’ailoa mai, “O feso’ota’iga tau upega tafa’ilagi sa maua ai so’otaga ma le Iunivesite o Furman ma ua sili ona fa’afiafiaina le fanau, ina ua mafai ona fa’atino lenei fa’amoemoe i totonu o le potu o fa’amasinoga o le Fa’amasinoga Maualuga a le tatou Malo. O le fa’afetai lea ua tuuina atu fa’apitoa i le tamaitai Loia a le Senate o le Fono Faitulafono, Mitzie Jessop Ta’ase, aua o ia lea sa ia fa’afeso’ota’ia le vasega o fa’amasinoga mo lenei avanoa taua mo le fanau.”

“Ona o le ala o feso’ota’iga ma Glen Halva-Neubaur sa fa’afaigata ona o tulaga eseese o taimi, ae fa’afetaia le alofa mai fo’i ma le naunau o lea tama ina ia maua lea fo’i tomai e le fanau a Amerika Samoa, o se teritori o Amerika. Ia una’ia ai o latou fa’amoemoega mo le lumana’i, ona ua fa’ata’ita’ia e i latou nei galuega ma fiafia i ai. O le avanoa sa maua e galulue fa’atasi ai ma le Furman Mock Trial Team lea e aofia ai Dana o le polofesa fa’atonu o Fa’amasinoga Fa’ata’ita’I fa’apei ona fa’atino e le fanau a’oga i Fagaitua,  Polofesa Glen Hala-Neubauer, le tamaitai Faiaoga o le History o Kaylla Turituri ma la’u vasega o le English 128 American Literature.”

O le i’uga o le fa’amasinoga o lea tama, e le fa’amaonia e le Tiuri moliga ua fa’asaga ia te ia.

E ui ona o nei mea uma sa a’o e i latou, a’o le fa’atinoga sa iloga ona mata’ina. O le vasega fo’i lea sa faia ai se fa’asoa a le Tusitala i le taimi atofa mo sailiga galuega e fiafia i ai le fanau e ao ina tautua ai mo le malo ma le mamalu lautele o ona tagata nuu i le lumana’i. Foliga mai e le o mamao le latou fa’amoemoe ma le auga o galuega fa’aloia, sailia le mea moni ma ia tutumau i ai.