TALA I VAIFANUA

Pago Pago, AMERIKA SAMOA

LAGOMAU LE AFIOGA LE ALIIOAIGA - LONA MAOTA I PAGO PAGO LAVA

O le toe sauniga o le afioga le Aliioaiga, Asuega Faamamata sa fa’ataunuuina lava i lona Maota i Pago Pago lava, ma lagomau ai o ia i lona aiga ma lona afio’aga ina ua mae’a lona sauniga mamalu. 

Sa auai atu le afioga le Kovana Sili o Amerika Samoa, Lemanu Peleti Palepoi Sialega Mauga fa’apea nisi o sui mamalu o le Fono Faitulafono ae maise le afioga le Ma’oputasi Mauga Tasi Ausega ma le pa’ia lasi o le Afioaga o Pago Pago ma le itumalo o le Ma’oputasi , sa latou vagaia le toe aso o lana afioga le Ali’ioaiga ma i latou.

O le sauniga lotu sa tofu Sao i ai le vasega o Fa’afeagaiga uma i le afio’aga o Pago Pago, fa’apea ma Fa’afeagaiga a le Aiga. O i latou sa to’a i ai le aupeau o fa’anoanoaga o aiga i se latou upu tima’i i lea taeao toto’a.

Na faia lava lona toe sauniga i lona maota talimalo i Pago Pago ma sa amatalia lea i le itula e 8:30 i le taeao o le aso Lua,  Me 11, 2021. O le susuga le Faife’au Manumalo Baptist Church, Papali’itele Lauli’i Alofa sa saunia le Upu mo le aofia na poto mo le toe aso o Ausega Fa’amamata.

“E tatou te maua uma lava le Ola e fa’avavau, pe afai tatou te o sa’o ia Iesu, talia o ia ma lana fa’aolataga, ia faia lona finagalo, tausia ana poloa’iga, ma tatou ola fealofani, o lona lea toe mana’o ia i tatou uma.” Le toe upu ma lana toe tima’i mo le aiga atoa na poto mai e vagaia toe taimi ma le tina a’o le afioga le Ali’ioaiga ua malolo mai tiga uma o lenei olaga.

I le sauniga i luga o le tuugamau, na tuuina lea i le susuga le Fa’afeaigaga EFKAS, Rev. Fa’avae ma o lana aufaipese fo’i sa fofogaina vi’iga o sauniga e lua o le taeao ananafi.

I le vaega o le sauniga mamalu i luga o lona Oliolisaga tumau sa taulimaina ai le Tagavai o le Malo o Amerika Samoa, le malo sa tautua ai le afioga Asuega Fa’amamata mo se taimi umi o lona soifua, ua iloga fo’i lana tautua i lona aiga, le afio’aga, le itumalo ma lona Malo. 

Na taua’aoina e le Taitai Leoleo le Tagavai i le Afioga le Peresetene o le Senate, le tofa Tuaolo E. Manaia Fruean ma sa ia fa’ao’oina ai le alo tama’ita’i sa tausi ma le fa’amaoni i le afioga le Ali’ioaiga ao soifua mai seia oo i ona toe taimi.

O le afioga le Peresetene o le Senate o le Fono Faitulafono, sa avea ma sui o le Kovana Sili o le Malo Fa’ateritori o Amerika Samoa, na te fa’ataunuu ai lea tiute taua.

Na tautuaina foi e le vaega fa’apitoa o le Matagaluega o le Puipuiga o le Saogalemu Lautele le tagavai, ma sa fa’atino uma fa’aaloaloga e tatau ai ma le taua’aoina atu o le tagavai e fa’ailo le tautua a lenei ta’ita’i iloga o le atunuu.

O le afioga le Aliioaiga sa avea ma Senatoa o lona itumalo i le Fono Faitulafono i le taufa’asiusiuga o lona soifua tautua i lona malo.

VIVII FIAFIA LE AUFAI’OA – UA TETELE FA’ATAUGA I FALEOLOA

O mea uma I Amerika Samoa ua matele ina va’aia laina uumi, pe afai e te fia taumafa pe fia tala sau tupe mai masini poo kesia, e le o toe manatu e vave ona e alu ese mai, ua mae’a tautuaina oe, e pei ona sa masani ai. Ua uumi laina i masini talatupe, ua uumi laina e fa’atali ai mo le tala mai o au tupe i faletupe, ua uumi lana e fa’atali ai sau fa’atauga e fia totogi i faleoloa, ua matua fiafia le ‘au fai’oa o le atunuu, aua ua mautu atu ia i latou le aupeau o le puna’oa na sasa’a mai e le Stimulus.

Mai le tele o feoa’iga e faia ua le toe fa’atafa le fiu e vala’au ni ta’avale lait la’u pasese, ua faasolo atoa le totogi a aiga o ta’avale laiti e feavea’ia i latou ma alu ai lava se’iloga ua mae’a uma fa’atauga o le aso. Lona lua o mea e tiga ai, ona ua le toe fa’atafa le poloka fa’asolo atoa o ta’avale i le alatele, ua tomumu a’ia’i ai ma ave pasi, aua o le pasese sa masani ona piki ma ave i le taulaga e fa’atolu fa’ato’a ta le 12, ae ua fa’asolo ina tasi lava le sau toe fo’i atu ua afa le aso.

“O le mea la lea ua i ai, ua leai ni pasese se tele e maua, ua le talafeagai le tupe sa maua muamua ma le tupe ua maua mai i le aso e tasi. O lona uiga e va’ai atu, ua aiga le maunu a ta’avale laiti, ae matua misi atoa ai pasi la’u pasese,” o se tala lea a se tasi o ali’i ave pasi sa matua vae vave lava i le la’uga o pasese i le alatele. O ia foi sa fiafia tele ona o le tele o le mamalu o le atunu’u feafioa’i.

Mo i matou e fa’atali pasi ua toeititi atoa le 20 minute o tatalia se pasi i le auala, ua i ai nisi o pasi ua le toe va’aia o tutu i le Maketi i Fagatogo, foliga mai ua lagona e i latou ua gau lenei vaitau i pisinisi tau la’u pasese mo pasi. Lea la ua omia ai le vasega o tagata feoa’i i Pasi, ma o se mea faigata lea ua va’aia nei i lea tautua.

I le tautua a Taxi Stands, ua fiu e vala’au ae le toe talia le telefoni, a leai ua ii mai e foliga o lo ua le avanoa. Ina ua maua le avanoa e maua ai le ta’avale laititi la’u pasese i luga o le auala, sa fesiligia pe aisea ua le toe talia mai ai le telefoni a le latou Stand Taxi? “Ua le mafai ona toe tali mai e le Base le matou telefoni aua e le o toe o atu Taxi e fa’ailoa atu o lo’o avanoa mai le la’uga o pasese. Ua sau lava le ta’avale laititi latou ma toe maua e le isi pasese i luga o le auala ma toe alu atu ai lava. 

“A tali mai e le Base le telefoni, ae leai ma se ave ta’avale Taxi e talia le uaealesi, o lona uiga e sisi ai le tali telefoni i fa’amatalaga a tagata, ae o le mea moni ua le mailoa se mea a fai, a le toe o atu Taxis i le Stand ma ua fa’asolo atoa fo’i avega o aiga e fa’atau ma ua mae’a ai lava le asi o le isi tagata faigaluega o ae ta’avale toe foi i aiga ua lava le lulu’u o lea aso.” O se tala lea a se tasi o ali’i ave taxi, a tolu aso o usu i le aiga na maua le Stimulus, ma ua fa’asolo pea fa’atauga a lea aiga, ua aofia atu ai ma le Mothers Day.

O lo ua le toe fa’aaogaina la le pasi e lea aiga sa masani ona malaga e fa’atali le pasi ma aga’i ai fo’i i le lotu. O mea moni ua siitia e le Stimulus le la’asaga o le soifua masani o sia aiga, e le o mea leaga, o se mea e foliga mai o se tau ua selesele ai le sa taumafai ia oo i lea tulaga.

I laina uumi i fale’aiga lea e asu ai tausami ua mae’a gaosia lelei, ua matua fa’amautu mai e le Pule o lea fale’aiga i Nuuuli, “O le fiu e falai le mamoe ma fa’asolo mai, ae le muta ai le mana’o o le mamalu gasolo mai le faitoto’a. E le o fiu la matou e tautuaina tagata lautele, ae o lo ua fai si tuai o le aukuka, fa’aopoopo atu le taimi e gasese vave ai taumafa alumia i le vaveao, ae le lava pea lena sapalaimo le vaega e tutu mai ma fa’atauga a silia ma le $50 ma aga’i atu i luga. Fa’afetai lo’u agaga i lenei vaitau, ua sagisagi fiafia le livaliva, aua e le mau a’i pea aso faapenei i le tautua.”

Mai faleoloa tetele e aofia ai le ACE Hardware i Malaeimi, Cost-U-Less ma le GIAS (Good in American Samoa) i Tafuna fa’apea le Laufou Shopping Center, e le o toe tele se sapalai o televise ma oloa mo potu malolo o maota o aiga. Ua la’u le televise ma seti nofoa, o oloa uma lava e aoga i le fanau i masini tau Komipiuta ma latou meaafale e tuu ai i luga, ina ia mafai ona mautinoa e uma ane nei mea, ae ua mautu lelei nofoaga i fale o aiga e faia ai meaa’oga a le fanau. 

Ua fa’apea fo’i ona fa’ailoa mai e le vaega a le ASTCA le ai tosolaina o le WIFI ma le Bluesky Communication, ua pisi tele latou, ua tele na’ua oka o aiga e fia fa’apipi’i a latou WIFI e tapena ai mo so’otaga tafa’ilagi e faatino ai meaa’oga a fanau, ae maise i taimi e pagatia ai nisi fa’ama’i pipisi i le lumana’i, poo le Coronavirus lava.

O le siitaga o le tamaoaiga ua maua e le lautele o aiga o Amerika Samoa, ua iloga nei i a latou fa’atauga ma le pisi na’ua o le soifua o aiga o le atunuu.

Fa’aalia e le susuga Manu’a Chen o le Manu’a Store uma lava i totonu o Amerika Samoa, “E moni lelei, o fa’atauga i le vaitau lenei e le’i va’aia mamua fuainumera nei muamua, fa’afetai ua mafai ona maua nisi o mea o manana’o ai le atunuu, ae maise lava i ili ea malulu, ua matua alumia lava.”