TALA I VAIFANUA

Pago Pago, AMERIKA SAMOA

10 FANAU AOGA PIKI MO LE INISINIA I FEOAIGA - POLOKALAMA O LE TUUAGA O A’OGA

E to’a sefulu le fanau a’oga maualuluga a le Teritori ua mae’a pikia mo le Kosi Inisinia o Feoa’iga lea e faia le latou aoaoaga faapitoa i le vaiau o le tu’uaga umi o a’oga ia Ini se’ia oo ia Akuso 2021.

O i latou nei ua ma’ea filifilia fa’apitoa ina ia latou aoaoina auiliili ituaiga o ala eseese e mafai ai ona fa’aleleia atili feoa’iga i luga o alatele. 

O le a auai fa’atasi i latou ma ma isi sui mai isi teritori uma o le Iunaite Setete o Amerika, ma ua fa’aigoaina lea aoaoga fa’apitoa o le Pac-STEP.

O lea polokalama o lo’o ua fa’atupe mai lea e le USDept.Transpotation Federal Highway Administration, ma ua fa’apito augafa lava mo le vasega o teritori uma i le pasefika o Amerika.

E masani lava ona filifili na’o le to’afa o sui fanau a’oga mai teritori ta’itasi ae ona o lo’o a’afia i tatou i le Covid-19, o lea ua fa’atulaga ai lenei tausaga ua manatu ai le Matagaluega o Galuega Lautele, lea e sootauau lava latou tiute ma le Federal Highway Administration, ina ia fa’atautaia lenei aoaoga ma fetufa’iga uma i lea Kosi i ala fa’afeso’ota’i i Upega Tafa’ilagi pe o - Virtual.

Ona o se mea e le tau totogia se pasese lea ua fa’atinoina i lenei tausaga, o lea ua manatu ai e fa’ato’atele le fanau sogasoga e fa’aauala i ai nei ituaiga o atamai, ma sailiili ala e fa’aleleia ai tatou auala pe o le inisiniaina lea o le fausaga o alatele i le atunuu.

O le Iunivesite o Hawaii lea e latou te fa’atautaia maia nei a’oa’oga uma e fa’aaogaoina ai le polokalama mo Teritori ma e fai vasega e ave e le tamaititi e to’atasi i le 4 fo’i o vaiaso lea e fa’atautaia ai semina i le potufono o le Matagaluega o Galuega Lautele.

Ua fa’ailoa mai e le tamaitai o Tanya Aab o le Public Works sa ia fa’ailoa maia, “Sa faasaalalau faalaua’itele i a’oga maualuluga uma lava i le teritori lenei avanoa, ina ia talosaga mai ai se aoga poo le tamaititi sogasoga lava fo’i latou. O le fa’atulagaga sa fa’aaogaina e tusia le tala ma fa’atumu le tusi talosaga mo sou avanoa e filifilia ai o oe e fai ma sui o lea to’asefulu mai a’oga maualuluga.

O i latou nei e to’a 10 ua filifilia: Julia Laing, Francis Vaofanua ma Joymer Caloyloy o Tafuna High School; Katherine Kim o Manumalo Academy; Nuutofi Faauliuli, Jadelyn Toma ma Dorrin Tuisamatatele o Fagaitua High School; Michael Sun o South Pacific Academy; Baelin King o Faasao Marist High School; Daniel Wang o Pacific Horizons School

SILIA I LE 100 ISI SUI AUMAI SAMOA MA ISI ATUMOTU

I le taimi nei ua mae’a nei ona fa’anofova’ava’aia le isi aumalaga lona tolu mai Samoa ona sa malaga atu e fia apalai o latou visa e malaga ai i Amerika ma ua toe taliu mai i latou. O i latou fo’i nei e fia malaga atu i fafo mo a latou talavai o lo’o tapena i ai, ae o le fa’aletonu ua uma aso o latou visa e malaga ai, ae ao ina toe talosagaina.

O se tasi o fa’asalalauga fa’alauaitele a le Komiti Fa’afoe o le Covid-19, ua fa’ailoa mai ai na to’ai taunuu le isi malaga mai le aso Tofi i Amerika Samoa ma o nisi ua toe malaga mai Samoa ma Tonga, ma o i latou nei ua silia ma le tausaga talu ona toe fia fo’i mai i fanua, ae ua taofia ona o le fa’asa o le Covid-19.

O lo a fa’ailoa e le Faigamalo fa’apea fo’i le Komiti Fa’afoe o le Covid-19 a le tatou nei Malo, e silia ma le to’a 100 i latou ua mae’a nofova’ava’aia ma ua fiafia fa’atasi ma aiga mai atumotu eseese o le Pasefika ua mae’a toe fa’afo’ia mai mo galuega nisi, ae o le toe taliu mai i aiga nisi.

I le taimi nei ua toe taofia lava le malaga na fa’amoemoe e malaga mai Fiti ona o le toe fa’amalosia mai o nisi o aiaiga o le fa’asa a le malo Fiti ua fa’amamaluina nei, aua ua toe va’aia le fa’ateleina o e ua maua i le Covid-19 i lea malo.

O isi sui na talia e malaga mai i Amerika Samoa o le vaega lea a le Engineering Remedian Resources Group ERRG ma le vaega a le USArmy Coprs of Engineers (USACE) lea na fa’ato’a to’ai taunuu mai i le aso Sa Me 2nd i le tatou malo. 

O i latou nei o lo’o aofia i le galuega tele lea e fuafua mo le punavai o Aua lea e aofia ai le tele na’ua o elemeni o’ona ma e le tatau ona aofia i le suavai mama e taumafaina e lea afio’aga ma le mamalu lautele o le a oo i ai nei paipa vai.

Ua i ai fo’i se aumaalaga fa’apitoa a le USEPA ma le ASEPA o lo’o tau tu’ufa’atasia mai ma o lo’o fa’auia mai uma lava le tele o aiaiga a le Covid-19 Task Force ina ia mautinoa lava e le o ulufale mai se tasi ua mae’a a’afia i le Covid-19.

INA IA FA’ATUMAINA LE LELEI O LE ‘AMU MA A’AU I LE ATUNUU

O le soifua maloloina lelei o ‘Amu ma A’au o Amerika Samoa, o le auau atoa lea o le fa’amoemoe na saunoa i ai le tatou Faipule i le Konekeresi, Uifaatali Aumua Amata i le fonotaga fa’apitoa sa fa’atautaia a le Natural Resources Committee e va’aia toto’a le Suavai Taumafa, Moana Sausau ma le Siomaga o Meaola uma o lo’o ua aofia ai. 

O le tatou Faipule i le Konekeresi o se tasi lea o totino o le Konekeresi sa latou fa’atuina ma fafau le pili lenei nmera HR160 o loo aiaia ai auala e mafai ai ona toe “Fa’aleleia le Amu ma A’au 2021 RRR poo le Restoring Resilient Reef 2021.

O le tamaitai o Kelley Anderson Tagarino o le Iunivesite o Hawaii o le polokalama a le Sea Grant lea e fesoasoani mai fo’i i Amerika Samoa sa maua lona avanoa e saunoa faapitoa ai mo le sapaia atili o lea foi pili sa talanoaina. Sa ia fa’ailoa le aoga tele ma alamanuia e mafai ona maua mai e tagata lautele ma le malo fo’i ona o le faia o galuega fa’asao ma toe fa’aleleia o le olaola lelei o ‘amu ma fa’aleleia atili ai fo’i ma ‘a’au i teritori o Amerika i le Pasefika.

O le i si lava mea e sili ona aoga ai le ‘aau ia lelei atoatoa, ona e latou te puipuia ai le malolosi o galu fafati ma ‘aia ai le apitagalu ma solo atu ai le tele o le palapala aga’i i le sami. Sa fa’ailoa o le isi afaina tele lava o apitagalu o le atu Samoa ona o le taimi na sofa’i mai ai le Tsunami o le 2009.

Ua fa’afetaia mai fo’i e Uifaatali le tusi sa tapena atu e le susuga le Fa’atonu o le DMWR, Taotasi Archie Soliai lea sa mafai ona fesoasoani atili fo’i i le Failautusi o le Komiti, e sapaia atili ai lea mau sa saunoa i ai le tamaitai o Kelly Anderson Tagarino, ma o lo’o auai ai le tatou Sui Faipule i le Konekeresi e fa’aupu ma una’ia malosi.

O alamanuia fo’i o le a fa’auia mai lenei pili o le a fesoasoani lea e toe fa’aleleia ai le olaola o Amu ma A’au i le atunuu, ma o le a i ai fo’i se galuega tele e mafuli tagata o le atunuu e fa’aleleia mo le gataifale.

Ua fa’ailoa i le tusi na taua’aoina mai le Fa’atonu o le DMWR Taotasi A. Soli’ai, “O lo ua sapaia malosi e Amerika Samoa lenei pili tau fa’aulu e fa’aleleia atili ai le ‘Amu ma A’au o le teritori poo le pili nmera HR-160 RRR2021 ona o lo’o feso’ota’i lelei lea pili ma le galuega fia una’ia malosi ia toe fa’atele, faaleleia ‘amu o le gataifale, ia mautu a’au e ofaga ai i’a ma puipuia mai ai le solo atu o le eleele i le gataifale, ma ia faia foi suesuega e tatau ona fa’atino ia mafai ona mita’i le fa’agasologa o galuega toe fa’aleleia o le gataifale poo aga’i i luma pe leai.”

Ua saunoa fo’i Tagarino, “O le ‘amu ma a’au o Amerika Samoa, e ese mai lea ituaiga i le tele o isi a’au ma ‘amu o ola i isi vaega o le lalolagi. E vave tele ona toe fa’aleleia mai e le ‘amu i Amerika Samoa lo latou ola fa’afouina, e le pe ona o le a’afiaga fa’anatura o lo’o a’afia ai ona o fesuia’iga o le tau, ae suia ma toe fa’afou lo latou lauolaola i se vaitaimi puupuu. E tatau ai ona fesoasoani polokalama fa’asao ma toe faateleina o ‘amu e toe una’ia vave ai le lauolaola o ‘amu ma le malosi’aga o a’au i le teritori.”

O le taumafaiga lenei ina ia fa’aleleia fesoasoani uma a le Feterale mo le toe totoina ma le fa’aleleia o le lauolaola o ‘Amu ma A’au i Amerika Samoa, e avea ai Amerika Samoa ma fa’asao o le Gataifale e mata’ina i le Iunaise Setete atoa.