Loka i le faaoolima to’alua o lona tuafafine ae maua ai fualaau faasaina

Pago Pago, AMERIKA SAMOA

O le ali’i lea na pu’e faapagota e Leoleo ma tu’uaia i lona faaoolima i le to’alua a lona tuafafine, ua molia nei o ia i lona le usitaia o tulafono tau i fualaau faasaina, ina ua maua e Leoleo ia te ia fualaau faasaina o le aisa ma le mariuana.

O le masina na te’a nei na tula’i mai ai lenei fa’alavelave i Tafuna, ae o le vaiaso na te’a nei na fa’atoa maua ai e Leoleo le ua molia ma pu’e fa’apagota ai loa o ia.

O le vaiaso na te’a nei na tula’i ai Faamanu Aleki i luma o le Fa’amasinoga Fa’aitumalo mo lana ulua’i iloiloga. O le ali’i loia fautua ia Michael White na tula’i mo ia, ae o le ali’i loia sili lagolago ia Robert Morrison III na tula’i mo le itu a le malo.

Ua molia nei Aleki i le moliaga o le umia faasolitulafono o vaega o le pauta o le aisa ma le moliaga o le umia faasolitulafono o vaega o le laau faasaina o le mariuana, o ni solitulafono  mamafa e mafai ona faasala ai se tasi i le umi e mai le 5 tausaga e oo atui le 10 tausaga, pe faasala foi i le salatupe e le silia i le $20,000; faapea ai moliaga mamafa e 2 o le faaoolima i le tulaga lua, atoa ai ma le fa’aleaga meatotino i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua; faapea ai ma moliaga mama e 2 o le faaoolima i le tulaga tolu, atoa ai ma lona faia o ni gaioiga e ono lamatia ai le saogalemu o fanau laiti, o le vaega A lea solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000, poo le fa’asala fo’i i fa’asalaga uma ia e lua.

E $10,000 le tupe lea ua fa’atulaga e le Fa’amasinoga e totogi ona fa’atoa mafai lea ona tatala Vaega i tua mai le toese i Tafuna.

Afai ae mafai ona ia totogi lea vaega tupe, ua fautuaina o ia ina ia fesoota’i vava lalata ma lana loia, e le mafai fo’i ona ia tuua pe taumafai e tuua le atunu’u, ma ia tuuina atu lona tusi folau e taofi e le loia a le malo, se’i vagana ua mae’a lana mataupu ona fa’atoa mafai lea ona toe tuuina atu lona tusi folau ia te ia.

E le matai fo’i ona ia taumafai i soo se auala e fa’afesoota’i molimau a le malo, e aofia ai ma i latou o lo o a’afia i lenei mataupu i soo se auala. Afai latou te fetaui ma i latou nei i soo se nofoaga, o lona tiute o le alu ese mai ai.

Na teena e le afioga i le ali’i Fa’amasino ia Elvis P. Patea le talosaga a le itu tete’e ina ia fa’aitiitia le tupe e tatala ai Aleki i le $3,000.

Na taua e White e fa’apea, o Vaega o se ali’i e galue malosi mo le tausiga o lona aiga, e le o i ai fo’i se tulaga e ono masalomia ai o ia i le sola ese mai le atunu’u. E to’alima lana fanau, na fananau uma i Amerika Samoa, o lona to’alua fo’i o se tagatanu’u o Amerika Samoa.

Na taua atili e White e fa’apea, afai e fa’atulaga le tupe e tatala ai le ua molia i le $3,000, o le a mafai ona ia totogiina lea vaega tupe, ma mafai ai loa ona toe tatala o ia i tua e fa’aauau ona galue e tausi ai lona aiga.

Na tetee malosi le loia a le malo i le talosaga a le itu tete’e. Na taua e Morrison III e fa’apea, o le tupe e pei ona fa’atulaga e le Fa’amasinoga, ua talafeagai lelei ma le mamafa o tu’uaiga fa’asaga i le ua molia. O lo o popole fo’i lona aiga ina ne’i toe tula’i mai se isi fa’alavelave matuia pe afai ae toe tatala atu le ua molia i tua.

I le mae’a ai ona fa’afofoga o le Fa’amasinoga i fa’afinauga a itu e lua, na teena ai loa e Patea le talosaga a le iu tete’e, ma faatumauina ai loa le tupe e tatala ai Aleki i tua i le aofaiga e $10,000.

O le vaiaso fou lea ua fa’atulaga e tula’i ai le ua molia i luma o le Fa’amasinoga mo lana ulua’i iloiloga.

TAGI A LE MALO

E pei ona taua i le tagi a le malo e fa’apea, o le masina na te’a nei, na logoina ai e se Tina le Ofisa o Leoleo i Tafuna mo se fesoasoani, e mafua mai i lona tuagane ua manu’a tigaina o ia ina ua fa’aoolima i ai le tuagane o lona to’alua.

E to’atele Leoleo na aga’i atu i lea valaau, ma mafai ai loa ona latou fa’atalatalanoaina molimau sa i ai e tusa ai o le fa’alavelave.

Na taua e le Tina sa ia logoina Leoleo i Leoleo Suesue e faapea, na faateia o ia ina ua vili atu le atali’i o lona tuagane ma faailoa atu, o lona Tama (le na manu’a) lea ua auina atu i le falema’i, ua manu’a lona ulu ma lona tino ina ua ta e lona uncle i le u’amea.

E le i mafai e Leoleo ona fa’atalatalanoa le ali’i na a’afia i le po na tula’i mai ai le fa’alavelave, ae na fa’atoa mafai ona fesiligia o ia e tusa ai o le mea sa tupu i le afiafi o le aso Toona’i na sosoo ai.

Na taua e le ali’i na a’afia e fa’apea, na faateia o ia ina ua valaau atu Aleki i lona igoa, ae o le taimi lea faatoa uma ai lava le latou faiga lotu ma lana fanau i le afiafi. O lona to’alua (tuafafine o le ua molia), o lo o malaga i Samoa i se fa’alavelave a le latou aiga.

Na savali mai ma saofa’i i luga o le fasitepu o lona fale ma la talanoa ai loa ma Vaega. Na faateia o ia ina ua ia faalogoina i faamatalaga a Vaega, o lo o ita o ia ona o ni isi o polokalame a le latou aiga e lei logoina ai o ia.

Sa fesili atu Aleki pe aisea na le logoina ai o ia i le fa’alavelave lea ua malaga ai lona tuafafine i Savaii, ae na tali atu i ai le na a’afia, sa i ai lona manatu ua uma ona logo o ia e tusa ai o lea fa’amoemoe.

A o faagasolo pea le talanoaga, na taua e le na aafia le faateia o ia ina ua tu’i e Aleki ona foliga ma pau ai i lalo, ona aapa atuloa lea o Aleki i le fasi uamea sa nonoa ai i luga laau a lona to’alua o lo o tu i luma o le pa laau ma se’i mai ae ta ai lona ulu ma manu’a ai.

Na mae’a lea, ona savali atu loa lea o Aleki i le pito o loo paka ai lana ta’avale ma amata loa ona sasa tioata o lana ta’avale ma nuti lili’i uma ai. Na taua e le ali’i na manu’a e fa’apea, o iina na gata ai loa lona toe iloaina o se mea, ina ua matapogia i le tuga o le manu’a sa a’afia ai lona ulu.

O aiga tuai na latou molimauina le fa’alavelave na laga ane ma fesoasoani, ma auina atu ai loa le na a’afia i le falema’i mo togafitiga.

Na taua e le atali’i o le na a’afia i Leoleo e fa’apea, ao sasa e le ua molia tioata o le latou ta’avale, sa alu ane ma fesili i ai, pe aisea ua ia faia ai ni uiga leaga i lona Tama ma toe faaleaga le latou ta’avale. E leai se tali a le ua molia, se’i vagana ai lona faliu ane ma po le gutu o le tama a lona tuafafine ma fai i ai, “aua e te tautala i le mea e le oo i ai lou iloa.”

Na fiu Leoleo e saili le ua molia i le po na tula’i mai ai le fa’alavelave, ae o le vaiaso na te’a nei, na mafai ai loa ona pu’e fa’apagota e Leoleo le ua molia mai le fale o lana uo i Malaeimi, ma auina atu ai loa o ia i le Ofisa mo suesuega.

A o le i auina atu le ua molia i le Ofisa o Leoleo i Tafuna mo suesuega, na saili e Leoleo le tino o le ua molia mo ni aupega. I le taimi na saili ai e Leoleo le tino o Aleki, na maua ai e Leoleo se paipa tioata o loo i ai vaega o le pauta paepae o le aisa. Na toe saili le isi taga ma maua ai le sikaleti mariuana e tasi. 

Ina ua fesiligia e Leoleo le ua molia, sa ia ioeina ai tu’uaiga uma lava fa’asaga ia te ia, e pei o lona faaoolima i le to’alua a lona tuafafine, fa’aleagaina o le ta’avale, atoa ai ma lona faaoolima i le atali’i o le ali’i na manu’a.

Na taua atili e le ua molia i Leoleo e fa’apea, na tiga lona loto ina ua taumafai lona tuafafine ma lona to’alua e faalafi ia te ia fuafuaga a le latou aiga o lo o faia i Savaii. Na faamaonia e Leoleo le ‘ona o le ua molia i le taimi na ia faatinoina ai le solitulafo.

Ina ua fesiligia e Leoleo le ua molia i fualaau faasaina na maua ia te ia, na ta’utino ai le ua molia, o fualaau faasaina na faatau mai i lana uo ave taxi ma le faamoemoe e fa’aaoga mo ia lava.