TALA I VAIFANUA

Pago Pago, AMERIKA SAMOA

80 SUI NA FA’ATAUTAIA FOLASAGA FESOASOANI I LE FANAU A’OGA – FILIFILI TATAU SAU GALUEGA MO LE LUMANA’I FAGAITUA HIGH:

Na matua fa’atumulia le Laumua o le Fetu i Sasa’e ma o le Laumua fo’i o Toa o le Vasa, i le anoanoa’i o  folasaga matagofie na fefaasoa’i ai sui tofia e fa’atautaia folasaga i galuega e agava’a ai le fanau a’oga, ma le vasega o fanau a’oga uma i le A’oga Maualuga i Fagaitua. O le to’a valusefulu e mai i ofisa eseese o le Malo, i ona matagaluega eseese, ae maise o pisinisi tumaoti eseese e mafai ona talosaga ai le fanau a’oga, ina ia amata galulue fa’ataitai ai i le tuuaga o a’oga o le a oo mai ia Iuni 2021. 

O sui na auai e to’a 80 nei sa tala fa’uto i potu a’oga, ina ia mafai ona latou fa’asoa i fanau a’oga, i ituaiga o aoaoga ma mataupu e tatau ona latou tau’avea e aoga ai i ituaiga o galuega o lo’o mafai ona galulue ai i latou matagaluega. O ituaiga totogi o lo’o maua e i latou o lo’o galulue i tofiga eseese nei, ae maise o le taua o lou tagata pe a oo ina fia avea oe ma tagata faigaluega.

O le vaega a le Faletupe o Atina’e e to’afa lelei i latou na auai atu, ina ia tima’ia le fanau i a latou ituaiga o galuega e fa’atino, o latou matafaioi tausi lea e ao ina tautuaina ai tagata lautele.

O le itu o e faia nogatupe ma fa’ailoa i tagata e fia faia ni nogatupe aiaiga uma o lona nofoaitalafu ai i tupe toina mai e le Faletupe o Atina’e mo oe le sui na talosaga mo se nogatupe e faatula’i ai sau pisinisi, lipea ai lou fale, pe fa’atuina ai sou fale fou. O lo ua i ai foi avanoa lelei e mafai ona fa’afaigaluega ai se tasi o fanau aoga ae tatau ona avea muamua kosi fa’apisinisi i le Kolisi Tuufa’atasi ona agavaa loa lea o le tamaititi aoga e talosaga mo nei tofiga.

O le sui lona lua o le vaega a le Au pasi fale ma le au tusi ata fale, e aoga lea mo le vasega o aiga o lo’o soloa’i atu ina ia mafai ona maua se nogatupe e fa’atuina ai se fale fou, po’o se pisinisi fou. O ituaiga o galuega lea e maua i lena itu o le tautua e tatau ai ona lelei lau tusi ata fale, ia iloa faita le Blue Print o le fale atoa lea e saunia fa’apitoa e le matagaluega o galuega lautele a le Malo po’o le faletupe lenei o atina’e.

O lo ua aofia i lea tulaga le iloa lelei fo’i faitau le laufanua ma fua le laufanua e fa’atuina ai le fale. O tomai e moomia mo lea matata ua fa’ailoa mai, e aoaoina mai uma lava pe afai ae tau’avea i le Kolisi lau kosi lea o le Tusi Ata Fale. O lona uiga e ao ina mae’a lau aoga i Fagaitua, ona soso’o lea ma lou toe avea o lau kosi lea i le Kolisi, ona fa’ato’a agava’a lea ma mautinoa ua fa’afaigaluega oe i lea itu o le tautua a le Faletupe o Atina’e.

O le iisi toe ituaiga o galuega a le Faletupe o Atina’e o le vaega e nafa ma le fa’afaigaluegaina o tagata, po’o le Human Rsources a Faletupe lava latou.

O iina sa fa’amatala auiiliili ai i le fanau ituaiga o tagata e moomia e so’o se galuega. O le fa’amaoni ma le onosa’i e sili ona taua, fa’afeiloai tagata uma ma le laufofoga fiafia, ae sili ona taua o lou fa’amaoni e faia ou tiute i aso uma ma le fiafia. E to’aga i le galuega e te le tuai soo pe faalausoso’o, e maea lelei ona fa’atino au galuega i le taimi e moomia ai. O lea itu o le galuega e faigaluega ai na’o e ua agava’a ma ua umia fo’i tusi pasi maualuluga mai kolisi ma Iunivesite.

O galuega ua mafai ona ulufale atu  ai le vasega o talavou lea ua papasi a’oga maualuluga, e mafai ona galue fa’ataitai pe vave lana pu’e i tiute fai ma mea na, ae le mafai ona alu atu loa talia e avea ma se tasi e sui tagata faigaluega o lo’o ua i ai nei, aua  e moomia lava ona muai umia fa’ailoga maualuluga i le fa’afoega o vaega fa’apea i totonu o Ofisa fa’apea o le Malo.

 O isi ituaiga o tiute sa fa’afofogaina o le vasega o Tusitala ma i latou e faigaluega i totonu o Nusipepa ina ia e taga’i ma faitau sau nusipepa i aso ta’itasi, e ese mai le nusipepa o lo’o fa’asalalauina atu i alaata o televise ma sootaga o upega tafailagi. “E oo lava i le tusitusi e na’o le Tusipasi lava o le A’oga Maualuga i Amerika Samoa  ma nisi malo uma lava e mana’omia, pe afai e lelei lau tusitala i le gagana peretania ma le fa’asamoa fo’i.

O lona uiga o se mea taua lea e tatau ona va’ai toto’a i ai nisi o le fanau aoga o le a vave amatalia aiga pe ua le  manatu fo’i e fa’aauau le a’oga i le tausaga fou.

 Faaalia fo’i e le susuga le ali’i Pule Aoga i le Laumua i Fagaitua, “O le taimi lenei ua tau le maua se avanoa e o atu ai i fafo a tatou fanau e fa’alautele le atamai, pe sailia fo’i ni galuega e agava’a ai i fafo, o lea la o se avanoa e maua iinei e mafai ai ona faigaluega ai o se mea lea ua tali leleia e aiga ae maise matua. Ua le mailoa lenei fa’ama’i, ae o lea e tatou te olaola saogalemu lava iinei mai le Covid-19, ua tatau ai ona tatou va’ai toto’a ai i avanoa ua tatou maua i le lotoifale o si o tatou atunuu.”

O se aso ua matua laulausasa’a folasaga o ni filifiliga tatau fa’alotoifale a le fanau, pe afai o le a manatu ina ia sailia se galuega, ua maua lava avanoa.

Matagofie le taligamalo a le Laumua mo le mamalu o sui na fa’atinoa le fa’amoemoe o le Laumua, e afua mai le malu taeao se’ia ina mavae mai i le aoauli, sa matua fa’amalieina le galala ma le fia tausami i le tali fa’aaloalo. Fa’afetai fo’i i meaalofa na taulimaina, e avea lea ma pine fa’amau o le mafutaga taua i lea fo’i aso iloga i le Laumua o le Toa o le Vasa.

Tusia: Leua Aiono Frost

TOE SA’AFI MO LE AFIOGA FEPULEA’I TUILAEPA AFA RIPLEY – SAUNIGA I SIONA LE MAUGA PA’IA EFKAS LEONE:

O le toe sa’afi a le fanau, le pa’ia o aiga na lua, le mamalu o uo mamae ae maise i latou na masani i le afioga le ali’i Loia, sa faafofogaina lea e le mamalu lautele sa auai i ona toe sauniga na fa’atulaga e le faletua Marie Tauanuu Ripley ma le fanau ma Aiga.

O le ulua’i sauniga sa fa’atautaia i le aso Lulu, ma ta’ita’ia e le Fa’afeagaiga EFKAS i Fagatogo, Rev. Iasepi Ulu.

O le autu o lana faamalosi, “ Ia tatou agaga i mea a le Atua ae le o mea a tagata. O le mafutaga i lalo nei  o le mafutaga fa’ale tino tagata nei ae ia tatou tepa taula’i i le mafutaga i tua atu o le Oti, aua e fa’avavau lea. O le tatou ala i lena mafutaga e ao ina tatou faia le amiotonu ma ia tausi i poloa’iga a le Atua.”

Na soso’o ma molimau a le fanau i le latou mafutaga ma lo latou tama. 

O latou folasaga sa latou fa’aalia ai, “O le matou tama o se tasi e alofa tele. E le o se tasi e tautala so’o, o lona leo ua misia i le matou mafutaga. E le so’ona tautala ae a saunoa, e ao ina usita’ia. O ia e tutusa uma i matou i lana tausiga, e alofa e faia mea matou te manana’o ai, e talanoa mai i le fuafuaga a le tagata lava ia mo lona lumana’i, lea ua motusia nei le mafutaga, ae o le a taumafai lava ia fa’ataunuuina mea sa tatou fuafua ma oe, le tama peleina.”

O le afioga Fepulea’i Tuilaepa Afa Ripley sa soifua a’e i ona matua o Leoso Taeleifi Ta’aviliafi Afa Ripley Sr. o Leone, ma lona tina o Fa’amamata Leilua Malau’ulu Taito Ripley o Falesao Manu’a, Pago Pago ma Nuuuli i Amerika Samoa ia Ianuari 20, 1949, ae ua fa’amavae nei ma aiga ina ua maliu ia Me 26,2020.

E to’atasi lava lona tuafafine o Malaetele Christina Ripley ua maliu fo’i o ia. O ona uso e aofia ai Matagitu Pooainafaiaoe Ripley, ua maliu fo’i. Edward Ripley, Seupule Richard Ripley, Cherylmoanamarie  Cherie Elmer Albert Ripley, Liomatua Haili Lelei Ripley. O latou uso tausi e aofia ai Simi Edward Ripley ma Loleni Taufete’e.

Na fa’aipoipo atu o ia i le tina o le aiga, Marie Vaelua Taeao Tauanuuu – Ripley o Leloaloa  Amerika Samoa ma Sagone ma Salelavalu , Savaii. Na faia lea fa’aipoipoga ia Me 31, 1975  i Fagatogo Amerika Samoa.

O le la’ua fanau sa aofia ai Afa Taeao Tauanuu Ripley, Talia Tutasi Ripley, Vaelua Epi Ripley, Fa’amamata Marie Ripley, Taeao Malauulu Ripley ma Taufagalupe Fiatagata Ripley. O le fanau matutua e aofia ai Peter Sonny ma Janet Wilson Tauanuu ma le ali’i o Mapusaga Papali’i Venitura ma Lupe Aumavae Tauanuu. 

O Papalii Venitura sa ave ma molimau mulimuli a le fanau ma usuina ai le latou pese fa’amavae ma le latou tama.

“Poo ai lava le fanau, ae ou te iloa e mafai ona fa’ailoa mai e le aofia o poto mai I lenei afiafi, O Veni lava le pele e to’atasi a le tama o Fepulea’i Afa Ripley. E asiasi atu le tama i so’o se mea ou te fa’anofonuu ai ona o a’oga, e pei o se uo mamae ma e fiafia te faia mea lelei uma lava mo a’u. Ou te fa’amemelo fo’i lona alofa naunauta’i ia te a’u le atali’i.  E talanoa mai i mea tau le aiga, tusa lava pe le’i taitai mai ona ou matua. Lea ua avea a’u ma Matai, ua ia fesiligia so’i loto ma sou fa’aiuga fai i mea tau le aiga atoa. O se tala e le aumaua fo’I lona alofa faitama leaga ia te a’u, ma ou te molimau atu, o le a ou misia lana ta’ita’iga, lana fa’atonu ma lana fa’asoa mai ia te a’u i mea uma lava. O Papa Afa Ripley, o se meaalofa sili na tapena e le Atua mo le matou tina, ae maise ia i matou le fanau ma le pa’ia o aiga.”

E to’aono le la’ua fanau tausi ua lisia i le polokelama le e aofia ai: Senila Asuelu, Iosia Mulipola, Lua’ai Fa’ali’i Fei Filoialii Itamua, Lualua ma Faagata Penina ma le fanau.

I le 1963-1967 na faauu mai ai Fepulea’i i le a’oga maualuga a Samoana ae ua 17 lea o ona tausaga. Na maua lana sikolasipi mai le malo e e ulufale ai i le Kansas State Teachers College i Emporia i le Setete o Kansas. 

1972-1973 Na fa’amanuiaina ua maua lona faailoga o le Bachelors ma lona Masters i Kosi Fa’apisinisi .

1973-1975 Ua toe taliu mai I fanua ma ua amata loa ona faigaluega mo le Malo o Amerika Samoa. 

1975-1978 sa toe fo’i i le a’oga i Kalefonia California Western School of Law i San Diego, Kalefonia.

1978, toe taliu mai i Hawaii ma amata galue loa fa’aloia e fa’aaoga ai lona tusi loia ua ausia i Kalefonia. Sa ia sueina ai le su’ega a Loia i Hawaii ma faigaluega ai loa. Na toe taliu mai i lona aiga e tausia matua ma aiga.

1978-1987 Sa tautua ai faaloia I le setete o Hawaii (Prosecutor) mo le 10 tausaga.

E tolu tofiga Loia sa tautua ai i Honolulu, Sui Loia Sili, Sui Loia e saisaitia tagata solitulafono a le setete o Hawaii, ma le Sui Corporation Counsel -Tral Division. 

O le tausaga 1988 na toe taliu mai ai I laufanua. O le taimi lea ua tula’i mai le tama e avea ma fofoga o aiga, Tofa Leoso ma le tausi ia Fa’amamata i Leone, ma amata ai loa lana tautua i le Malo o Amerika Samoa e avea ma Loia Sili, ona sosoo ma le valaauina e tautua i le Fono Faitulafono i le Maota Maualuga e avea ma latou loia faufautua.

1996-2014 na vala’auina ai fa’apitoa e Kovana Tauese ina ia avea ma Loia a Amerika Samoa e finauina le saoga a Amerika Samoa mai le Sikaleti, lea sa maua mai ai ma le vaega tupe tele a le Malo, ma fesoasoani i le tupe maua e tausia ai le Malo i lena nofoaiga.

O le tuua fo’i o le malo e lenei taitai aoga, i le malo ma ona tagata lautele, ae maise lava fo’i o le lotoifale o le tina ma le fanau ma le pa’ia o Aiga. Ia manuia lau malaga Fepulea’I Tuilaepa Afa Ripley Jr.

O lona toe sauniga sa auai uma ai le vaega eseese o le Faigamalo, i e na latou faigaluega fa’atasi ae maise o ta’itai o lo’o tula’i mai i lenei vaitau e fa’afoea le malo fa’ateritori o Amerika Samoa. Na toe faia lava ona toe sauniga nei i le malumalu tapuai EFKAS i Leone, Siona le Mauga Pa’ia, ma falelauasi ai  o ia i lona nofoaga tumau i lona aiga, Sa Ripley i Leone lava, le mea sa ia naunau e lagomau fa’atasi ai ma ona tua’a.