Galulue faatasi Asosi o Fusuaga ma tagata fusu tuai e faaleleia fusuaga i AS

Pago Pago, AMERIKA SAMOA

O le taamilosaga o fusuaga a le Asosi o Fusuaga a Amerika Samoa lea na faagasolo i le mae’a ai o le sisiga fu’a a le atunu’u i le vaiaso na te’a nei, na atagia mai ai le galulue faatasi o le Asosi o Fusuaga ma tama fuai o le taaloga fusu e fesoasoani ma lagolagosua i le faaleleia o le taleni mo fanau ma tupulaga lalovaoa.

O le nofoaga autu o le mae’a fusu i Tafuna, le Veterans Stadium na faataunu’u ai lea taamilosaga, lea fo’i na molimauina e le to’atele o le atunu’u e aofia ai matua, uo ma aiga o ali’i fusu.

O le Peresetene o le Asosi o Fusuaga a Amerika Samoa (ASBF), le afioga a Paepaetele Mapu Jamais faapea ai Faiaoga Sinia e pei o le afioga i le Sa’o Fetalai ia Sala Sanele, ma nisi na lagolago i lenei faamoemoe, na mafai ona ofo atu lo latou fesoasoani e lagolago ai taleni a fanau.

E 6 paga sa tausinio i lea aso e aofia ai ma le paga faapitoa e tasi, lea na ta’aalo ai nisi o alo o le atunu’u ua leva ona malolo litaea mai i le ta’aloga, ao lenei ua manatu e tuu mai lo latou tauau e ala i le tomai ma le agava’a e lagolago ai i le atina’eina o le taaloga o fusuaga i alo ma fanau.

E pei ona silafia, ua tele masina e le i toe faatinoina se taamilosaga o fusuaga tuu faatasi a le Asosi o Fusuaga, e ui ua tele masina talu ona koleni kalapu  ma au fusu i nofoaga o loo faamautu ai.

E 6 Kalapu Fusu eseese i le atunu’u na mafai ona auai i lenei taamilosaga, ona o le faanaunautaiga e tau tuu faatasi se aufusu a le atunu’u e tapena ai mo nisi o taamilosaga faavaomalo o loo aga’i mai i le lumana’i.

Na saunia e le Asosi o Fusuaga meaalofa tupe mo alii fusu uma na maua le avanoa e tausinio ai i lenei taamilosaga. 

Na fa’aalia e Paepaetele i le Samoa News e faapea, o le autu o lenei taamilosaga fusu, o le taumatai lea ina ia toe tau amata ona faamasani tama fusu i le taaloga, ua tele masina e lei mafai ona toe tuu faatasia se taamilosaga o fusuaga faapea, e mafua mai i le leai o se nofoaga lelei e faataunu’u ai le faamoemoe.

O le mae’a fusu a le malo i totonu o le Veterans Stadium lea sa faaaoga e le Asosi o Fusuaga Faapolofesa mo le tele o tausaga i lalo o le taitaiga a le afioga a Toleafoa Henry Tavake, lea ua fa’aaoga nei e le Asosi o Fusuaga a Amerika Samoa e faatino ai a latou fusuaga.

Ina ua fesiligia Paepaetele poo i ai ni taamilosaga o fusuaga faavaomalo o lata mai e mafai ona malaga atu i ai se aufusu a le atunu’u, saunoa le ali’i Peresetene e faapea, e le o i ai se taamilosaga o faatulaga mai i le taimi nei i le Pasefika, ona ua poloka fuafuaga uma talu ai le faama’i o le Koviti-19, ae o le agaga atoa o le Asosi o Fusuaga, ia tapena pea tama fusu e sauniuni ai mo isi taaloga i le lumana’i.

Na maua le avanoa e fesiligia ai e le Samoa News le Faiaoga a le Asosi o Fusuaga, le afioga i le Sa’o Fetalai ia Sala Sanele Etuale e tusa ai o lenei faamoemoe. Saunoa Sala e faapea, o le sini autu ua mafua ai ona toe tau amata lenei taaloga, ia maua ai le avanoa o fanau ma tupulaga talavou e faaaoga ai lo latou taimi avanoa e faatino ai se isi mea lelei mo lo latou lumana’i e pei o fusuaga, nai lo le tosina atu i isi mea faafiafia o le olaga, ma i’u ina aafia atu ai i le fualaau faasaina. 

O le toatele o tupulaga i ona po nei ua aafia i latou i faafitauli eseese e pei o le pule i le ola atoa ai ma le tagofia o fualaau faasaina. O lu’itau nei ua mafua ai ona to’atele fanau talavou e ma’imau o lato soifua ona ua sese le auala ua ui ai.

“O le isi lena autu o lenei faamoemoe, o le taumafai lea o le Asosi o Fusuaga ina ia faatosina mai tupulaga talavou e auai i fusuaga ma koleniga i afiafi ma aso ta’itasi, ina ia maua ai le avanoa e mafuta faatasi ai ma isi tupulaga talavou, ma taofia ai le aga’i atu i nofoaga e ono aafia ai o latou olaga talavou i fualaau faasaina ma le ‘ava malosi,” o le saunoaga lea a Sala i le Samoa News.

O se tasi o vaaiga taua na molimauina i le aso o lenei faamoemoe, o le maua lea o le avanoa o nisi o tama fusu tuai sa fai ma sui o Amerika Samoa i taaloga faavaomalo i tausaga ua te’a, e toe aga’i mai ai e a’oa’o fanau ma faaaoga lo latou agavaa e lagolagosua ai i le taaloga o fusuaga.

O nisi o ia tama fanau a le atunu’u e aofia ai le au uso mai Aoa, le susuga a Talosaga Manutulila ma lona uso ia Siaosi Manutulila, atoa ai ma le lagolagosua a lo la Tuaa, o ia fo’i lea sa faiaoga i lea aso.

Na taua e Sala i le Samoa News le tele o le sao e mafai ona lagolago mai ai nei tama fanau a le atunu’ui le faaleleia lea o le taaloga o fusuaga. 

Sa varia ai fo’i i lea aso nisi o alii fusu o le taimi muamua lenei ua ulufale ai i totonu o se mae’a fusu, ma o se mitamitaga i faiaoga ma le pulega a le Asosi o Fusuaga, le i ai o ni fanau talavou a le atunu’u o loo i ai le naunau i lenei taaloga.

E pei ona silafia, ua tele pine auro na mafai ona maua e Amerika Samoa mai taamilosaga faavaomalo i tausaga ua mavae, e mafua mai i au fusu na faafaiele atu e le Asosi o Fusuaga a le atunu’u, le ASBF. 

E le gata i pine auro ma taamilosaga e pei o le Oceania, faapea ai ma le Samoa Games i le va lea o Samoa e 2, ae na mafai fo’i ona oo atu se sui o Amerika Samoa e tausinio i taaloga o le Youth Olympic i le 2018 i lalo o le fu’a a le ASBF, e pei ona iai le susuga a Falaniko Tauta.

Na taua e le afioga i le ali’i Peresetene ia Paepaetele i le Samoa News e faapea, o nisi nei o moemitiga a le Asosi o Fusuaga a le atunu’u i le lumana’i, ia mafai ona toe ausia matati’a maualuluga e pei ona ausia i le taimi ua te’a, ina ia siitia maualuga ai le igoa o Amerika Samoa i le lalolagi.

“O le avanoa taua foi lenei e valaau atu ai i tupulaga talavou a Amerika Samoa, afai o i ai se tasi e fia atina’e le taaloga fusu, susu mai i le tatou mae’a fusu i le Veterans Stadium i Tafna i afiafi taitasi, o iina lea o loo faagasolo ai a tatou koleniga e tapena ai mo fusuaga o vaiaso taitasi,” o le saunoaga lea a le alii Peresetee.

Ua talosagaina foi le mamalu o le atunuu lautele aemaise matua, uo ma aiga o alii fusu ina ia faaalia le lagolago e ala i le auai atu i fusuaga i faaiuga o vaiaso taitasi, ina ia mafai ai ona lato molimauina le tulaga tupu tupu pea o le taleni fusu a fanau mo le lumana’i.