TALA I VAIFANUA

Pago Pago, AMERIKA SAMOA

FA’AALIGA TAUA MAI LE SOIFUA MALOLOINA - UTAGIA MAI E LE MAMALU LAUTELE

O le a fa’aauau pea ona aofia fa’atasi le aufaigaluega a le Matagaluega o le Soifua Maloloina ma le Vetereni i nofoaga faatulaga nei mo le fa’aauau ona faia tuiga puipuia mo le Covid-19: Ofisa o le Matagaluega o Tina ma Talavou i Tafuna; EOB Maota o le Malo i Utulei; Lee Auditorium I Utulei mai le 8:00 ile taeao se’ia oo i le 3:00 I le afiafi.

I le taimi nei, ua na’o tui o le Moderna ma le Pfizer o lo’o fa’aaogaina, ae o lo’o fa’auaau pea ona taofia le 600 tui o le Janssen, lea e tasi lava le tui e mo’omia ona faia mo so’o se tasi.

Ia manatua le fa’aaliga taua lenei: Pe afai e fia faia lou tui muamua e puipuia ai oe mai le Covid-19; e ao ina umia mai lou numera falema’I ma sou fa’amaoniga o lou sui poo le ID. Afai e leai sou numera falema’i ua faia, e tatau ona umia se isi fa’amaoniga mo oe ei ai sou ata, pei o le Tusi Folau poo le Laisene Aveta’avale.

Afai ua e susu mai mo lou tui lona lua e ao ina umia mai lou pepa tui e fa’ailo ai le aso ma le ituaiga tui ua mae’a faia mo oe, e i ai lava me fa’amaoniga o lou sui poo lou ID. E tatau fo’i ona e manatua pe ua faia sou tui o le Flu pe leai ae le’i silia ma le lua vaiaso ua te’a.

Fa’amolemole valaau i le 219, pe toe fia silafia Aso o Tuiga: Aso Lulua ma aso Faraile i falema’i i Tafuna ma Leone Aperila 21 ma Aperila 23; peita’I o isi tuiga uma eseese mo le mamalu lautele ae maise fa’asologa o tui puipuia mo isi uma gasegase mo le fanauiti e faia lea i le aso Lua, Aperila 20 ma le aso Tofi, Aperila 22, i falema’i lava i Leone ma Tafuna.

Mo gasegase ma i latou e tausi esea i Aiga, o i latou nei e tausia fa’apitoa ona o manu’aga tumau i le tino poo le mafaufau, e tatau ona utagia e mafai ona vala’au mo se fa’apupulaga atili, i le telefoni #219, pe afai e mana’omia ona amata faia tui puipuia o le Covd-19.

O i latou uma nei e aofia ai matua matutua ua tausi esea i aiga, Le toe gafatia ona savali mamao, fa’aaogaina le nofoa fa’ata’avalevale e fealua’i ai, ma e ua le toe mafai ona savavali ae ua tausia i luga o moega i tua i aiga ma i latou foi ua fa’afualoa le soifua ae ua le manatua e i latou mea na tutupu pe ua faia fo’i se tui pe leai.

O aso fa’apitoa nei ua fa’atulaga mo le auaunaga o a tatou pelega nei e pei ona ta’ua i luga: E faia tuiga mo i latou e avatua fa’apitoa i ta’avale a latou aiga ia Me 15, 2021 i le Malaeva’alele, ma e faia tuiga e fa’asolo atu i ta’avale ma fa’atalitali mo le 15 minute i le pakaga o ta’avale i le Malaeva’alele lava, fa’ato’a tu’ua ai le nofoaga pe afai ae le i ai ni faaletonu ia i latou ona o le tui.

Ia utagia mai, a’o le’i oo i lea aso patino mo tuiga nei, e tatau ona mua’i vala’au le laina 219, ma lesitala ai lou suafa mo lea tuiga, e tatau ona i ai lou numera falema’i i aso patino mo le tuiga ma lou suafa i le lisi o tuiga i lea aso, o lau lesitala lena. E i ai lau pepa fa’atumu e ao ina e sainia ma e taulimaina i le aso o le tuiga lea.

Mo nisi fa’afesili uma mo nei fa’aaliga eseese ua auina atu fa’amolemole vala’au mo se malamalamaga i le laina feso’ota’i a le DOH #219 poo le 633-5871. 

FESOASOANI TUPE MO E NA MALILIU I LE KOVITI-19

O le aso Lua, na te’a nei, sa faatautaia ai se fonotaga faapitoa i le Ofisa Tutotonu mo Fitafita ua Litaea i Tafuna, ma sa auai atu ai sui o le Ofisa o le Kovana fa’atasi foi ma nisi o sui fa’apitoa mai le Matagaluega o le Saogalemu Fa’alotoifale o Amerika Samoa, ina ia latou soalaupule i avanoa ua fa’ailoa mai, e mafai ai ona maua fesoasoani tupe mo aiga o e na maliliu ona o le Covid-19.

I le saunoaga a le afioga Kovana Lemanu Mauga sa ia fa’ailoa ai, “E i ai aiaiga ma ta’iala o le maua ai o lea fa’amanuiaga e i Aiga o i latou ua maliliu ona o a’afiaga o le Covid-19. O le naunautaiga o le Malo, ia agavaa uma tagata o le atunuu i lea fesoasoani, ae tatau ona silafia ta’iala mai le FEMA.” 

O le faafetai faapitoa a le Alii Kovana Sili i le Failautusi ia Alejandro Mayorkas ona o lana galuega mae’ae’a sa faatino ina ia mafai ai ona aofia Amerika Samoa i lenei feasoasoani tupe a le FEMA, aemaise lava i lenei taimi o feagai le lalolagi atoa ma le faamai o le Covid-19.

“E momoli foi le faafetai tele i le Faatonu o le Matagaluega o Puipuiga o le Saogalemu Fa’aotoifaleo le tatou malo, le alii Vetereni Samana Ve’ave’a, aua o ia sa taulamua i lenei faamoemoe,” o se fa’aopoopo lea  ale Kovana i lana fa’afetai fa’apitoa.

O le talosaga a le Malo i tagata uma, ia faaaoga lenei avanoa taua e talosaga ai mo se fesoasoani tau tupe mo aiga a’afia. O le sui mai le Matagaluega o le Puipuiga o le Saogalemu o le Lotoifale o le susuga ia Laauli Ifopo, ma o le Fa’atonu o Vetereni Mapu Jamias, o le sui patino fo’i lea o le Ofisa Kovana, o i la’ua o le a nafa ma le galuega e fesoasoani atu i Aiga o le atunuu e mo’omia lea fesoasoani mai i lenei porokalama.

Mo i latou e fia talosaga, o aiaiga nei e tatau ona utagia:

● O le na maliu na maliu i totonu o Amerika poo se Territori o Amerika, faapea ma Columbia.

● E tatau ona manino i le pepa maliu, le mafuaga o le maliu ona o le Koviti-19, po’o auga o le Koviti-19.

● O e agavaa e na’o tagata nuu na soifua ma ola i totonu o Amerika (US Citizen), tagatanuu o Amerika Samoa Nesionale (Nationals), tagata o isi atunuu ua faataga faaletulafono ona nofomau i totonu o Amerika, ma ua faamaonia sa faaaoga a latou tupe i le taimi o le maliu a’o le’i o’o i le aso 20 o Ianuari 2021.

● E leai se aiaiga e tatau ona faailoa atu ai o le ua maliu o se tagata nuu na soifua ma fanau i Amerika, (US Citizen) poo se tagata Nesionale Amerika (Nationals), poo se tagata ua faatagaina faaletulafono ona aumau i Amerika. Mo tupe na faaalu i se maliu, e tatau ona usutaia ma faamaonia vaega nei:

● Malaga i se taavale o ni tagata se toalua e faamaonia le tagata maliu o le aiga.

● Tupe na fa’aaluina i le feavea’ina o se tino maliu, pusa maliu poo le lefulefu o le ua maliu.

● Tupe na fa’aaluina i le vaega tonu na teu ai le maliu (burial plot) poo tupe na totogi i le vaega na susuina ai le tino maliu.

● Tupe faaaluina i le faatauina o se ma’a o le tuugamau poo se faailoilo o le fanua tanu (marker)

● Tupe sa fa’aaluina i le totogina o se faifeau e faia le sauniga o le maliu, poo se tagata o le malo na fatinoina le sauniga.

● Tupe na fa’aaluina i le tapenaina o le maliu.

● Tupe sa fa’aaluina e totogi ai le falemaliu, po’o le aufaigaluega a le falemaliu.

● Tupe sa totogi ai le susuina o le tino maliu, po’o totogi mo feso’otaiga i internet a’o tapena se maliu.

● Tupe faalauina e tapena ai pepa faamaonia ma pepa maliu. O faamatalaga uma e moomia e faatatau i lenei feasoasoani a le FEMA.

FA’AIUGA TA’AMILOSAGA VOLLEYBALL O LE SISIGAFU’A 2021

Mai le ta’amilosaga tele o le Ta’aloga Volley Ball sa feagai ai ma le Asosi Volleyball a Amerika Samoa [ASVA] lea sa fa’atautaia mo le fa’ailogaina o le Sisigafu’a 2021 a Amerika Samoa ua fa’amaumau mai ai fa’aiuga nei e le latou Failautusi o Jayleen Chun.

E fa vaega sa fa’atulaga e fa’atautaia ai lenei ta’amilosaga mo le fa’ailogaina o le Sisigafu’a 2021.

O le vaega o Alii talavou e 20 tausaga ma laiti mai, le vaega o au ta’a’alo Volleyball a Tamaitai; Vaega o Au ta’a’alo Volleyball a Kuini poo Fa’afafine ma le Vaega o Au Ta’a’alo Alii silia ma le 20 tausaga le matutua.

Mai le Vaega o Alii U-20 tausaga o le soifua: Siamupini le au malosi a le “Aliitaoso”.

Tulaga lua le au a le - Annex 2 ae tulaga tolu ai le ‘au malosi mai Aunuu le “Aunuu Sea Riders”. O le MVP poo le tama ta’alo lelei na maua lea e Aaron Fruean.

Mai le vaega o A’u a Tama’ita’i i lenei tausaga ua tele se suiga ua maua mai ai. Ua avea e le Crew Cuts le Siamupini o lenei Liki o le sisigafu’a 2021. Tulaga lua ai le ‘au malosi a tamaitai o le “Mizuno”. Tulaga tolu le ‘au a le BTI mai Nuuuli. O le tamaitai sili ona mata’ina lana ta’alo poo le MVP Tamaitai o Sherry Fonoti.

I le vaega o ‘au ta’a’alo a Kuini poo Fa’afafine Samoa ua umia ai nei e le “Originals le Siamupini o le Liki Volleyball o le Sisigafu’a Amerika Samoa 2021. Tulaga lua ai le ‘au malosi a le Sparkles ma le tulaga tolu ua sola ma le “Sassy.”

O le sui ua sili ona mata’ina lana ta’alo i le vaega atoa lea, na maua lea e Andrea P. Adams.

O le vaega o le ta’amilosaga Volleyball a le ASVA mo le sisigafu’a 2021, e sili fo’I ona tele ‘au sa tauva ai ina ia maua le Siamupini 2021, ae ua mae’a ane filiga a Aleaga, ua mautu atu le Siamupini i tau’au malolosi o le Annex 2. O le tulaga lua ai le ‘au mataala a le Sinapi, ae tulaga tolu ai le au a le Autalavou mai Amouli, mai le Falelima i Sasa’e.

O le sui ua umia nei le ta’alo lelei, sili ona mata’ina i le Liki lea, o le susuga Malo Risati.