Maua fualaau faasaina ina ua taofi e Leoleo ta’avale i le soona alu saoasaoa

Pago Pago, AMERIKA SAMOA

O le ave ta’avale o le pikiapu lanu uliuli lea na taofi e Leoleo i le soona alu saoasaoa i luga o le alatele i Faleniu i le masina na te’a nei, ua molia nei i lona soli o le tulafono tau i fualaau faasaina a le malo, ina ua maua e Leoleo i totonu o le ta’avale vaega o le pauta faasaina o le aisa.

E to’alua ali’i sa i totonu o le ta’avale i le taimi na taofia ai e Leoleo a o faatino ai a latou tiute masani o le mata’ituina lea o le saogalemu i luga o le alatele. O i laua e aofia ai le ave ta’avale, o ia fo’i lea ua molia i lenei mataupu, le susuga a Faavale Isaia ma lona uncle e 61 tausaga le matua, le susuga a Joseph Sio.

E pei ona taua e le malo i le latou tagi e faapea, a o tiute ali’i Leoleo e to’alua mo le mataituina o le saogalemu o ta’avale ma tagata femalagaa’i i luga o le alatele i le afiafi o le aso 20 o Mati na te’a nei, na laua molimauina ai se pikiapu lanu uliuli o lo o aga’i mai i luga o le alatele i Faleniu  i se saoasaoa e sili atu ma le saoasaoa faatulafonoina i luga o le alatele.

Na liliu le ta’avale a Leoleo ma tuliloa le pikiapu ma faaola moli faailoilo e ta’u atu ai i le ave ta’avale, ua tatau ona taofi lana ta’avale. Na taua e Leoleo e fa’apea, e toeitiiti lava 50 mita le mamao o le vaega na latou taofia ai le pikiapu na alu saoasaoa, ma le vaega o le alatele na tu mai ai le pikiapu.

A o aga’i atu Leoleo e siaki poo ai o loo i totonu o le ta’avale pikiapu, na vaaia e Leoleo ni gaioiga i totonu o le ta’avale, e foliga mai o ni tagata o loo taumafai e nana se mea i totonu lava o le ta’avale. 

Na faailoa e Leoleo i le ave ta’avale le mafua’aga ua ala ai ona taofi lana ta’avale, ona ua ova maila ua alu ai lana ta’avale i luga o le alatele, peita’i sa tete’e le ave ta’avale ma faapea atu i Leoleo, sa talafeagai lava maila na alu ai lana ta’avale ma maila faatulafono i luga o le alatele. 

Ina ua fesiligia le ave ta’avale i lona suafa, sa faailoa i ai e le ave ta’avale, o lona igoa o Filemoni Isaia, ao le pasese o le susuga a Vaita’i Alefosio. Ina ua fesiligia e Leoleo ia Isaia mo lana laisene ave ta’avale, na tali le ua molia, o lona laisene na leiloa i le masina na te’a nei ina ua osofaia e se tagata lana ta’avale ma gaoia ai lana ato tupe sa i ai i totonu lona laisene.

Na saili e Leoleo faamaumauga o le laisene o le ta’avale piskiapu na latou taofia ma iloa ai, o le ta’avale lea o loo lesitala i lalo o le igoa o Isaia Jr Isaia, o le uso matua lea o le ali’i ua molia, ae o le laisene ave ta’avale a Isaia (le ua molia), na mae’a le aoga i le tausaga na te’a nei, lona uiga, e le o tusa ma le tulafono lona faafoeina o se ta’avale i luga o le alatele a le malo.

Talu ai tulaga faaletonu i le laisene ave ta’avale a Isaia, na fautuaina ai loa e Leoleo o ia ina ia latou agai atu i le Ofisa o Leoleo i Tafuna mo isi suesuega. O le a taofia ai fo’i ma le ta’avale i lalo o le vaavaaiga a Leoleo, sei vagana ua sau se tagata o lona aiga o lo o lelei lona laisene ave ta’avale e aveese atu le ta’avale ona faatoa mafai lea.

A o faia talanoaga a Leoleo ma Isaia, sa iloa atu e le isi ali’i Leoleo se straw ua uma ona ta tipi tulimanu o lo o taatia i le fola o le ta’avale i le vaega o loo i ai vae o le pasese. O iina na fautuaina ai loa e Leoleo ia le pasese ia Sio, ina ia latou aga’i uma atu i le Ofisa o Leoleo i Tafuna mo isi suesuega.

A o le i auina atu le ua molia ma le pasese i le Ofisa o Leoleo i Tafuna mo isi suesuega, na muamua faia se suega faapitoa i le tino o Isaia ma le pasese ina ia faamaonia ai, la te le o tagofia fualaau fa’asaina poo ni aupega mata’utia e ono lamatia ai le saogalemu o Leoleo faapea ai fo’i i laua.

E leai ni fualaau faasaina poo ni aupega mata’utia na maua i le susuga a Sio, ae ina ua saili e Leoleo le tino o Isaia, na maua ai i le taga o lona ofuvae sa faia se paipa tioata e fa’aaoga e ula ai le pauta faasaina o le aisa, o lo o i ai fo’i vaega o le pauta faasaina o le aisa. Na saili e Leoleo totonu o le pulou a Isaia ma maua i ai se pepa iila o lo o i ai lau mamago lanu meamata.

Na faasolo le sailiga a Leoleo i totonu o le ta’avale ma maua ai le straw ua tipi tulimanu e tasi o lo o i ai vaega o le pauta faasaina o le aisa i lalo o le nofoa o le ave ta’avale. Ae o totonu o le vaega e tu’u ai lefulefu o sikaleti pe a ula, sa maua ai e Leoleo se afa sikaleti mariuana ua uma ona ula le isi afa ae totoe ai le isi afa.

Na molimauina uma lava e Isaia gaioiga a Leoleo i le taimi na saili ai o ia ma le pasese, faapea ai ma le taimi na saili ai totonu o le ta’avale.  O le mae’a ai ona faatino o le siaki faapitoa a Leoleo, na logoina ai loa le Vaega o Leoleo Suesue e iloiloina mataupu tau fualaau faasaina mo le fa’aauauina o le suesueina o lenei mataupu.

E eseese potu na ave i ai Isaia ma Alefosio mo le faatalatalanoaina e tusa ai o fualaau faasaina sa maua i totonu o le ta’avale.

Ina ua fesiligia e Leoleo ia Isaia e tusa ai o fualaau faasaina sa maua ia te ia faapea ai totonu o le ta’avale, na taua ai e le ua molia e fa’apea, o fualaau faasaina sa maua ia te ia faapea ai totonu o le ta’avale, o mea na ia faatau mai i lana uo o Spunky e sau mai Tafuna.

Na taua e Isaia i Leoleo e faapea, o ia sa fai lana galuega i le tau faaumaina o lana umukuka ae na faateia o ia i le vili atu o lona uncle o Sio e alu atu i lana pikiapu la te ti’eti’e ai i luga o le aega i Tafuna e faatau mai ai se la aisa e ula. Na oso i le ta’avale ma alu loa ua piki mai Sio mai lona fale i Vailoa ma la ti’eti’e ai loa i Tafuna e piki mai ana fualaau faasaina mai le fale o lana uo.

Na la ti’eti’e aga’i i Tafuna ma faatau mai ai pepa iila e 2 o le aisa faapea ai ma le straw e tasi ua uma ona tipi tulimanu. Na taua e Isaia i Leoleo, na tago ula faa afa le sikaleti mariuana, ona ia tu’u lea o le isi afa i totonu o le vaega e tuu i ai lefulefu sikaleti o le ta’avale. 

Ina ua fesiligia e Leoleo ia Sio e tusa ai o fualaau fa’asaina sa maua i totonu o le ta’avale atoa ai ma le tino o Isaia, na teena ai e Sio le i ai o sona sootaga ma nei fualaau fa’asaina. Na taua e Sio e fa’apea, o ia sa nofonofo i luma o le faleoloa i Vailoa ae te’i ina ua afe atu le ta’avale a Isaia ma piki o ia ma fai mai la te ti’eti’e e faasavili i le afiafi ona toe momoli ai lea o ia.

A o faia le la tietiega, sa tutu e Isaia le sikeleti mariuana ma tu’u atu ia te ia, peita’i sa ia fai i ai, o ia e le tagofia fualaau fa’asaina. Na faailoa atu fo’i e Isaia ia te ia, o lo o maua le aisa pe afai e fia ula i se aisa, peita’i sa ia faapea atu fo’i i ai, na te le tagofia fo’i le pauta o le aisa.

O le mae’a ai ona fesiligia e Leoleo o i laua e to’alua, na toe tatala ai loa i tua Sio e aunoa ma ni moliaga e faila faasaga ia te ia, sei vagana ai Isaia na taofia loa i le Toese i Tafuna e faatali ai le taimi e tula’i ai i luma o le Fa’amasinoga.

O le masina na te’a nei na tula’i ai Isaia i luma o le Faamasinoga Faaitumalo. Ua molia o ia e le malo i le moliaga mamafa o le umia faasolitulafono o le pauta faasaina o le aisa, faapea ai ma le moliaga mamafa o lona umia faasoltulafono o le laau faasaina o le mariuana.

E $5,000 lea ua fa’atulaga e tatala ai i tua Isaia pe afai ae mafai ona ia totogi le vaega tupe ua tuuina atu e le Fa’amasinoga. Afai ae tatala i tua Isaia, ua poloaina o ia e aua nei toe taumafai e faafesootai Sio lea na la to’alua i totonu o lana ta’avale, pe taumafai fo’i e toe faafesoota’i lana uo mai Tafuna lea o loo tu’uaia na ia faatau mai ai fualaau fa’asaina.