TALA I VAIFANUA

Tusia: Leua Aiono Frost

FITAITUGA TALOSAGAINA O AVANOA E MALAGA MAI AI I AMERIKA SAMOA

Pe afai e te le’i taumafai lava e talosagaina se avanoa o se tasi o lou aiga e fia malaga mai pe alu atu foi i fafo. ia e fai lava fo’i si tele o mea e tapena.

Ua mautinoa e ao ina muamua lava e fa’atumuina le talosaga i luga o le Uepesite a le DOH lea e i ai tuatusi http:///americansamoapublichealth.com lea tuu i ai le suafa o le tagata o fia fo’i mai i lona malo, poo i latou uma fo’i o fia ulufale mai e pu’e latou ID ona au talia i le fono a le Immigraion.

Afai ua uma ona fa’aulu lea talosaga, afai e to’atolu le aumalaga o le a fa’atumu uma lava pepa a sui ta’itasi e malaga mai.

Ona faliu ane lea e fa’aumu le talosaga lesitala i le vaega a le Ofisa o le loia sili a le tatou malo i luga lava o upega tafailagi, e te le tau va’aia lava se tasi mo lau talosaga O le upega tafailagi lea a le DLA - Department of Legal Affairs - e fa’aulu atu ai le kopi o le tusi folau ma isi uma pepa kilia o ma’i ua e pu’eina e fa’aaoga ai le mea pu’eata o lau telefoni. O le tuatusi lea https://www.legalaffairs.as.gov/repatriation-document-upload

A uma loa ona e fa’atali lea poo le a le taimi o le a maua atu ai sau tali. Peita’i e ui ina ua e le toe va’aia nisi o faigaluega mo lau talosaga, ae ua e silafia e tatau ona vala’au atu se tasi.

O mea o fa’atumu, o fa’amaumauga lea o le tagata o lo’o fia malaga mai. Leai ma se sootaga ma le tagata o lo’o fa’atumuina le talosaga poo lona aiga iinei. O le vala la lena e atili ai ona le manofo le vaega o aiga o lo’o iinei. O le telefoni e feso’ota’i mai ai le sui o le telefoni a le tagata i Samoa po’o le sui o fia ulufale mai. Ailoga la e vala’au le sui lea e fa’agaoioia pepa. 

O le mea la e fiu ai o le feoai solo e saili se tali fiafia pe leai. O sui nei ua maua ane, e tatau ona talanoa i ai pe oo lau talosaga i lena itu, [email protected] o le ofisa o le Kovana, poo [email protected] e fa’atoa maua ai le igoa lau tagata o talosaga i luga o le lisi mo e ua sauni e malaga mai Samoa poo Hawaii.

O le alu ese atu i Hawaii e talosaga amata mai le Medicaid Office i Tafuna, ae ua fa’atulaga fo’i le latou upega tafailagi mo lea fa’amoemoe.

FA’ALEAOGAINA FA’ATONUGA FA’AAOGA NA’O LE ASTCA I TAUTUA TAU FESO’OTA’IGA

O  fa’asalalauga fa’alaua’itele a le afioga Kovana Lemanu P. Mauga e suia ma fa’aleaogaina ai le fa’atonuga tuusa’o a le afioga Kovana Lolo Moliga e tusa o le fa’a’aoga na’o le ASTCA i feso’ota’iga tai Initeneti ma telefoni a matagaluega uma ole malo, peita’i ua fa’ailoa mai e Kovana Lemanu, “O le a tuu le faitalia i le fa’auluuluga o mataglauega ta’itasi, poo le a le kamupani poo le matagaluega o feso’ota’iga e manana’o i ai i latou e fa’aaoga, pau o le mea  ia mau fa’atuatuaina ma ia tutusa lelei le malosi ma le agava’a o lena tautua e fa’aaogaina ai ma e le suia ai fo’i tulafono tau fefa’atauaiga ma tauofoga a le malo.”

O le poloaiga fa’alauaitele lea sa fa’ato’a fa’asalalauina mai lea ia Mati 29, 2021. O le poloaiga fa’amalosi a Kovana Lolo Moliga sa fa’asalalauina lea ia Aukuso 15, 2017 ma sa ia fa’atonuina ai vaega uma o le malo ua na o le ASTCA e mafai ona fa’aaogaina i tautua tau feso’otaiga, ae le fa’aaogaina se isi kamupani i le teritori e faia lea tautua. 

O le falema’i lava latou, e le suia lava le latou kamupani e tautua ai i latou, o le Bluesky Communications. 

FA’ATELEINA VAEGA TUPE MO LE AUFAIFAIVA O LE ATUNUU

E le o toe mamao foi at to’ai taunuu mai nisi o fa’amanuiaga ua maea fa’atulaga mai e le feterale mo le vasega o le aufai faiva.

Ua fa’alauiloa mai e le NOAA Fisheris le latou fa’aagaaga maia o le $255 miliona e fesoasoani ai i le aufai faiva ma o se fesoasoani ua fa’amatu’u mai e le 2021 Consolidated Appropriations Act.

O le fa’atupega lea ua fa’atulaga mai mo le aufaifaiva uma i setete ma teritori o Amerika e fagotaina le gataifale o le Iunaite Setete atoa. O le tinoitupe lea o le a fa’aaogaina e totogia ai aiaiga uma lava o lo’o aofia i le lalo o le Section 12005 o le Coronvirus Aid, Relief & Economic Security Act [CARES Act].

O le isi mea e sosoo nei o le taua’aoina atu loa o le tupee le NOAA ina ia toe fa’alelei mea na fa’aleagaina pe o mea ua le mafai ona toe fa’agaoioia ona o le fa’asa o le Covid-19, ma o le a fesoasoani fo’i i ni fa’aletonu uma na feagai ai ma aiga ona o le taofiga ona toe fagogota o le atunu’u pe feoa’i e faia latou faigafaiva e pei ona sa masani ai.

O le fa’atupega ua mafai ona talosagaina e nisi o i latou e fagota mo le fa’amoemoe e fa’atau atu i maketi eseese, e mafai ona totogia ai malaga fa’apitoa e aumaia ai ni tagata faigaluega, o lo’o aofia ai ma nisi o lo’o fa’atautaia fa’ato’aga o I’a i le vai e i ai tilapia, kamupani e tuuapaina le i’a ma isi fo’i tautua eseese e feso’ota’i ma Kamupani I’a.

O lo ua fa’atulaga lea fesoasoani ina ia una’ia malosi i latou e galulue fa’atasi ma le latou vaega o tautua uma tau faigafaiva i le teritori ma e ao ina latou malamalama lelei foi i le fa’aaogaina o nei alagatupe.

O lo ua fa’atulaga le tele o fa’atonuga uma e mafai ona usita’ia ma mulimulitai ai i le uepesite a le Faigafaiva.

TOE SOSO’O LE PAYROLL PROTECTION PROGRAM  MO LE ISI 2 MASINA

Ua toe soso’o mai nei le taimi e fa’atautaia le polokalama fesoasoani mo totogi o tagata faigaluega sa vaea pe fa’aitiitia taimi e faigaluega ai ona o le Covid-19 e Peresetene Biden. Ua toe fa’aopoopo mai le isi lua masina ma ua ia sainia fo’i lea tulaga fa’aletulafono ina ia fa’amalosia ai.

O lona uiga ua tula’i mai nei e fa’ato’a mae’a lea ia Me 31, 2021 ma ua maua ai le isi 30 aso e mafai ai ona fa’amae’a le fa’atautaiga o pepa a le Small Business Administration, ae maise i nogatupe e le’i maea faia i ai se fa’aiuga.

O le tamaitai pule o lea itu o le tautua Cassillas Guzman o le SBA sa ia fa’ailoa maia, “Ua toe aumaia fo’i se isi fe’au taua mai ia Peresetene Biden ina ia fesoasoani atili pea i le tusa ma le 30miliona pisinisi laiti i setete ma teritori o Amerika.”

Ina ua toe tafa le finagalo o le Peresetene e toe soso’o le taimi atofa mo le PPP ma le SBA, “O lona uiga ua tula’i mai lona sapaia pea o le taumafaiga ina ia maua e nisi o pisinisi ma tagata faigaluega alamanuia ua mae’a fa’atulaga mai le amataga mo i latou. O e fo’i sa tuai ua toe maua le avanoa e fa’amae’a ai nei mea uma ma talosaga mai. O lo’o i ai lona agaga i faleoloa laiti ma taumafaiga fa’ato’a fa’atula’ia ina ia mafai ona maua le una’iga e fa’aauau ai latou pisinisi, se’ia oo ina tetele ma ua tautuaina pea lava tatou lotoifale.”

O lo ua galulue punoua’i le Asosi a le Aufaipisinisi i le tatou nei teritori e fesoasoani malosi i Kamupani Laiti ina ia mafai ona fa’atutumu pepa talosaga ma fa’auia a’o le’i mae’a le isi lua masina o totoe nei o lea alamanuia.”

Ua fa’ailoa mai e tusa ma le 5,400 i latou na maua fa’atupega mai le PPP.

Ua fa’ailoa mai o lo’o maua le avanoa e fa’amalamalama lelei ai oe e le SBS ma latou pa’aga le fa’atumuga o le talosaga ma mea fo’i o oo mana’o mai ai le SBA ina ia fa’ao’o atu mo le latou filifiliga i lau mataupu na talosagaina.