TALA I VAIFANUA

Pago Pago, AMERIKA SAMOA

FA’AMALOSIA E KOVANA LEMANU IA MATUA ATINA’E MANU’A

I le faigamalaga lea na alu nei a le faigamalo i le Manu’atele, sa mafai lava ona fa’ataunuuina ai le fonotaga a le Kapeneta lea sa fuafua e faia i Manu’a. Sa fa’atautaia lava a’o i ai i latou Ofu ma sa fa’ailoa mai e tusa ma le to’a 100 i latou o sui o matagaluega ta’itasi sa auai mo lea fonotaga.

“O le tatou fa’amoemoe maualuga, ia atina’e Manu’a ma ia fa’atumauina pea lona matagofie le ‘avea, ina ia fiafia le to’atele e o mai i ai e tafafao e pei ona fiafia i tatou e aga’i i Samoa lena fa’amoemoe,” o se tala lea a Kovana Lemanu Peleti Mauga. 

O le fa’atasiga lea sa faia i le aso Faraile ma ua augani atu o ia, “A’o tatou i ai i le Manu’atele, ia fa’aaoga tatau o tatou taimi e mita’i ma va’ai patino ai se aoga o lau matagaluega e fa’aleleia ai le tautuaina o le Manu’atele, e tofu sao i tatou ina ia fa’aleleia mea e le’i lelei ai le tautua a lau matagaluega, ina ia fiafia mai tagata e gasolo mai e tafafao ma fai malologa ma toe fo’i atu i Tutuila,” o le augani atu lea a Kovana i lana Kapeneta. “E ao ina o gatusa tautua a tatou Matagaluega ta’itasi o lo’o fa’auia i tagata uma i Tutuila ma le tautuaina fo’i o tatou tagata o lo’o alaala ma atina’e le Manu’atele.”

“O le naunauta’iga lea e i ai le tatou faigamalo. ia naunau le to’atele e aga’i mai e tafafao ma asiasi mai i le Manu’atele, o se nofoaga saogalemu toe lafulemu e aoga mo le tagata e fa’afouina ai lona mafaufau, ia malolo lelei e leai se mea e tiga ai, ma pisivale ai, ae toe fo’i atu i le galuega ua fa’afouina mea uma.”

“E pei lava ona fiafia i tatou e malaga tafafao i Samoa, ia fa’apena le Manu’atele ia i tatou i Tutuila. Tatou galulue fa’atasi la i lena matati’a ia ausia, ae aua nei fa’aleagaina ai le to’afilemu, le mama ma le matagofie le avea o le Manu’atele lava latou.”

O le Manu’atele o le vaega lea o le Atu Samoa o lo’o mausali i ai le tele o ona tala tuu ma tala o le vavau.

O le malaga lona lua lea a le Sui Kovana, aua sa malaga muamua e tusa o le lua vaiaso na muamua atu, e va’ai patino ma matau mea uma ua fa’atino ma fa’atulaga mo galuega a matagaluega ta’itasi ua fa’atautaia i le Manu’atele, a’o le’i oo atu lenei malaga sa fa’ataunuu i le vaiaso ua te’a.

SIITIA LE PENEFITI MAUA O LE FOOD STAMP MO I LATOU E AGAVA’A

O se tala fiafia fo’i ua fa’alogoina e le mamalu o i latou ua agava’a i pepa mea’ai a le Food Stamp, lea ua fa’ailoa ai, ua toe si’itia le penefiti mo le masina o Mati ma Aperila, e fa’aauau fo’i le si’itaga i le masina o Me e oo atu ia Setema, le mae’a ai o lenei tausaga fa’aletupe a le malo tele.

Ua mafua ona fa’ailoa atu le masina o Mati ma Aperila, ona e eseese le si’itaga lea ma le si’itaga e mulimuli mai ia Me se’ia oo ai ia Setema 2021.

O lenei fa’alauiloaga, o se si’itaga laititi ua fa’atulaga mai mo le fa’ama’i Covid-19, ma e le tumau lea fo’i penefiti.

O le aotelega o le tupega e $2.4 miliona o se vaega tupe na toina mai e fesoasoani ia i latou uma o lo’o ua a’afia ona o le Covid-19 ma ua fa’atulaga mo Amerika Samoa, CNMI ma Puerto Rico i le Consolidated Appripriations Act 2021.

O le si’itaga fou lea ua toina mai ua fa’ailoa ua siitia ai penefiti o maua i le 34.5% ma ua fa’atulaga ai le aofai o le penefiti maua atoa e le sui e le o maua sona tamaoaiga tausi mai le $139 i le $187 i le masina.

Ua fa’ailoa mai e le faatonu o le DHSS lea e fa’asoa maia le Food Stamp, Muavaefa’atasi John Suisala, “ O lenei fesoasoani ua fa’auia mai e ala i le siitaga o le penefiti Food Stamp mo le mamalu o i latou o agava’a ai, ua le gata ina fesoasoani atili i lea vaega o le atunuu, ae ua masa’a mai ai fo’i le tamaoaiga fa’aopoopo e tusa ma le $2.4 miliona i le atunuu, o se vaega o le tamaoaiga fou lava ua maua mai.”

Ua fa’auia atu fo’i lana fa’afetai tele i le vaega a le USDA FNS, le ali’i fa’atonu o lo’o va’ava’aia lea itu o le tautua tatou e i ai, Charles Tobin ma le pule o le Polokalama Barbara Utuchian ma le latou aufaigaluega ona o le vave fo’i ona mae’a fa’aoo maia o lea fesoasoani mo i latou e agava’a ai o tatou teritori.

O le fa’aoo atu lava lea fesoasoani Food Stamp e lea vaega o le Tautua Lautele a le tatou atunuu, ma o se faiga lea ua sili ona agatonu mo lea tautua, ma o se vaega o tautua eseese olo’o fa’atautaia mai e le matagaluega o Alagamanuia eseese mo le Mamalu Lautele o le tatou atunuu.

O penefiti nei ua fa’asolo atu e aofia ai le ASNAP, COVID NAP ma le COVID SNAP e amatalia nei ia Aprerila 01, 2021; ma e fa’asolo lava i le fa’asologa o le alafapeti e pei ona masani mai ai:

• O i latou e masani ona maua le $56.00 o le Food Stamp ua siitia i le 131.00 o Food Stamp.

• O i latou sa maua $71.00 ua siitia i le $116.00

• O i latou sa maua le $89.00 ua maua le 165.

• O le sui sa mauaina le $139.00 ua maua le 237.00

• O le sui ua maua le $111.00 e maua le 159.00

O le a maua faatasi le penefiti o le masina o Mati ma Aperila. O le sui sa masani ona maua le $56 i masina ta’itasi ae o le a maua le $131 mo Mati ma le $131 mo Aperila, ma ese mai lea o le a maua e amata ia Me le aofai e $187 i le masina e tasi se’ia oo ia Setema 2021.

O le sui e masani ona maua le $71 i masina ta’itasi o le a maua le $116 mo Mati ma le $116 mo Aperila ma le $187 mo le masina o Me se’ia oo ia Aetema 2021.

O le sui sa mauaina le aofai e $89 i masina ta’itasi o le a ia maua le food stamp e $147 mo Mati ma le $147  mo Aperila ma le $187, Me e oo atu ia Setema 2021.

Ua fa’ailoa mai e to’a 111 i latou o le a maua le ta’i $76 mo Mati ma le $76 mo Aperila ma maua ai le aofai e $263 ma o le a $187 mo Me seia oo atu ia Setema 2021.

O nisi sa maua le $139 o le a fa’aopoopo atu le $48 mo Mati ma le $48 mo Aperila, maua le aofaiga e $235 ae fa’aauau fo’i ona maua le $187 mai ia Me se’ia oo ia Setema 2021.

DIVINE IULI FALANIKO - AVEA MA TAITAI OFISA LESITALA

O le tamaitai IA Divine Iuli Falaniko ua avea nei ma tatou Lesitala a le Teritori, ua suia ai Tasi le tamaitai ua lauiloa i lona fo’i tula’i mai i lea lava Ofisa aoga tele a le tatou Malo. O lona lea faiva sa fa’alauiloa mai e le susuga le Loia Sili, Fainuulelei Falefatu Alailima Utu i le aso Faraile ua te’a.

Sa ia fa’ailoa fo’i ua mae’a agava’a le tamaitai o Divne Iuli Falaniko mo lea tofiga aua ua toeititi atoa le 20 tausaga o lana tautua i le Ofisa o le Loia Sili.

O Mrs. Falaniko o lo’o i ai fo’i lona tofiga tau Paralegal ma o se fautua fesoasoani i loia mo tulafono uma e aiaiga ma fa’atulaga palola mo pagota fa’atasi ai ma isi tiute eseese tau lesitala i le atunuu.

O Mrs. Falaniko, o se tasi o tamaitai sa fa’au’u mai i Fa’asao High School i le tausaga e 1985, o lo’o ua mae’a umia le Masters Degree i mataupu tau Public Administration ma Human Resources. Ua atoa fo’i le tausaga atoa e tasi o lo’o ia galue fa’amasani ina ia maua’a tomai i mataupu tau Lesitala i lea lava Ofisa o le atunuu.

O ia lava o se tamaitai na soifua a’e ma aoaoina lelei a’o mautu pea lona aiga i Leone, ma ose alo e fa’asino ia Isa-Lei ma Iuli Joseph Iuli o Leone. Ua fa’aipoipo atu o ia ia Juliano Falaniko ma ua to’aono fo’i o la’ua alo.

“O le tamaitai o Divine o se tasi e tautua tele i lona aiga, e taua ia te ia lana aganuu ma e soifua mata’u ma fiafia e tautua i lana Ekalesia Katoliko Roma i Leone lava.O se tofiga lenei e fa’amautu atili le soifua mata’u ma le faimeatonu o se tasi e tula’i ai, ma e taua ia te ia le tonu lelei o fa’amaumauga uma e patino i mea totino, fanua ma suafa o le atunuu atoa. O lo’u tofia ai o Divine Iuli Falaniko e tautua i lenei tofi, ua alagatatau ma lea sui ma ona uiga tausa’afia ae maise ona agava’a.”