TALA I VAIFANUA

Pago Pago, AMERIKA SAMOA

TOATELE AIGA MA UO MAMAE – AUAI I TOE SAUNIGA O POPEYE HERMAN J.E. THOMSEN

O le afiafi o le aso Toonai na faatasia ai le mamalu o aiga i ona itu tetele ma ona itu taulagi, fa’apea fo’i pelega a le tama Suetusi ma Faipisinisi o Popeye Herman J.E. Herman o Fagatogo, Iliili, ma Apia, Samoa, i lona toe sauniga na fa’atautaia i le Gov. Rex Lee Auditorium i Utulei.

I lona toe sauniga sa fa’afofogaina ai molimau felanulanua’i e tusa o le soifuaga o le ali’i faipisinisi agaalofa ma le lima mafola i ana uo mamae, lona aiga na lua, ae maise lana fanau ma nisi fo’I e sulufa’i atu e mana’omia lana fesoasoani.

O nisi fo’i o uo mamae a le tama ua atoa le 82 ma le 7 aso o lona soifua, sa iloga ai, o ia o se tasi o faipisinisi iloga o le atunuu, ae sa le soifua ai o se tasi e foliga mai fa’apena i lona soifuaga atoa.

O se va’aiga lautele ia te ia i taimi uma, e la’ei lona ofuvae vaepupu’u ma le mitiafu fai kola, e le o se va’aiga a nisi e taualoa galuega e tutula’i ai i lenei atunuu, peita’i o le fa’aatagia lea o lona soifua e manatu lava ia ina ia fa’asamasamanoa le taga’i a le atunuu ia te ia. Peita’i, ua tula’i mai o le isi lea faipisinisi sili ona umi ona fa’atautaia lana pisinisi I le atunuu. O ia o se pisinisi e tautuaina va’a I’a e taula mai ma fefa’ataua’i a latou I’a ma oloa o sapalai e tausia ai le a’u fagogota i le vasa. E tele le sao o lana pisinisi I le la’uina atu o le I’a mai Va’a I’a i le uafu a le Kamupani I’a i Satala ina ia amata fa’amama e tu’uapaina ai.

O ia fo’i e toe sapalaia nei fa’agota i a latou sapalai manaomia mo le toe tu’uva’a ese atu e toe fagogota ma toe fo’i mai. O lana lea tautua e aiaia fa’afeterale ma toe i ai fo’i tulafono fa’alotoifale i le tatou nei malo e usita’ia ai, ae le to’atele lava nisi e fa’atautaia lona ofisa. O le malosi lea o lona iloa, o le tele fo’i o lona tamaoaiga, sa malu ai nisi e to’atele i a latou galuega e tausia ai nai o latou aiga.

Ua iloga le to’atele o ana uo ae maise ai i lana Asosi Tenisi lea e avea lava o ia ma Peresetene mai le amataga se’ia oo nei ina ua tuua le mafutaga. O iea le ua fa’ailoa e nisi o ana uo, “E pei o se uso ae o le uo mamae. E leai se mea e afua ai ona ita fua i ai, e fiafia tele so’o se tasi o matou e auai Popeye i a matou fa’atasiga, e atua lava lona iloa talimalo lelei. E le fa’ava’ava’ai i tulaga o tapenaga o mea lelei ina ia lava ma totoe tapenaga o so’o se fa’atasiga, e faia uma lava e ia.”

Na faaipoipo atu ia Betty Spenceri le tausaga 1963, lea sa fa’amanuiaina ai o ia i lona afafine o Tanya Teuila Luanne. Ae o lona lua o tamaitai na faaipoipo atu iai o ia, o Tulipe Fanene ma e to’alua nai o la alo tamaitai.

I le 40 tausaga o le soifua o le ali’i suetusi, ua amata ai ona ia fa’ase’e lana pisinisi e amata tautua i ala tau fefaataua’iga o Oloa ma va’a fagota o lo’o tautuaina Kamupani I’a i le atunuu. O le igoa o lana Kamupani o le Blue Angel ma sa fa’afoea mai i gauta teisi lava o le Kamupani o le Faleoloa o Liki Reed i Fagatogo.

I molimau na fa’afofogaina, e fai uo lelei tele lenei ali’i. E tausi ma osi aiga tele lona olaga I ona aiga uma i Samoa, Niu Sila ma iinei. E le fa’atuaoia lona alofa.

O ana aoaoga sa amata i Samoa i le aoga a le Ekalesia Katoliko i Leulumoega a’o faigaluega lona Tama e vaaiga nisi o Esetete tausi a le Malo o Niu Sila. Peita’i na soifua a’e o ia a’o alaala i Motootua nai ona matua o Edward Thomsen ma Amelia Lomialagi Bentley Ia Mati 7, 1939.

Na siitia mai ana aoga i Leiififi ao faigaluega ona matua i le fa’ato’aga tele ma e tausia ai lafu povi ma Solofanua i Fiaga, Aleisa.

Peitai o se latou malaga i Niu Sila ma ona matua, sa oo ai le fa’aiuga a Popeye e fia ulufale i le aoga a St Kevin’s ma sa nofo ai loa o ia e a’oga i lena aoga. O iina sa fa’aatoatoa mai ai lona iloa ta’alo i le Lakapi ma le Faipele poo fusuaga.

Na avea o ia o se totino o le XV a lana aoga mo le 4 tausaga sosoo, ma na piki fo’i e avea ma tama ta’alo a le X1 i tausaga e tolu o lona olaga a’oga ai i St Kevin’s. 

Peita’i i le ta’aloga o Faipelega ae sa ia mauaina le ipu o le Middle Weight i le tausaga 1954 i Niu Sila lava, ma ua le toe tauva ai loa lana a’oga lea i Faipelega talu ma lea tausaga 1954. Na taliu fa’atasi mai i la’ua ma lona tausoga o Eddie Thomsen i Samoa ma o mai loa galulue i le kamupani a Uncle Fritz Thomsen i Samoa, peita’I o le taimi lea ua I Amerika Samoa lona tama ua aumaia e le Kamupani a Kneubuhl I Fagatogo nei.O la’ua tiute fai I le Kamupani a Uncle fritz, e aofia ai le Sue Tusi ma le Tausi Tusi, ma ua na’I le 6 masina lea auaunaga i Samoa ae masi’I mai loa e nofo ma galue i lona tama i Pago Pago.

O le tausaga 1961 na amata ai lona lana auaunaga ma avea ma Amerika Samoa ma se atunuu e fa’amautu ai, e oo mai lava i lona taimi mulimuli.

E pei ona ta’ua e Taulapapa William Sword, “Afai e mafaia e Popeye ona fa’atautaia lana pisinisi fefa’ataua’i ma va’a I’a e tausia le tatou kamupani I’a tele i le motu, ma ua silia lea auaunaga ma le 40 o tausaga, o se tasi ua matua maua’a lava lona silafia I le pisinisi o lo’o ia fa’atautaia, ma o se tasi o pisinisi ua loa ona tumau ma tautua le atunuu. Malo Popeye, o oe lava o le Toa manumanu!”

Sa matua matagofie mea uma na gafa ma le fanau ma pelega a Popeye mo lona toe sauniga e ala I le sauniga mamalu lava ia ma le vasega o Molimau sa fa’atulaga mo lea sauniga mo Herman Popeye Thomsen. O le aiga foi sa laulauina, ua iloga ai lava le tausimatua o le fanau ma aiga, fa’afetai pelega o aiga ma uo mamae. Ia manuia lau malaga Popeye.

MANA’OMIA LE SAPAIA FONO FAITULAFONO - TAUTUA MO LATOU SOIFUA & MANAOGA FA’APITOA

Ina ua mae’a ai le fonotaga mo le tolu aso o tautua uma ua fa’atulaga e tautuaina le mamalu o i latou ua soifua ma mana’oga fa’apitoa o le tino poo le mafaufau i le aso Tofi ua te’a, ona latou masi’i fa’atasi lea e feutaga’i le fono faitulafono ina ia latou amana’ia le latou mau, “Ina ia fausia ai se atunuu e aofaga fa’atasi ma laugatasia i fesoasoani ma alamanuia uma o lo’o tausia tutusa ai o i latou uma. Ia le manatu nisi o i latou o lo’o soifua ma mana’oga fa’apitoa, ua fa’aese le tausiga fa’apitoa o i latou. A ia latou lagona ma soifua fa’atasi ma isi uma o lo’o atoatoa le latou malosi i le tino poo le mafaufau, e aunoa ma ni lagona o i latou e fa’aese le tatou tausiga ma le agava’ai latou i si mea uma e fa’atutu, fausia ma fa’atulaga e manuia ai le soifuaga o le to’atele i le tatou atunuu.”

O le una’iga malosi lenei ua tutufa’atasi ai matagaluega fa’atulaga e tautuaina i latou o lo’o ua soifua ma manaoga fa’apitoa ona o afaina tumau o le tino poo le mafaufau i le atunuu, le OPAD- Office of Protection & Advocacy on Disabilities, le DDPC -Developmental Disabilities Planning Council ma le UCEDD - University Center for Excellence in Developmental Disabilities.

O i latou na saunoa fa’apitoa ina ia mautu i lea mataupu e feso’ota’i ai ma le fono faitulafono, o le susuga le Sui Faatonu o le OPAD Tapumanaia Satele, Fa’atonu o le UCEDD Tafa Tua -Tupuola sa saunoa ai.

O le mataupu sili ona fa’aleoina o le tulaga ua silia ma le 30 tausaga ona fa’atautaia polokalama uma nei mai le Malo tele mo i latou nei o le atunuu, ae ua matauina lava, o lo’o fausia ma fa’atula’ia le tele o nofoaga tetele i le atunuu, ae le o usita’ia nisi o tulafono a le Malo tele, e pale feagai ma le auaunaga mo i latou ua le mafai ona savavali ona o a’afiaga tumau o le tino ma ua faaaogaina nofoa fa’ata’avalevale.

O lo ua fa’ailoa atu e i la’ua le maga o lea tulafono a le Feterale Section 504 o le Rehabilitation Act, ma ua manino ai le fa’asaina ona toe fausia se fale po’o nisi lava ituaiga o nofoaga ae le mafai ona faia aiaiga uma tau le gafatia ona tautuaina ai o i latou ua gatusa lelei lava fo’i ma avanoa o tuuina i le lautele o le atunuu o lo’o fa’aaogaina.

Ua aofia ai fo’i i lenei fa’atulagaga o so’o se nofoaga e fausia mo pisinisi tumaoti.

Ua fa’ailoa manino e nei sui fetalai o fa’afaletolu lea le tulaga, “Afai e le mafai ona ulufale ma le toto’a e i latou nei nofoaga o pisinisi e tautuaina ai i latou, o lo’o te’ena lava le auaunaga tutusa mo i latou.”

Ua fa’amautu mai nei e Senatoa Logovii ma Rep Avagafono Maiava o le a la’ua taumafai e fa’atulaga se pili tau fa’aulu mo lea auaunaga.

TALOSIA PEA EPIKOPO BROWN LE PASIGA O LE TALOSAGA ALE HOPE HOUSE ELE MEDICAID

O lo ua fa’ailoa mai e le taitai o le Ekalesia Katoliko Roma, Epikopo Peter Brown, lona agaga fiafia ona o lea ua mua’i pasia le Hope House e fa’aaoga latou togafitiga ma le tausiga fa’apitoa o i latou o tausia ai, e fa’aaoga ai latou agava’a i le Medicaid.

“O se talosaga ua tali leleia le mafai e le Medicaid ona talia le Hope House e fa’aaoga ai agava’a o i latou o tausia fa’apitoa ai. O se taumafiga ua alu le tolu tausaga o taumafai ona fa’aleleia le auaunaga ae maise o le nofoaga ina ia mafai ona pasia le matou tusi pasi lea o le CMS.”

Ua fa’ailoa mai ua fa’alautele le auaunaga a le Hope House ma ua aofia ai nisi o tautua fa’apitoa mo i latou ua ogaoga manu’aga ma ua tausia fa’apitoa, aua tino matutua foi i latou. 

Ua fa’ailoa mai fo’i e Epikopo Brown, “Ua maua tonu mai lenei alamanuia mo le Hope House i le taimi tonu lava ua fa’afaigata atili le galuega tautuaina o tagata gasegase fa’apitoa, ona ua motusia fo’i le alagatupe na toina mai le ANA, lea sa fesoasoani tele i le fa’atupega o le tautua, ma le fa’aaupegaina ai le aufaigaluega tausi gasegase i le latou auaunaga, e fa’atino mo i latou o nofoia le Nofoaga o Fa’amoemoega i Fatuoaiga. Na motusia lea fa’atupega mai le ANA ia tesema 2020.”

“Ona o lenei fa’amanuiaga ua ausia nei, e fa’afetaia ai le agalelei ma le taumafaiga a Kovana Lolo Moliga ma le faletua fa’apea fo’i ma Kovana Lemanu Mauga i lona tula’i mai i lenei faigamalo fou, aua ua agaga fa’atasi i la’ua mo le la’asaga fou lea ua fa’atino ai le auaunaga mo tatou tagata matutua o i latou o tausia fa’apitoa i le Hope House.”

Ua faapea foi ona ia fa’afetaia le fono faitulafono ma le fa’atonu o le Medicaid Office i Amerika Samoa Sandra King Young ona o le latou pasiaina m lagolagosua i le talosaga na fa’aulu ma latou galulue fa’atasi ai ia pasia i matou.

E le fa’agaloina fo’i le sapaia e le mamalu lautele o le atunuu, i ona atgata lautele se’ia oo i Kamupani ma Fa’alapotopotoga Tumaoti ona e fa’auia mai lava fesoasoani i ala eseese mo le Hope House i so’o se taimi i tausaga ta’itasi, fa’afetai le agalelei fa’afetai le alofa tula’i, ia fa’amanuia lava le Atua.”

O le Hope House ua pau lea o se nofoaga o lea ituaiga o lo ua fa’atautaia tumaoti mai le malo, e tausia fa’apitoa ai Matua ua tino matutua ua faigata ona tausia lelei pe afai ua ausage aiga, fa’apea fo’i ona tausia fa’apitoa ai i latou ua soifua pea ma manu’aga tumau o le tino poo le mafaufau, o nisi sa soifua mai lava ma i latou, ae o nisi ua mafua mai i ni manu’aga ogaoga, ao nisi e mafua ona o gasegase fita ua po’ia ai le soifua laulelei.