Loka i le Falepuipui i lona faia o uiga mataga i se tama’ita’i 16 tausaga

Pago PAgo, AMERIKA SAMOA

O le a’afia ai o fanau laiti i uiga ma amioga mataga, ua maitauina ai le fa’atupulaia o lenei ituaiga solitulafono i totonu o le atunu’u i le taimi nei.

O le 2 vaiaso ua tuana’i atu na tula’i mai ai se mataupu faasaga i se ali’i e 65 tausaga le matua lea ua fa’asala i le Toese i Tafuna ona o uiga mataga sa ia faia i se tama’ita’i e 15 tausaga le matua, a o lea fo’i ua molia mai se ali’i e 48 tausaga le matua i lona faia o uiga mataga i se tama’ita’i e 16 tausaga le matua e aiga i ai.

O le alii e 48 tausaga le matua, e pei ona ta’ua I le tagi a le malo, o le ‘Uncle’ a le tamaitai o lo’o a’afia I lenei mataupu.  Ina ua pu’e faapagota o ia e Leoleo i le 2 vaiaso talu ai, na maua ai se vaega o le pauta faasaina o le aisa.  Ma ua le mafai ona lomia lona suafa, ona o puipuiga i le ono mafai ona alia’e ai le suafa o le tama’ita’i o lo o a’afia i lenei mataupu.

E lua ni tagi ua molia ai lenei alii.  I le tagi muamua, ua molia i moliaga e 4, e aofia ai le moliaga mamafa e 2 o lona tagofia o itutinosa o se teneititi e laititi i lalo o le tulafono, atoa ai ma moliaga mama e 2 o le faaoolima i le tulaga tolu, ma le faia o gaioiga e ono lamatia ai le saogalemu o fanau laiti.

I le tagi loa lua, ua molia ai e le malo lenei ali’i i le moliaga o le umia faasolitulafono o vaega o le pauta faasaina o le aisa.

Na teena e le ua molia ia nei moliaga, ina ua tula’i i luma o le fa’amasinoga fa’aitumalo i le vaiaso na te’a nei. Ma na talosagaina e lana loia fautua ina ia faatulaga loa se aso e faia ai le ulua’i iloiloga o lenei mataupu.

O le aso Tofi o le vaiaso nei i le itula e 1:00 i le aoauli lea ua fa’atulaga e faia ai le ulua’i iloiloga o le mataupu i luma o le afioga i le ali’i Fa’amasino ia Elvis P. Patea, e sailia ai pe lava mau a le malo e lagolagoina ai le faia o se solitulafono.

E $35,000 le tupe lea ua fa’atulaga e totogi ona fa’atoa mafai lea ona tatala le ua molia i tua mai le toese i Tafuna. 

E ui sa finau malosi le loia a le itu tete’e i le fa’amasinoga ina ia fa’aitiitia le tupe e tatala ai le ua molia i tua, pe tatala fo’i o ia e aunoa ma se tupe e totogi, ae na lagolagoina e le fa’amasinoga le fa’afinauga a le loia mo le malo, ina ia taofia pea o ia i le toese se’i vagana ua totogi le $15,000.

Na ta’ua e le loia fautua e fa’apea, o le ulua’i taimi lenei ua molia ai lenei ali’I i se solitulafono. Sa ia finau e fa’apea, afai e tatala i tua le ua molia, e le sola ese o ia mai i le atunu’u, ae o le a la galulue fa’atasi ina ia mautinoa e auai o ia i soo se taimi e valaau ai lana mataupu. 

Na finau atili fo’i le loia a le ua molia e fa’apea, e ui i tu’uaiga fa’asaga i le ua molia, ae o le mea moni e ao ona silafia e le fa’amasinoga, e le o ia o se tagata leaga e ono lamatia ai le saogalemu o tagata lautele pe afai ae tatala o ia i tua.

Na finau malosi mai fo’i le loia a le malo ina ia fa’atumau le tupe ua mae’a ona fa’atulaga e le fa’amasinoga e tatala ai i tua le ua molia, ona o puipuiga lava mo le saogalemu o fanau teine a le atunu’u. Na ta’ua e le loia a le malo e fa’apea, e ui o le ulua’i taimi lenei ua tu’uaia ai le ua molia i se solitulafono, ae e foliga mai i le siosiomaga o le mataupu e pei ona tula’i mai, e fai lava si matuia o gaioiga sa faia e le ua molia. 

Na fa’ailoa e le loia a le malo i le fa’amasinoga e faapea, e le tatau ona tatalaina i tua le ua molia e aunoa ma se tupe e totogi, e pei ona finau mai i ai lana loia. Afai fo’i e tatala o ia i tua, e tatau ona mautinoa e le sola ese o ia mai i le atunu’u.

O tuutuuga ua tuuina atu e tatala ai le ua molia i tua, o le faasa lea ona ia taumafai e faafesootai le teineititi o lo’o a’afia I lenei mataupu, i soo se auala, auai i soo se taimi e valaau ai lana mataupu, ma ia tuuina atu lona tusi folau e taofi e le malo. Ua fautuaina fo’i o ia e aua ne’i ona taumafai e tuua le atunuu e aunoa ma se fa’atanaga a le fa’amasinoga.

TAGI A LE MALO

O lenei mataupu na tofu atu i le Ofisa o Leoleo i Tafuna i le taeao o le aso 20 o Tesema, 2020, ina ua talosagaina e se Tina se fesoasoani a Leoleo, fa’asaga i  ni uiga mataga sa taumafai le ua molia e faia i lana tama teine e 16 tausaga le matua.

Na aga’i atu Leoleo ma aumai le teineititi na a’afia ma lona Tina, mo le fa’atalatalanoaina o lenei mataupu.

Sa ta’ua e le teineititi na a’afia, i Leoleo e fa’apea, na fa’ateia o ia a’o taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o lo o fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o lo o tootuli i luma o lona ulu ma tago atu i lona tafatafa.

Na musumusu atu le ua molia i le teineititi na a’afia, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma alu ese atu ai.

Na taua foi e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa.

Na taua e le Tina i Leoleo, sa molimauina fo’i e lona atali’i (le tuagane o le tama’ita’i na a’afia) gaioiga sa faia e le ua molia. Na maua le avanoa e fesiligia ai e Leoleo le tuagane o le tama’ita’i na a’afia e uiga i lenei mataupu.

Sa ta’ua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua ia toe aga’i atu i totonu o le latou fale, na matua fa’ateia o ia ina ua ia vaaia le ua molia o lo o tootuli i luma o le moega a lona tuafafine. 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o lo o saili lana CD. 

Na ta’ua e le tuagane a le tamaitai o lo’o aafia I lenei mataupu i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu. 

O le mae’a ai ona fesiligia e Leoleo o le teineititi na a’afia ma lona tuagane, na aga’i atu ai loa e saili le ua molia, ma latou maua atu ai lana pasi o lo o tu i le maketi i Fagatogo, ma pu’e fa’apagota mai ai loa o ia.

A o le i auina atu le ua molia i le Ofisa o Leoleo, na suesue muamua e Leoleo lona tino po o i ai ni aupega po o ni fualaau faasaina. Ma na maua ai se paipa tioata o lo o i ai vaega o le pauta faasaina o le aisa. Na ta’utino le ua molia i Leoleo, o le paipa tioata na faatau mai i lana uo ave taxi.

Ina ua fesiligia e Leoleo le ua molia e uiga i lenei mataupu, sa ia ioeina ai lona faia o uiga mataga i lenei tama’ita’i e aunoa ma se fa’atagana. E le gata sa ia tagofia o ona itutinosa, ae na ia ulufale faamalosi fo’i i totonu o le fale i le leva o le po e aunoa ma se fa’atagana ona o le manatu e fa’atino ai se solitulafono.

Pau le itu na ese mai ai le fa’amatalaga a le ua molia ma le fa’amatalaga a le tama’ita’i na a’afia, ona sa taua e le ua molia i Leoleo e fa’apea, na fa’atonu e le tama’ita’i na a’afia o ia e alu atu i lona potu i le po la te talatalanoa ai.