Toe faafo’i i Samoa le ali’i ua ta’usala i le umia o fualaau faasaina

Pago Pago, AMERIKA SAMOA

O se tasi o tuutuuga o le fa’asalaga fa’anofovaavaaia mo le ali’i mai Samoa lea na maua i ai e Leoleo se vaega tele o fualaau fa’asaina o le pauta, a uma loa ona ia tuliina masina e 20 i totonu o le Toese i Tafuna, ona ia tuua loa lea o le atunu’u ma aumau ai i fafo atu o Amerika Samoa mo le umi o lana nofovaavaaia e 5 tausaga.

O le fa’asalaga ua tuuina atu e le Fa’amasinoga Maualuga i le susuga a Onofia Viliamu i le vaiaso na te’a nei, o lo o momoli fa’atasi atu ai ma se feau malosi ia i latou uma o lo o faia lenei solitulafono o le umia fa’asolitulafono o fualaau fa’asaina, e le gata e le mama i le Fa’amasinoga ituaiga solitulafono faapenei, ae le ‘alo lava fo’i le Fa’amasinoga mai le tuuina atu o le fa’asalaga e tatau ma onomea mo le solitulafono.

O le vaiaso na te’a nei na tula’i ai Viliamu i luma o le Fa’amasinoga Maualuga mo le lauina o lana fa’asalaga, i le mae’a ai lea ona ta’usala o ia i lona umia faasolitulafono o fualaau fa’asaina.

O le tama’ita’i loia sili lagolago ia Kristine Soule na fai mai sui o le malo i lenei mataupu, ae o le ali’i Loia Fautua lagolago ia Ryan Anderson na tula’i mo le ua molia.

O Viliamu Jr, 42 tausaga le matua, lea na taofia pea i le toese i Tafuna ina ua le mafai ona totogi le tupe e $10,000 sa fa’atulaga e tatala ai o ia i tua, na ulua’i tu’uaia i moliaga mamafa e 2, le moliaga o le umia fa’asolitulafono o vaega o le pauta fa’asaina o le aisa, atoa ai ma le umia fa’asolitulafono o le pauta o le aisa ma le fa’amoemoe e tule’i ma fa’atau atu i isi tagata, lea e mafai ona fa’asala ai se tasi i le toese mai le 5 e oo atu i le 10 tausaga, pe faasala fo’i i le salatupe mai le $5,000 e oo atu i le $20,000.

Ae i lalo o le maliliega na sainia e Viliamu ma le malo, lea fo’i na talia e le Fa’amasinoga Maualuga i le masina o Ianuari na te’a nei, na malie ai le ua molia e tali ioe i le moliaga ua toe teuteu e le malo, le moliaga o le umia fa’asolitulafono o vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000.

I le tali ioe ai o Viliamu Jr i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le aso 19 o Tesema 2019 i Amerika Samoa, sa ia umia faasolitulafono ai vaega o le pauta fa’asaina o le aisa.

Na ioe atili le ua molia e fa’apea, i le taeao po lava o le aso e pei ona taua, ao galue ai o se ave taxi i luga o le alatele a le malo i Tafuna, na pu’e faapagota ai o ia e Leoleo i lalo o se poloaiga mai le Fa’amasinoga. Ina ua saili e Leoleo lona tino ma lana ta’avale, sa latou maua i ai vaega o le pauta fa’asaina o le aisa.

Ina ua maua lona avanoa mai le Fa’amasinoga Maualuga, na fa’atoese ai loa Viliamu Jr e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i lona aiga e fai sona aoga i le tautuaina o lona to’alua ma lana fanau.

Na taua e Viliamu i le Fa’amasinoga e fa’apea, e le o ia o se tagata leaga e pei ona finau mai ai le itu a le malo, ae o ia o se tagata e tautua aiga ma loto alofa i soo se tasi. E ui i fualaau fa’asaina sa maua ia te ia ma lana ta’avale, e talitonu Viliamu, e le avea mea ia na auala e suia ai le vaai a tagata ia te ia ma le ituaiga tagata e i ai o ia.

Sa ia faatoese i le malo o Amerika Samoa i lona soli o le tulafono, ma ia talosagaina ai le Fa’amasinoga mo se isi avanoa mo ia se’i toe fo’i atu ai i tua e tausi lona aiga. Sa ia taua e fa’apea, o masina e 15 na taofia ai o ia i le Toese i Tafuna e fa’atalitali ai le lauina o lana fa’asalaga, ua avea lea ma lesona taua mo lona olaga.

Na fesili le Faamasinoga i le susuga a Viliamu, poo fea lona aiga lea e talosaga e fia fo’i i ai. Na tali le ua molia, o lona aiga i Samoa, lea o lo o i ai lona to’alua ma lana fanau.

Na talosaga le ali’i loia fautua na tula’i mo le ua molia ina ia fa’asalaga Viliamu i se fa’asalaga faanofovaavaaia, e aofia ai ma le tuutuuga ina ia poloaina o ia e tuua le atunu’u ae toe fo’i atu i Samoa, ona o tulaga fa’aletonu i ona pepa nofomau. Na talosaga atili le ali’i loia fautua i le Fa’amasinoga, ina ia aofia ai i le fa’asalaga fa’a falepuipui o le a tuuina atu mo Viliamu masina e 13 lea ua mae’a ona ia tuliina i le Toese i Tafuna, a o fa’atalitali ai se faaiuga o lana mataupu.

Na lagolagoina e le loia a le malo le talosaga a le itu tete’e, ina ia fa’asala le ua molia i se fa’asalaga fa’anofovaavaaia, e aofia ai ma le poloaiga na te tuua ai le atunu’u ae toe fo’i atu i lona aiga i Samoa, ona o le tulaga faaletonu i ona pepa nofomau.

Na taua e le Fa’amasinoga e fa’apea, o le mataupu fa’asaga ia Viliamu Jr, o se tasi lea o mataupu e uiga ese fo’i ona aafiaga, ona e le gata o loo aafia ai tulafono tau femalagaaiga, ae aafia ai fo’i ma tagata lautele mai fualaau fa’asaina sa tulei ma fa’atau atu e le ua molia.

I le toe faatepa ai e le Fa’amasinoga o mau faamaonia e uiga i lenei mataupu na taua ai e le Fa’amasinoga e fa’apea, o Viliamu Jr ma le ali’i o Alex Alofa, o i laua ia na pu’e faapagota e Leoleo i le taeao o le aso 19 o Tesema o le tausaga na te’a nei, i lalo o se poloaiga a le Fa’amasinoga, ina ua masalomia le auai o nei ali’i i gaioiga e tulei atu ai i tagata lautele vaega o fualaau fa’asaina o le aisa.

Ina ua saili e Leoleo le ta’avale laupasese sa fealua’i ai Viliamu, sa latou maua i ai taga pepa iila e 3 o lo o tutumu i vaega o le pauta fa’asaina o le aisa. Sa maua fo’i i le taga o le ofutino a Viliamu sa faia isi pepa iila e 4 o lo o i ai vaega o le pauta fa’asaina o le aisa.

Na taua e Viliamu i Leoleo ina ua fesiligia o ia e faapea, o fualaau fa’asaina sa maua i lana ta’avale, o meatotino ia a Alofipo. Sa ia taua atili fo’i e fa’apea, na la o ma Alofipo e kiliva fualaau fa’asaina a Alofipo i tagata ua le mafai ona o atu e piki mai a latou fa’atau, ae pu’e fa’apagota ai loa i laua e Leoleo.

E 5 tausaga na manatu le Fa’amasinoga e taofia ai Viliamu i le toese i Tafuna. Ua faamalumalu e le Fa’amasinoga le tuliina o lea fa’asalaga, ae o le a nofovaavaaia ai o ia mo le 5 tausaga i lalo o tuutuuga e ao ona usita’i i ai.

O ni isi o ia tuutuuga e aofia ai lona tuliina o masina e 20 o le Toese i Tafuna e aunoa ma le tatalaina o ia i tua. O le a aofia ai i lea fa’asalaga masina e 13 lea ua mae’a ona tuli e Viliamu i le Toese i Tafuna.

O le mae’a ai ona tuli e le ua molia o lana faasalaga faa falepuipui, ua poloaina o ia ina ia tuua le atunu’u ae aumau ai i fafo atu o Amerika Samoa mo le umi e 5 tausaga, ona o tulaga faaletonu i ona pepa nofomau. E pei ona taua e le Fa’amasinoga, ua silia i le 3 tausaga talu ona mae’a le aoga o le pepa nofomau a Viliamu.

O le mataupu a le susuga a Alofa lea o loo molia faatasi  ma Viliamu ua faamoemoe e faataunuuina i le tausaga fou lana fa’amasinoga autu. O se tasi o tuutuuga o le maliliega a Viliamu ma le malo, o lona malie lea e molimau mo le mataupu i le faamasinoga autu a Alofa.

I le tausaga e 2017 na ta’usala ai e le Faamasinoga Faaitumalo ia Viliamu i le moliaga o le faaoolima i le tulaga tolu faapea ai ma le tu fua i le fanua o le isi aiga, o vaega A o solitulafono mama, ma faasala ai loa o ia e nofovaavaaia mole 24 masaina.

Na ta’utino Viliamu i le fa’amasinoga e faapea, i le aso na pu’e faapagota ai o ia e Leoleo, na alu ai i le fale o lona tuaoi ma faaoolima ia te ia, e mafua mai i se vevesi na tula’i mai i le fanua o lo o nonofo ai Viliamu ma lona aiga.