TALA I VAIFANUA

Pago Pago, AMERIKA SAMOA

TULAGA O LE SOLO TETE’E A FAIA’OGA O LE SOUTH PACIFIC ACADEMY

Sa le’I taunu’u le fonotaga na fuafua e faia i le afiafi o le aso Tofi, a le Faalapotopotoga a Matua ma Faiaoga (PTO) a le aoga a le South Pacific Academy (SPA) peita’i na fa’aalia e nisi o matua ma faia’oga o lo’o tete’e, sa latou matua mana’omia ona faia lea fonotaga, se’ia soalaupule ai o latou mana’oga pe ua talia e le komiti Fa’afoe pe leai.

Ua fa’alauiloa mai le tula’I ese o Salamasina Satele mai le tofiga Taitaifono o le Komiti Fa’afoe, ua talia ma faia la se tasi o fanoga sa manana’o i ai faia’oga o lo’o tete’e.

I le solo tete’e I le taeao o le aso Faraile sa fa’atasi ane i ai nisi o matua ma nisi sa a’o’oga i le SPA, ma ua latou manatu, “Ua tatau ona toe fo’i le vasega o faia’oga nei e to’a 14 o tete’e, e fa’atino tiute i potu a’oga o le fanau.”

Ona ua le taunuu le fonotaga ma le Komiti Fa’afoe lea sa tuu e faia i le afiafi o le aso Tofi ua te’a, o lea ua toe fa’atulaga ai le fonotaga a le PTO e faia i le afiafi o le aso Faraile, tusa lava pe le pa’au atu ai le Komiti Fa’afoe o le SPA.

I le talanoa atu i Matua ma Faiaoga o lo’o tete’e, i le taeao o le aso Faraile, sa iloga ai, o lo’o fete’ena’i lagona o nei faia’oga ma tulaga o le sofa’i e sui o le Komiti Fa’afoe o le laina o feso’ota’iga a faia’oga ma lo latou tiute o le fa’atulaga o togi o le fanau a’oga e tusa ma latou galuega fa’atino i potu a’oga. O le uepesite lea e fa’aigoaina o le PowerSchool. Ona ua oo sui o le Komiti Fa’foe i lea sootaga, ua mafai ona latou va’aia togi ua ausia e fanau a’oga, ma latou fesiligia ai. O se tasi lea o mataupu ua fa’ailoa mai e Faiaoga, ua le saogalemu a latou fa’aiuga fa’afaiaoga i togi o le fanau.

Ona o lo ua to’a 14 faiaoga o solo tete’e, ua fesiligia ai i latou na, pe ua le fia faia latou tiute o le aoao o le fanau a’oga? O le tali e fia faia, ae manatu ina ia fa’asa’o le mea ua oo i ai le aoga, ua fesiligia togi ua ausia e le fanau a’oga ma le agava’a o le faia’oga e faia ai lea togi. O mea ia sa manatu ai o le fonotaga ua toe soloia mai e le peresetene o le PTO, lea e avea ma sui o matua i le Komiti Fa’afoe, Ben Sauvao.

Mai Matua sa aofia i le solo tete’e, sa latou fa’ailoa ai, “Ua tatau ona toe fo’I faia’oga i le potu a’oga. Ua totogia e i matou pili e a’o’oga ai fanau, ae o lea e to’atele na’ua faia’oga lea e solo tete’e ma a’afia lagona, ae le o a’oa’oina matou fanau e pei ona fa’atulaga ai.”

Ioe i lagona o matua, peita’i ina ua le maua se avanoa e feutaga’i ai ma le Komiti Fa’afoe e pei ona fa’atulaga ai, ae o lea ua solofua mai le fonotaga, ua uia ai le ala ua faia e nei faia’oga e fa’ailoa ai, e tatau ona feutaga’i.

Ua saili fo’i se leo o se tasi lava o aofia I le Komiti Fa’afoe, o mea fa’apenei e ao ina fa’ailoa mai so latou lagona. Ina ua fesiligia, ae fa’ailoa mai, “O le fautuaga a le matou Loia mo lenei mataupu, ia le tali lava i se mea, aua e fete’ena’i ai le mataupu ae le’I oo le mataupu lenei i le fa’amasinoga. Ua taofia uma o matou manatu fia fa’ailoa atu, ona o fautuaga mai le Loia ua tula’i mo le Komiti Fa’afoe i le taimi nei. Ua tula’i ese le Taitaifono o Satele mai lea tulaga ma ua nofoia nei lea tofiga e Muagututi’a Fiti Sunia.”

Ua fa’ailoa mai foi, “E le o faigofie ia i matou ona le tali atu, ae ua usita’ia le fautuaga fa’aletulafono a le matou loia.  E ese fo’i le alafua ua fa’ataoto ai le filifiliga o le Komiti Fa’afoe a lenei A’oga e pei ona fa’atulaga ai e le latou Article Incoporation, o le alafua lea e mulimulita’i ai mea uma e fa’atino i le a’oga. E le’i toe i ai se iloiloga ma se fa’afouga o lea Article Incoporation talu mai ona fa’avae, o le ala faigata fo’i lea ona tali atu.”

Ina ua fesiligia lea sui i tulaga o manatu fa’aalia o Faiaoga, ae tali mai lea sui, “O lo’o tele le gasu ua maua a’e nei, i nisi o i latou o lo’o auai i le solo tete’e,  e tusa ai ma le fa’aaogaina o le paketi a le a’oga, ma ua avea foi lenei feeseeseaiga ma ala ua va’ai toto’a ai le Komiti Fa’afoe i le tele o mea o lo’o faia i totonu o le pulega ma le fa’afoega o le a’oga i le taimi nei. O le a fa’ailoa atu lava le i’uga o nei mea uma, pe a oo ina talafeagai fa’aletulafono lea ua fautuaina ai i matou e onosa’I, se’ia mae’a lelei le suesuega, i mao atu se tala, ae le moni.”

O le fa’atupega atoa o lenei a’oga, e sau sa’o lava i pili totogi e matua mo aoaoga a latou fanau, ma le tupe toina mai e le Malo mo a’oga Tuma’oti lo latou fa’afoega mai le pulega a le Matagaluega o A’oga a le tatou Malo.

O se tasi o fanoga sa fofogaina e le vaega o solo tete’e, ua fia suia le Peresetene o le PTO, peita’i, ua le mafai i le taimi nei, ua taofia nisi fuafuaga uma e faia i le PTO, ona o lea ua fesiligia le fautuaga a Loia mo le mataupu o lo’o taumafai ona solauapule se vaifofo.

E pei ona fa’ailoa e se tasi o matua sa auai I le solo tete’e o le aso Faraile, “O lea ua amata ona fa’ataupepe  le mataupu, ae ua fesiligia fo’i poo le a se faiga o faia ai a’oga ale fanau mo le lua lenei o vaiaso atoatoa i potu a’oga?”

Ua fa’ailoa mai ua fa’aaogaina nisi o faia’oga sa fa’aagaaga e le Komiti Fa’afoe mo a’oga a le fanau. Ua galulue fo’i le Komiti Fa’afoe ina ia sailia nisi faiaoga agava’a ina ia mafai ona fa’atautaia aoga a le fanau, pe afai o le a fa’afaigata pea ona fa’amalie finagalo o nei faia’oga o lo’o solo tete’e i le pulega.

O le fia avea ai o oe ma se sui i le Komiti Fa’afoe o le SPA, e ao ina avea oe o se matua o lou alo o a’oga i le SPA, ma e faia lau talosaga e te fia avea ma totino o le Komiti Fa’afoe i le Komiti Fa’afoe o tutula’i i lea tausaga ua e talosaga ai.

O le tala lenei, sa tusia mai fa’amaumauga o le solo tete’e i le aso Faraile. Peita’I ua fa’ailoa mai e fono le Komiti Fa’afoe mo se latou tali mai i le mamalu lautele ma e fo’i o solo tete’e i le aoauli o le aso Sa, ma o le tali lea e fa’asalalauina i le gagana peretania i le lomiga o le aso, i le Samoa News ma isi fo’i fa’asalalauga fa’alauaitele i le atunuu atoa.

TOE MANATU LE KOVANA – TOE FA’AOLAOLA MAI FA’AILI PU A LE FANAU A’OGA

O lo ua toe tepa le Kovana Sili Lemanu P. Mauga, ua tatau lava ona toe fa’amanatu le agava’a o fanau a’oga i le taina o mea fa’aili ma ili pu o fa’aili pu e pei ona i ai i aso ua tuana’i. Ona o lea fa’anaunauga, ua toe fa’atulaga ai ona toe amata fa’atulaga Fa’aili Pu e ta ma savavali e pei ona sa i ai i taimi ua mavae, i totonu o a’oga tulaga muamua ma a’oga maualuluga i le atunuu.

“O le a toe fa’alogoina le leo o fa’aili pu i totonu o a’oga a le fanau.”

“O le taumafiaga lenei, ina ia mafai ona toe fa’aofi mai le musika i totonu o aoga ma loto o le fanau aoga, o lea ua ia sapaia a’ia’i e aoga tele lea mo fanau a’oga i tulaga o le saili fa’atasi, e galulue faatasi ai ma isi uso ma tuafafine i le fa’anaunauga ia matagofie le fa’atinoga, e fa’ailoa le latou naunau ia iloa ona ta fatuga ma savavali ai mo a latou fa’aaliga. E sili ona faigofie pe afai o le a vave amatalia lea taumafaiga a’o laiti mai i latou.”

Ua le gata in fa’aulu i a’oga nei polokalama tau Fa’aili Pu ae ua mafai foi ona toe fa’afo’i i Autalavou ma afio’aga ta’itasi pe a manatu ai, aua o le mea lea sa va’aia ai le fiafia o tupulaga o le ta o fa’aili pu ma savavali i savaliga tetele o le Sisigafu’a ma Fa’aaliga Faili Pu i le atunuu, ae maise o fa’au’uga o a’oga.

 E ese mai lea, ua matua sapaia lava fo’i e Kovana Lemanu Mauga le fa’atulagaga o le toe iloiloga o le Fa’avae o le Malo o Amerika Samoa, ma ua tapena mai se sootaga fa’alauaitele ma tagata uma e ala o le Upega Tafailagi mo lea fa’amoemoe, ina ia aotelega i ai taofi fa’aalia o le atunuu.

E ese mai tupe o le stimulus ua tatalia nei ae ua i ai le fa’atupega a le ARP, lea ua fa’ailoa mai e maua ai le o se tasi o paketi o le a mafai ona fa’aaogaina e aoga e faia ai suesuega ma tuiga o le Covid-19, peita’i o loo tumau pea lava le mama o Amerika Samoa mai le fa’ama’i fita o le Coronavirus.

Ua fa’afetaia fo’i Kovana Lemanu le tula’i i o Peresetene Biden aua o se fesoasoani sili lea ona tele ua mafai ona maua mai e Amerika Samoa ma ua tele mea e mafai ona faaleleia ai.

TOTINO FOU - KOMITI FOMITI FA’AFOE O LE ZONING UA TOE FA’ATULA’IA NEI

O le komiti fa’afoe e va’aia toto’a le Talafatai o le atunuu, “Zoning Board” ua toe fa’atula’ia nei, ma ua faia ai vaega a le Kovana sili, peresetene o le Senate, Fofoga Fetalai o le Maota o Sui ma Kovana Itumalo latou te filifilia mai ni o latou sui agava’a e se’ei i lea Komiti aoga tele mo le malo ma lona fa’atulagaga o lona talafatai. O le fa’atulagaga fo’i lea fa’atulafono o le filifilia o ni sui o lenei Komiti Fa’afoe.

O tiute patino o le Komiti Fa’afoe o le Zoning e aofia ai:

·         Ia mautinoa ua fa’atulaga lelei le fa’auia o tautua lautele i so’o se nofoaga ua manatu e fausia, ia mafai ona oo I ai ala o feaoaiga faapea isi uma tautua lautele.

·         Ia mautinoa o lo’o lelei tulaga uma o le soifua maloloina, saogalemu lautele o e ua mae’a i ai i luga o le nofoaga, fa’aopoopo i ai ma i latou ua talosagaina so latou nofoaga, ia le so’ona fa’ato’ateleina nisi i lea nofoaga, ia lava le avanoa mo tagata uma e soifua ai ma le saogalemu i le nofoaga.

·         Ia puipuimalu fo’i le aia tatau a tagata uma ma fuafua lelei se fa’atulagaga matagofie o le talafatai o le atunuu pe a mae’a fa’atutuina nofoaga fou ua talosagaina. Afai e i ai nisi e asiasi mai, ia fiafia i le matagofie o lona nofoaga.

·         Ia lava le avanoa e nofo lelei ai tagata uma o le atunuu ina ua vaai toto’a i avanoa mo atufalega e alaala ai le atunuu, a’o le’i amata fa’atula’ia se fale nofo.

O Sui totino ua tofia nei e aofia ai: Tolo Ho Ching; Malaeoletalu Meleisio Gurr; Jackie Manini-Tufele; Mataese Mataese Jr.; Senator Ponemafua Tapeni na tofia mai e le Peresetene o le Senate; Manumaua Wayne Wilson na tofia mai e le Fofoga Fetalai o le Maota o Sui; Pua’auli Ioane Pua’auli na tofia mai e le Kovana Itumalo Falelima i Sasa’e. O Amatafafai Iese o le sui na tofia mai e le Kovana Itumalo Falelima i Sisifo ma Sualevai Nofoaiga Sualevai o le sui na tofia mai e le Kovana Itumalo o Manu’atele.

O sui uma nei e fa’ato’a mae’a latou tofiga o se’ei ai i lea Komiti Faafoe i le tausaga 2023.

O le ta’ita’ifono o lea Komiti Fa’afoe o le susuga Fa’au Seumanutafa o le Matagaluega o Fefa’atauaiga ma o lea tusi fa’alauaitele na tusia ma fa’asalalauina ia Mati 10, 2021.