Fautua Faipule ia Dr. Lameta e faafou lona laisene e galue i Am.Samoa

Pago Pago, AMERIKA SAMOA

Ua fautuaina e afioga i Faipule o le Maota o Sui o le Fono Faitulafono a le atunu’u le ali’i Foma’i mai Samoa ia Dr. Ken Lameta, ina ia tausisi i tulafono a le malo e ala i le faafou o lona laisene e faataga ai o ia na galue faa foma’i i le teritori.

O le vaiaso nei na feiloa’i ai afioga i Faipule ma le ali’i Foma’i ia Dr. Lameta, faapea aima le Faatonusili o le Ofisa o Fa’atoaga a le malo ia Solialealofiotagaloa Iosua Tasi Mutini, i se iloiloga na faatautaia e le Komiti o Faatoaga a le Maota o Sui, i lalo o le ta’ita’iga a le afioga i le ali’i Faipule ia Ape Mike Asifoa o le ta’ita’i komiti.

Na faatulaga le iloiloga ina ia faamanino ai nisi o mataupu sa fiamalamalama i ai afioga i Faipule. O nisi o ia mataupu e aofia ai le tulaga o vailaau ia na aveese faamalosi atu e le Matagaluega o le Puipuiga o le Saogalemu Lautele i le 2019, lea ua  maua tala ua toe faafo’i mai i le Ofisa o Faatoaga, atoa ai ma le mafua’aga ua toe aumai ai e le Ofisa o Faatoaga le ali’i Foma’i ia Dr. Lameta e galue i le atunu’u, ae o lea sa i ai ni faafitauli na tutupu mai ai i tausaga ua mavae.

Na faamanino e le ali’i Faatonusili ia Solialealofiotagaloa i luma o le Komiti e faapea, e taunu’u atu i le Ofisa ina ua tofia o ia e avea ma Faatonu o lo o i ai Dr. Lameta na galue mai pea lava i le tausaga ua mavae. Ae talu ai le taua o le auaunaga a le ali’i Foma’i, na faailoa ai e le ali’i Faatonu i luma o Faipule lana fuafuaga e toe faafou le Konekarate a Dr. Lameta lea e mae’a i le masina fou.

Ina ua maua avanoa o Faipule e fesiligia ai molimau, na fesiligia ai loa e le Sui Fofoga Fetalai ia Fetu Fetui Jr le ali’i Foma’i, pe faamaonia ripoti fai mai e silia i le 30 meaola na mamate ona o le faaletonu o ana gaioiga sa faia i tausaga ua mavae.

Na tali le ali’i Foma’i, e le moni tu’uaiga ua faia faasaga ia te ia, e leai fo’i ni faamaumauga e faamaonia ai. 

Na faamanino e le ali’i Foma’i e faapea, o tu’uaiga faasaga ia te ia, na alia’e mai ina ua ia fesiligia le tamaitai o lo o galue ai i le Fale o Togafiti ai meaola i Tafuna (Vets Clinic), i le mafua’aga na te faaaogaina ai tusi lisiti e 2 e faamaumau ai tupe maua a le Ofisa.

E pei ona taua e Dr. Lameta, o le isi tusi lisiti o loo aofia ai faamaumauga e tuuina atu i le Faatonusili, ae o le isi tusi lisiti e teu lava e le tamaitai o lo o galue ai i le Ofisa. E 2 masina talu ona tuana’i lana fautuaga sa tuuina atu i lea tamaitai ae alia’e loa faamatalaga e pei ona tu’uaia ai o ia. 

Na taua e le ali’i Foma’i lona maasiasi ina ua saslalau solo ripoti i luga o le nusipepa ma le leitio e faaleaga ai o ia e tagata, fai mai ua tele meaola ua mamate i lana tui. Na matua teena malosi e le ali’i Foma’i nei tu’uaiga uma.

Na faauilavea le afioga i le ali’i Faipule ia Vailiuama Steve Leasiolagi ma fautua i le Ta’ita’i Komiti ina ia fautuaina le ali’i Foma’i e taofi ma faamuta lana molimau, ona o lea ua taua ai ma tu’uaiga faasaga i tagata faigaluega e le o mafai ona tali mai i nei tu’uaiga.

Ina ua fesiligia e le afioga i le ali’i Faipule ia Faimealelei Anthony Fu’e Allen le ali’i Faatonusili e faatatau i vailaau ia na aveese faamalosi e le Matagaluega o le Puipuiga o le Saogalemu Lotoifale i le 2019, na faamaonia ai e le ali’i Faatonu le mae’a lea ona toe faafo’i atu o nisi o vailaau i lona Ofisa, se’i vagana ai se isi vaega o vailaau o lo o taofia pea e le Matagaluega o le Puipuiga.

O nisi o vailaau ua toe faafo’i atu i le Ofisa o Faatoaga o loo fa’aauau pea ona fa’aaoga mo le tuiina o mea’ola i taimi o togafitiga. O isi vailaau ua mae’a le aso e aoga ai, ma o loo galulue soosoo tauau pea le Ofisa o Faatoaga ma le Ofisa o le Siosiomaga a Amerika Samoa (AS-EPA) i le vaaia atoa ai ma le mata’ituina o vailaau. O le vaega fo’i a le AS-EPA e gafa ma le faatamaia o vailaau ua mae’a le aoga.

Ina ua fesiligia e Faimealelei le ali’i Foma’i i lona laisene e galue ai i Amerika Samoa, na faamanino ai e Dr. Lameta e faapea, o le tausaga e 2012 na muta ai le aoga o lona laisene e faataga ai ona galue i le teritori. Ua mae’a ona tuuina atu pepa uma lava e aofia ai ma lona ata i le Ofisa o le Soifua Maloloina, peita’i e oo mai lava i le taimi nei e lei maua lava lona laisene fou.

Ina ua fesiligia lona faailoga Faa Foma’i, na faamanino ai e Dr. Lameta e faapea, o lona faailoga faa foma’i na maua mai lea i le atunu’u o Filipaina, ae o lona Laisene e galue ai faafoma’i i tulaga o meaola e aumai i le malo o Samoa. O lona faailoga faa foma’i e aloaia i lalo o Malo o le Taupulega (Commonwealth), lea e aofia ai ma le malo tele o Amerika.

Saunoa Faimealelei e faapea, o le popolega o loo i ai, e le gata e le o i ai sona laisene e faataga ai ona galue faa foma’i i le atunu’u, ae leai fo’i se faatanaga ia te ia na te oka ai ituaiga vailaau nei mai fafo.

Na tuliloa e le tamaitai Faipule ia Andra Tereise Samoa le molimau a le ali’i Foma’i, ma ia fesiligia ai le mafua’aga ua le faafouina ai lona laisene e faataga ai ona galue i le atunu’u, ae na tali le Foma’i, o le Matagaluega o le Soifua Maloloina le mafua’aga.

Na fesili le alii Faipule ia Lua’itaua Gene Pan i le ali’i Foma’i e faailoa atu faamaumauga na mafua ai ona soona oka mai le tele o vailaau. Na taua e le ali’i Faipule e faapea, sa tatau lava ona i ai se numera e fuafua i ai le tele ma le laititi o vailaau e aumai, nai lo le soona aumai o lenei uta tele o vailaau, ao lea ua amata ona le aoga ma sauni e lafoa’i.

Saunoa Dr. Lameta e faapea, o le uta o vailaau na aumai i Niu Sila, na fuafua mai mo le 6 masina. O vailaau fo’i e le faapitoa mo se ituaiga meaola se tasi ae faapitoa mo soo se meaola lava i le atunu’u.

O le fesili pe aisea na oka mai ai vailaau mai Niu Sila ae le oka mai i Amerika, na faamanino e le ali’i Foma’i e faapea, o le kamupani lea na oka mai ai vailaau mai Niu Sila, o le kamupani lea latou te sapalaiina vailaau i atumotu uma lava i le Pasefika. O vailaau o loo tufatufa ma faatau atu e le kamupani lea, o vailaau mai Amerika.

Saunoa le ali’i Faipule ia Manumaua Wayne Wilson e faapea, afai e le o i ai se laisene e agavaa ai le ali’i Foma’i ona galue i Amerika Samoa, e tatau la ona tuu atu uma vailaau i lalo o le vaavaaiga a le Fale Talavai a le Falema’i, ina ia mautinoa ai le saogalemu.

Saunoa atili Manumauae faapea, o lona popolega o loo i ai, ina nei oo atu vailaau nei i aao o i latou e le tatau ona oo atu i ai, ona ua ia faalogo i ripoti o nisi o nei vailaau e mafai ona gaosi mai ai fualaau fa’asaina.

Na faailoa e le afioga i le ali’i Faipule ia Vesiai Poyer Samuelu i le ali’i Foma’i e faapea, o ia le isi tagata o loo mafatia lona mafaufau i meaola na mamate, ona o lea fo’i sa mate ai le ta’ifau sa tausi a lana fanau. Sa ia molimauina lagona faanoanoa o lana fanau i le taimi na mate ai le latou ta’ifau, ma ia manatu ai e tatau lava ona faaleo lana mataupu i le ali’i Foma’i.

Na faamalulu le afioga i le ali’i Faatonusili ia Solialealofiotagaloa i le mamalu o afioga i Faipule e tusa ai o faaletonu e pei ona tula’i mai. Sa ia taua e faapea, o le isi tuutuuga e mafai ai ona faafou le konekarate a le ali’i Foma’i, ia faafou lona laisene e galue ai i Amerika Samoa. 

Na faafetaia e le ali’i Faatonu le tautua a le ali’i Foma’i ma ia taua ai e faapea, pau lava lea o le foma’i e maualalo lona totogi, e na o le $40,000, ae o isi uma Foma’i i le atunuu e maualuluga o latou totogi.

Saunoa Vesiai e faapea, e le taua le totogi ae taua le faamaoni i le faatinoina o le galuega. E tatau fo’i i le ali’i Foma’i ona fiafia ina ua ia maua le ituaiga totogi faapea. I lona talitonuga, e tusa lava fo’i pe na o le $10,000 le totogi o le Foma’i i le tausaga ua lava ma totoe.