Nofosala se ali’i i lona faia o uiga mataga i se tamaitai talavou

Pago Pago, AMERIKA SAMOA

E 20 masina lea ua fa’asala ai e le Fa’amasinoga Maualuga le ali’i mai Samoa e to’a 4 ona ‘alo na tu’uaia ma ta’usala i lona faia o uiga mataga i se teineititi e 16 tausaga le matua, ina ua ta’usala o ia e le Fa’amasinoga i le moliaga mamafa o lona tagofia lea o itutinosa o se teineititi e laititi i lalo o le tulafono.

O le fa’asalaga fa’a falepuipui ua tuuina atu i le susuga a Tautalatasi Ulugia Jr, (poo Tasi Ulugia Jr fo’i e pei ona iloa ai o ia e le to’atele), o se tasi lea o tuutuuga o lana fa’anofovaavaaia e 5 tausaga na tuuina atu e le Fa’amasinoga i le masina na te’a atu nei.

Na ulua’i tu’uaia e le malo ia Ulugia Jr i moliaga mamafa e 2 o lona tagofia lea o itutinosa o se tama’ita’i i le tulaga muamua, faapea ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

Ae i lalo o se maliliega na sainia e le ua molia ma le malo, na malie ai Ulugia Jr e tali ioe i le moliaga e tasi o lona tagofia lea o itutinosa o se teineititi a laititi i lalo o le tulafono, o se solitulafono e mafai ona fa’asala ai o ia i le toese mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000.

I le tali ioe ai o Ulugia Jr i le moliaga e pei ona ta’usala ai o ia, sa ia ta’utino ai e fa’apea, i le taimi o le aso 28 o Oketopa, 2019 na ia tagofia ai itutinosa o se tamaitai i se auala e fa’amalie ai lagona tu’inanau sa ia te ia.

Na faatoese le ua molia e tusa ai o lana solitulafono, ma ia talosagaina ai se isi avanoa mo ia. Sa ia faatoese foi i le tamaitai na aafia ma lona aiga e tusa ai o le faalavelave sa tula’i mai.

Na taua e lana loia fautua ia Ryan Anderson e fa’apea, e ui i le matuia o le gaioiga sa faia e le ua molia, ua lagona e le ua molia le matuia o lana solitulafono, ma ua salamoni moni fo’i o ia mai lana mea sese sa faia.

Na talosaga Anderson i le fa’amasinoga mo se fa’asalaga faanofovaavaaia, ae fa’aaoga ai le umi e 15 masina lea ua mae’a ona tuli e le ua molia i le toese i Tafuna e fai ma ana fa’asalaga. Sa talosaga fo’i Anderson ina ia aua ne’i toe i ai se isi fa’asalaga fa’a falepuipui mo Sivatia, ae tatala loa o ia i tua.

Na lagolagoina e le loia a le malo le talosaga a le itu tete’e mo se fa’asalaga fa’anofovaavaaia, peita’i na finau le tama’ita’i loia sili lagolago ia Kristine Soule i le fa’amasinoga, ina ia tuuina atu se fa’asalaga fa’a falepuipui ia Ulugia Jr, ona o le matuia o le gaioiga sa ia faia.

Na taua e le malo e fa’apea, e tatau ona momoli se feau taua i le atunu’u atoa, e le mama i le fa’amasinoga ituaiga amioga faapenei, o le faia lea o sauaga fa’asaga i fanau laiti. Ae o le itu e sili ai ona matuia, ona o le teineititi na a’afia e nonofo ma lona aiga i le Fale Mautotogi lea e mautotogi ai fo’i Ulugia Jr i Tafuna.

A o le i tuuina atu le faaiuga a le fa’amasinoga fa’asaga i lenei mataupu, na toe fa’atepa e le Fa’amasinoga itu e lua i mau faamaonia o le tagi fa’asaga ia Ulugia Jr, atoa ai ma le mea moni sa tula’i mai i le aso na tula’i mai ai le fa’alavelave.

Na taua e le fa’amasinoga e fa’apea, o lenei mataupu na tofu atu i le Ofisa o Leoleo i Tafuna ia Oketopa 28, 2019, ina ua logo e ni isi o le aiga le Ofisa o Leoleo mo se fesoasoani, i le mae’a ai lea ona fa’amatala e le teineititi i ona matua o le faalavelave sa tupu.

Na aga’i atu Leoleo i Tafuna ma aumai le teineititi na a’afia ma lona Tina, atoa ai ma le pu’e fa’apagota mai o le ua molia ia Ulugia Jr. Ina ua mae’a ona fesiligia e Leoleo le teineititi na a’afia ma lona Tina e tusa ai o lenei fa’alavelave, sa aga’i atu ai loa Leoleo ma latou fesiligia le ali’i o Ulugia Jr.

Na faamatala e le tamaitai na a’afia e fa’apea, na tuli o ia se tasi o ali’i e alu ia Ulugia Jr e faanoi mai se tapa’a mo lona aunty. Na alu le tamaitai ma tu’itu’i le faitoto’a o le fale o Ulugia Jr, ma tatala mai ai e le ua molia le faitoto’a o le fale ae faaulufale le tamaitai na aafia.

Na fesili le ua molia i le tamaitai na aafia pe i ai se mea e mana’o i ai, ona tali lea i ai o le tamaitai, o ia na alu atu e faanoi se sikaleti mo lona aunty o loo faatali mai i le latou fale. Na fai Ulugia Jr i le tamaitai e alu atu i totonu o le fale. Ina ua ulufale le tama’ita’i i totonu o le fale, sa faatonu loa e le ua molia ina ia saofa’i i luga o le nofoa i totonu o le potu malolo ae sei alu e aumai le sikaleti mo lona aunty ma se apainu mo ia.

Na taua e le tamaitai na aafia i Leoleo e faapea, a o saofai i luga o le nofoa, na faateia o ia ina ua tago mai le ua molia i ona tua ma pa’i atu i lona fatafata. Na tu i luga le tamaitai na aafia ma taumafai e tete’e le ua molia, peita’i na aapa atu le ua molia ma toso mai lona lima ma taitai o ia i totonu o lona potu, ma ia fa’atino ai loa uiga mataga e ala i lona tagofia o vaega o lona tino. 

Ao fa’atino e le ua molia ia gaioiga uma e pei ona fa’amatala e le tamaitai na aafia i Leoleo, sa faalogoina e le tamaitai le malosi o le manogi pia o lo o alu atu i lona tino. Sa vaaia fo’i e le tamaitai na aafia fagu vailima e 3 o loo tutu i luga o le laulau ua uma ona inu. 

Na tuu e le ua molia le pepa sikaleti i le tamaitai na aafia, faapea ai le $20 ma le apainu ma fai i ai, e alu loa i le fale, aua nei ona faailoa i se tasi le mea sa tupu i lo la va.

Ina ua fesiligia e Leoleo ia Ulugia Jr e uiga i lenei fa’alavelave, na matua teena malosi e ia fa’amatalaga uma a le tamaitai o lo o tu’uaia na ‘aafia. Na taua e le ua molia i Leoleo e fa’apea, na te le o manatuaina se taimi na alu atu ai le tamaitai lea i totonu o lona fale.

Na pau tagata na afea lona fale, o le fanau tama e toalua a lona tausoga e nonofo latalata ane i le nofoaga o loo mautotogi ai, lea na o atu e avatu lana meaai i le aoauli, faapea ai ma le taimi na toe o atu ai i le afiafi e avatu falaoa e 2 e fai ai lana ti o le afiafi.

E 5 tausaga i le falepuipui ma le salatupe e $5,000 na faasala ai e le fa’amasinoga ia Ulugia Jr, peita’i ua faamalumalu le tuliina o le faasalaga faa falepuipui atoa ai ma le totogiina o le salatupe, ae ua nofovaavaaia le ua molia mo le 5 tausaga i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuliina o masina e 20 i le toese i Tafuna, atoa ai ma lona tuua o le atunuu pe a malaga mai i le toese. Peita’i o le tuutuuga o le tuua o le atunu’u o le a taofi lona faataunuuina i le taimi nei, se’i vagana ua toe avatu se isi poloaiga a le fa’amasinoga.

Ua faasa ona toe nofo le ua molia i le Fale Mautotogi i Tafuna, ae ua poloaina o ia e saili se isi nofoaga e nofo ai, pe afai ae magalo mai i tua i le toese. Ua fautuaina fo’i o ia ina ia faia se suega o le HIV i lona tino, ma ia lesitala o ia i le lisi o i latou ua ta’usala i le faia o uiga mataga i fanau laiti.

Na faailoa e le faamasinoga i le ua molia, na te toe tagofia loa le ‘ava malosi, o lana ipu pia lava lena e tasi e toe faafo’i ai o ia i Samoa, poo le faatonu loa o ia e tuli atoa le faasalaga e 5 tausaga i le toese.

I le tausaga e 2010, na ta’usala ai Ulugia Jr i le moliaga mama o le faaoolima i le tulaga tolu, o le vaega A o solitulafono mama, lea e mafai ona faasala ai se tasii le Toese mo le umi e le silia i le tasi le tausaga, pe faasala foi i le salatupe e le silia i le $1,000, poo le faasala fo’i i faasalaga uma ia e lua.

O le moliag na ta’usala ai Ulugia Jr na afua mai i le mataupu lea na ia tagofia ai itutino o se tamaitai e 23 tausaga le matua e aunoa ma se mafua’aga tatau.