TALA I VAIFANUA

Pago Pago, AMERIKA SAMOA

FA’ATULAGA E UIFA’ATALI AMATA MATAUPU MO AMERIKA SAMOA.

Ua fa’auia nei e Uifa’atali Aumua Amata sana tusi i le Komiti Fa’afoe o Puna’oa a le Senate a le Malo tele, ina ia taga’i toto’a i ai, a’o latou iloiloa ma fa’atulaga alamanuia e fesoasoani mai ai ia Amerika Samoa i lenei vaitau o le Coronavirus ma fesoasoani fa’amatuu mai ona o le a’afiaga o lea fa’ama’i i le Iunaite Setete ma teritori o Amerika.

E ese mai lea, ae ua ia talosagaina fo’i le ali’i taitaifono Joe Manchin ma le tasi o Senatoa iloga o lea Komiti, Sen. Dr John Barrasso, ina ia mautinoa ua taua’aoina mai i le tatou Kovana, le aia ma le malosiaga atoatoa e na te fa’aaogaina ai tupe atofa mai mo galuega e aoga a’ia’i i tagata ma le malo o Amerika Samoa.

O mea nei ua mae’a lisia e le tatou Faipule i le Konekeresi ina ia taga’i toto’a i ai lea Komiti:

• Le mana’omia o i ai mo le fa’afouga o le falema’i LBJ Medical Center ma le fa’atupega o le Medicaid ma ia aumaia le fa’atagaga e fa’aaogaina ai lea alamanuia i so’o se ala e tatau ai.

• Talosaga mo le Fa’atupega Fa’aauau o Tuiga ma le  Fa’atautaiga o Tuiga i le teritori.

• Tima’i ma taga’i toto’a i le  totogi maulalo ma a’afiaga i le tamaoaiga e ono lutia ai le teritori ona o se si’itaga o totogi maulalo.

• Talosaga ina ia aofia Amerika Samoa i le aiaiga ma le talanoaina o fa’atupega mo a’oga a le fanau e afua mai le Leve K se’ia pa’ia Level 12, fa’apea ma le aofia ai o saoga mo le Kolisi Tuufa’atasi o Amerika Samoa.

• Talosaga ina ia aofia i le atofaina mai le Child Tax Credit ma Lafoga a tagata galulue, ia aofia ai ma le totogi mo e faigaluega ina ia maua nei lafoga e le mamalu lautele o le atunuu.

• Mo le Alamanuia e toe toina mai, ia mafai ona toe totogia mai tupe ia i latou na a’afia galuega ona o le Coronavirus, ia aofia ai ma le mamalu o e ua talia fa’aletulafono ona faigaluega i Amerika Samoa, o i latou na, e le o aofia i alamanuia na toina mai muamua.

Fa’ailoa e Uifa’atali, o isi iloiloga o alamanuia tau stimulus ua amata aiaia nei i iloiloga a le Konekeresi ua aofia ai le $350piliona i vaega tupe toina mo setete ma teritori ina ia toe fa’aleleia atili ai le atina’e o Amerika. 

Pe afai ae manuia se tufatufaga e i’u ina umia e Amerika Samoa le $510miliona o le fa’atupega e toe fa’aleleia ai le tamaoaiga tausi o le tatou atunuu.

“O le tausaga ua te’a, sa matua fa’aitiitia mai lava le fa’atulagaga o le vaega tupe na taua’aoina, ma ua matele fo’i ina taofiofia mai le ala e fa’aaogaina ai. Ou te mautinoa ua mae’a silafia e le Senate e tauau e toe fa’aititia mai nei saoga ua pasia mai e le maota, peita’i, a’o le’i faia se tou fa’aiuga, ia mua’i taga’i toto’a i le tulaga o le puipuigamalu o teritori ma nai a latou vaega tupe ua toina atu i ai, fa’atasi ai ma le tuuina atu atoa o le malosi’aga i ta’ita’i tofia e mafai ai ona latou fa’aaogaina tatau nei tupe mo le puipuiga o le soifua, tausia o le soifua maloloina ma le falema’i, LBJ Medical Center, o lo ua tatau lava ona fa’aleleia mo Amerika Samoa,” o se vaega lea o le tusi a Uifa’atali i le Komiti o Puna’oa a le Senate a le malo tele.

Ua toe fa’ailoa atu fo’i i le Komiti, o le fa’avasega ese atu lava o se vaega o le $510miliona lea e aga’i i le fa’aleleia o le Falema’i ua sili atu lava lea. Ma ia toina fo’i le malosi’aga i le Kovana na te pulea ai ma fa’asoa le vaega tupe atoa lea ina ia fa’aaoga e tusa o lona silafia o mea e ao ina fa’ataunuu mo tagata lautele.

O le isi lava mataupu e sili ona ogaoga o le taumafai lea o le malo e fa’afetauia le vaega tupe a le Medicaid  e ao ina totogia a’o le’i fa’aaogaina mo malaga, ona fa’ato’a toe totogia lea e le Medicaid lana saoga pe a mae’a ona faia le tautua mo tagata lautele o agava’a i le polokalama.

“O le taumafai o le malo e muamua totogi mea uma ae fa’ato’a toe fa’afo’ia mai e le Medicaid mulimuli, o se mea e le o faigofie ona maua i le tupe fa’asoa a le teritori, ona e le o i ai suiga tetele i le falema’i e mafai ai ona togafitia o matou tagata ua fa’agasegasea, e le faigofie lava lea itu i le fa’atautaiga lelei o lea auaunaga,” o se tala lea a Uifa’atali. 

FA’ATONU MATAGALUEGA ALAGAMANUIA MO TAGATA LAUTELE 

Ua pasia e le Fono le Fa’atonu o le Matagaluega o Alagamanuia mo Tagata Lautele ia Muavaefa’atasi John Suisala. 

Na pasia lea tofiga e le Senate i le aso Lulu ae na pasia e le Maota o Sui i le vaiaso ua te’a. I le iloiloga a le Senate i le taeao o le aso Lulu, ae le’i faia le palota pasia a senetoa, sa fesiligia ai e Senatoa Malaepule S. Moliga le ali’i fa’atonu i lana vaega o lo’o fesotai ai ma le CFIDD, o se fa’alapotopotoga na faatula’ia e i la’ua ma lona to’alua a’o mafuta pea e le’i tete’a.

Ua iloga o le Ofisa o le CFIDD o lo’o avea ma nofoaga sa fa’atautaia mai ai le tufatufaga o WIC a tina ma fanauiti mo Tafuna i se vaitaimi, ae na fa’atonuina e Kovana Lolo Moliga, se kamupani faufale latou te tala esea lea Ofisa ia Tesema 2020.

O le tali a Muavaefa’atasi, “Ioe sa faaaoga e le WIC lea ofisa e tufatufaina ane ai siaki mo tina ma fanauiti mai Tafuna. Sa fa’aaoga e le CFIDD le isi itu, ae fa’aaoga e le Polokalama a le WIC le isi itu o lea lava Ofisa.

O le amataga o lenei tautua sa mua’i fa’atula’ia a’o le’i avea o ia ma fa’atonu o le Matagaluega lea, ma sa fa’aaogaina fo’i lea tautua o se auaunaga a le WIC, e tautua ai le Tualauta ma isi vaega o le falelima i sisifo. Sa fa’aaogaina lea Ofisa autu e aunoa ma se totogi.

Na toe fesili Malaepule Moliga, pe le ua a’afia le tulaga o lona fa’auia o tautua a le Matagaluega o lo’o avea ai o ia ta’ita’i i lea faiga ua faia pea?

Sa ia fa’ailoa atu, sa muai faia ma totogia atu lenei tautua a’o le’i avea o ia ma Fa’atonu o le Matagaluega, ma ua i’u ane ina avea o ia ma fa’atonu, ae o lo’o fa’aauau pea.

Na toe fesiligia o ia poo ai e sauniga pepa uma mo peimeni e faauia i le CFIDD mai le matagaluega DHSS ae fa’ailoa mai e ia, e i ai lava se tasi o le au faigaluega e gafa ma lea tulaga, ae le o ia. 

O le toe saunoaga a Malaepule, o lo’o i ai le fete’ea’iga i le va o oe le fa’atonu o le Matagaluega ma totogia pea o le CFIDD, o se fa’alapotopotoga o lo’o e fa’atautaia mai ma nisi o lo’o outou fa’apa’aga.

O isi uma senatoa sa latou fa’afetaia le galue malosi ma le fa’aaogaina fo’i o lea alo o le atunuu i tofiga taiulu fa’apenei i taimi fo’i e tautuaina ai le atunuu i alamanuia eseese ua fa’asalafa e tufatufa atu. O na taimi e le faigofie ona e tumutumu atu le atunuu e fia maua lea alamanuia, ae fa’afetai ona o le lava o le tofa e fa’atautaia ai ma fa’ato’ato’a le mamalu o le atunuu.

O nisi o latou manatu ua latou fa’afetaia ai le toe tofia mai o ia e avea ma ta’ita’i o le matagaluega ua fai si leva o tautua mai ai, ua ia silafia lelei uma lava le fa’ata’atiaga o tautua eseese o lo’o latou fa’asoa maia i e agava’a i ai o le atunuu.

TAIMI O LE VALIGA ATA – DOWNTIME

O lo ua i ai le isi vaega fou o tina ua latou filifili e fa’aaoga tatau o latou taimi ua malolo mai galuega, ua oo i taimi e fiafia fa’atasi ai ma nisi o latou uo mamae, e talatalanoa ma inu sina uaina, ua le fa’amalositino fo’i ma ua maua le avanoa e fia fefa’asoa’i ai i ni mea lelei, lea ua manatu ai, e valivali sina ata matagofie, e fa’amatagofie atili ai lou fale.

“O le valiata o se taleni e le faigofie ona maua, se’i vagana ua e matua naunau e fia faia pe a fa’aosofia oe i le fiafia ma lagona fo’I o le mafatia loloto, ona gafatia lea ona e valia se ata e aumaua ai lagona natia na i le va’aiga o mata,” o se tala lea a le tamaitai tusi ata fou o Tuifa’asisina Korina ina ua vala’au atu e fia maua se fa’amaumauga po’o se fa’amatalaga autu i lea vasega fou ua va’aia ua agai i luma le latou taumafaiga i lea taleni.

O le aso 20 Fepuari 2021, sa faia ai le latou vasega lea talu ai nei, ma ua fa’ailoa mai ai lo latou naunau ia mautu lo latou iloa I lea matata aoga tele. Ua tasi lava le ituaiga ata e tusia e i latou uma, fa’ailoa ai lo latou autasi i le fa’amoemoe e tasi, “Ia soifua fiafia e faia se galuega lelei e aoga foi mo lou aiga, ae fiafia fa’atasi ai ma ni au uo, ma faia talanoaga fa’afiafia loto, ma fefa’asoa’I lagona lelei,” o se tala ata lea a le tamaitai o Su’a Judy Ulufaleilupe.

O le Downtime o se pisinisi ua fa’afoea lea e Diana Pelini mai lona fale i Ottoville, ua talafeagai lelei lava fo’i lona maota ma fa’atasiga fa’apenei e na te fa’atautaia. O nisi o ana sui totino na auai, o nisi o tamaitai faipisinisi lauiloa o le tatou atunuu, Isabel-Rose Hudson, Tuifa’asisina Korina Seiuli Lee, Su’a Judy Ulufale ma si ona alo tamaitai o Judy Ulufale, Aliitasi Afuola ma isi.

“Ia fa’aalia ou lagona fiafia i lau ata ua tusia,” o le autu lea o le mafutaga i lena afiafi fiafia ma le ‘auuso.