TALA I VAIFANUA

Pago Pago, AMERIKA SAMOA

ASIASI LE DOH TOBACCO/DIABETES – FITIUTA ELEMENTARY, MANU’A

Ua oo atu le asiasiga a le aumalaga a le DOH Tobacco Diabetes Coalition i le a’oga tulaga muamua i Fitiuta, Manu’atele I le aso ananafi ma ua latou faia fo’i se foa’i taua mo le fanau, a’o i ai i latou e fa’atino nisi o a latou fonotaga ma faia se latou faaaliga o ituaiga o mea’ai paleni e gafa taulima ai lou soifua maloloina ma fa’aitiitia ai le Ma’i Suka i totonu o le atunuu.

O le aumalaga a le DOH Tobacco Diabetes Coalition e aofia ai le tamaitai Fa’atonu o le lea Kolisi i le DOH i Faga’alu, Farrah Lesa ma lona sui, Daphne Fale.

Ua fa’ailoa mai e Farrah Lesa, “Ua fa’afiafiaina lava le fanau a’oga, mai le Level 1 se’ia pa’ia le Level 8, ua mae’a ona taua’aoina i ai latou meaalofa e aoga mo le faia o latou meaa’oga. O mea nei e patino lava le aoga i fanau a’oga.”

Ua va’aia le fiafia o i latou aua ua amata toega o lenei tausaga a’oga, ae ua toe maua atu nai sapalai mo i latou e fa’atino ai meaa’oga. O meaalofa na tauaaoina o vase, pusa vali ma pusa penitala mo le fanau a’oga. O lo ua i ai fo’i ma foa’i mo Faiaoga ina ia fa’aaoga i o latou faiva i potu a’oga.

Ua fa’ailoa mai le agaga fiaifa ma le fa’afetai o fanau a’oga, ae o se tasi lea o tautua ua fa’aaogaina fo’I e le tamaitai fa’atonu ma lona sui o le DOH Tobacco e fa’afeso’otai ai ma fanau talavou i le Manu’atele, ina ia latou iloa le tele o tulafono ua aiaia ai le ulaula tapa’a ma sikaleti i le tatou teritori.

“Ia outou iloa e matua fa’asaina lava ona toe ulaula se tasi i totonu o le potu a’oga, poo le lotoa fo’i a le aoga atoa. E ao ina susu i fafo le faia’oga mai le pa a le a’oga, e tusa ma le 50 futu le mamao ese mai falea’oga, e ulaula ai lana sikaleti, pe afai e ulaula tapa’a i latou.”

“O lo ua iloa fo’i e leai se mea lelei e maua e se tasi e ulaula tapa’a, aua lava ne’i outou taumafai e fa’ata’ita’i lena tu e le lelei mo lou olaga. E te ma’i ma e oti ai, ona ole ulaula tapa’a,” o se tasi o lea tima’iga ale famaitai fa’atonu o Lesa na faia i le fanau aoga i Fitiuta.

E le gata i lea ,a e ua saunoa fo’i le tamaitai sui taitai o Daphne Fale, “Ia outou iloa fo’i ua fa’atulafonoina, e le mafai ona outou toe o e fa’atau mai se sikaleti a nai o outou tama, tina po’o aiga i le taimi nei. Afai ae toe maua ane oe ua e alu e faatau le sikaleti e molia la oe i le tulafono, fa’atasi ai ma le sui o loo tulia oe i le faleoloa e fa’atau mai sana sikaleti. Afai o lou tama pele, ma lou tina pele lea e tulia o ei le faleoloa, o i latou na e fesiligia ma fa’asalaina e le tulafono ua faamalosia nei e ola ai i tatou uma e le o ulaula, ae a’afia i le asu o le ulaula o le isi o lua tuaoi, i nofoaga faitele, ua fa’asaina ai fo’i le ulaula tapa’a i totonu o malumalu ma isi fa’atasiga faitele uma lava, ae silisili ai i potu aoga ma lotoa a a’oga.”

Sa tapu’eina ata uma mo le fa’amaumauga o lea malaga asiasi a le DOH Tobacco Diabetes Coalition i lea a’oga i le Manu’atele, ma ua fa’amauina fo’i le latou agaga foa’i ma tima’iga i le fanau, ia soifua o nisi e le tagofia le sikaleti. O le aofai o le fanau a’oga i Fitiuta Elementary e to’a 42 i latou uma.

Ua faia isi fonotaga fa’aleaoaoga a le DOH Tobacco Diabetes i Faleasao ma Ta’u a’o le’i toe taliu mai i fanua.

FA’ATAUNUU FOAI ROTARY – AOGA A LE MANU’ATELE

I le vaiaso ua tuana’i, sa oo atu ai sui mamalu o le Kalapu a le Rotary ina ia fa’ataunuu le latou meaalofa mo le fanau a’oga I le Manu’atele, e aofia fa’atasi ai le Faleluanuu ma FaleTa’u. O le aso Lua lea sa oo ai i latou i Asaga ma latou fa’amautu ai ae faia le foa’i mo a’oga i le Faleluanuu.

Peita’i na toe fa’ao’o a’e fo’i le latou malaga i le Faleta’u ma ua faia le foa’i o Tusi Lomifefiloi i le fa’aperetania ina ia mafai ona fa’aogaina e le fanau mo suesuega o uiga o upu ua le malamalama lelei ai. Ua tofusia nei le fanau aoga i a’oga uma a le Manuatele ma tusi Lomi Fefiloi, e fa’aaoga e i latou te fa’aaogaina mo latou suesuega i le gagana peretania.

Ua fa’afetaia fo’i lenei nofoaiga a le Rotary Club i Amerika Samoa mo le latou galuega fa’aauau o lenei foa’i taua. O se tasilenei o galuega ua mae’a faia o se auaunaga mo le manuia lautele o le atunuu, e fa’ailoa ai le agaga o le Rotary Club, ia fa’amuamua galuega lelei e tautua ai le atunuu lautele, a le mo le taimi nei, a’o le lumana’i.

LE MAFAI ONA TALIU MAI NISI SA MALAGA I SAMOA E FAI VISA:

E lua va’alele na malaga i Samoa e la’u i latou na fia malaga e talosaga o latou visas  e malaga ai i Amerika mo talavai i le aso Gafua na te’a nei. O visa nei ua fa’amoemoe e malaga ai i le malaga a le va’alele fa’apitoa mo le avea i fafo o gasegase e fa’aauau togaifitiga ma talavai i Hawaii ia Mati 10, 2021.

O le va’alele lea na malaga ma ia sui, sa tatau ona toe taliu mai ma nisi o tatou tagatanuu o lo ua fia toe fo’i mai i le tatou nei teritori, peita’i, ua suia le agava’a e malaga mai ai le to’atele ona ua mae’a fa’atulaga, le isi suega e toe faia lava 3 aso a’o loma lou malaga mai.

O loe aso Gafua lea e faia ai le malaga, o nisi sa tulituli mai le fia sau i le va’a mai nuu mamao i tua o le motu o Upolu, o nisi mai Savaii, ma ua toe taliu sa’o mai le va’a e leai ma se pasese na malaga mai ai. Afai na faia le tui suesue lea i le aso Faraile, ua uma fo’i le aoga o le tui lea e malaga mai ai nisi na maua le avanoa ae ua le mafai ona malaga mai ona ua le taulia le suega o le Covid i lona itula fa’atulaga e 72, fa’ato’a tali ai e malaga mai.

Ona o lo’o le taitai ona lava le sapalai o le tui puipuia mo le Covid i Samoa mo le aotelega o le faitau aofai o tagata e tatau ona tuia, ua fa’atulaga ai le suega lea ia i totonu o le tolu aso e tatau ai ona ulufale mai i Amerika Samoa, peita’i e le mafai fo’i ona aoga mo va’alele e fia malaga mai ai i aso Gafua, ae faia tuiga suesue nei i le aso Faraile.

O le suiga fou lea o le maliliega fa’atasi a Samoa na lua, e ao ina mautinoa ai, e le ulufale ai lava se tasi o lo’o sau ma se siama o le Covid-19 i tatou malo e lua.

Ua fa’ailoa mai fo’i e se tasi o le Kamupani Va’alele a le Samoa Airways, “E le o toe suesuea fua tagata mai Amerika Samoa i Samoa pe a to’ai taunuu atu, e le nofo va’ava’aia i latou, aua e mautinoa e le o iinei se Covid-19. Peita’i o nisi mai isi malo uma e nofo va’ava’aia uma lava i latou mo le 21 aso. O le tui lea ua malilie fa’atasi Samoa na lua e faia, ina ia le toe nonofova’ava’aia ai o tatou tagata e malaga i Samoa ae o atu lava o i aiga. A'o Amerika Samoa, ua oo lava ia i latou mai Samoa ua nofo va’ava’aia. O le faigata ua leai ai nisi ua malaga mai le va’alele na fa’atulaga e fo’i mai ma se pasese, ona e le’i i ai se faasalalauga muamua e fa’ailoa atu ai i pasese ua fa’atulaga e faia muamua se tui mo i latou fa’ato’a malaga mai ai.”

78 TALOSAGA  FA’ATUPEGA A LE HUD – FILIFILIA E LE FALETUPE O ATINA’E MAI LE SE’I

E 78 talosaga sa fa’aulu mo le fa’atupega a le Faletupe o Atina’e ua fa’amanuiaina nei ona o le se’i sa fa’atautaia e filifili ai ni talosaga e taga’i toto’a i ai le faletupe mo ni nogatupe e fa’aleleia pe fausia ai latou falenofo. O le fa’atupega o nei nogatupe ua toina mai lea i le USHousing & Urban Development.

O i latou la nei o le a fa’aauau ona tagai toto’a i ai le faletupe o atina’e ina ia latou talosaga na fa’aulu mo le fa’atupega.

E ui ina o lea ua fa’amanuiaina latou talosaga mo le fa’atupega o le fausia olatou fale po’o le fa’aleleia o latou falenofo, e fa’asolo ai lava ona suesuea auilili e le faletupe a latou talosaga pe agavaa latou tupe maua, atoa ma isi uma aiaiga e mafai ai ona agava’a i latou e faataunuu le nogatupe o talosagaina e i latou mai le faletupe o atina’e. E aofia i lena suesuega, e tatau foi ona latou filifilia se kamupani kamuta ua mae’a laiseneina e latou te fausia le falenofo ua talosaga e fa’atuina.

O le aofaiga o nogatupe o talosagaina e afua mai le $36,000. e oo i le $58,000. Ma le tupe pasene o le initalesi e 2.5% e oo i le 5.0%. O i latou e talia latou talosaga e ao lava ina soifua a’e o tagatanuu moni o Amerika Samoa se’ia oo i e ua maua le nofomau i le malo nei.

Ua fa’ailoa mai e na’o le 75 nogatupe e tatau ona taua’aoina mai le 78 o e ua filifilia mai le se’i.