TALA I VAIFANUA

Pago Pago, AMERIKA SAMOA

TAPENA E TAOFIA PEA A’OGA – FAALETONU PEA LE TAU

Ua nofo tapena pea a’oga ina ia saogalemu le fanau mai feoa’iga i vaitau matagi ma le louloua i le lua aso ua te’a, e aofia ai le tapunia o aoga a le malo, ae maise le tele o aoga tua. 

Ua fa’ailoa mai o lo ua taoto nei i le pasefika i saute uiga tumau o le tau ua va’aia nei i le atu Samoa, ae o lo’o tulata fo’i i tatou i ni uiga loulou a le tau lea ua mataituina pea lava e le tatou Ofisa Va’ai Tau.

O le itula 3:00 i le afiafi o le aso Gafua, ua iloga e le o tau tuumamaina mai uiga louloua ma le timuga o le tau, ma ua toe faia ai lea fa’aiuga e toe taofia loa aoga mo le taeao o le aso ananafi.

O lo’o taoto le vaega louloua lea o le tau i saute i sisifo ma ua oo le malolosi o matagi i le 25knots i le itula ma e oo atu i le 40 knots i le itula le malolosi o matagi to fa’ata’uta’u.

Ua fa’aauau nei lava ona taofia feoaiga i le tai, ma ua fa’amautu pea le poloaiga fa’alaua’itele i matagi malolosi, timuga tetele ma lologa i le atunuu, ma ua fa’ailoa atu fo’i ma lapata’iga o le louloua o le tai ua taofia ai feoa’iga o va’a laiti.

Ua mae’a faamauina le sili atu ma le 3inisi o timuga toulu i Tafuna e afua mai le 12:00 i le vaeluaga o le po se’ia oo i le itula e 3:00 i le afiafi o le aso Gafua.

Ua fa’ailoa mai e le Ofisa Va’ai Tau, ua va’aia e i ai suiga, e ono oo atu i le taeao nei ua suia le tulaga o le tau. E ui la ina louloua le tau ma timuga ma matagi malolosi ae le o taofia ai femalaga’iga i le ea. Ua fa’ataunuu pea lava malaga i Samoa mo i latou e fia talosagaina o latou visas.

Ua fa’ataunuu lava foi malaga i Ta’u ma Fitiuta lea o loo malaga ai foi nisi o le Matagaluega o le Soifua Maloloina e faia polokalama fa’agasolo o le manulauti ia taofia le ulaula tapa’a ma le ma’i suka ina ia faaitiitia.

Mai le aufaigaluega a le Matagaluega o Galuega Lautele ua lipotia mai ai nisi o vaega o le alatele i Fagasa sa latou galulue ai e toe kilia le auala mai la’au ma ma’a i ni sologa sa i ai.

AMATALIA TUIGA O LE COVID I LE MANU’ATELE

O le Aso Gafua lea na fa’atulaga e malaga ai nisi o le Matagaluega o le Soifua Maloloina ina ia fa’ao’o le tuiga o le Covid -19 i le Manu’atele.

Ua faailoa mai ua fa’ataunuuina ma le manuia lea faamoemoe ma ua oo atu nei le vaega ua tofia fa’apitoa mo lea faigamalaga i Ta’u, Fitiuta ma Faleasao i le aso Gafua ma ua fa’atautaia pea se’ia mae’a lea itu o le Manu’atele ona fa’ato’a siitia ai lea o le auaunaga i le Faleluanuu i Ofu ma Olosega.

“O le Motusa latou e faigofie aua e vave lava ona tu’ufa’atasia mai uma ina ia faia tuiga muamua. E fa’ailoa atu loa i le mamalu lautele e o mai uma mo so’o se fa’amoemoe lava o le Malo, e vave lava ona latou fa’atasi mai. O le tuiga fo’i lenei, ua leva ona fa’alogo atu ua amata tui mai tagata lautele i Tutuila, fa’afetai ua vave fo’i ona fa’ao’o mai ia i matou lea galuega alofa ia malu puipuia fo’i i matou toe malaga atu i Tutuila ma fia malaga fo’i i fafo pe a tatala feamalga’iga,” o se tala lea a Rev Lamese Fa’afili i le taimi na faia ai se talanoaga e tusa o le latou polokalama mo le tupulaga talavou a le Faleluanuu ia Fepuari 10, 2021, ina ua logotala o le a oo atu le tuiga ia i latou i le isi vaiaso mulimuli o Fepuari.

Fa’ailoa e le Soifua Maloloina e tusa ma le 900 Tui o le Moderna ua malaga atu nei ma le vaega filifilia latou te fa’atautaia tuiga i le Manu’atele, e tasi le vaiaso e nonofo ai le vaega ua tofia mo lea tuiga i le Manu’atele ona fa’ato’a toe taliu mai lea pe a mae’a ma le tuiga i Ofu ma Olosega.

Peita’I ua fa’aauau pea lava fo’i tuiga uma i Tutuila nei ma ua faia lava i le aso Gafua mo i latou uma e fia faia tui muamua.E ese mai lea aso ua fa’atulaga ma le aso Lulu ma le aso Faraile e fa’asolo ai lava tui nei i le falema’i i Tafuna, e afua mai le itula 8:00 i le taeao se’ia pa’ia le itula e 6:00 i le afiafi.

I le taimi nei ua tula’i mai le aofai o e gasolo atu ile falema’i mo tuiga i le aso e tasi i le 1,100 tagata. Ona o lea to’atele ua manatu ai o le a tatala le isi nofoaga fou mo tuiga o le Covid-19 i le Gov. Rex Lee Auditorium ma e tatala lea nofoaga ia Mati 01, 2021.

O lo ua fuafua lea nofoaga mo i latou uma lava e alaala i le falelima i sasa’e ma le Fagaloa ma nuu tutotonu o le motu o Tutuila.

Ua fa’ailoa mai fo’i, o lo’o mafaufauina fo’i se isi nofoaga i le Falelima i sisifo, ae le’i fa’amautuina atili lena fuafuaga.

Ua mae’a fa’atulaga fo’i le isi vaega o le au fai tuiga o le Covid-19 e asiasi atu i Aiga ina ia faia tuiga mo matua matutua ua faigata ona fe’avea’i ona o manunu’a tumau o le tino ma ua fa’agagau fo’i i latou ua fa’afalenofoia i aiga.

10 TAUSAGA LOKA I LE FALEPUIPUI – ALO O SAMOA I UTAH

O se tasi o tama fanau e tupuga mai Samoam Talalima Toilolo, ua fa’ailoa mai fa’amaonia ona moliga tau fefa’auiuia’iga fa’agaoi o tupe ma toina fa’agaoia ai tupe mai se faletupe tele i Salt Lake City, Utah. O lea faiga fa’agaoi o tupe mai le faletupe ua maua ane ua oo i le $3.8miliona.

Ua le na’o Talalima Toilolo o a’afia i lea soligatulafono, ma e fa’aopoopo i lona fa’aiuga e 10 tausaga e Loka ai i le falepuipui, ua faa’tonuina fo’i e totogia le aotelega e $827,369 ia i latou na latou talaina fa’anana fa’agaoia mai ai nei tupe uma.

E tusa ai ma le fa’amaumauga a le fa’amasinoga i Utah, ua fa’ailoa ai e afua mai ia Iuni 2018 se’ia oo ia Fepuari 2019 na auau fa’atasi ai Talalima Toilolo ma nisi e to’alua, Jonathan Ward ma Monica Nunes e latou fa’afeuiuia’ia tupe e faaaoga ai le ala sa fa’aaoga e Kamupani e toe fa’afo’ia ai totogi o ni oloa ua toe fa’afo’ia mai e tagata sa fa’atauina.

O nei peimeni sa toe totogia e le Kamupani ona ooloa ua toe fa’afo’i mai e tagata fa’atau, fa’atasi ai ma nisi fo’i o mea ua tuuaina ai Kamupani e tatau ona latou toe totogia i tagata. O peimeni na ua le totogia nei i tagata fa’atau, ae ua fa’auia i lenei vaega e to’atolu ua fa’amaonia le latou solitulafono.

O le faiga sa latou toesea mai ai nei peimeni o le ala lea e fa’aaoga ai Cards e totogia ai fa’atauga, e fa’aaoga e faleoloa e fa’atautaia ai peimeni mo fa’atauga a i latou e ona teugatupe ma ua tele o nei fa’atauga e le’I faia ni fa’atauga ae ua tala mai tupe  O ala ua fa’aaogaina ua maualuga tele le tomai ua fa’atautaia ai, ma ua iloga ai ua fa’auia e nei sui totogi o fa’atauga ma isi fo’I peimeni mo oloa toe fa’afo’i i a latou teugatupe, ae o sui na fa’atau ma le kamupani sa fa’atau ai i latou.

Ua fa’ailoa mai ua toeseina mai tupe i teugatupe a i latou na faia fa’atauga, ae leai ni fa’atauga na faia. Oa ua faaalu uma tupe o peimeni o fa’atauga i teugatupe tau fa’asese nei a sui nei e to’atolu ua latou tuu fa’atasia ma ua latou vaetoluina lea mo i latou. O le ali’i Samoa lenei e 44 tausaga le matua.

O le tamaitai o Monica Nunes ua fa’atulaga le lauina le iuga o lona fa’amasinoga ia Mati 18, 2021 ma ma ua faila fo’i e le vaega o fa’amasinoga le suesuega tele i tuuaiga ua molia ai nei le ali’i o Jonathan Ward, lea e to’atolu ai i latou na molia I lenei soligatulafono.

O le ituaiga soligatulafono sili lea ona faigata ona saili ona ua avea fa’amalosia ai fa’amaumauga o le to’atele o tagata fa’atau ma ua avea fo’i mai ala e faigata ona malamalama ai tagata e to’atele.

Ona o tagata e to’atele ua faaaogaina nei ituaiga o fa’atauga nei, ua fa’ailoa mai ua a’afia atu ai ma Sabrina Toilolo ia i latou ua molia, o Sabrina o le afafine lea o Talalima Toilolo. O lea e le’i amatalia suesuega i moliga o Sabrina Toilolo ma Jonathan Ward lea soso’o mai.