TALA I VAIFANUA

Pago Pago, AMERIKA SAMOA

TULAFONO MALAGA LONA LUA AUMAIA AIGA O OPEA I FAFO

Mai le Faigamalo ua tu’uina mai ai lenei fa’asalalauga fa’alaua’itele ina ia nofouta le atunuu i le fuafuaga ua fa’ataoto ai le aiaiga o le isi malaga o lona lua o lo’o soso’o mai mo le mamalu o aiga o opea i fafo ona o le Covid-19.

O mea e ao ina manino atoatoa i ai le atunuu, e afua mai lea i le vave ona lisia lou suafa i le lisi ua i ai lea i le matagaluega o le Soifua Maloloina. Peita’i, ua i ai nei ni lesona ua mafai ona maua mai i le fa’aiuga o le ulua’i malaga ua mae’a faia nei a le tatou malo e toe fa’afo’i mai ai o tatou pelega i aiga.

Ona o lea o le a suesue auililia ai e le malo, le afuaga tonu o lou manatu e te fo’i mai i aiga. Ona o lea o le a fa’aopoopo atili ai nisi o mea e suesueina atili ai lou toe fia taliu mai, poo le a fo’i se aoga i le malo o Amerika Samoa ma ona tagata lautele. O lo ua maua ane le aotelega o le seleni e fa’aaoga i malaga ta’itasi pe a 159 tagata e malaga mai e $2miliona.

O le toe malaga fa’afo’ia mai o tagata i le atunuu, ua taga’i toto’a ai Amerika Samoa i se aoga o lou toe taliu mai i le atunuu, ae ua le fa’aaogaina lea e pei o se avanoa e ao ina toina atu mo nisi e na’o le fia o’o mai i aiga, ona ua taliu mai malaga sa alu atu ai e asiasi. E taugata le fa’atinoga o nei malaga ma ua tatau fo’i ona fa’aalu aoga le seleni mo le toe fa’afo’ia mai o nisi e fa’atino tautua tau tiute o galulue ai i le atunuu, o nisi e mana’omia lava ona oo mai ona o faiva e ao ina toe fa’aauau i galuega a le Malo.

Lea la ua fa’ailoa mai ai, mo le lumana’i o lea lava tautua a le malo ua fa’atulaga ai i latou e malaga mai:

1. Toe fa’afo’ia mai o nisi o le mamalu o le atunuu: E tatau ona fa’ailoa mai se fa’amaoniga e nei sui e fia malaga mai, o i latou e nonofo mau i Amerika Samoa. O le i ai se tinoitupe fa’aagaaga e tatau ona latou totogia mo le nofo va’ava’aia pe a to’ai taunuu mai i Amerika Samoa. O lea tau e $500.mo le tagata e to’atasi, lea ua amata fa’atulaga mo le malaga mai a le va’alele ia Mati 10, 2021. O le fanau e lua tausaga aga’i i le itiiti ifo, o le a le totogia latou pasese. O le a totogia fa’aatoa e le Malo le isi vaega uma o le pili nofova’ava’aia, ma le pili atoa mo fanauiti.

2. Latou sa malaga atu i fafo mo talavai: LBJ ma le Medicaid i a latou gasegase sa auina atu i fafo i malaga fa’apitoa mo talavai, o le a toe avatu fo’i ia i latou le fa’amuamua I lea taumafaiga ona o lo’o alaala tumau lava i latou i Amerika Samoa. O le fa’anaunauga, ia le toe fa’aopoopo atu nisi omiga i lagona ma le popolevale o i latou nei sa auina atu i fafo mo talavai ma toe taliu mai.

3. US Army Faaagaaga: Ua fa’aagaaga 50 nofoa mo le Ofisa o le Kovana i nisi e manatu le fa’auluuluga o le Malo, i nisi latou te manatu ua tatau ona malaga i na avanoa, o nisi o malaga ua alagatatau ona ave i ai le fa’amuamua a le Malo e tusa o mafuaga o le latou fia malaga ese mai le atunuu. O na avanoa o le a talia lava le talosaga i le ofisa o le Kovana.

4. Tamaiti Aoga: O tatou fanau a’oga e fia malaga atu i fafo e fa’aauau a’oa’oga. Ona o nisi o tatou fanau sa fa’amalosia ona tapunia latou Iunivesite ona ua tetele ai a’afiaga o le Covid-19, o lea sa fa’amalosia ai aiga ina ia totogia nofoaga le tumau e nonofo ai i latou ma fa’aauau latou a’oa’oga i laina o feso’ota’iga fa’ainitineti. Ona o le fa’apopolega o aiga mo le latou saogalemu, ma le fefefe o aiga ina ne’i a’afia le fanau i le fa’ama’i leaga tele o le Covid-19, o lea ua fa’atulaga ai lenei vasega o avanoa, e tatau i le fanau ona fa’au’u mai Iunivesite i le tausaga 2020, fa’apea ma i latou olo ua mae’a sauni atu ina ia fa’au’u i lenei tausaga a’oga o lo’o ua toetoe mae’a.

5. Tagata Faigaluega Mo’omia Tele: Soo se faipisinisi lava o lo’o i ai le mana’omia i tulaga o tagata faigaluega o lo’o mana’omia tele ona o agava’a e le lau maua i Amerika Samoa. O nei avanoa faigaluega e tatau ona fa’ailoa patino ai le aoga o lea tautua i le malo ma le aga’i i luma o le atunuu ma ana galuega atia’e. O le a mana’omia fa’amaoniga uma e mafai ona faigaluega ai lea sui i le atunuu, pe a to’ai taunuu. Ia mautinoa e uia muamua e i latou uma nei e ulufale mai i Amerika Samoa le taimi atoa o le nofova’ava’aia. O le a faato’a talia lelei se talosaga mo tagata faigaluega pe afai o le a oo ane le sui e ona le pisinisi o talosaga a latou tagata faigaluega.

6. O isi nofoa uma o le a le fa’aaogaina e le Fa’auluuluga o le Malo mo nisi e malaga atu i fafo ma malaga mai i totonu o le atunuu, o le a fa’asao lea mo le mamalu lautele o nisi e fia malaga atu i fafo pe ulufale mai fafo.

Tagata e malaga tafafao, i latou e fia asiasi i fafo i aiga, i latou e malaga atu i fafo pe malaga mai iinei ae fa’amoemoe e fa’aauau le malaga atu i nisi malo. I latou uma o e fia asiasi mai i matua ma aiga i Amerika Samoa nei. Leai ma ni fagafao o le a maua se avanoa e malaga ai nei malaga uma.

ASO UA FA’ATULAGA MO NISI MALAGA MAI & ULUFAFO ATU I FAFO:

Ua fa’ailoa e le Ofisa o le Kovana malaga ua foufou ina ia faia i masina ta’itasi ina ia mautinoa o tulaga lelei le tupe e fa’atino ai, ae maise ai ma nofoaga e nofoia e i latou e malaga mai i totonu mo nofova’ava’aia mo le 14 aso. 

O malaga faatulaga nei: Malaga #2  – Aso Lulu, Mati 10; Malaga #3 – Aso Lulu, Aperila 15; Malaga #4 – Aso Lulu, Me 12; Malaga #5 – Aso Lulu, June 16; Malaga #6 – Aso Lulu, Iulai 14.

O fuafuaga uma mo malaga nei o le a toe va’ai toto’a i ai le faigamalo, le komiti fa’afoe o le Covid-19 ma faia ni suiga pe afai e tatau ai. O le a toe taga’i toto’a fo’i i le saoga ole tagata malaga  ma le aofai e totogia e le malo i tulaga o tupe fa’aalu i le tausiga o tagata malaga i nofova’ava’aia ma le pasese fo’i. E tauau e le tutusa uma tupe fa’aalu ma saoga e totogia e i latou e malaga mai ma malaga atu i malaga ta’itasi uma nei.

O lea la ua mae’a le ulua’i malaga sa fa’ata’ita’ia ai ona maua a’ia’i fa’amaumauga o pili totogia ma ua i ai fo’i la lesona lelei ua maua mai ai  ina ia va’ai toto’a i ai le ta’ita’iga mo isi a tatou malaga o mulimuli mai.

O isi mea uma e aofia ai le nofoaga i mea’ai ma isi tautua eseese sa tausia ai le aumalaga ma le va’ava’aiga malu a foma’i ma le saoga e fa’aatoa ai le totogi o le nofoaga na nofova’ava’aia ai, o se vaega lea ua totogia e le Malo.

Peita’i ina ua mae’a nei ona va’ai toto’a I le aotelega o le tausiga lelei ma le totogia o le va’alele e malaga fa’apitoa mai ai aumalaga toe fa’afo’isia mai o tatou tagata nuu i fanua ma aiga, ua matau atu e le lava le fa’asoa a le malo mo lea fa’amoemoe. Ona ua mautinoa lea tulaga, ua faia le fa’aiuga, e tatau ona faia saoga mai le aumalaga e fa’amama avega i le fa’asoa a le malo i aumalaga o lo’o sauni e fa’ataunuu i masina ta’itasi.

Ua fa’ailoa manino e Kovana Lemanu Mauga, “Ina ia mafai ona fa’aauau ona faia mai a latou malaga nei, e mana’omia e le tatou Malo le fesoasoani mai o tatou aumalaga i lona totogia o lea tautua, ina ia fa’amaonia ai le mafai ona faia pea lea tautua.”

“Ua mafai ona maua mai le isi fesoasoani mai le LBJ Tropical Medical Center, ua aapa mai fo’i le Medicaid, ae ua le taitai ona lava.Ina ia mafai ona fesoasoani fo’i i o tatou tagata ua fia toe taliu mai i aiga ma fanua, o lea ua ou fa’atulagaina ai le saoga a le tagata malaga e to’atasi e ta’i $500 e foasoani lea i le fa’atupega e fa’aatoa ai le totogi o le tautuaina o le aumalaga ia mautinoa e le o malaga mai ma le Covid-19.O le fanau e lua tausaga ma laiti ane, ua leai se totogi.”

Ua fesoasoani mai fo’i le Kamupani Va’alele a le Hawaiian Air ina ia latou toe fa’afo’ia uma mai pasese e le’i fa’aaogaina e le mamalu lautele ina ua taofia femalaga’iga i le va ma Hawaii. Ua mafai ona faia lea tulaga i le Ofisa o le Hawaiian Air i le tatou malae va’alele i Tafuna po’o Hawaii fo’i.

Ua fa’afetaia e le Malo le tula’i mai o le Ofisa o le Initeria, ma taua’aoina le $1.6 miliona ina ia fesoasoani i lenei tautua. O le a fa’asolo ona fa’aaogaina le tinoitupe e $300,000 i malaga o le a mua’i faia mai i le atunuu, mai lea fa’atupega.

“O lea tau o le malaga e tasi ua fuafua aga’i i le $300,000. i le malaga e tasi pe afai e 160 tagata e malaga mai ai. O lea foi tau e i’u ina suia i isi malaga o lumana’I, pe afai e suia fo’i le aotelega o le au malaga e malaga mai. O isi loa vaega uma o le tinoitupe o le a fa’aaoga lea mo le malu puipuia o le atunuu femalagai i le nofo va’ava’aia, mea tausami mo le tausiga lelei o le aumalaga mo le 14 aso i le to’ai taunuu mai,” o se tusitusiga lea mai le malo.

“E ui ina o lo’o matau mai o lo’o i ai se  vaega tupe o totoe mai o le CARES Act na toina mai mo Amerika Samoa, ae le taitai ona lava lea mo le aotelega o malaga o lo’o fuafua ina ia fa’ataunuu i lenei tausaga.”

Fa’ailoa e Lutena kovana Talauega Eleasalo Ale, “Ina ua mae’a lenei ulua’I malaga, ua iloga mai e fa’aalu lava e le Malo le tinoitupe e latalata i le $2miliona mo le malaga e tasi. Ua mae’a tula’i mai le Medicaid e totogia muamua le faigamalaga ae le’i fa’atinoa, le malaga lenei ia Fepuari 01, 2021.”

Ona o lea ua atoa nei le 1,800 o i latou ua mae’a lisia o latou suafa i nei malaga o loma, aua o lo’o taga’i toto’a pea i le vasega o e malaga i fafo mo togafitiga ma talavai, le vasega o fanau a’oga ma le aufaigaluega mo’omia a le Malo ma Kamupani Tumaoti, ua alagatatau ai ona fa’atulaga e ta’itasi lava malaga e faia i le masina e tasi. O lo ua mafai ona faia ai femalaga’iga mo tagata faigaluega mo’omia a le atunuu fa’apea fo’i ma le Malo Tele ina ia fa’atautaia pea galuega uma i le teritori.”s

“Pe oo loa ona mae’a lelei uma nei malaga ua fa’atulaga, ona amata feutaga’i loa lea o le Malo ma le Hawaiian Air ina ia faia malaga e pei ona masani ai, ma o le a fa’ataoto mai le fuafuaga e fa’atino ai lea tautua i le va o lea Kamupani va’alele ma le tatou malo. E ao ina mua’i pasia lea fa’atulagaga o faigamalaga masani nei,” o se toe upu lea a Taulauega.